O YOHANIS 17
17
O Yesus waniata iwinöninïki
1Ipaha wotemo hokogënanga, o Yesus womamataga o dihangil̄e deʼ wotemo, ”Ama, örahanënanga yadonoka maöraha. Nihimulia Ani Ngohaka, hupaya Ani Ngohakö wonihimulia Ama. 2Ama nohihidöakoka o kuaha o umati o nyawa mata-mata o Ngohakika, hupaya Unanga wahidöaka o ngango madutu deʼ i kokakali o nyawa mata-mataika, Ama nihidöa-döakoka Unangika. 3Nënanga o ngango madutu deʼ ikokakali; hupaya o nyawa ininäko Ama Jou Madutu madiai nomadinga-dingakoka deʼ iwinäko o Yesus Kristus, Ama nihulo-hulokoka. 4Ngohi tonihimuliaka Ama o dunia nënanga mal̄okuoka, deʼ tabötoka o manarama, Ama nohihidöa-döakoka Ngohino. 5Ama! Orahanënanga Ngohi tonihimulia Amaika, de o mulia Tongohi madutu imakinïki de Ngona Ama kao dunia nënanga idadiö de kowahi.
6Ngohi tonihinäkoka Ama hagala o nyawaika o duniaino nënanga, Ama nohihidöa-döakoka Ngohino. Onanga ganga kato Ngona Ama, deʼ Ama nohihidöa-döakoka önanga Ngohino. Onanga yamotekoka Anidemo Ama. 7Orahanënanga önanga ihiöriki mata-mata Ama nohidöakoka Ngohino ma ahali Ngonaino Ama. 8Ngohi tohi adonoka onangika Anidemo Ama nohidöa-döakoka Ngohino; deʼ onanga yatarimaka. Onanga ihiöriki de madiai Ngohi toböa Amaino deʼ onanga yongaku Ama nohihuloko Ngohi.
9Ngohi toma niata mangale önanga. Ngohi toma niatua mangale o dunia mä mangale hagala o nyawa Ama nohihidöa-döakoka Ngohino, hababu önanga ganga kato Ngona Ama. 10Mata-mata kato Ngohi, ganga kato Ngonaö Ama; deʼ mata-mata Tongona Ama, ganga kato Ngohiö. Ngohi ihihimulia önanga manga hidogoronaka. 11Orahanënanga Ngohi toböa Ngonaika Ama. Ngohi togogerokaua o duniaka; mä onanga naga o duniaka. Ama notebi-tebini! Nagöana önanga de Ani romanga makuaha Ama, enagënanga Ani romanga Ama nohidöakoka Ngohino – hupaya önanga yodadi kamoi, hokä imatero Ama deʼ Ngohiö kamoi. 12#Mzm. 41:10; Yoh. 13:18 Maöraha Ngohi kadede onangohi, Ngohi tägoanoka önanga de Ani romanga makuaha Ama – Ani romanga nohihidöa-döakoka Ngohino. Ngohi tagoanoka önanga deʼ kao nyawa moiö de önanga yohihangua sowaliua ünanga igoungu kokiani wohihangoka; hupaya de gënanga idadi okia itulihoka Ma Jou Ai Demo ma Buku magoronaka. 13Orahanënanga Ngohi toböa Amaika. Mata-mata nënanga Ngohi totemoka maöraha Ngohi kao duniakahi; hupaya önanga yamäo yaomanga de Ahi mörene. 14Ngohi tahiadonoka onangika Ani demo Ama, deʼ o dunia yadohata önanga, hababu önanga koto duniaua hokä imatero Ngohiö toduniaua. 15Ngohi togahokua hupaya Ama nal̄ë önanga o duniaino nënanga, mä Ngohi togahoko hupaya Ama nagöana önanga o Dorouino. 16Ka ima tero mahali hokä Ngohi toduniaua, onangö toduniaua. 17Nahi dadi önanga, kato Ngona Ama madutu noma dinga-dingakoka o diai; Ani demo Ama gënanga o diai. 18Hokä Ama nohihulokoka o duniauku, hoko genangö Ngohi tahuloko önanga o duniaika. 19Mangale to önanga manga wowango mahidoku, Ngohi toma hilapahi Ahi diri hokä Tongona madutu Ama, nomadinga-dingakoka hupaya onangö yodadi kato Ngona madutu Ama nomadinga-dingakoka de mangëkomo o diai.
20Mangale ka onangua nënanga dika Ngohi toma niata. Ngohiö tomaniata mangale hagala o nyawa aha ihingaku Ngohino de to önanga manga hakihi nënanga. 21Ngohi togahoko, Ama hupaya önanga mata-mata yodadi kamoi, hokä Ama kamoi dede Ngohi, deʼ Ngohi dede Ngona Ama. Tanu önanga yodadi moi dede ngone, hupaya o dunia yongaku Ama nohihulokoka Ngohi. 22Ngohi tahidöakoka onangika o mulia Ama nohihidöa-döakoka Ngohino, hupaya önanga yodadi moi, hokä ima tero Ngoneö kamoi; 23Ngohi dede önanga, deʼ Ama dede Ngohi; hupaya önanga igou-goungu kamoi. O dunia aha ihiöriki Ngona Ama nohihuloko Ngohi, deʼ Ama nahininga önanga hokä Ama nohihininga Ngohi.
24Ama, Ngohi toigo hupaya önanga, Ama nohihidöaka Ngohino, naga dede Ngohi o ngï kiaka naga Ngohi, hupaya önanga yamäke Tongohi Ahi mulia; enagënanga Ani mulia Ama nohihidöa-döakoka Ngohino, hababu Ama nohihininga Ngohi o dunia kai dadiö dekowahi. 25Ama noadi-adili! O dunia ininäkoua Ama, mä Ngohi toninäko Ama; deʼ hagala o nyawa nënanga ihiöriki Ama nohihuloko Ngohi. 26Ngohi tahimatokoka Ani romanga Ama onangika; deʼ Ngohi aha gila-gila todiai hokogënanga, hupaya Ani dora Ama Ngohino itatapu manga hininga magoronaka deʼ Ngohi kamoi dede önanga.”
Currently Selected:
O YOHANIS 17: TLB
Highlight
Share
Copy
Want to have your highlights saved across all your devices? Sign up or sign in
