O KELUARAN 4
4
Ma Jou Madutu wihi doaka o Musa o kuaha wodiai ihera-heranga
1Daha o Musa wohaluhu ma Jouika, ”Mä sarakia o demo ma ade o Israel manyawa yoluku yongaku deʼ yoluku yahaduli tongohi ahi demo-demo? Okia kokiani ngohi todiai, o demo ma ade önanga yotemo Jou nomahi matokua Ani diri ngohino?”
2Ma Jou wïleha, o Musaika, ”Okia gënanga ani giamoka?” O Musa wohaluhu, ”O diki-diki.”
3Ma Jou wotemo, ”Nohi kaweli gënanga o tonakuku.” O Musa wohi kaweli, daha o diki-diki gënanga ingali imadadi o dodiha deʼ o Musa wopiringana woma kokurutika. 4Ma Jou wïtemo o Musaika, ”Nomahitigi o dodihaka gënanga, deʼ nasö mabikinika.” O Musa womahitigi deʼ watagoko o dodiha gënanga de majapati ingaliokali idadi o diki-diki o Musa ai giamoka. 5Ma Jou wato, ”Nadiai hoko gënanga hupaya o Israel manyawa yongaku Ngohi, ma Jou, manga ete deʼ manga tohora manga Jou Madutu, o Abraham, o Ishak deʼ o Yakub manga Jou Madutu, womahi matokoka Ai diri ngonaika.”
6Ma Jou wïtemoli o Musaika, ”Nohi ngohama ani giama ani bajuika.” O Musa wohimoteke, deʼ maöraha ünanga watauru ai giama wohihupu, ai giama gënanga duru mamagarehe karana yakorona o pado o panyake madorou. 7Daha ma Jou wïtemo, ”Nohi ngohamoli ani giama ani bajuika.” O Musa wadiai hokogënanga, deʼ maöraha ünanga wohihupuoli, ai giama gënanga itogumoka. 8Ma Jou wato, ”Nako önanga yoluku yongaku ngonaika, ekola yamakeoka ihö hera-heranga madodihiraka deʼ koihi goungua, done ihö hera-heranga nënanga aha yadiai önanga yongaku. 9Nako önanga kayolukohi yongaku ngonaika ngaroka yamake oka hinoto ihö hera-heranga nënanga, deʼ önanga yoluku ya haduli ani demo-demo, nal̄ë ma huhutulu o akere o Nil ma Ngairoka deʼ nö guhe o tonakuku. O akere gënanga aha ingali imadadi o awunu.”
10Mä o Musa wotemo, ”Ya Jou, ngohi koigoungua o nyawa yososawaro yotemo-temo yaoa kahuruonino kayaoa o öraha nënanga, ibötino Jou nohi temo ngohino. Ngohi ahi akiri itubuho, totemo itaulu deʼ itaitua.”
11Ma Jou wïtemo unangika, ”O naguna wahi döaka o uru o nyawaika? O naguna wadiai ünanga womou ekola iwi topongono? O naguna wadiai womahi öriki ekola wopiloko? Koigoungua Ngohi, ma Jou? 12Oraha nënanga, nöiki, Ngohi aha tonï riwo ngona no temo-temo deʼ Tonï dotoko okia kokiani ngona nahetongo.”
13Mä o Musa wi baluhu, ”Ngohi togahoko, uha nohi huloko ngohi, ya Jou, nahuloko o nyawa mahomoa.”
14Daha ma Jou wï ngamoka o Musaika deʼ wïtemo, ”Koigoungua ngona deʼ ani riaka ai romanga o Harun? Ngohi tohi öriki ünanga wosawaro wotemo-temo. Igou-goungu ünanga ai dodagi magoronaka nenangino, deʼ ünanga aha wosanangi nima make dede ngona. 15Ni mä ade-ade dede ünanga deʼ nihi ngahu unangika okia kokiani ünanga wotemo. Ngohi aha tinï riwo ngini ini hinoto deʼ tinï dotoko okia kokiani ni temo deʼ nidiai. 16Unanga kokiani wo temo-temo o kawaha manga himangoka deʼ ani romanga wao deʼ ngona woni pulono hokä ma Jou Madutu wa heto-hetongo okia kokiani ünanga wahetongo. 17Nao o diki-diki gënanga, ngona aha nadia ihö hera-heranga deʼ o diki-diki gënanga.”
O Musa woma kilioro o Mesirika
18Genanga deʼ iböto o Musa wolio ai toroa o Yitro ai tauika, deʼ wïtemo unangika, ”Nohihi gumal̄a ngohi toma kilioro o Mesirika la tä legahi tongohi ahi riadodoto deʼ tä tailako boteka önanga ka yowangohi.” O Yitro wïtemo o Musaika, ”Noiki deʼ mahalamati.”
19Maöraha o Musa ka o Midian ma tonakokahi, ma Jou wïtemo unangika, ”Nomakilioro o Mesirika. O nyawa mata-mata yö igo-igo ini toma ngona yohonengoka.” 20Done o Musa womihi garo ngoi hekata deʼ ai ngoha-ngohaka deʼ yahi döa önanga o keledai il̄e daha imä jobo ima ko moteke dede önanga o Mesirika. De ma Jou Aipareta, o Musaö wao ai diki-diki.
21Ma Jou wïtemo o Musaika, ”Ngohi to nihi döakoka ngonaika la nodiai ihö hera-heranga. Hoʼ nako ngona damä noma kilioroka o Mesirika, nadiai hagala ihera-heranga gënanga o Mesir manga koano ai himangoka. Mä Ngohi aha tadiai ünanga ai häeke i togowini, hiädono ünanga woluku wahigumal̄a o Israil manyawa gënanga yöiki. 22Daha nahetongo ma koanoika gënanga Ngohi, ma Jou, tohibehehongo hoko nënanga: ’O Israel ganga ahi ngohaka ma riaka, 23#Kel. 12:29 deʼ ngona Toni hiparetaoka la nohi gumal̄a ahi ngohaka gënanga wöiki, hupaya ünanga wakunu wohi huba Ngohino, mä ngona na tila. Oraha nanga Ngohi aha tï toma ani ngohaka ma riaka.’ ”
24Imä tau-tauoka o ngï moioka o dodagi gënanga ma goronaka, ma Jou waino o Musaino deʼ womau wï toma. 25Ngoi hekata o ngo Zipora, mal̄ë moi o helewo ma doto-doto deʼ matobiki tonauru makai toami ngoha-ngohaka, daha mohi peke o Musa ai l̄ouika. O ngo Zipora mato, ”Ngohino ngona nodadi o awunu marokata.” 26O hali gënanga ma hetongo ima dohanga deʼ o huna o agama madatoro. Done ma Jou idadiua wïtoma o Musa.
27O öraha gënanga ma Jou wïtemo o Harunika, ”Noiki o tonaka ikokakahaika la o Musa nima make.” O Harun wöiki, daha ima make deʼ ai dodoto o l̄oku iTebi-tebinoka deʼ wï ame ünanga. 28O Musa wohi jarita o Harunika mata-mata ma Jou wa hö heto-hetongo unangika maöraha ünanga wï huloko woma kilioro o Mesirika, inoli mangale mata-mata ihö hera-heranga kokiani wadiai. 29De ipaha o Musa deʼ o Harun yöiki o Mesirika deʼ yatoomu o Israeloka manga tutuda mata-mata. 30O Harun wo hiädono onangika hagala wa heto-hetongo ma Jou o Musaika, deʼ o Musa wadiai mata-mata ihera-heranga o nyawa geönanga manga himangoka. 31Done önanga yongaku, deʼ maöraha önanga yoihene ma Jou igou-goungu wä tailakoka o Israel manyawa deʼ wamake hagala toönanga manga huha deʼ manga hangihara, önanga ima rukuku yohuba.
Currently Selected:
O KELUARAN 4: TLB
Highlight
Share
Copy
Want to have your highlights saved across all your devices? Sign up or sign in
