O KEJADIAN 35
35
O Yakub de ai doomu yoiki o Betelika
1 #
Kej. 28:11-17
O wange moiuku ma Jou Madutu wïtemo o Yakubika, ”Ngohi ma Jou Madutu tomahimö mato-matoko Ahi diri ngonaika maöraha ngona aniriakoka o Esau de nopiringana. Tai-taiti noiki o Betelika. Nogogere genangokadau deʼ nohigoko o huhuba mangï o gahumu moi mangale Ngohi.”
2-3Daha o Yakub wätemo ai tau madol̄aika deʼ mata-mataika o nyawa naga kamamoi dede ünanga, ”Ngone aha nenangoka de homäjobo deʼ hoiki o Betelika. Genangokadau ngohi aha tohigoko o huhuba mangï toma Jou Madutu wohiriwo-riwoka ahihuha de o hangihara maörahoka deʼ wohigoanoka ngohi kiaika dika ngohi toiki. Ho niaumo hagala o gikiri maporetino madulada naga nginioka; nidiai o röehe madebini imoteke madatoro deʼ niapake o pakeanga madebi-debini.” 4Daha önanga ihidöaka o Yakubika mata-mata o gikiri ma poretino madulada naga onangoka deʼ to onaö manga ngati-ngati. Mata-mata o baranga gënanga o Yakub wadatomo o gota ma ago-agomo matimiuku o Sikhem makota madatekoka.
5Maöraha o Yakub deʼ ai tau madol̄a madoomu imä jobo, ma Jou Madutu wätamunu yogögogere hagala o kota magilolitino de o modongo mamamao, hiädono önanga yakinïkua nao Yakub deʼ ai doomu. 6Daha önanga imahiädono o Kanaan matonakoka o Betel makotaka mahira maromanga o Lus. 7Genangokadau o Yakub wohi goko o huhuba mangï deʼ wohiromanga o ngï gënanga ”O El-Betel”, karana ma Jou Madutu womahi matokoka Ai diri unangika genangokadau maöraha ünanga ai riakoka de wopiringana. 8Dokengokaö o ngo Debora, momïlöleleani o ngo Ribka, mohonenge daha imilungunu o gota ma ago-agomo matimiuku o kotaka gënanga o korehara il̄e idaduoka. Gënanga mahababu o gota gënanga wohiromanga ”O Gari magota mautu”.
Ma Jou Madutu wihibarakati o Yakub o Beteloka
9O Yakub womakilioro o Mesopotamiaino de ipaha, ma Jou Madutu womahi matokoli Ai diri unangika deʼ wihibarakati. 10#Kej. 32:28 Ma Jou Madutu wïtemo unangika, ”Ngona aha inihetongokauaoli o Yakub, mä o Israel.” Hoko gënanga ma Jou Madutu wihiromanga ünanga o Israel. 11#Kej. 17:4-8 Daha ma Jou Madutu wotemoli, ”Ngohi ma Jou Madutu Toko Kuaha. Kokiani ngona de aningohaka de ani danongo ka manga ngöe! Ngona aha nohi guti hagala o berera de o hoana deʼ no dadi o kokoano manga ete de manga tohora. 12O berera tahi döa-döakoka o Abraham deʼ o Ishakika, aha toni hidöaka ngonaika deʼ aningohaka de anidanongika.” 13De iböto gënanga ma Jou Madutu wimal̄a o Yakub. 14#Kej. 28:18-19 O ngï ma Jou Madutu witemo-temo o Yakubika, ünanga wohigoko moi o hohininga mahelewo. Daha o helewo gënanga wohihuba ma Jou Madutuika de woguhe o angguru deʼ o zaitun maminya mal̄okuku. 15O ngï gënanga wohiromanga ”O Betel”.
O ngo Rahel mohonenge
16De iböto gënanga o Yakub deʼ ai doomu yamal̄a o Betel. Maöraha önanga kamanga gurutikaohi de o Efrata o ngo Rahel ami öraha imahi ädono la ami ngohaka ima kil̄au. Mä ami ngohaka ihuha ima kil̄au. 17Maöraha mohiri duru ikiriaka, mabidan momitemo, ”Ani hininga iamoko, Rahel, aningohaka o nauroli.” 18Mä o ngo Rahel ami ajali itigioka, deʼ maöraha münanga momau mowomaha mohibobaha, mihi romanga o ngohaka gënanga o Ben-Oni mä ai ama wihi romanga o Benyamin.
19O ngo Rahel mohonenge de ipaha, münanga imilungunu o ngekomo madatekoka yodumu-dumutu o Efrataika, öraha nanga ma romanga o Betlehem. 20O Yakub wohigoko o hohininga mahelewo o gahumu moi genangokadau, deʼ hiädono o öraha nënanga ma o ngo Rahel amijere kayanonakoikahi de o helewo gënanga. 21De iböto gënanga o Yakub wohigila-gila ai dodagi, daha wohigoko ai tau-tau o ngï moioka yatio o Eder macandi. 22#Kej. 49:4 Magogiriaka önanga naga o ngïoka gënanga o Ruben womä idu de o ngo Bilha, ai ama ngoihekata paliara. O hali gënanga o Yakub woihene, deʼ ünanga duru wongamo.
O Yakub ai ngoha-ngohaka
(1Taw. 2:1-2)
O Yakub aingohaka o nauru yangimoi de yahinoto. 23O ngo Lea ami ngoha-ngohaka ganga o Ruben (o Yakub aingohaka mariaka); o Simeon, o Lewi, o Yehuda, o Isakhar deʼ o Zebulon. 24O ngo Rahel ami ngoha-ngohaka ganga o Yusuf deʼ o Benyamin. 25O ngo Bilha ami ngoha-ngohaka, o ngo Rahel ngomi gilaongo ganga o Dan inoli o Naftali. 26O ngo Zilpa ami ngoha-ngohaka, o ngo Lea ngomi gilaongo ganga o Gad deʼ o Asyer. O ngoha-ngohaka gënanga imakil̄au o Mesopotamiaoka.
O Ishak wohonenge
27 #
Kej. 13:18
De o Yakub womahiädono ai amaika o Ishak, wogögogeroka o Mamre mabereraka o Hebron madatekoka. (Ma hira ai ete o Abrahamö wogogere dokengoka.) 28-29Ai umuru duru iwiperekioka, enagënanga o taongo o ratuhu moi de mori tufange, o Ishak wohonenge de o Esau deʼ o Yakub aingoha-ngohaka iwilungunu.
Currently Selected:
O KEJADIAN 35: TLB
Highlight
Share
Copy
Want to have your highlights saved across all your devices? Sign up or sign in
