O KEJADIAN 45
45
O Yusuf womahi nyata imoteke madiai ünanga o naguna
1 #
Kis. 7:13
O Yusuf wakunokaua watumungu ai mamao ai pegawe-pegawe manga himangoka. Karana gënanga wähuloko önanga yamal̄a o kamari ma amo-amoko gënanga hupaya ünanga womahi nyata ai riadodotika imoteke madiai ünanga o naguna. 2De iböto mata-mata ai pegawe yamal̄aka o kamari ma amo-amoko, o Yusuf woari wakua-kuatil̄e, hiädono o Mesir manyawa o kamari ma amo-amoko maporetoka yoihene, deʼ o abari gënanga yadono ma koano ai kadatoika. 3O Yusuf wätemo ai riadodotika, ”Ngohi nënanga o Yusuf. Kawowangohi nanga ama?” Yamake gënanga ai riadodoto duru yohawana hiädono yakunua yohaluhu. 4Daha o Yusuf wato onangika, ”Niaino nengino.” Onanga imahitïgi, deʼ wätemoli, ”Ngohi o Yusuf, ngini nihihukunoka o Mesirika. 5Uha nihawana ekola niatoduba niadiri karana ngini nihihukunoka ngohi. Imoteke madiai ma Jou Madutu mahirete wohiao ngohi nenangino tinï hihira ngini la tahihalamati o nyawa manga ngöe. 6O öraha nanga daha o taongo hinoto o habirokata maöraha, deʼ madekana o taongo motoahi o nyawa aha yakunua yopajeko ekola youtuku. 7Ma Jou Madutu wohiaoka ngohi tinïhihira ngini la ngini tinihihalamati de madodagi i höhera-heranga nënanga, deʼ tomahi tagongo niahalamati deʼ niangohaka de niadanongo idogo. 8Ho imoteke madiai nginiua nidadi o hababu ngohi naga nenangokadau, duga-duga ma Jou Madutu. Unanga wohihidadioka ngohi ma koano Mesir ai pegawe ikökurutil̄e. Ngohi ihihijojo o kuaha ai tau de madol̄a mata-mataika deʼ o Mesir mata-mataika.
9 #
Kis. 7:14
Oraha nanga itaiti ngini nima kilioro nanga amaika deʼ niahëtongo unangika aingohaka o Yusuf wotemo hoko nënanga, ’Ma Jou Madutu wohihidadi ngohi yakokuaha o Mesir mata-mataika; woma tai-taiti waino. 10Nanga ama yakunu wogogere o Gosyen madaeraoka, woma hitigi-tigino ngohino – nanga ama, deʼ aingohaka de ai danongo, ai duba, aikabingi, ai hapi deʼ hagala tonanga ama. 11Nako nanga ama naga o Gosyen madaeraoka, ngohi takunu tïpaliara nanga ama. O habirokata maöraha kaidogohi o taongo motoahi, deʼ ngohi aha tohidailako hupaya nanga ama, ai tau madol̄a deʼ nanga ama ai aiwani o gigini uha okianaga ikuranga.’ ”
12O Yusuf wotemoli, ”O öraha nanga ngini mahirete niamake, ngonaö Benyamin, i gou-goungu ngohi o Yusuf. 13Nahetongo nanga amaika hoko kia ma amoko tongohi ahi kuaha nenangoka dau o Mesir mabereraka deʼ nihijarita unangika hagala ngini nia make-makeoka. Daha tai-taiti niwiao ünanga nenangino.”
14De iböto gënanga ünanga wïkololo o Benyamin, ai dodoto gënanga, daha woari; o Benyaminö woari inoli wïkolololi o Yusuf. 15De ipaha, de kawo ari-ariohi, o Yusuf wäkololo mata-mata ai riadodoto deʼ wä ame önanga. De iböto gënanga önanga yomulaenge imä teke ade-ade dede ünanga.
16Maöraha ma koano ai kadatoka yoihene o abari o Yusuf ai riadodoto yoböa, ma koano deʼ ai pegawe-pegawe mayosanangi. 17Daha ma koano wïtemo o Yusufika, ”Nähuloko aniriadodoto gënanga manga keledai yogina de o gandum deʼ yolio o Kanaanika 18la iwingoho niaama deʼ manga tau madol̄a daha imatagali nenanginodau. Ngohi aha tahidöaka onangika o tonaka duru maoa-oa o Mesir mabereraka, deʼ önanga aha yakunu yowango de koyo kura-kurangua de o tonaka gënanga mahasilino. 19Nä huloko onangö nenangoka de imä gao o kereta muruono naga iti toöna manga hekata deʼ manga ngohaka mahohumujurohi, deʼ la iwingoho toönanga manga ama. 20Onanga i paraluua yapikiri manga bara-baranga pakisa önanga yamal̄aika, karana duru maoa-oa o Mesir mabereraka mata-mataika aha idadi toönanga.”
21O Yakub aingoha-ngohaka yadiai ma koano gënanga aipareta. O Yusuf wahidöaka onangika o kereta muruono naga, imamoteke de makoano aipareta, deʼ manga bilaonö mangale manga dodagi. 22Yahidöakoli onangika o nyawa moi-moi o pakeanga mahungi o habi moi, mä o Benyaminika wihidöaka o ratuhu hange o tiwi haaka deʼ o pakeanga mahungi o habi motoa. 23Unanga wohidingoto ai amaika o keledai o dutu ngimoi de ihigina o bara-baranga duru maoa-oa o Mesir mabereraka, deʼ o keledai o dutu ngimoioli de magina o gandum, oroti de o inomo mahomoa la yaol̄omo manga dodagi magoronaka o Mesirika. 24De ipaha ünanga wahidongotaka yosobo ai riadodoto, inoli wätemo onangika, ”Uha nima teke ributu o ngekomika.”
25Onanga yamal̄a o Mesir deʼ yolio o Kanaan mabereraika o Yakubika, toönanga manga ama. 26”O Yusuf kawo wangohi!” önanga yato unangika. ”Unanga wakokuaha o Mesir mata-mataika!” Woihene o abari gënanga, o Yakub iwitomomonoka, deʼ ünanga wä ngakua onangika.
27Mä de ipaha önanga ihijarita mata-mata wahöheto-hetongo o Yusuf onangika, deʼ maöraha ünanga wamake makereta o Yusuf wohidingo-dingoto la iwïbuhuku deʼ iwiao o Mesirika, ünanga womatodokana ai hayalino. 28”Ahingohaka o Yusuf kawowangohi!” una wato. ”Duga-duga gënanga ngohi tö igo-igo! Ngohi kokiani toiki deʼ tïmake i hira de tohonenge.”
Currently Selected:
O KEJADIAN 45: TLB
Highlight
Share
Copy
Want to have your highlights saved across all your devices? Sign up or sign in
