O KEJADIAN 21
21
O Ishak womakil̄au
1Ma Jou womihibarakati o ngo Sara, hokä womi jäjajioka. 2#Ibr. 11:11 Maöraha wohi tötantuoka ma Jou Madutu maöraha o Abraham iwiperekioka, o ngo Sara moroëhe daha mongohaka o nauru womatengo. 3O Abraham wihiromanga o ngohaka gënanga o Ishak; 4#Kej. 17:12; Kis. 7:8 deʼ maöraha o Ishak ai umuru o wange tufange, o Abraham wïhuna imamoteke deʼ ma Jou Madutu Aipareta. 5O Abraham ai umuru o taongo o ratuhu moi maöraha o Ishak woma kil̄au. 6O ngo Sara motemo, ”Ma Jou Madutu wodiaioka ngohi toiete karana tomorene. Moi-moi o nyawa yoihe-ihene o hali nënanga aha yoiete yomorene dede ngohi.” 7Ipaha mödogo, ”O nagona hokakangano yakunu yotemo ahi rokatika ngohi aha o ngohaka tähuhu? Ma ngohi tongohakoka ngarokä ahirokata duru iwiperekioka.”
8O ngohaka gënanga idogo wolamoko, deʼ mawangeoka ünanga wo mulaenge o huhu iwihipidili, o Abraham wodiai o rameanga kohä rame.
O ngo Hagar deʼ o Ismael yä duhu
9O wange moiuku, o Ismael, o Abraham deʼ o ngo Hagar o Mesir mangoheka gënanga manga ngohaka, magogiriaka youle-ule deʼ o Ishak o ngo Sara ami ngohaka. 10#Gal. 4:29-30 O ngo Sara mamake o hali gënanga daha mïtemo o Abrahamika, ”Nomi duhu o gilaongo ngoheka gënanga kamamoi deʼ amingohaka. Yakunua o ngoheka gënanga amingohaka watarima o hidoku anikayaino aha wapopuhaka ahingohaka o Ishak.” 11O Abraham hakali-kali wosanangiua deʼ o gogahoko gënanga, karana o Ismael gangö ka aingohaka. 12#Rm. 9:7; Ibr. 11:18 Mä ma Jou Madutu wïtemo o Abrahamika, ”Uha nohawatere yakorona ngoni gilaongo o ngo Hagar deʼ amingohaka gënanga. Nodomoteke o ngo Sara amimau, karana deʼ madodagi o Ishak ngona aha namake o ngohaka deʼ o danongo Tonihi jäjioka gënanga. 13Hoko genangö o ngo Hagar ami ngohakika aha Tihi döaka manga ngoë o ngohaka deʼ o danongo hupaya önanga yodadi o berera de o hoana. Hababu unangö aningohaka.”
14Yarehino mawange o ngoru-ngorumino, o Abraham womihi döaka o ngo Hagarika o inomo de o akere mangiuku moi, mangale manga bilaono o ngekomika. Unanga womihitai o ngohaka gënanga o ngo Hagar ami poretiha, deʼ womihuloko o ngoheka gënanga moiki. Daha o ngo Hagar momä jobo deʼ motagi-tagi o Bersyeba matonaka ikokakahaoka. 15Maöraha manga bilaono o akere imata, o ngo Hagar mïkelenga amingohaka omomo marubu-rubu matimioka, 16daha mogogeruku done hoʼ metere o ratuhu moika deʼ o ngï gënanga. Motemo ami hiningaka, ”Ngohi tataanua tïmake ahingohaka wohonenge.” Daha munanga moari.
17Ma Jou Madutu woihene o Ismael ai ilingi, deʼ ma Jou Madutu Ai malaekat o dihangoka deʼ wotemo o ngo Hagarika, wato, ”Okia ngona nomahuha, Hagar? Uha nohawana. Ma Jou Madutu woihenoka aningohaka ai ilingi. 18Noiki ani ngohakika, nïgoraka deʼ nihidodiai ünanga. Ngohi aha tahidadi aingohaka deʼ ai danongo o berera deʼ o hoana ma ago-agomo.” 19Daha ma Jou Madutu wadiai o ngo Hagar motailako deʼ madiai, hiädono münanga mamake moi o humu. Done munanga moiki aha möguhe o akere mangïuku, ipaha mihi döaka amingohaka waokere.
20Ma Jou Madutu witomoteke o Ismael. O ngohaka gënanga i dogo wolamoko; ünanga wogogere o Paran matonaka ikokakahaka, deʼ wodadi yolimo-limoro yososawaro. 21Ngoi ayo mihi kawingi ünanga deʼ o Mesir mangoheka momatengo.
O Abraham deĘĽ o Abimelekh manga jaji
22 #
Kej. 26:26
O öraha gënanga ma koano Abimelekh deʼ o Pikhol, aitentara manga haeke, yaino o Abrahamino deʼ yotemo, ”Ma Jou Madutu wonïriwo ngona hagala moi-moi ngona nadodiai magoronaka. 23Hababu gënanga nokoboto nenangokadau ma Jou Madutu Ai himangoka ngona aha nodiaiua iadi-adilua ngohino, kayaoa ahingoha-ngohakika, ekola ahidifauku. Hoka ngohi tonihihininga maoaka ngonaika, nodiaiö hoko gënanga ngohino deʼ o bereraika ngona nö gogogere nënanga.”
24O Abraham wotemo, ”Ngohi tokoboto.”
25Mä ipahaika o Abraham wïtoduba o Abimelekh mangale moi o humu yaora-oraoka ma koano ai gogilaongo gënanga. 26O Abimelekh wïtemo, ”Ngohi tohiorikua o nagona yoiaioka. Komaiwahi ngona nahetongo ngohino, deʼ nënanga madodihiraka ngohi toihene o hali gënanga.” 27Daha o Abraham wohidöaka mangoë o duba deʼ o hapi o Abimelekhika, deʼ o nyawa yahinoto gënanga yodiai o jaji. 28O Abraham watingaka tumidi o duba mangohaka ai duba matikaino, 29deʼ o Abimelekh wïleha unangika, ”Yadodoa hoʼ ngona no diai o hali gënanga?”
30O Abraham wïbaluhu, ”Natarima tumidi o duba mangohaka nënanga hokä o nonako Tuanga nohigoungu ngohi tohaitoka o humu nënanga.” 31De hoko gënanga o ngï gënanga ihi romanga o Bersyeba, karana genangokadau o nyawa yahinoto gënanga yahetongo manga koboto.
32Ibötoönanga yadiai manga jaji o Bersyebaka, o Abimelekh deʼ o Pikhol imakilioro o Filistin manyawa manga bereraika. 33Daha o Abraham wodatomo o tamariska magota o utu moi o Bersyebaka, deʼ mulaenge deʼ gënanga o ngï gënanga yapake mangale iwi huba ma Jou, ma Jou Madutu wokokakali. 34Iböto deʼ gënanga o Abraham wogogere hatoli itedekana o Filistin manyawa manga bereraka.
Currently Selected:
O KEJADIAN 21: TLB
Highlight
Share
Copy
Want to have your highlights saved across all your devices? Sign up or sign in
