O KEJADIAN 44
44
O galahi ihö hihihanga
1I tai-taitino gënanga o Yusuf wïhipareta ai tau madol̄a mangabaluhika, ”Nadol̄a o nyawa geönanga manga karongo de o gandum, mangöe hokokia önanga yakunu yao, de nönoa matiwi moi-moi manga karonguku, o gandum gënanga mal̄okuoka. 2Nönoaö ahi galahi o haaka toöna manga dodoto makiditoko ai karonguku, kamamoi de matiwi ai gandum mabobangu.” Wolöleleani gënanga wadiai o pareta gënanga. 3Yarehino mawange duru o ngoru-ngoruminohi, o Yusuf imakitingaka de ai riadodoto, daha önanga imä jobo de toönanga manga keledai. 4Onanga yokurutikaowahi de o kota gënanga, maöraha o Yusuf wïtemo ai tau madol̄a manga baluhika, ”Taiti nanïki o nyawa geonanga. Nako nadaenoka, nätemo onangika, ’Yadodoa hongini niabalahi yaoa-oa de o dorou? 5Yadodoa ho ngini niatohiki ahi tuanga ai galahi o haaka? O galahi gënanga wokere de wapake deʼ hokä o mamaihi mapakakaha. Ngini niadiaioka o dorou ma ago-agomo!ʼ ”
6Maöraha wolöleleani gënanga womahiädono o Yusuf ai riadodotika, wahetongo okia wihipopareta o Yusuf. Onanga yohaluhu unangika, 7”Okia ani dumutu Tuanga? Ngomi mikoboto ngomi midiaiua hoko gënanga! 8Tuanga ngona mahirete nohiöriki o tiwi ngomi mia make-make mia karongo magoronaka o gandum mal̄okuoka gënanga ngomi mihi gilioka ngonaika Tuanga. Ho miakunu ngomi mitohiki o haaka ekola o gurasi magubernur ai tauoka! 9Tuanga, o demo ma ade o baranga gënanga i make unangoka womatengo mia hidogoronaka, mal̄aikala ünanga iwi hukumu wohonenge, deʼ ngomi midadi anigilaongo Tuanga.”
10Wolöleleani gënanga wätemo, ”Kayaoa; mä duga-duga unangoka o galahi gënanga i make, geünanga aha wodadi ahi gilaongo; mahomoa yakunu nioiki.” 11Daha de majapati önanga moi-moi ihiguti deʼ yahelenga manga karongo. 12Wilöleleani o Yusuf gënanga watailako o karongo-o karongo gënanga wohidodiai, i mulaenge mariaka ai karongo hiädono madodoto makiditoko ai karongika, deʼ ogalahi gënanga yamäke o Benyamin ai karongo magoronaka. 13Ai ria-riaka duru manga hininga ihuha hiädono yakäkakihi toönanga manga pakeanga. Onanga yögina to ona manga keledai deʼ imakilioro o kotaika.
14Maöraha o Yehuda deʼ ai riadodoto imahi ädono o Yusuf ai tauika, ünanga naga kagenangokadauohi, deʼ önanga yo huba ai himangoka. 15Done o Yusuf wotemo, ”Okia ngini niadiai gënanga? Ngini nihi örikua o nyawa hokä ngohi nënanga yakunu tohiöriki nia manarama madorou de o mamaihi?”
16”Yakunu okia ngomi mitemo ahi Tuanga?” o Yehuda wohaluhu. ”Sarakia ngomi miakunu mimahipongono deʼ mihitiai tongomi mia diri? Ma Jou Madutu wahelenga tongomi miahowono. O öraha nanga mata-mata ngomi anigilaongo Tuanga, koigoungua, duga-duga ünanga yamömake-make magalahi gënanga unangoka.”
17O Yusuf wato, ”Kowali! Ngohitoluku todiai hoko gënanga! Duga-duga unangoka magalahi gënanga yamö make-make aha wodadi ahi gilaongo. Mahomoa yakunu nilio nia hininga mahuka nia amaika.”
O Yehuda wĂŻ demo o Benyamin
18O Yehuda wotagi mahimangiha wihitigi-tigika o Yusuf deʼ wotemo, ”Uha nongamo, ahi Tuanga, nohihigumal̄a to ade-adeoli de ngona ahi Tuanga. Uha nohi ngamo ngohino; Ahi Tuanga hokä ma koano Mesir mahirete. 19Ahi Tuanga nolehaka ngomino nënanga, ’Boteka ngini de niaamaohi ekola niadodoto mahomoaohi?ʼ 20Ngomi mihaluhu, ’Tongomi mia Ama iwiperekioka deʼ miadodoto womakil̄au maöraha mia ama ai umuru ikurutil̄eoka. Ai riaka o ayo moi de miadodoto gënanga wohonengoka, hoʼ önanga yahinotoka duga-duga unangokahi mahirete kawowangohi, deʼ mia ama duru wihayangi unangika.’ 21Ahi Tuanga nomihuloko ngomi miwi ao ünanga nenangino, hupaya ahi Tuanga yakunu nïmake, 22daha ngomi mihaluhu o ngohaka gënanga yakunua imatingaka de ai ama; nako ünanga womatingaka de ai ama, ai ama aha wohonenge. 23De ipaha ahi tuanga notemo ’Ngini yakunua nihïhimangoli ngohi nako niwiaoua niadodoto gënanga.’
24Maöraha ngomi mima kilioro tongomi mia amaika, ngomi mi hiadono unangika ahi Tuanga ani demo gënanga. 25De ipaha tongomi mia ama womïhuloko ngomi miboali nenangino la miija o inomo. 26Ngomi mihaluhu, ’Ngomi yakunua mioiki dokaika, hababu ngomi yakunua miwïhimanga magubernur nako tongomi miadodoto makiditoko wonïkua. Ngomi duga-duga yakunu mioiki dokaika nako unangö woiki.’ 27De ipaha tongomi mia ama wotemo, ’Ngini nihiöriki o ngo Rahel, ngohihekata duga-duga amingohaka hinoto. 28Madodihiraka wohidogumal̄aikaoka ngohi. Unanga marai iwigolioka o aiwani madorou, karana hiädono o öraha nanga ngohi tïmakeokaua. 29Nako ngini niwil̄ë o ngohaka madodoto makiditoko nënanga ngohioka, deʼ okianaga idadi dede ünanga, o hininga mahuha ngini niao-ao ngohino gënanga aha mabaha ka ahi honenge, karana ngohi nënanga i hiperekioka.’ ”
30-31”Karana gënanga, ahi Tuanga,” o Yehuda wato o Yusufika, ”nako ngohi toma kilioro mia amaika de tongomi miadodotua gënanga, marai tongomi mia ama gënanga wohonenge. Ai ngango imahigagao o ngohakoka gënanga, deʼ ünanga hoko gënanga ai mobereki hiädono o hininga mahuha ngomi miao-ao unangika gënanga aha mabaha kai honenge. 32Inoli, ngohi tojajioka ahiamaika ngohi todadi o ngohaka gënanga ai dururu. Ngohi totemo ahi amaika, nako ngohi tiaoua o ngohaka gënanga tihigilio unangika, ngohi aha tatagongo mahukumanga hokokia madekana towango. 33Ho, ngohi togahoko, ahi Tuanga, nohihigumal̄a ngohi togogogere nenangokadau todadi ani gilaongo ahi Tuanga tïtagali tongomi miadodoto nënanga; mal̄aikala ünanga wolio kamamoi de ai ria-riaka. 34Sarakia yakunu ngohi tomakilioro tongomi mia amaika nako o ngohaka gënanga wonïkua? Ngohi done tapöaua tölega-lega o bodito aha iwitapal̄u tongomi mia ama gënanga.”
Currently Selected:
O KEJADIAN 44: TLB
Highlight
Share
Copy
Want to have your highlights saved across all your devices? Sign up or sign in
