O KELUARAN 1
1
O Israel manyawa yä hangihara o Mesir mabereraka
1 #
Kej. 46:8-27
O Yakub iwihi romangö o Israel, woiki o Mesir ma bereraika deʼ aingoha-ngohaka deʼ toönanga manga tau madol̄a moi-moi. O Yakub aingoha-ngohaka enagënanga:
2o Ruben
o Simeon
o Lewi
o Yehuda
3o Isakhar
o Zebulon
o Benyamin
4o Dan
o Naftali
o Gad
o Asyer.
5O Yakub aidifauku gënanga mata-mata manga ngöe yamori tumidi. O Yusuf wo hiraikaoka o Mesir mabereraka. 6O öraha muruono naga ipahaika o Yusuf deʼ ai riadodoto yo honenge; hoko genangoli imahi kuumuru moi dede ünanga. 7#Kis. 7:17 Mä toönanga manga ngohaka deʼ manga danongo, enagënanga o Israel manyawa, yongohaka deʼ yodanongo duru kamanga ngoë, deʼ önanga manga ngöe yodogo duru itaiti, hiädono o Mesir maberera iomanga deʼ önanga.
8 #
Kis. 7:18
De ipaha o koano mahungi woma tengo wï nako-nakoua o Yusuf wo mulaenge wopareta o Mesir mabereraka. 9Unanga wätemo ai kawahaika, ”O Israel manyawa gënanga duru idadi o bodito ngoneino, karana önanga duru kamanga ngöe, deʼ iholoi yokuata ngaro deʼ ngone. 10#Kis. 7:19 Demo maade o parangi idadi, yakunu idadi önanga imateke rimoi deʼ nanga haturu mangale inä lawani ngone, daha yo piringana yamal̄a o berera nënanga. Ngone kokiani o ngekomo ho lingiri hupaya önanga uha idadi iholoi yowöeoli.” 11Done o Mesir manyawa yä goraka yä goana yatö tailako o Israel manyawa mangale yä hangihara manga wowango deʼ omanarama itotubuho. Onanga yä pakisa ihi goko o Mesir ma koano ai kota o Pitom deʼ o Raamses la manga kia honanga magogo-gono matiti. 12Mä iholoi o Mesir manyawa yätuku, ka idogo yowoë o Israel manyawa manga ngoë, deʼ kaitagi ima higerewoto yamodeke o berera gënanga, hiädono o Mesir manyawa idadi yä modongoka onangika. 13Daha mahayanga deʼ madora koiwa önanga yätuku o Israel manyawa, 14deʼ yadiai toönanga manga wowango ihangihara. Madora de mahayangi koiwa önanga yapakisa yokarajanga itotubuho o tau ma ago-agomo ihi goko deʼ o dumule-dumuleoka.
15De ipaha o Mesir ma koano wä hipareta o ngo Sifra deʼ o ngo Puaika, ma bidan yahinoto yä riwo-riwo o Ibrani ma ngo ngoheka manga ngohaka ima kokil̄au. 16O Mesir ma koano wotemo, ”Maöraha ngini niä riwo o Ibrani ma ngongoheka yongohaka, nio hohininga nënanga: Nako o ngohaka imahi ado-adonino gënanga o nauru, nia hohonengoka ënanga! Nako o ngohaka imahi ado-adonino gënanga o ngoheka nia mal̄aika ënanga iwango.” 17Mä ma bidan yahinoto gënanga onyawa iwi modo-modongo ma Jou Madutuika. Onanga yoluku yadiai ma koano aipareta deʼ yä mal̄aika mata-mata o ngoha-ngohaka o nauru manga gogil̄au yo wango. 18Done ma koano wä ahoko ma bidan yahinoto gënanga deʼ wä leha, ”Yadodoa ho ngini nia mal̄aika o ngoha-ngohaka o nauru yowango?”
19Onanga yohaluhu, ”O Ibranioka ma ngongoheka hokä o Mesir o koua ma ngongoheka. Onanga duru igapanga yongohaka. Ma bidan mo moboa owahi, manga ngohaka ima kil̄auoka.” 20-21Done ma Jou Madutu o bidan-bidan gënanga wahi barakati deʼ wahi döaka de manga ngohaka onangika, karana önanga iwi horomati ma Jou Madutu. Deʼ o Israel manyawa ma kaidogo yö wöe de yokuata. 22#Kis. 7:19 Daha ma koano wohi döaka o pareta nënanga ingodumu ai kawahaika, ”O Ibranioka manyawa manga ngoha-ngohaka o nauru gënanga dahao ima kokil̄auino kokiani yä umo o Nil ma Ngairuku, mä mata-mata manga ngohaka o ngoheka yakunu yä mal̄a ika yo wango.”
Currently Selected:
O KELUARAN 1: TLB
Highlight
Share
Copy
Want to have your highlights saved across all your devices? Sign up or sign in
