O KEJADIAN 37
37
O Yusuf deʼ ai roriadodoto
1O yakub wogogere o Kanaan mabereraka, o ngï wogögogere ai ama, 2deʼ nënanga o Yakub ai tau madol̄a manga jarita:
Maöraha o Yusuf, o Yakub aingohaka ai umuru o taongo ngimoi de tumidi, ünanga wohidailako manga kabingi de manga duba matika imakinïki de ai ria-riaka, enagënanga o ngo Bilha deʼ o ngo Zilpa manga ngoha-ngohaka, yahinotö ai ama ai hekata paliara. Unanga wohi ngahu-ngahu ai amaika o manarama itotorou ai ria-riaka yadodiai.
3O Yakub iholoi wïhayangi o Yusufika ngaro de ai ngoha-ngohaka mahomoa, karana o Yusuf womakil̄au maöraha ai ama iwi perekioka. O wange moiuku wadiai to Yusuf ai juba moi duru mahohailoa. 4O Yusuf ai ria-riaka yamakeoka manga ama iholoi wïhayanga o Yusufika ngaro de onangika, önanga iwïdohata o Yusufika, hiädono yolukoka imaketemo ihidodiai dede unanga.
5O hutu moiuku o Yusuf wonanere, deʼ maöraha ünanga wohi jarita ai nanere gënanga ai ria-riakika, kaidogo önanga iwïdohata unangika. 6Nënanga o Yusuf wahöheto-hetongo onangika, ”Abeika niihene! 7Ngohi tonanere ngone mata-mata o dumuleoka magogiria o gandum magogobe holiko, daha tongohi ahi gandum imaoko imatotiail̄e. Tingini niagogobe ihigilolitino tongohi ahi gogobe daha yahuba enangika.”
8”Natobote ngona aha nodadi o koano deʼ nomï kuaha ngomi?” ai ria-riaka iwi hidaaere. Daha önanga kaidogo iwïdohata unangika karana ai nanere deʼ karana okia wahö heto-hetongo.
9Ipaha o Yusuf wonaneroli, deʼ ünanga wahetongo ai ria-riakika, ”Ngohi tonaneroli, ngohi tamake o wange malako, o mede deʼ o murumu ngimoi de moi yatilabukuku ngohino.”
10O nanere gënanga wohiade-adeoli ai amaika, deʼ ai ama wihidaaere, wato, ”O nanere okia gënanga? Nato bote ngohi, ngoni ayo deʼ aniroriadodoto aha miaino deʼ miatilabukuku mihuba ngonaika?” 11#Kis. 7:9 O Yusuf ai ria-riaka manga hininga i sanangiua unangika, ma ai ama itatapu wapikiri o nanere gënanga.
O Yusuf iwi hukunu deʼ iwi ao o Mesirika
12O wange moiuku maöraha o Yusuf ai ria-riaka yoiki o Sikhemika la yogoana manga ama ai kabingi de ai duba matika, 13o Yakub wïtemo o Yusufika, ”Noiki o Sikhemika, aniria-riaka manga ngï ika yogoana nanga kabingi de nanga duba matika.” O Yusuf wohaluhu, ”Kayaoa, Baba.”
14Ai ama wïtemo, ”Nö lega sarakia onanaga ani ria-riaka deʼ nanga kabingi de nanga duba matika, daha nomakilioro la nohi ngahu ngohino.” Done wihigumal̄a o Yusuf woiki wamal̄a o Hebron ma Wai.
Ipahaika itedekanua o Yusuf womahiädono o Sikhemoka. 15Magogiriaka ünanga wotagi wakaika wakaino o tonaka i lua-luasoka, ima make de womatengo o nauru wïleha unangika, ”Okia ngona nolingiri?”
16”Ahiria-riaka. Önanga magogiria yogoana o kabingi de o duba matika,” o Yusuf wïbaluhu, ”Bapa nohi öriki kiaka önanga naga yaika?”
17O nyawa gënanga wato, ”Önanga nenangoka de imäjoboka. Ngohi toihene ona yatoönanga aha yoiki o Dotanika.” Daha o Yusuf womäjobo wänïki ai ria-riaka deʼ wamake önanga o Dotanoka.
18Ma gurutikahi önanga iwimake o Yusuf, deʼ ünanga womahi adonowahi onangika, önanga yohininga moi mangale iwitoma. 19Önanga imaketemo moi de moika, ”Nimä legahi, biaha wonä nanere gënanga waino. 20Ika ngone hïtoma ünanga de o hikaweli ai mayeti o humu madü dudunguku. Dahaö ngone hahetongo ünanga iwigolioka o aiwani madorou. Ngone ahaö hamake sarakia idadi ai nanere gënanga.”
21O Ruben woihene önanga ihidödailakoka gënanga, daha ünanga wohidailako wodiai la wï hihalamati o Yusuf. ”Uha niwi toma,” wätemo. 22”Ngone hïhikaweli dika o humu magoronauku o tonaka i kokakahaka nënanga, mä uha ngone hïgohara ekola hï l̄abo.” O hali gënanga wahetongo karana ünanga ai dumutu wïhihalamati o Yusuf deʼ wï huloko ünanga wolio o tauika. 23Maöraha o Yusuf womahiädono ai ria-riakika, de makuata önanga yahuputu o Yusuf ai juba duru mahöhailoa gënanga. 24Daha önanga iwi tatauru deʼ iwi hikaweli o humu madüdudungu magoronauku.
25Maöraha önanga magogiriaka yol̄omo, itodokanino önanga yämake o Ismael manyawa de manga onta maduduono magogiria manga dodagi magoronaka o Gilead de o Mesirika. Toönanga manga onta-onta magina o rampa-rampa deʼ o kismis. 26Daha o Yehuda wätemo ai riadodotika, ”Okia mafaidä hïtoma nanga dodoto deʼ kahagögogono o doma gënanga? 27Niaino ngone hïhukunu o Ismael manyawaika gënanga. Ngaro uha ngone hodiai una wohiri. Sarakiaö maünanga tongone nanga dodoto mahirete.” Ai roriadodoto yö modeke, 28#Kis. 7:9 deʼ maöraha yä muruono naga o Midian manyawa imahöhuku-hukunu yakaino, o Yusuf ai ria-riaka iwihihupu o humu il̄e gënanga daha önanga iwi hukunu o Ismael manyawaika gënanga de ai ija o tiwi haaka monaoko. Ipaha imahöhuku-hukunu gënanga iwi ao ünanga o Mesirika.
29Maöraha o Ruben womakilioro o humuino gënanga deʼ wïmakeua o Yusuf genangoka, wakakihi ai pakeanga karana ai hininga ihuha. 30Unanga womakilioro ai riadodotika deʼ watemo, ”O ngohaka gënanga koiwiwaka genangoka! Okia kokiani ngohi todiai öraha nanga?”
31Daha önanga yatoaka okabingi o dutu moi deʼ o Yusuf ai juba yatono o kabingi ma awunuku gënanga. 32Ipaha ojuba gënanga önanga yohuloko yototaka manga amaika de mabehehongo, ”O juba nënanga ngomi miamake. Nënanga madutu toani ngohaka Baba?”
33O Yakub wanako o juba gënanga, daha wotemo, ”Itiai, nënanga ahingohaka ai juba! Maraioka ünanga iwigolioka o aiwani madorou. Adedë, o Yusuf ahingohaka wohonengoka o aiwani gënanga iwi kakakihi!” 34O Yakub wakakihi ai pakeanga karana ai hininga mahuha deʼ wapake o huha de o duka mapakeanga. O wange muruonino madekana ünanga wïdodora aingohaka gënanga. 35Mata-mata ai ngoha-ngohaka kayaoa o nauru kayaoa o ngoheka yaino iwil̄aru, ma ünanga woluku iwi l̄aru. Wotemo, ”Hiädono tohonenge ngohi aha tohigila-gila tïdodora ahingohaka.” Hoko gënanga ünanga wohi gila-gila wapake o huha de o duka mapakeanga karana aingohaka o Yusuf.
36O öraha gënanga o Mesir mabereraka o Midian manyawa iwihukunoka o Yusuf o Potifarika, ma koano ai kapita wodädadi o kadato magogoana manga haeke.
Currently Selected:
O KEJADIAN 37: TLB
Highlight
Share
Copy
Want to have your highlights saved across all your devices? Sign up or sign in
