O KEJADIAN 38
38
O Yehuda deʼ o ngo Tamar
1Mudukua o öraha gënanga o Yehuda wämal̄a ai roriadodoto deʼ wogogere de o Hira, o nauru womatengo ai ahali o Adulam makotaino. 2Genangokadau o Yehuda imanako de o Kanaan mamoholehe momatengo, o Sua ngoi ora, daha önanga yokawingi. 3Manga ngohaka madodihiraka o nauru ai ama wihiromanga o Er. 4Manga ngohaka mahinotoka, o nauroli, iwihi romanga o Onan. 5Manga ngohaka mahangeoka makao nauroli, deʼ iwihiromanga o Syela. Maöraha o Syela woma kil̄au o Yehuda naga o Kezib mabereraka.
6O Yehuda wihikawingi o Er aingohaka mariaka de o ngo Tamar. 7O Er ai kalakuanga duru itorou, hiädono ma Jou wïngamo unangika deʼ wïtoma. 8Daha o Yehuda wïtemo o Onanika o Er ai dodoto, ”Noiki aniriaka ngoi faoika, de nomäidu dede muna. Nohi totomo okia kokiani nodiai munangika, hababu ngona amirokata ai dodoto; de hokogënanga aniriaka yakunua wamake o ngohaka de o danongo.” 9Mä o Onan wohiöriki ai ngoha-ngohaka done aha koyo dadiua touna madutu. Ho imaröehemoi wohigeto-getongo de ai riaka ngoi fao gënanga, wamal̄aika ai akere ipoa maporetuku hupaya ai riaka aha kowamakeua o ngohaka de o danongo. 10O manarama gënanga yadiai ma Jou wongamo, deʼ ma Jou wïtoma unangö. 11Ipaha o Yehuda womitemo o ngo Tamarika ngoi mol̄oka gënanga, ”Nolio ani dimono manga tauika deʼ nogogere genangokadau hokä o babao hiädono ahingohaka o Syela idadi wolamoko.” Unanga wotemo hoko gënanga karana wömodongo uha-uha o Syela aha ma Jou witomali, hokä ai riaka yahinoto. Done o ngo Tamar molio ami dimono manga tauika.
12O öraha muruononaga ipahaika o Yehuda ngoihekata mohonenge. De imataka maöraha wapake o huha de o duka mapakeanga, o Yehuda wihigaro ai dodiawo o Hira o Adulam makotaino gënanga, yoiki o Timna mabereraika, o duba magogo yaguti-guti mangï. 13O ngo Tamar moihene o abari amidunungu o Yehuda aha waino o Timna mabereraino la yoguti ai duba magogo. 14Done muna matururu amibabao mapakeanga de o pakeanga mahomoa. Ami biono matamunu de o kokudu, daha muna mogogeruku o Enaim makota mangorana ma amokoka magogere o ngekomoka yödumutu o Timnaika. O ngo Tamar mohiöriki itiai o Syela, o Yehuda aingohaka madodoto makiditoko, wolamokoka, mamunanga kowahiohi imihi kawingi de o goduru gënanga.
15Maöraha o Yehuda womimake o ngo Tamar, watobote o ngoheka gënanga momatengo o huhutu maninïki, karana ami biono de madadamunoka. 16Daha o Yehuda womahitigi-tigika o ngekomo madatekoka gënanga de womitemo, ”Okia moi nogahoko?” Unanga wohiörikua o ngoheka gënanga ngoihunungu mahirete.
O ngo Tamar mohaluhu, ”Damä de ngona Tuanga.”
17O Yehuda womitemoli, ”Ngohi aha tonihidöaka ngonaika o kabingi magö o dutu moi.”
O ngo Tamar mohaluhu, ”Kaidadi itiyakunu naga de madodanu, hiädono Tuanga nohidingoto o kabingi gënanga.”
18”Madodanu okia?” o Yehuda woleha.
O ngo Tamar mohaluhu, ”Nohidöaka ngohino Tuanga ani cap de maguminoka deʼ anidiki-dikiö naga ngonaka gënanga Tuanga.” O Yehuda wohidöaka o bara-baranga gënanga munangika, daha önanga imaröehemoi, deʼ o ngo Tamar moröehoka. 19O ngo Tamar molio amitauika deʼ mahuputu o ngöere amibiono madadamunu, daha momahi pakeoli ami babao mapakeanga.
20O öraha muruono naga ipahaika o Yehuda wïhuloko ai dodiawo, o Hira la wototaka o kabingi gënanga deʼ wögahoko obara-baranga wohidöa-döakoka hokä o dodanu mohigilio, ma o Hira womimakeua o ngoheka gënanga. 21O Hira woleha-leha hagala o nyawaika o Enaim mabereraka, ”Kiakamaika mangoheka o huhutu mani nïki biaha moto tamä o ngekomo madatekoka nënanga?”
”Komaiwa naga nenangoka o ngoheka o huhutu yaninïki,” önanga yohaluhu.
22Daha o Hira womakilioro o Yehudaika deʼ wïtemo, ”Ngohi tomimakeua mangoheka gënanga. I moteke dokengoka manyawa komaiwa naga o ngoheka o huhutu yaninïki genangoka.”
23O Yehuda wato, ”Mal̄aika o bara-baranga gënanga tomunangoka, iti yakunu ngone hamakeua o mal̄eke. Ngohi tohidailakoka la tafangu, mangona nomimakeua munanga.”
24Doneho o mede hange ipahaika o Yehuda woihene o abari o ngo Tamar ngoihunungu momadiaioka hokä o ngoheka o huhutu yaninïki deʼ moröehoka.
Daha o Yehuda wahi pareta, ”Nimil̄ë münanga deʼ nimituhuku hiädono mohonenge!”
25Magogiriaka o ngo Tamar imiao imihihupu, münanga mohibehehongo amidunungika, mato, ”Ngohi wohiröehoka manyawa o bara-baranga nënanga madutu. Niatailako o naguna o cap madutu de magumini deʼ o diki-diki nënanga.”
26O Yehuda wanako o bara-baranga gënanga deʼ wotemo, ”O ngoheka gënanga komahowonua. Ngohi taganapuua okianaga kiani tadodiai munangika; kokiani ngohi tomihikawingi münanga de tongohi ahingohaka o Syela.” O Yehuda komaiwaka ima röehemoi deʼ o ngo Tamar.
27Ami öraha yadonoka o ngo Tamar ami ngohaka imahiädono, i nyata tomuna ami ngohaka ihago. 28Magogiriaka amingohaka ima kil̄au, moi ani ongohaka magil̄au i hago-hago gënanga magiama ihihupu, de mabidan masö o ngohaka gënanga magiama deʼ maliko de olawe madoka-dokara. Mato, ”O ngohaka nënanga imakil̄au ihira.” 29Mä o ngohaka magil̄au gënanga yatauru magiama higilio, deʼ o ngohaka magil̄au moi hongoli imakil̄au iholoi ihira. Ipaha ma bidan motemo, ”Ho hokogënanga madodagi nomahititila nohupu!” Done o ngohaka imakokil̄au iholoi i hiraino gënanga mihi romanga o Peres. 30De ipaha gënanga dahao ai dodotoli womakil̄au ai giamoka naga olawe madoka-dokara. Unanga iwihi romanga o Zerah.
Currently Selected:
O KEJADIAN 38: TLB
Highlight
Share
Copy
Want to have your highlights saved across all your devices? Sign up or sign in
