O KISAH RASUL-RASUL 3
3
O nyawa wolugu-lugu wihitogumu
1O wange moiuku o Petrus deʼ o Yohanis yoiki ma Jou ai Tauika o takoro hange o bimaoa, enagënanga o hubayanga maöraha. 2Dokengoka o ngorana ma amo-amokoka ihiromanga ”O Ngorana ma Hohailoa”, naga o nyawa womatëngo o nauru wolugu kawo makil̄auinohi. O wange ihigëtongo o nyawa gënanga iwiao dokengika la wogahoko o hadaka o nyawaika yowöwoha-wohama ma Jou ai Tauika. 3Maöraha o nyawa gënanga wämäke o Petrus deʼ o Yohanis yowohama ma Jou ai Tauika, ünanga wogahoko onangika la iwihi döaka okia naga moi unangika. 4Onanga iwitotailako ünanga, aha o Petrus wotemo, ”Nomipulono ngomi!” 5Daha o nyawa gënanga aihininga yodekekete onangika de wonganono aha wamäke okianaga moi onangino. 6Mä o Petrus witemo unangika, ”Ngohi duruhe ahi tiwiö de koiwa. Mä okia naga ngohioka, gënanga aha ngohi tonihidöaka ngonaika: De o Yesus Kristus aikuaha o Nazaret manyawa gënanga, notagi!” 7Daha o Petrus wasö aigiama maniraka o nyawa wolugu-lugu gënanga, deʼ wiriwo ünanga womomiki. Gila-gila ail̄ou o nyawa gënanga deʼ ai pupungu idadi ikuata. 8Daha ünanga womatötubo womaokoil̄e, deʼ womuläenge womadagi wakaika wakaino. Ahao ünanga wowohama ma Jou ai Tauika imakinïki o Petrus deʼ o Yohanis woma dagi de womatotötubo deʼ wihigiriri ma Jou Madutu. 9Mata-mata o nyawa iwimäke ünanga womadagi deʼ wihigögogiriri ma Jou Madutu. 10Daha önanga iwinako ünanga wogaho-gahoko o hadaka, biaha wogogeruku ”O Ngorana ma Hohailoa” ma Jou ai Tauoka. Onanga yohëranga duru deʼ yokiriri yamäke okia idadi unangika.
O Petrus airiwayati ma Jou ai Tau magoronaka
11O nyawa gënanga kahoko genangika dika waninïki o Petrus deʼ o Yohanis. Deʼ maöraha önanga yaruange yadono o löa yahetongo ”O Löa Salomo”, o nyawa mata-mata yoböa imatoomu onangika hababu yokiriri. 12Maöraha o Petrus wamäke o nyawa yowöe-wöe gënanga, ünanga watemo onangika, ”Hei, o Israeloka manyawa, yadodoa Roriadodoto nihëranga o hali nënanga? Yadodoa Roriadodoto nimipulono kangomino? Okia ngini niatobote o nyawa nënanga wakunu womadagi hababu naga o kuaha ngomioka ekola hababu ngomi mimote-moteke ma Jou Madutuika? 13#Kel. 3:15 Ma Jou Madutu iwihohuba-huba o Abraham, o Ishak, o Yakub tongone nanga ete de nanga tohora manga Jou Madutu, ma Jou Madutu gënanga wihimuliaka Ai Gilaongo, enagënanga o Yesus. O Yesus gënanga niwihilapahioka yokokuahaika, deʼ ngini niwi lawani o Pilatus aihimangoka, maöraha o Pilatus womau wihipidili. 14#Mat. 27:15-23; Mark. 15:6-14; Luk. 23:13-23; Yoh. 19:12-15 Unanga aidebi-debini deʼ yaoa, mä ngini niwitila Unanga deʼ niwiributu hupaya o Pilatus wihipidili womatëngo o nyawa wotoma-toma mangale ngini. 15Ngini niwitoma Unanga, enahioko karana Unanga o ngango matiti mangale o nyawa mata-mata. Deʼ ma Jou Madutu wihiwangokali Unanga o honengino. Ngomi miahakihioka mahirete o hali gënanga. 16Ngini niamäkeoka deʼ niahakihi okia idadi de o nyawa wolugu-lugu nënanga. Unanga wokuatoka deʼ wotogumokali karana ünanga wongaku o Yesusika deʼ Ai kuahaika. Karana wingaku o Yesusika o nyawa nënanga wodadi wotumuloaokali niahimangoka ngini mata-mata.
17Roriadodoto! Orahanënanga ngohi tohiöriki okia ngini de niatutuda-tutuda niadiaioka o Yesusika, gënanga ngini niadiai karana ngini nihiorikua okia ngini niadiaioka. 18Deʼ karana gënanga idadioka okia ma Jou Madutu kahuruoninohi wohingahuoka i tilakuru Ai nabi-nabi mata-mata, o Koano Wohihohalamati wohijajioka gënanga kiani wohangihara. 19Hababu gënanga Roriadodoto, nitoba ibötohi nidiai o baradoha deʼ nimakilioro ma Jou Madutuika, hupaya Unanga waëhe niabaradoha. 20Ma Jou aha woböa nginika deʼ ngini aha niamäo o rohani maparakara masanangi. Deʼ ma Jou aha wihuloko o Yesus woböa nginika, karana Unanga wihitatapuoka ma Jou Madutu wodadi o Koano Wohihohalamati mangale ngini. 21Unanga kiani wogogere o horogaka hiädono ma Jou Madutu wohidadi mata-mata mahungi hokä ma Jou Madutu wotemoka Ai nabi-nabika mahiraino. 22#Ul. 18:15, 18 O Musa wotemoka, ’Ma Jou Madutu nia Jou aha wihuloko nginika womatëngo o nabi niahoanino mahirete, hokä Unanga wohihuloko ngohi. Ngini kiani ni ihene mata-mata okia o nabi wahetongo nginika gënanga. 23#Ul. 18:19 O nyawa yagogonua manga hiningaka okia ma nabi wotemoka gënanga, o nyawa gënanga aha yahitingaka ma Jou Madutu aiumatoka deʼ yahibinaha.’ 24O nabi-nabi nagaö ihiadonoka o abari ma Jou Madutuino, muläenge ma Nabi Samueloka deʼ o nabi-nabi mahomoa yoböa maduruino, mata-mata ihingahu mangale örahanënanga. 25#Kej. 22:18 O jaji-o jaji ma Jou Madutuino inihiädono o nabi-nabi gënanga mangale ngini o Roriadodoto. O jaji ma Jou Madutu wadodiai de niaete de niatohora, ma Jou Madutu witemo o Abrahamika hokonënanga, ’Ani difauku Ngohi aha tahi barakati hagala o nyawa o duniaka.’ O jaji gënanga naga mangale nginiö. 26Hababu gënanga ma Jou Madutu wi iriki Ai Gilaongo, daha wihuloko Unanga woböa nginika iholoi ihira, hupaya Unanga winihibarakati ngini. Madodagi Unanga winihibarakati enagënanga wadiai Roriadodoto mata-mata nitoba niawowango madodagi i totorouino.”
Currently Selected:
O KISAH RASUL-RASUL 3: TLB
Highlight
Share
Copy
Want to have your highlights saved across all your devices? Sign up or sign in
