O YOHANIS 18
18
O Yesus iwitagoko
(Mat. 26:47-56; Mark. 14:43-50; Luk. 22:47-53)
1Hokogënanga o Yesus woma niata iböto, Unanga de iwinöninïki yoiki yatobongo o Kidron ma Ngairi. Genangoka naga o dumule moi, deʼ o Yesus de iwinöninïki yowohama o dumuleika gënanga. 2O Yudas wohininga dorou gënanga, wohiöriki o ngï gënanga; hababu o Yesus mamoi-mamoi imatoomu genangoka de iwinöninïki. 3O Yudas woiki o ngï ika gënanga de waao o duduono moi o tentara Romawi deʼ yamuruono naga ma Jou Madutu ai Tau magogöana yamäke o huhuloko o imam-imam manga häekino deʼ o Farisioka manyawaino. Onanga imagao o daë, o lantera deʼ o oboro. 4O Yesus wohiöriki mata-mata aha idadi Ai dirika. Hoʼ Unanga womahi tigi hagala o nyawaika gënanga deʼ waleha, ”Ngini nialingiri o nagona?”
5Onanga yohaluhu, ”O Yesus o Nazaret manyawa.”
O Yesus wato, ”Ngohila Unanga.”
O Yudas wohininga dodorou womaokoino genangoka dede önanga. 6Maöraha o Yesus watemo onangika, ”Ngohila Unanga,” önanga mata-mata yodohuku deʼ yoruba o tonakuku. 7Mamoioli o Yesus waleha onangika, ”Ngini nialingiri o nagona?”
Onanga yohaluhu, ”O Yesus Nazaret manyawa.”
8O Yesus wato, ”Ngohi totemo iböto Ngohila Unanga.” ”Deʼ nako igoungu Ngohi ngini nihilingiri, niamal̄aika önanga mahomoa nënanga yoiki.” (9De wotemo hoko gënanga, imadadi okia o Yesus wohidodemo iböto ngaro kowahi de gënanga: ”Ama, o nyawa Ama nohihidöa-döakoka Ngohino, kao nyawa moiö de yohihangua.”)
10O Simon Petrus womagaoino o oworo moi, warahuku daha wioto o imam womomulia aigilaongo hiädono ipageloka aingauku manirakoka. O gilaongo gënanga airomanga o Malkus. 11#Mat. 26:39; Mark. 14:36; Luk. 22:42 O Yesus wotemo o Petrusika, ”Nohi ngohamoli anioworo maharunguku! Okia ngona napikiri Ngohi aha taokerua o hangihara magalahi o Ama wohihidöakoka Ngohino?”
O Yesus iwiao wihimanga o Hanas
12Daha o Romawi matentara de manga baluhu deʼ o Yahudioka yagöa-göana iwitagoko deʼ iwiliko o Yesus. 13Madodihiraka önanga iwiao o Yesus wihimanga o Hanas, o Kayafas aitoroa. O Kayafas ganga o imam womomulia o taongo gënanga. 14#Yoh. 11:49-50 Deʼ unangala wanasihatoka o Yahudi manyawa yokokuaha, iholoi yaoa o nyawa womatëngo wohonenge mangale o hoana yongodumu.
O Petrus wihipongono o Yesus
(Mat. 26:69-70; Mark. 14:66-68; Luk. 22:55-57)
15O Simon Petrus deʼ womatëngo iwinöninïki mahomoa iwinïki o Yesus. Wonöninïki mahomoa nënanga winäko ma imam womomulia; hoʼ unanga witomoteke wowohama dede o Yesus ma imam womomulia aitau malöaika, 16ma o Petrus wotamä maporetoka, o ngoranoka. Winöninïki mahomoa gënanga woiki wohupu deʼ womi temo o ngoheka molöleleani o ngorana magogöana, daha wiao o Petrus wihingohama magoronaika. 17O ngoheka molöleleani o ngorana magogöana gënanga mitemo o Petrusika, ”Hei, koigoungua ngonaö o nyawa ninöninïki o nyawa gënanga?”
”Kowali,” o Petrus wohaluhu.
18O öraha gënanga o alo kohamäta, hoʼ yolöleleani deʼ yogo göa-göana imadofoil̄e o uku deʼ onanga imarauku genangoka. O Petrus woiki genangika deʼ womaokoino womarauku dede önanga.
O imam womomulia wileha o Yesus
(Mat. 26:59-66; Mark. 14:55-64; Luk. 22:66-71)
19O imam womomulia wileha o Yesus mangale iwinöninïki deʼ mangale Ai dodötoko. 20O Yesus wohaluhu, ”Ngohi hoko genangika totemo tohitararonuku o nyawa yowöe-wöe manga himangoka. Ngohi hokogenangika tadotoko o puji matau-tauoka deʼ ma Jou Madutu ai Tauoka, o ngï Yahudioka manyawa biaha ima totoomu. Komaiwahi Ngohi totemo okia naga de toma ngiu-ngiunu. 21Hoʼ yadodoa Tuanga nohi leha Ngohi? Naleha önanga yoihe-ihenoka Ngohi tadotoko. Maraioka önanga ihiöriki okia Ngohi totemoka.”
22Maöraha o Yesus wotemo hokogënanga, womatëngo wogo göa-göana genangoka wipoka deʼ wato, ”Duru nobarani, Ngona notemo hokogënanga ma imam womomuliaika!”
23O Yesus wohaluhu, ”Nako Ngohi totemo okianaga moi ihowono, nahetongo nenangoka okia mahowono! Mä nako Ngohi totemo gënanga igoungu itiai, yadodoa ngona nohipoka Ngohi?”
24Dahao o Hanas wahuloko o nyawa iwiao o Yesus de aililikoka ma Imam womo Muliaika o Kayafas.
O Petrus wihipongonoli o Yesus
(Mat. 26:71-75; Mark. 14:69-72; Luk. 22:58-62)
25O Simon Petrus kawoma okoinohi womarauku genangoka. O nyawa yotemo unangika, ”Koigoungua ngonaö ninöninïki o nyawa gënanga?” Mä o Petrus womahi pongono wato, ”Kowali!”
26O nyawa womatëngo ma imam womomulia aigilaongo, enagënanga o riadodoto de o nyawa aingauku waoto-oto o Petrus, wato, ”Koigoungua ngohi tonimäkeoka ngona o dumuleoka gënanga dede ünanga?”
27Daha o Petrus wihi pongonoli, ”Kowali,” – deʼ maöraha duru ima kokoronaika gënanga o kuru-kuru ihorene.
O Yesus wihimanga o Pilatus
(Mat. 27:1-2, 11-14; Mark. 15:1-5; Luk. 23:1-5)
28Duru ngoru-ngoruminohi önanga iwiao o Yesus o Kayafas aitauoka de magubernur aikadatoika. O Yahudioka manyawa mahirete yowohamua o kadato magoronaika, hupaya önanga uha yodadi yopeseke imoteke o agama madodagi, hababu önanga yomau yanïki yol̄omo o Paskah mangol̄omoka. 29Karana gënanga o Pilatus woiki wohupu onangika deʼ waleha, ”Okia nia galaki o nyawa ne Unangika?”
30Onanga yohaluhu, ”Hohiade Unanga koiwa Ai howono, ngomi aha miwiaoua ma Bapa Gubernurika.”
31O Pilatus watemo onangika, ”Niwi l̄ë Unanga de niwi hakimi Unanga imamoteke niahukumu mahirete!”
Mä o Yahudioka manyawa gënanga yohaluhu, ”Ngomi yakunua miahukumu o nyawa yohonenge.” (32#Yoh. 3:14, 12:32 Nënanga idadi hupaya iganapu okia o Yesus wotemoka yadäene madodagi Unanga aha wohonenge.)
33O Pilatus wowohamoli ai kadatoika deʼ wiahoko o Yesus, dahao wileha, ”Boteka Ngona o Yahudioka manyawa manga koano?”
34O Yesus wohaluhu, ”Okia aniloleha nënanga ngonaino mahirete ekola naga o nyawa mahomoa inihingahuoka ngonaika mangale Ngohi?”
35O Pilatus wohaluhu, ”Bote ngohi o Yahudioka manyawa? Inihi lolapahi Ngona ngohino ganga Ani nyawa mahirete deʼ o imam-imam manga häeke. Okia Ngona nodiaioka?”
36O Yesus wotemo, ”Ngohi ahi pareta o duniainoua nënanga. O demo maade nako Tongohi ahipareta o duniaino nënanga, Tongohi ahi nyawa aha yalawani hupaya Ngohi uha ihihilapahi o Yahudioka yokokuahaika. Mä igoungu Tongohi ahi pareta o duniainoua nënanga!”
37O Pilatus wileha Unangika, ”Nako hokogënanga, Ngona o koano?”
O Yesus wohaluhu, ”Ngona notemoka Ngohi nënanga o koano. Ngohi tomakil̄au deʼ toböa o duniaka mangale madumutu moi, enagënanga tohidöaka o hakihi mangale o diai. O nyawa o diaino gënanga ihihigihene Ngohi.”
38O Pilatus wileha Unangika, ”Okia mamangarati o diai?”
O Yesus iwihukumu wohonenge
(Mat. 27:15-31; Mark. 15:6-20; Luk. 23:13-25)
Daha o Pilatus wohupuoli ai kadatoino deʼ watemo o Yahudi manyawaika, ”Ngohi tamäke okia-kiaua Ai howono Unangoka. 39Mä imoteke niabiaha, ngohi kiani tihilapahi o hohowono manyawa womatëngo o Paskah ma Wange ma Amokoka. Nioigo ngini hupaya ngohi tihilapahi o Yahudioka manyawa manga koano mangale ngini?”
40Onanga yohaluhu de ima pöa-pöaka, ”Kowali, uha Unanga, mä o Barabas!” (O Barabas ganga o nyawa moi wo ora-ora.)
Currently Selected:
O YOHANIS 18: TLB
Highlight
Share
Copy
Want to have your highlights saved across all your devices? Sign up or sign in
