O YOHANIS 19
19
1Ipaha de gënanga o Pilatus wowohama deʼ wähuloko o nyawa iwi gohara o Yesus. 2O tentaraka yodiai o makota moi o gota majaga-jaga de mahohihikaka, daha iwihi tamunuku o Yesus ai häeke mal̄okuoka. Iböto de gënanga önanga iwihi noa Toünanga aijuba magoguhurungu, 3daha iwigogilio yoböa Unangika deʼ yotemo, ”Nowango o Yahudioka manyawa manga koano!” Aha ino iwipoka Unanga.
4Iböto de gënanga o Pilatus wohupu wohigalioli deʼ wotemo o nyawa yowöe-wöeika gënanga, ”Niwi lega! Ngohi tiao Unanga tihihupu nginika, hupaya ngini nihiöriki kamoiö de ngohi tamäkeua o howono Unangoka.” 5O Yesus wohupu de iwihi tamunuku o makota mahohihika de Ai juba magoguhurungu. O Pilatus watemo onangika, ”Niwi lega o nyawa gënanga.”
6Maöraha o imam-imam manga häeke deʼ yogogöa-göana gënanga iwimäke o Yesus, önanga yopöaka, ”Niwi salib Unanga! Niwi salib Unanga!”
O Pilatus watemo onangika, ”Niwi l̄ë Unanga, deʼ niwisalib ngini mahirete, ngohi kamoiö de tamäkeua o howono Unangoka.”
7O Yahudioka manyawa gënanga yohaluhu, ”Imoteke tongomi mia hukumu, Unanga kiani iwihukumu wohonenge hababu Unanga woma ngaku Ai diri ma Jou Madutu ai Ngohaka.”
8Maöraha o Pilatus woihene önanga yotemo hokogënanga, ünanga iholoi wohawanoli. 9Unanga wohi galioli wowohama ai kadato magoronaika, de o Yesus iwiao iwihi ngohama, o Pilatus wileha Unangika, ”Ngona ani ahali okiaino?”
Mä o Yesus wohaluhua. 10Hoʼ o Pilatus wotemoli, ”Ngona noluku notemo dede ngohi? Nohiöriki, tongohi ahi kuaha toni hilapahi Ngona, deʼ tokuaha toni salib Ngona!”
11O Yesus wohaluhu, ”Nako ma Jou Madutu wonihidöakua o kuaha gënanga ngonaika, ngona kautuö de koiwa anikuaha Ngohino. Karana gënanga o nyawa ihihi lolapahi Ngohi ngonaika, iholoi ilamoko manga baradoha ngaro de ngona ma.”
12Maöraha o Pilatus woihene gënanga, ünanga wohidailako mangale wihilapahi o Yesus. Mä o Yahudioka manyawa yopöa-pöaka, ”Nako Tuanga nihilapahi Unanga, Tuanga ma Kaisarua ai dodiawo! O nyawa imangaku yokoano, ganga ma Kaisar aihaturü!”
13Maöraha o Pilatus woihene o demo-demo gënanga, ünanga wiao o Yesus wihihupu daha wogogeruku o kuruhi mangï yatotailako o nyawa manga hali maromanga ma Nanao o Helewo. (De o Ibranioka manga demo maromanga Gabata.)
14Oraha gënanga ngade yadono o takoro ngimoi de hinoto o wangeoka, mawange yadonuahi o Paskah ma Wange ma Amoko. O Pilatus watemo o nyawaika gënanga, ”Nënanga nia koano!”
15Onanga imapöa-pöaka, ”Niwi toma Unanga! Niwi toma Unanga! Niwi salib Unanga!”
O Pilatus wäleha, ”Kiani ngohi tisalib nia koano?”
O imam-imam manga häeke yohaluhu, ”Duga-duga ma Kaisar woma tëngo-tëngo tongomi mia koano!” 16De o Pilatus wihilapahi o Yesus onangika la iwi salib. Onanga iwil̄ë o Yesus daha yoiki iwiao Unanga.
O Yesus iwisalib
(Mat. 27:32-44; Mark. 15:21-32; Luk. 23:26-43)
17O Yesus wohupu de wamoku mahirete Ai salib o ngï ika maromanga ”O häeke ma Kabelanga ma Ngï.” (De o Ibranioka mademo ihiromanga Golgota.) 18Dokengoka Unanga iwisalib. Yahikinïki de Unanga nagaö yahinoto o nyawa mahomoa yasalib; womatëngo Ai higiloka, womatëngo Ai nirakoka deʼ o Yesus mahidodogoronaka. 19O Yesus aisalib magotaika, o Pilatus wahuloko yatulihi de madulihi hokonënanga: ”Yesus Nazaretino, o Yahudioka manyawa manga Koano”. 20O Yahudioka manyawa manga ngöe yabasa o dulihi gënanga hababu o ngï o Yesus iwisosalib gënanga ikurutikaua de o kota. O dulihi gënanga de o Ibranioka, o Latinoka deʼ o Yunanioka mangademo. 21O imam-imam manga häeke yotemo o Pilatusika, ”Uha natulihi ’O Yahudioka manyawa manga Koano’, mä natulihi, ’O nyawa nënanga wotemo, Ngohi o Yahudioka manyawa manga Koano.’ ”
22Mä o Pilatus wohaluhu, ”Ngohi tatulihi iböto, tatapu itulihoka.”
23O tentara-tentara gënanga iwisalib iböto o Yesus, önanga yal̄ë Ai pakeanga. Pakeanga gënanga yaregu iata: moi-moi yamäke o hidoku moi. Onanga yal̄ë o Ai juba. Ai juba gënanga koiwa maguguriti – kaimahi paronuku daku de yauku hiädono daukuku. 24#Mzm. 22:19 O tentara-tentara gënanga imaketemo moide moika, ”Uha ngone hatobi-tobiki o juba nënanga. Niaino ngone hodiai o undi la o nagona yakunu yadäene.” O hali gënanga idadi hupaya iganapu okia i tulihi Ma Jou Ai Demo ma Buku magoronaka, enagënanga,
”Onanga imahikodoku Ahi pakeanga,
deʼ yodiai o undi mangale ahijuba.”
Deʼ i goungu o tentara-tentara gënanga yadiai hokogënanga.
25O Yesus aisalib madatekoka imaokoino o Yesus ngoi ayo, de ngomi riadodoto o ngoheka, o ngo Maria o Keliopas ngoihekata, deʼ o ngo Maria Magdalena. 26Maöraha o Yesus womimäke ngoi ayo de wininïki wihohininga imaokoino genangoka, Unanga wotemo ngoi ayoika, ”Ayo, gënanga aningohaka Ayo.”
27Dahaino o Yesus wotemo wininïkika gënanga, ”Gënanga ngoni ayo.” Oraha de gënanga wininïki gënanga womiao o Yesus ngoi ayo mogogere aitauoka.
O Yesus wohonenge
(Mat. 27:45-56; Mark. 15:33-41; Luk. 23:44-49)
28 #
Mzm. 22:16, 69:22 Oraha nënanga o Yesus wohiöriki mata-mata itiaioka, deʼ hupaya okia itulihi Ma Jou Ai Demo ma Buku magoronaka yakunu idadi, Unanga wotemo, ”Ngohi ahikiriti madudungu.”
29Genangoka naga o udo-udomo moi ioma-omanga de o angguru ma akere masuka-suka. O bunga karang o gahumu moi yatonouku o angguru ma akeruku gënanga, deʼ ihi topokika de o gota majaga o hisop, daha yatubo hiädono o Yesus aiuru makail̄e. 30O Yesus wahihihi o angguru ma akere gënanga daha wotemo, ”I tiai oka!”
Daha Unanga Ai häeke waponu de wohonengoka.
O Yesus iwituduku
31O Yahudioka manyawa yokokuaha yoluku o nyawa manga mayeti yasosaliboka gënanga hokogënanga inuneuku o salib magotaka o Yahudioka manga Puji mawangeoka, okiali nënanga mamoi o Yahudioka manga Puji mawange gënanga, o Wange ma Amoko yododingakoka. Hababu mawange o Yesus iwisalib iotaka o Yahudioka manga Puji mawangeoka gënanga, o Yahudioka manyawa yogahoko o Pilatusika mangale yatobiki manga l̄ou o nyawa yasosalibika deʼ ihiguti manga mayeti gënanga o salib magotaka. 32O tentara-tentara gënanga yoiki deʼ yatobiki yododihira manga l̄ou yahinoto o nyawa yasosalib de o Yesus. 33Maöraha önanga yadono o Yesusika, önanga iwimäke Unanga wohonengoka. Hoʼ onanga yatobikua Ai l̄ou. 34Maʼaimahehoika o Yesus ihitopoko de o tuba, womatëngo o tentaraka gënanga; deʼ madataitoka ihupu o awunu deʼ o akere.
35O nyawa wamäke mahirete okia idadi gënanga, ünanga wohingahu o hali gënanga, hupaya nginiö ningaku. Deʼ aihakihi gënanga itiai, deʼ unanga wohiöriki gënanga itiai. 36#Kel. 12:46; Bil. 9:12; Mzm. 34:21 O hali gënanga idadi hupaya iganapu okia itulihoka Ma Jou Ai Demo ma Buku magoronaka, enagënanga ”Ai kobongo kamoiö ma aha koyatobikua”. 37#Za. 12:10; Him. 1:7 Ma Jou Ai Demo ma Buku magoronakaö itulihi, ”Onanga aha Unanga iwipülono önanga iwi topo-topokoka”.
O Yesus iwilungunu
(Mat. 27:57-61; Mark. 15:42-47; Luk. 23:50-56)
38Ipaha de gënanga o Yusuf o Arimateaino wogahoko wihigumal̄a o Pilatus la mangale wal̄ë o Yesus aimayeti. (O Yusuf nagala winöninïki o Yesus mä kawomangiu-ngiunu, hababu ünanga wamodongo o Yahudioka yokokuahaika.) O Pilatus wihigumal̄a ünanga, hoʼ unanga woiki wal̄ë o Yesus Ai mayeti. 39#Yoh. 3:1-2 O Nikodemus, mahira woböa-böa o Yesusika maöraha o hutu-hutu, unangö woiki de o Yusuf. O Nikodemus woao o mur deʼ o gaharu – mata-mata done ho o kilo moruange mangöe. 40O nyawa yahinoto gënanga yal̄ë o Yesus Ai mayeti daha yahawo de o ngöere magare-garehe mahohailoa de o minya mabou-bounu gënanga imoteke manga adati o Yahudioka manyawa yolungunu. 41O ngï o Yesus iwi salib naga o dumule moi. O dumule magoronaka gënanga naga o lungunu moi mahungi, komaiwahi yahilungunu o nyawa. 42Hababu o lungunu gënanga i tigino, deʼ o Yahudioka manga Puji mawange ngade imuläenge, önanga iwi lungunu o Yesus dokengoka.
Currently Selected:
O YOHANIS 19: TLB
Highlight
Share
Copy
Want to have your highlights saved across all your devices? Sign up or sign in
