O KISAH RASUL-RASUL 2
2
Ma Jou Madutu ai Womaha iböa
1 #
Im. 23:15-21; Ul. 16:9-11 Maöraha o Pentakosta mawange yadonoka, mata-mata o nyawa yongaku-ngaku imatoomu o ngï moioka. 2I todokanino yoihene o ilingi o dihanguku hokä o rato iwuwu. O tau kiaka o nyawa yowöe-wöe gënanga yogogerika, mata-mata iömanga de o ilingi gënanga. 3Daha önanga yamäke o äkiri-o äkiri matero o uku itahe okiaika dika deʼ itangi onangika moi-moi. 4Onanga mata-mata yakuaha ma Jou Madutu ai Womaha, deʼ yomuläenge yotemo-temo de irupa-rupa o demo mahomoa. Onanga yotemo imoteke okia ihidöaka o Womaha gënanga onangika mangale ihidemo.
5Oraha gënanga o Yahudioka manyawa mangangöe, hagala o berera o dunia magilolitino, yogogere jai-jai o Yerusalemoka. Onanga ganga o nyawa iwihingou-ngounu ma Jou Madutu. 6Maöraha yoihene maruruhu gënanga, o nyawa duruhë mangangöe, yoböa imatoomu. Onanga mata-mata yotodokana yoihene o nyawa yongaku-ngaku gënanga yotemo de toönanga moi-moi manga demo. 7De yohëranga de mangahininga yadäene önanga yotemo, ”Koigoungua o nyawa yotemo-temo nënanga mata-mata o Galilea manyawa? 8Sarakia idadi hiädono ngone hoihene önanga yotemo de tongone nanga berera mademo moi-moi? 9Ngone o Partiaino manyawa, o Media, o Elam; o Mesopotamiaino, o Yudea deʼ o Kapadokia; o Pontus deʼ o Asiaino, 10o Frigia deʼ o Pamfiliaino, o Mesirino deʼ o daera-daera Libia itigi de o Kirene; naga ngoneoka o Roma de yaino, 11naga o Yahudi manyawa deʼ naga o hoana de o berera mahomoa yowoha-wohamoka o Yahudioka manga agamaika; nagaö yoböa o Kreta deʼ o Arabino. Ngone mata-mata hoihene önanga yotemo-temo de tongone nanga demo moi-moi mangale o hali ihëra-hëranga wadiai ma Jou Madutu!” 12De yohëranga deʼ manga hininga yadäene önanga mata-mata ima keleha moi de moika, ”Okia mamangarati nënanga?”
13Mä nagaö o nyawa yohohedu. Onanga yotemo, ”See, o nyawa gënanga yadaluku dika!”
O Petrus airiwayati
14Daha ipaha o Petrus womaoko de o rasul yangimoi de moi mahomoa, de watemo o nyawa yowöe-wöeika gënanga. De toünanga aiilingi makuata wotemo, ”Roriadodoto, o Yahudioka manyawa deʼ mata-mata nigögogogere o Yerusalemoka! Ni ihene nihidodiai, hababu o hali nënanga iparalu ngohi tohitararono nginika. 15O nyawa nënanga yädalukua, hokä ngini niatakihiri; hababu örahanënanga ahaö o takoro hiwo o ngorumino. 16Mä nënanga wohi ngahuoka ma Jou Madutu ma Nabi Yoëlika:
17 #
Yl. 2:28-32
Ma Jou Madutu wotemo, ’O öraha mabahaka,
Ngohi aha tadogöpoa Ahi Womaha o nyawa mata-matauku.
Niangoha-ngohaka o nau-nauru deʼ niangoha-ngohaka o ngongoheka aha inihi ngahu nginika o hali-o hali Ngohi tahingahu onangika.
Nia nyawa yogögö aha yamäke o hali-o hali Ngohi tahi matoko onangika.
Nia nyawa yatotimo-timono aha yonänere mangale o nänere Ngohi tahidöaka onangika.
18Ahi gogilaongika ö – yaoa o nau-nauru yaoa o ngoheka –,
aha tadogopoa Ahi Womaha mawangeoka gënanga.
Onanga aha ihingahu o hali-o hali Ngohi tahingahuoka onangika.
19Ngohi aha todiai i hëra-hëranga dakengoka o dihanga mal̄okuoka,
deʼ o hali-o hali kabiahaua nëngoka o duniaoka nënanga;
aha naga o awunu deʼ o uku, o haga deʼ o nofo.
20O wange aha idadi ihühutu,
o mede idadi itökara hokä o awunu
i hira de ma Jou ai Wange o Wange ilamo-amoko deimo mulia gënanga iböa.
21Oraha gënanga, o nyawa imahi böaka ma Jouika
aha yahihälamati.’
22Roriadodoto o Israeloka manyawa! Ni ihene okia ngohi totemo nënanga: o Yesus o Nazaret manyawa gënanga ma Jou Madutu wihidöakoka o manarama mangale ngini riadodoto. Gënanga de madiai duru ihëra-hëranga deʼ o hali-o hali kabiahaua ma Jou Madutu wodiai niahidogoronaka riadodoto de o Yesus gënanga. Mata-mata gënanga riadodoto mahirete nihiorikoka. 23#Mat. 27:35; Mark. 15:24; Luk. 23:33; Yoh. 19:18 Imamoteke wohidatoroka mahirete, ma Jou Madutu waputühoka mangale wihilapahi o Yesus nginika. Deʼ maöraha Unanga iwihilapahi, ngini niwitoma Unanga de niwimal̄aika o nyawa madorou iwisalib Unanga. 24#Mat. 28:5-6; Mark. 16:6; Luk. 24:5 Mä ma Jou Madutu wihiwangookali Unanga o nyawa yohone-honenge manga hidogoronaka. Unanga iwil̄ahiroka o hönenge, mä ma Jou Madutu wihoheoka de wihihupu, hababu koidadiua Unanga iwikuaha o hönenge hokogenangika. 25#Mzm. 16:8-11 Mangale o Yesus nënanga o Daud wotemoka,
’Ngohi timäke ma Jou hokogenangika ahihimangoka;
Unanga wohidatekuku ngohi, hupaya de okia dika ngohi togiwiua.
26Hababu gënanga ahihininga imore-morene,
ahiuru ihidemo o higiriri:
deʼ ahi röehe nënanga aha itamä
irïrïdi o lungunu magoronaka.
27Hababu Ngona namal̄aikaua Ahi jiwa igögogere o nyawa yohone-honenge manga dunia magoronaka.
Ngona nimal̄aikaua anigilaongo wososetia gënanga wowedere womata-mataka.
28Ngona nohihi matokoka ngohino o ngëkomo mameta o ngango madutuika.
Ahi mörene duru kohagiria hababu Ngona naga dede ngohi.’
29Roriadodoto, nihihigumal̄a ngohi totemo tohi totararonika mangale o Daud, tongone nanga tohora gënanga. Unanga wohonengoka deʼ iwi lungunoka; de ai lungunu ka ëna nagahi ngone nanga hidogoronaka hiädono öraha nënanga. 30#Mzm. 132:11; 2Sam. 7:12-13 Ma Jou Madutu wojajioka o Daudika, de makoboto, womatëngo o nyawa o Daud aidifauku aha wigoraka ma Jou Madutu wodadi o koano. Karana o Daud wohiöriki mangale o jaji gënanga deʼ hababu unangö o nabi moi, 31ünanga wohiörikoli okia aha wadiai ma Jou Madutu. Hoʼ unanga wohidödemoka ngaro idadiuahi o Koano Wohihohalamati ma Jou Madutu wohijajioka, aha wowangokali o honengino. O Daud wotemo,
’Unanga iwimal̄aikaua wogogogere o nyawa yohone-honenge manga dunia magoronaka;
Ai röehe aha i dadiua iwedere womata-mataka.’
32O Yesus nenangala ma Jou Madutu wihiwangokali o honengoka. Ngomi mahirete mata-mata miahakihioka o hali gënanga. 33Unanga iwigoraka wogogere o pangkati ikokurutil̄eoka deʼ wihi döaka o kuaha ma Jou Madutuoka, daha watarima ma Jou Madutu Ai Womaha wohijäjajioka o Ama. Deʼ ngini örahanënanga ni ihene deʼ niamäke, ganga o Womaha gënanga Unanga womi dogopoaka ngomino. 34#Mzm. 110:1 O Daud mahirete wodoaua o horogail̄e, mä o Daud wotemo,
’Ma Jou wotemo ahi Jouika:
Nogogeruku Ahi nirakoka,
35hiädono Ngohi tadiai Ani haturu imaponu Ngonaika!ʼ
36Hababu gënanga o Israeloka manyawa mata-mata kiani nihiöriki de magoungu o Yesus ngini niwisaliboka gënanga, o Yesus genangala iwihidadioka ma Jou Madutu wodadi o Jou deʼ o Koano Wohihohalamati!”
37Maöraha o nyawa yowöe-wöe yoihene o hali gënanga, manga hininga duruhe iruae. Daha önanga yoleha o Petrusika deʼ o rasul-rasul mahomoaika, ”Roriadodoto, ngomi kiani midiai okia?”
38O Petrus wohaluhu, ”Nimatoba bötohi nidiai o baradoha. Deʼ kiani ngini moi-moi iniohiki de o Yesus Kristus airomanga, hupaya niabaradoha ihiapongo. Roriadodoto aha niatarima o ngongike ma Jou Madutu ai Womaha, ma Jou Madutuino. 39Hababu ma Jou Madutu wohijajioka gënanga ganga mangale ngini deʼ niadifauku de mangale o nyawa naga manga ngï magogurutika – enagënanga o nyawa mata-mata manga Jou Madutu tongone nanga Jou wa ahoko mangale yoböa Unangika.”
40Hokogënanga o Petrus wahingahu onangika. Deʼ kahangöeohi aidemo mahomoa ünanga wohihimanga onangika laʼ onanga imahitingaka o nyawa madorouino nënanga, kiaka ma Jou Madutu aha wahukumu. 41O nyawa manga ngöe yongaku okia o Petrus wotemo daha önanga yäohiki. Magegetongo o nyawa yongaku-ngaku o wange gënanga idogoli yaribuhu hange. 42O nyawa gënanga de manga hininga magoungu imädotoko hokogenangika o rasul-rasulino, deʼ hokogenangika imatotoömu. Onanga yol̄omo kä imatotoömu de yohubayanga kä imatotoömu.
O nyawa yongaku-ngaku manga wowango madodagi
43Duru mangöe ihëra-hëranga yadiai o rasul-rasul gënanga hiädono o nyawa mata-mata yohëranga deʼ yohawana. 44#Kis. 4:32-35 O nyawa yongaku-ngaku gënanga yorimoi deʼ okia tö önanga, mata-mata önanga yapäke. 45Manga baranga deʼ manga arata to önanga, önanga yahukunu, daha önanga imahikodoku matiwi önanga mata-mata, manga hidogoronaka imoteke manga paralu moi-moi. 46O wange higëtongo önanga hokogenangika imatoömu ma Jou ai Tauoka; önanga yol̄omo kaimatotoömu, manga tau-tauika önanga de manga mörene deʼ manga hininga itipokouku. 47Deʼ onanga hokogenangika iwihigiriri ma Jou Madutu deʼ yaigo o nyawa mata-mata. O wange mahigëtongo manga gegëtongo önanga idogo-dogo, hababu ma Jou wohidöaka onangika hagala o nyawa yahihohalamati.
Currently Selected:
O KISAH RASUL-RASUL 2: TLB
Highlight
Share
Copy
Want to have your highlights saved across all your devices? Sign up or sign in
