O LUKAS 4
4
O Yesus o Ibilihi iwitaili
(Mat. 4:1-11; Mark. 1:12-13)
1O Yesus iwikuaha ma Jou Madutu ai Womaha maöraha Unanga wamal̄a o Yordan ma Ngairi. Ma Jou Madutu ai Womaha iwiao Unanga o tonaka i kokakahaika. 2Genangoka Unanga o Ibilihi iwitaili o wange moruata madëkana. O öraha madëkana gënanga, Unanga okia-kiaua waol̄omo. Hoʼ mabaha Unanga wamäo iwihahini.
3O Ibilihi iwitemo Unangika, ”Bari Ngona ma Jou Madutu ai Ngohaka? Hoʼ, nahuloko o helewo nënanga imadadi o roti.”
4 #
Ul. 8:3
O Yesus wohaluhu, ”Ma Jou Ai Demo ma Buku magoronaka itulihi, ’O nyawa yakunua yowango kade o roti dika.’ ”
5Daha o Ibilihi iwiao o Yesus o ngï magögurutil̄eoka, deʼ o lako dadawi o Ibilihi wihidumutu Unangika mata-mata o kuaha o popareta o duniaka de makaramata. 6”Mata-mata o kuaha deʼ o kaya nënanga aha ngohi tonihidöaka Ngonaika,” o Ibilihi i temo o Yesusika, ”Hababu mata-mata nënanga ihihi döakoka ngohino, deʼ ngohi takunu tohidöaka nagonaika dika, ngohi tomau tahi döaka. 7Mata-mata gënanga aha idadi kato Ngona, nako Ngona noma ruku nohi huba ngohi.”
8 #
Ul. 6:13
O Yesus wohaluhu, ”Ma Jou Ai Demo ma Buku magoronaka itulihi, ’Niwi huba nia Jou Madutu deʼ niwï leleani Unanga dika.’ ”
9Daha o Ibilihi iwiao o Yesus o Yerusalemika deʼ iwikelenga Unanga ma Jou ai Tau maponatoka deʼ iwitemo Unangika, ”Bari Ngona ma Jou Madutu ai Ngohaka? Hoʼ nenangoka de noma ngumo. 10#Mzm. 91:11 Hababu Ma Jou Ai Demo ma Buku magoronaka itulihi, ’Ma Jou Madutu aha wahuloko Ai malaekat-malaekat inï göana ngona ihi dodiai.’ 11#Mzm. 91:12 Deʼ ikali, ’O malaekat-malaekat aha inilegono Ngona de manga giama, hupaya Ani l̄ou mauha i peleke o helewoika.’ ”
12 #
Ul. 6:16
O Yesus wohaluhu, ”Ma Jou Ai Demo ma Buku magoronaka itulihi, ’Uha niwitaili nia Jou Madutu.’ ”
13Ipahaka o Ibilihi iwitaili o Yesus de hagala rupa madodagi, ënanga iwimal̄aka o Yesus, deʼ yodamä o öraha maoa.
O Yesus womuläenge Ai manarama o Galilea madaeraka
(Mat. 4:12-17; Mark. 1:14-15)
14Ipaha o Yesus womakilioro o Galileaika; deʼ Unanga ma Jou Madutu ai Womaha iwikuaha. O abari mangale Ai diri yodogilianga o daera gënanga mata-mataika. 15Unanga wodotoko o pupuji matauoka, deʼ mata-mata o nyawa iwihigiriri Unanga.
O Yesus iwitarimaua o Nazaret mabereraka
(Mat. 13:53-58; Mark. 6:1-6)
16O Yesus woikoli o Nazaretika, o ngï Unanga iwipaliara hiädono wolamoko. O Yahudioka manga Puji mawangeoka imoteke mabiaha Unanga woiki o pupuji matauika. Unanga womaoko la wabasa Ma Jou Ai Demo ma Buku, 17deʼ iwihidöaka ma Nabi Yesaya aibuku. Unanga wahelenga o buku i lüluluino gënanga, daha wamäke o hidoku nënanga,
18 #
Yes. 61:1-2
”Ma Jou ai Womaha naga Ngohioka,
hababu Unanga wohi gorakoka ngohi la tohingahu
o Abari ma Oa o nyawa mihikinika.
Unanga wohi huloko ngohi la tohi ngahu
o duduhuhu o nyawa yätago-tagokika
deĘĽ o nyawa yopiloko ima hiorikoli;
la tä hohe o nyawa yahidapara itotorou
19deʼ tohi ngahu ma Jou aiböa maöraha
wahihalamati to Unanga aiumati.”
20O Yesus walulu okali o buku gënanga, deʼ wohigilio wolöleleanika, daha wogogere. Mata-mata o nyawa o pupuji matau magoronaka gënanga iwipulono. 21Deʼ o Yesus womuläenge woade-ade onangika hokonënanga, ”Ma Jou Ai Demo ma Buku madol̄a kangano ni ihe-ihene gënanga o wange nënanga iganapuoka maöraha ngini nihigihene.”
22O demo-demo wohidö demo-demo gënanga duru irahai, hiädono önanga yokiriri deʼ iwihigoungu Unanga. Onanga yotemo, ”Mode koigoungua Unanga o Yusuf aingohaka?”
23De o Yesus wätemo onangika, ”Marai ngini aha niapäke o hitotero mademo nënanga Ngohino, ’Dotere, nohitogumu anidiri mahirete. Ngomi mi ihene ihëra-hëranga nodiai o Kapernaumoka, nodiaioli anikapongoka mahirete.’ ” 24#Yoh. 4:44 O Yesus wödogo, ”Niohohininga, koiwa naga o nabi iwihoromati aikapongoka mahirete. 25#1Kok. 17:1 Mä ni ihene: o Elia aiorahoka, ma orahoka iawanua o taongo hange de mahononga madëkana, idadi o habirokata duru kaha giria o berera mata-mataika. O öraha gënanga naga manga ngöe o ngoheka bobao o Israeloka. 26#1Kok. 17:8-16 Ngarokö hokogënanga, kamoikaö de ma Jou Madutu wïhulokua o Elia woiki o bobobaoika gënanga mä duga-duga woiki o bobaoika momatëngo, o Sarfat mabereraka o Sidon madaeraoka. 27#2Kok. 5:1-14 Kogenangoli ma Nabi Elisa aiorahoka naga manga ngöe o nyawa o Israeloka yäpado itotorou, mä manga hidogoronaka kamoiö de wahitogumua, sowaliua o Naaman o Siria manyawa gënanga.”
28Mata-mata o nyawa o pupuji matauoka gënanga duru yongamo, yoihene o hali gënanga. 29Onanga imaoko daha iwiduhu o Yesus o kota maporetika, deʼ iwiao o l̄oku mabakorika, kiaka genangoka ihigoko manga kota. Onanga yomau iwitila Unanga o waiuku. 30Mä o Yesus woma hibilatu o nyawa manga ngöeika gila-gila woiki.
Womatëngo iwïngohamika o womaha madorou
(Mark. 1:21-28)
31Ipaha o Yesus woiki o Kapernaum makotaika o Galileaka. Dokengoka Unanga wädotoko o nyawa o Yahudi manga Puji ma wangeoka. 32#Mat. 7:28-29 Onanga yokiriri yamäke madodagi Unanga wodotoko, hababu Unanga wotemo-temo de makumati. 33Genangoka o pupuji matauoka womatëngo o womaha madorou iwikuaha. O nyawa gënanga woma pöa-pöaka, 34”Hei Yesus, o Nazaret manyawa, Ngona nomau okia nodiai dede ngomi? Ngona naino la nomï binaha ngomi? Ngohi tohiöriki Ngona o nagona: Ngona o huhuloko notebi-tebini ma Jou Madutuino!”
35”Noma rïdi!” o Yesus wodorohu o womaha madorouika gënanga. ”Nohupu de o nyawa nënanga!” Daha o womaha madorou gënanga iwihi paka o nyawa gënanga manga himanguku mata-mata, ipaha ihupu de o nyawa gënanga de wohiriua.
36Mata-mata o nyawa yohëranga, deʼ imaketemo, ”Goguleua Ai demo-demo. De makumati deʼ makuaha, Unanga wapareta o womaha madodorou ihupu, deʼ onanga ma yohupu!” 37De o abari mangale o Yesus yodogilianga o daera gënanga mata-mataika.
O Yesus wahitogumu manga ngöe o nyawa
(Mat. 8:14-17; Mark. 1:29-34)
38O Yesus wamal̄a o pupuji matau gënanga, daha woiki o Simon aitauika. O Simon ngoitoroa magogiria imigogama mopanyake, deʼ o nyawa ihingahu o hali gënanga o Yesusika. 39O Yesus woiki o ayo gënanga amidangirika, daha o Yesus waduhu o gogama gënanga. O gogama gënanga ihihanga, deʼ o Simon ngoi toroa gila-gila momomiki deʼ mä leleani önanga.
40O wange tigi-tigi itumunu, mata-mata o nyawa yäao o Yesusika manga riadodoto yädäe-däene o panyake i rupa-rupa. O Yesus wakelenga Ai giama onanguku moi-moi deʼ onanga wahitogumu. 41O womaha madodorou maihupu o nyawa yowöe-wöeino gënanga, de yopöa-pöaka, ”Ngona ma Jou Madutu ai Ngohaka!”
Mä o Yesus wädorohu önanga deʼ wahigumal̄aua önanga yoade-ade, hababu önanga yanäko bari Unanga ma Koano Wohi hohalamati.
O Yesus woriwayati o pupuji matau magoronaka
(Mark. 1:35-39)
42O wange tigi-tigi iböa o Yesus wamal̄a o kota gënanga de woiki o ngï moika magigoro koiwa-iwa. O nyawa yomuläenge iwilingiri Unanga, deʼ onanga iwimäkeoka, önanga ihidailako hupaya Unanga uha wämal̄a önanga. 43Mä o Yesus wätemo, ”O Abari ma Oa mangale sarakia ma Jou Madutu wopareta, kokiani Ngohi tohi ngahuoli, o kota-kota mahomoaika, hababu matiti gënanga ma Jou Madutu wohihuloko Ngohi o duniaino.”
44Karana gënanga o Yesus woriwayati o pupuji matau magoronaka o Yudea maberera mata-mataika.
Currently Selected:
O LUKAS 4: TLB
Highlight
Share
Copy
Want to have your highlights saved across all your devices? Sign up or sign in
