O KELUARAN 2
2
O Musa woma kil̄au
1O öraha gënanga o nauru woma tengo o Lewi ai hoanino, wo kawingi deʼ ongoheka moma tengo ka genanginoli ami hoana. 2#Kis. 7:20; Ibr. 11:23 Daha o ngoheka gënanga mongohaka o ngohaka o nauru woma tengo. Maöraha münanga mï make o ngohaka magil̄au gënanga duru kai hailoa, münanga mi iunika o mede hange madekana. 3Mä o ngohaka magil̄au gënanga yakunua iwi iunika i tedekana. Done o ayo gënanga mal̄ë o bongo-bongo ma röehe deʼ madiai moi o karaja, deʼ mohi lapeika deʼ o teri hupaya o akere uha yö ngohama. Ongohaka magil̄au gënanga iwi kelengauku o karaja magoronaka gënanga, daha iwi ao o Nil ma Ngairika deʼ i wi kelengauku o bongo-bongo marubu-rubuoka o ngairi gënanga madatekoka. 4Ngoi hiranga o riaka o ngohaka magil̄au gënanga moma oko ino genangoka dau deʼ hatoli magurutika la mö lega-lega okia aha idadi deʼ ami dodoto gënanga.
5Ma gogiriaka gënanga ma koano ngoi ora moböa. Münanga mo uti o ngairuku mangale moma ohiki, mä o momoholehe imï lö leleani yotagi-tagi o ngairi madatekino. Itodokanino ma koano ngoi ora mamake o karaja gënanga o bongo-bongo mahi dogoronaka, daha munanga momi huloko moma tengo ngomi gilaongo ma l̄ë. 6Maöraha ma koano ngoi ora ma helenga o karaja gënanga, ma make magoronaka naga o ngohaka magil̄au, deʼ o ngohaka ma gil̄au gënanga iari. Ma koano ngoi ora mamao mö dora enangika deʼ motemo, ”Nënanga o Ibrani manyawa manga ngohaka.”
7Daha ngoi hiranga o ngohaka gënanga momi leha ma koano ngoi oraika, ”Kanö modeke Jou Boki ngohi tolingiri o ayo moma tengo o Ibrani manyawa hupaya mahü huhu o ngohaka magil̄au gënanga?”
8”Kayaoa,” ma koano ngoi ora mohaluhu. Done o moholehe gënanga momi ahoko ngomi ayo mahirete. 9Ma koano ngoi ora momi temo ma ayoika gënanga, ”Nao o ngohaka magil̄au gënanga, deʼ nï huhu ünanga mangale ngohi; damä aha ngohi tonï hewa.” Done mao o ngohaka ma gil̄au gënanga deʼ mï huhu. 10#Kis. 7:21 Maöraha o ngohaka magil̄au gënanga hatoli wo lamokoka, ngoi ayo mihi lapahi ünanga ma koano ngoi oraika. Daha ma koano ngoi ora madiai o ngohaka gënanga ami ngohaka paliara. ”Unanga tihi romanga o Musa, hababu o akere magoronaka deʼ ti l̄ë,” ma koano ngoi ora mato.
O Musa wöara o Midian ma tonakika
11 #
Ibr. 11:24
#Kis. 7:23-28 Maöraha o Musa wobaluhoka, ünanga woiki imakamake deʼ ai hoana manyawa. Unanga wä make sarakia önanga yä pakisa ya diai o karajanga madodubuho. Wï make ö o Mesir manyawa woma tengo wi toma o Ibrani manyawa. 12O Musa wotö tailako ai gilolitino, deʼ maöraha ünanga wä make moiua naga iwi tö tailako, wï toma o Mesir manyawa gënanga daha ai mayeti wohi baitoka o dowongiuku. 13Iyarehino mawange o Musa woikoli, daha wä make yahinoto o Ibrani manyawa magogiriaka ima ngamo. ”Yadodoa ho ngona nï gohara ani dodiawo?” O Musa wï leha o nyawa wa howo-howonika gënanga.
14O nyawa gënanga wohaluhu, ”Onagona ini goraka ngona nodadi tongomi mia tutuda deʼ mia hakimi? Boteka ngona nomau nohi toma ngohiö, hokä o Mesir manyawa nï toma-toma gënanga?” Daha o Musa wohawanoka deʼ womapikiri, ”To bodito! Ahi manarama gënanga ihi örikoka.” 15-16#Kis. 7:29; Ibr. 11:27 Maöraha ma koano woihene idadadi gënanga, ünanga wolingiri o akali la wïtoma o Musa. Mä o Musa wopiringana daha wogogere o Midian mabereraka.
O Midianino ma imam, ai romanga o Yitro, aingohaka o ngoheka yatumidi. O wange moiuku, maöraha o Musa magogiriaka wogogeruku womahi tigi-tigika moi o humuika, o Yitro aingoha-ngohaka o moholehe yatumidö yoböa la o akere youiti deʼ yöguhe manga ama ai kabingi deʼ ai duba matika mangongokere mangï uku. 17Mä o aiwani yogoa-goana yamuruono naga yäduhu o ngoha-ngohaka o moholehe gënanga. Daha o Musa waino wariwo önanga deʼ wohiokere toönanga manga aiwani yapopaliara. 18Maöraha önanga yolio toönanga manga ama wä leha, ”Yadodoa ho, o wange nënanga ngini duru itaiti nilio?”
19Onanga yohaluhu, ”Naga o Mesir manyawa womatengo womïriwo ngomi ngarokä aiwani magogoana mahomoa imi ruäe. Inoli ünanga womï riwo o akere womï guiti, deʼ wohiokere tongomi mia aiwani ipopaliara.”
20”Kiaka ünanga öraha nanga?” o Yitro wä leha ai ngoha-ngohakika. ”Yadodoa ho, ngini niwi mal̄aika o nyawa gënanga? Nioiki niwiahoko ünanga wol̄omo kama moi dede ngone.”
21O Musa wö modeke mangale wogogere genangoka. De ipaha o Yitro womihi kawingi ngoi ora ami romanga o ngo Zipora deʼ o Musa. 22O ngo Zipora mongohaka o ngohaka o nauru womatengo. O ngohaka gënanga iwi hiromanga o Gersom, karana o Musa womapikiri, ”Ngohi nenangoka todadi o nyawa o dagi-dagino.”
23De ma tao-taongo ipahaika o Mesir ma koano wohonenge. Mä o Israel manyawa yotaiana karana önanga yadiai hokä o gilaongo, hiädono önanga yopoaka yogahoko o roriwo. Toönanga manga boaka deʼ manga daiana yadono ma Jou Madutuika. 24#Kej. 15:13-14 Ma Jou Madutu woihene manga boaka, deʼ Unanga wöhininga Ai jaji deʼ o Abraham, o Ishak deʼ o Yakub. 25Unanga wämake o Israel manyawa imadiai o gilaongo, done Ünanga waputuhu mangale wäriwo önanga.
Currently Selected:
O KELUARAN 2: TLB
Highlight
Share
Copy
Want to have your highlights saved across all your devices? Sign up or sign in
