O KEJADIAN 20
20
O Abraham deĘĽ o Abimelekh
1O Abraham womatururu o Mamre mabereraka deʼ o Kanaan matonakika o koreharail̄e idaduoka, deʼ wogogere o Kades deʼ o Syur mahidogoronaka. O öraha muruono naga ipahaika, maöraha ünanga wogogere o Gerar mabereraka, 2#Kej. 12:13, 26:7 ünanga wato ongo Sara ngoihekata gënanga ngoihiranga madodoto. Karana gënanga ma Koano Abimelekh o Gerar mabereraino wähuloko ai huhuloko imi ao o ngo Sara unangika. 3O hutu moiuku ma Jou Madutu womahimatoko Ai diri ma koanoika gënanga o nanere magoronaka, deʼ wïtemo, ”Ngona aha nohonenge, karana ngona nomil̄ëoka ongoheka gënanga; hababu munanga de ami rokatoka.”
4Mä o Abimelekh womihiduuwahi o ngo Sara, done ma koano gënanga wotemo, ”Jou, tahowonua! Boteka Jou aha nohi binaha ngohi deʼ ahiberera deʼ ahihoana manyawa? 5O Abraham mahirete wahetongo ongoheka gënanga ngoihiranga madodoto, deʼ ma ngo heka gënanga mahetongö hoko gënanga. Ngohi tadiaioka ohali gënanga deʼ ahi hininga madol̄a madebi-debini, ho, ngohi tahowonua.”
6Daha ma Jou Madutu wïbaluhu o nanere magoronaka gënanga, ”Itaiti, Ngohi tohiöriki ngona nodiai deʼ anihininga madol̄a madebi-debini. Karana gënanga Ngohi tonitatoko ngona nodiai o baradoha Ngohino, deʼ Tonihigumal̄aua ngona nomisö ongoheka gënanga. 7Mäöraha nanga, nomihigilio münanga amirokatika. Amirokata o nabi moi, deʼ ünanga aha womä niata mangale ngona hupaya ngona nohonengua. Mä nako ngona nomihigilioua, nohohininga ngona deʼ ani kawaha mata-mata aha nihonenge!”
8Yarehino mawange, o ngoru-ngorumino, o Abimelekh wä ahoko mata-mata ai pegawe deʼ wahingahu onangika hagala idödadadi gënanga. Onanga duru yodadi yohawana. 9Ipaha deʼ gënanga o Abimelekh wïahoko o Abraham deʼ wïleha, ”Okia nodiaioka ngomino? Okia ahihowono ngonaika, hiädono ngona noao o bodito nënanga ahidiriuku deʼ ahiparetaika? Igoungu ipatutua nodiai hokähokogënanga ngohino. 10Yadodoa hoʼ ngona nodiai hokogënanga?”
11O Abraham wïbaluhu, ”Ngohi tapikiri, nenangokadau moiua naga o nyawa iwïmodongo ma Jou Madutuika, hiädono ngohi ihitoma o nyawa imi nönahihu ngohi hekata. 12Inoli munanga gënanga itiai ngohi hiranga o dodoto. Ngomi o ama moi, mä o ayo mimahowono; deʼ ipaha ngomi mikawingi. 13Done maöraha ma Jou Madutu wohihuloko ngohi tamal̄a ahiama ai tau deʼ totagi-tagi o berera-berera mahomoaika, ngohi tomitemo ngohi hekatika, ’Nohimatoko anisetia ngohino deʼ nahetongo moi-moi o nyawaika ngohi nënanga aniranga o riaka.’ ”
14Ipaha deʼ gënanga o Abimelekh womihigilio o ngo Sara o Abrahamika, deʼ o öraha gënanga ünanga wihidöakö o gogilaongo o duba deʼ o hapi. 15Ma koano gënanga wïtemo o Abrahamika, ”Nenanga mata-mataika ahi berera; nögogere kiaka ngona nöigo.” 16Daha womi temo ongo Saraika, ”Aniranga o riaka tihidöakoka o tiwi o haaka o ribuhu moi hokä manyonyata igoungu o nyawaika mata-mata ngona igou-goungu nahowonua.”
17-18Ma Jou wodiaioka ongongoheka mata-mata o Abimelekh ai kadatoka koyongohakokua karana idodadadi deʼ ongo Sara, o Abraham ngoihekata gënanga. Daha womä niata ma Jou madutuika, deʼ ma Jou Madutu wahitogumu o Abimelekh, ngoihekata deʼ ai gogilaongo ongo heka, hiädono ongongoheka gënanga yakunu yongohakoli.
Currently Selected:
O KEJADIAN 20: TLB
Highlight
Share
Copy
Want to have your highlights saved across all your devices? Sign up or sign in
