O KISAH RASUL-RASUL 1
1
1 #
Luk. 1:1-4
Teofilus nobobarija,
Tongohi ahibuku madodihiraka magoronaka ngohi tohitararonoka mata-mata wadiaioka deʼ wodotökoka o Yesus ka de Unanga womuläenge wadiai Ai manarama, 2hiädono mawange Unanga iwigoraka o horogail̄e. Unanga wodoauahi o horogail̄e, de ma Jou Madutu ai Womaha makuaha Unanga wohidöaka o himatoko-o himatoko o rasul-rasulika waö iri-irikoka. 3Wowango ipahaino, o wange moruata madekana Unanga mamoi-mamoi womahimatoko de madodagi i iunua Ai rasul-rasulika gënanga Unanga igou-goungu wowango. Onanga iwimäke Unanga, deʼ Unanga watemo dede önanga yadäene sarakia ma Jou Madutu wopareta hokä o Koano. 4#Luk. 24:49 Deʼ maöraha Unanga imatoomu dede önanga, Unanga wohidöaka o pareta nënanga onangika, ”Uha niamal̄a o Yerusalem. Niodamä genangoka hiädono o Ama wohidöaka okia wohijo jäjajioka, enagënanga kahuruono Ngohi tinihingahuoka nginika. 5#Mat. 3:11; Mark. 1:8; Luk. 3:16; Yoh. 1:33 Hababu o Yohanis wo ohiki de o akere, mä o wange muruono nagahi ngini aha iniohiki de ma Jou Madutu ai Womaha.”
O Yesus iwigöraka o horogail̄e
6Maöraha o rasul-rasul gënanga imatoomu de o Yesus, önanga iwileha Unangika, ”Jou, boteka örahanënanga Jou nomau nohi gokokali o Israeloka manyawa manga Pareta?”
7O Yesus wohaluhu, ”Ahi Ama mahirete wohitatapu mawange deʼ maöraha. Borotaua gënanga ngini nihiöriki, hababu gënanga o Ama aihaku. 8#Mat. 28:19; Mark. 16:15; Luk. 24:47-48 Mä ngini aha niamäke o kuaha, nako ma Jou Madutu ai Womaha iböaka nginika. Deʼ ngini aha nidadi o hakihi-hakihi mangale Ngohi o Yerusalemoka, o Yudea ingodumu, o Samariaka, deʼ hiädono o dunia mabatingika.” 9#Mark. 16:19; Luk. 24:50-51 O Yesus wotemo iböto hokogënanga, Unanga iwigöraka o horogail̄e önanga manga lako mahimangoka, deʼ o lobi iwitamunu Unanga önanga manga lolegaka.
10Onanga kaima lega-legahi o dihangil̄e, maöraha o Yesus iwigöraka itodokanino o nyawa yahinoto manga pakeanga magare-garehe imaokoino toönanga manga datekoka. 11”Hei, Galilea manyawa,” o nyawa yahinoto gënanga yätemo, ”yadodoa ngini nima okoil̄edika genangoka nio lega-lega o dihangil̄e? O Yesus ngini niwimäke iwigöraka o horogail̄e gënanga ngini nia himangoka, aha woböaoli de kahoko gënangoli hokä ngini niamäke kangano.”
O Yudas aidagali
12Ipaha o rasul-rasul gënanga yolio o Zaitun ma Doporonoka o Yerusalemika. O Doporonoka gënanga hiädono o Yerusalemika done hokilo moi magurutika. 13#Mat. 10:2-4; Mark. 3:16-19; Luk. 6:14-16 O Yerusalemoka önanga yoiki o tau o ngï önanga imahidodogumu, daha yodoa o kamari il̄oku-l̄okuil̄e. O rasul-rasul gënanga, enagënanga o Petrus deʼ o Yohanis, o Yakobus deʼ o Andreas, o Filipus deʼ o Tomas, o Bartolomeus deʼ o Matius, o Yakobus o Alfeus aingohaka, o Simon o berera ma Gogöana deʼ o Yudas o Yakobus aingohaka; 14hokogenangika mata-mata kao hininga moi imatoomu mangale yohubayanga. Onanga yohubayanga de o ngongoheka yamuruono naga de o ngo Maria o Yesus ngoi ayo, deʼ o Yesus airoriadodoto.
15O wange moiuku, maöraha önanga imatoömuino – naga done ho yaratuhu moi de yamonaoko manyawa yoböaino – o Petrus womaoko mangale wotemo. Unanga wato, 16”Roriadodoto! Okia itulihoka Ma Jou Ai Demo ma Buku magoronaka, gënanga kiani idadi. Mahira de o Daud, ma Jou Madutu ai Womaha ihidödemoka mangale o Yudas, o nyawa iwitotago-tagoko o Yesus gënanga manga tutuda. 17O Yudas ganga tongomi miadodiawo, deʼ unangö iwiirikoka mangale mimanarama mima kinïki dede ngomi.”
(18#Mat. 27:3-8 O Yudas nënanga womamäkeoka ailungunu matonaka aimanarama itotorou mahewaino. Unanga iwiotaka deʼ wohonengoka de aimämata irepaika hiädono aiwariki ihupu mata-mataino. 19Mata-mata o nyawa yogogogere o Yerusalemoka yanako mangale o hali gënanga. Hababu gënanga, önanga manga bahasa magoronaka, önanga ihiromanga o tonaka gënanga o Akeldama, mamangarati ’o Awunu ma Tonaka’.)
20 #
Mzm. 69:26, 109:8 ”Karana o Mazmur ma Buku magoronaka itulihi hokonënanga,
’Mal̄aika o ngï wogogogere idadi kairïdika;
uha o nyawa moiö yogogere magoronaka.’
Naga i tulihö hokonënanga,
’Mal̄aika aimanarama makuruhi yal̄ë o nyawa mahomoa.’
21-22 #
Mat. 3:16; Mark. 1:9, 16:19; Luk. 3:21, 24:51 Hababu gënanga, kiani naga womatëngo womidogo ngomino midadi o hakihi mangale o Yesus wowangokali o honengino. O nyawa gënanga kiani o nyawa womatëngo o nyawa yowöe-wöe manga hidogoronaka mimakokinïki dede ngomi hoko genangika maöraha o Yesus woiki okiaika dede ngomi, ka o Yohanis muläenge woohiki hiädono maöraha o Yesus iwigöraka o horogail̄e ngomi mia hidogoronaka.”
23O nyawa yoböa-böaino genangoka yogahoko o nyawa yahinoto, enagënanga o Yusuf iwihetongö o Barsabas (ünanga iwi hetongo o Yustus), deʼ o Matias. 24-25Daha önanga yohubayanga. Onanga yato, ”Jou, ngona nohiöriki o nyawa mata-mata mangahininga. O Yudas hokä rasul aimanarama itifaka deʼ wohonengoka. Hoʼ nohimatoko ngomino, o nyawa yahinoto nënanga o nagona Jou nairiki laʼ nahidöaka o manarama gënanga iwitagali o Yudas.” 26Iböto gënanga mangaromanga yahinoto gënanga yodiai o undi, daha o undi iotaka o Matiasuku. Hoʼ unanga iwigoraka wodadi o rasul imakinïki de o rasul yangimoi de moi mahomoa.
Currently Selected:
O KISAH RASUL-RASUL 1: TLB
Highlight
Share
Copy
Want to have your highlights saved across all your devices? Sign up or sign in
