O MARKUS 10
10
O Yesus ai dodötoko mangale o ngongoluku
(Mat. 19:1-12; Luk. 16:18)
1Ipaha o Yesus wamal̄a o ngï gënanga, deʼ woiki o Yudea madaeraika deʼ o Yordan ma Ngairi mahonongaka madaera. O nyawa manga ngöe yoböali yotoomu o Yesus iwikilolitino. Deʼ hokä biaha o Yesus wädotoko önanga.
2Yamuruono naga o Farisi manyawaö yaino laʼ mangale yalingiri o Yesus aihowono. Onanga yoleha, ”Imoteke nanga agama matita, boteka yakunu o nyawa yäoluku manga hekata?”
3O Yesus wohaluhu, ”O Musa wohi döaka o pareta okia nginika?”
4 #
Ul. 24:1-4; Mat. 5:31 ”O Musa wohi gumal̄a o nyawa yäoluku manga hekata, mangale yakunu ihira yotulihi o ngongoluku mahurata,” önanga yohaluhu.
5”O Musa watulihi o pareta gënanga hababu ngini ihuha holi inï dotoko,” o Yesus wato onangika. 6#Kej. 1:27, 5:2 ”Mä madodihiraka, maöraha ma Jou Madutu wodiai o nyawa, yahetongo ’Ma Jou Madutu wahidadi önanga o nauru deʼ o ngoheka. 7#Kej. 2:24 Gënanga mahababu o nauru aha yamal̄a manga ayo deʼ manga ama deʼ yorimoi de ngoi hekata, hoʼ yahinoto yodadi moi.’ 8Hoʼ, önanga o nyawa yahinoto okaua, duga-duga imatëngo. 9Gënanga mahababu, okia ma Jou Madutu wohirimoioka, yakunua o nyawa ihikitingaka!”
10Onanga yowohamoka o tauika, iwinöninïki yoleha o Yesusika mangale o hali gënanga. 11#Mat. 5:32; 1Kor. 7:10-11 O Yesus wätemo onangika, ”O nagona yäoluku manga hekata deʼ yokawingi de o ngoheka mahomoa, o nyawa gënanga wohowono ngoi hekata mo hira-hiraika gënanga. 12Kogenangoli o ngoheka mioluku ami rokata deʼ mokawingi de o nauru mahomoa, munangö mohowono.”
O Yesus wahibarakati o ngoha-ngohaka
(Mat. 19:13-15; Luk. 18:15-17)
13Naga o nyawa yä ao manga ngoha-ngohaka o Yesusika hupaya Unanga wäpal̄anga deʼ wahibarakati önanga. Mä iwinöninïki o Yesus yängamo o nyawa geönanga. 14Wamäke o hali gënanga, o Yesus wongamo daha Unanga wätemo iwinöninïkika, ”Nia mal̄aika o ngoha-ngohaka gënanga yaino Ngohino! Uha nia duhunu önanga, hababu o nyawa hokä hokonënanga yodadi o gegetongo ma Jou Madutu aiumati. 15#Mat. 18:3 Nio hohininga nënanga! O nagona iwï himangua ma Jou Madutu hokä o ngohaka moi, önanga aha yodadiua o gegetongo ma Jou Madutu ai umati.” 16Iböto o Yesus wotemo hokogënanga, o Yesus wäkololo o ngoha-ngohaka gënanga, ipaha Unanga wakelenga Ai giama onanguku wägeto-getongo deʼ wahi barakati önanga.
Mangale o kaya manyawa
(Mat. 19:16-30; Luk. 18:18-30)
17Maöraha o Yesus wohigila-gilali Ai dodagi, womatëngo waino woma popopäta o Yesusika. O nyawa gënanga woma ruku o Yesus ai himangoka deʼ woleha, ”Guru maoa, ngohi kokiani okia todiai hupaya yakunu tamäke o ngango madutu deʼ ikakali?”
18”Yadodoa hongona nato Ngohi yaoa?” o Yesus woleha. ”Mahomoa de ma Jou Madutu mahirete, koiwa naga yaöa. 19#Kel. 20:12-16; Ul. 5:16-20 Ngona nanakoka ma Jou Madutu ai pareta-pareta, ’Uha notoma, uha nohowono, uha notohiki, uha nohakihi i elu-eluku, uha notipu, nä horomati ani ama deʼ ngoni ayo.’ ”
20”Bapa Guru,” o nyawa gënanga wato, ”Mata-mata o pareta gënanga ngohi tamotekoka madero kato magoduruohi.”
21O Yesus wïpulono o nyawa gënanga deʼ ai hayanga daha wïtemo, ”Ikuranga o hali moiohi ngona nöparalu. Noiki nahukunu mata-mata ani arata; laʼ matiwi nahi döaka o nyawa mihikinika, deʼ ngona aha nomä mäke o arata o horogaka. Iböto de gënanga naino laʼ nohi nïki Ngohi.” 22Woihene o Yesus wotemo hoko gënanga, o nyawa gënanga woliwolu, daha watingaka o ngï gënanga de ai hininga i huha karana ünanga duru wokaya.
23De o Yesus wäpulono iwinö ninïki daha wätemo onangika, ”Ihuha duru itike o nyawa yokaya-kaya yodadi o gegetongo ma Jou Madutu ai umati!”
24Iwinö ninïki yohëranga yoihene o Yesus ai demo gënanga. Mä o Yesus wätemoli, ”Ahi ngoha-ngohaka igoungu ihuha itike hodadi o gegetongo ma Jou Madutu ai umati! 25Gahumu moi o onta iwohama o populaki mapidahika i holoi gapanga de o nyawa yokaya-kaya yowohama ma Jou Madutu ai Dunia ma Hungiika.”
26O Yesus aidemo-demo nënanga yadiai iwinöninïki yohëranga, hiädono önanga imakokeleha, ”Nako hokogënanga, o nagona daha yakunu yohalamati?”
27O Yesus wäpulono önanga deʼ wohaluhu, ”Ka o nyawa gënanga de madudukoro mä ma Jou Madutu koiwa madudukoro; kema Jou Madutu mata-mata kaiyakunu.”
28Daha o Petrus wotemo, ”Napulono, ngomi miamal̄aka hagala mata-mata mangale mininïki Bapa.”
29O Yesus wotemo, ”Ningaku: o nyawa yamal̄aka manga tau madol̄a, ekola airiadodoto o nauru deʼ aibiranga, ekola ngoi ayo, ekola aiama, ekola aingoha-ngohaka, ekola manga dumule karana Ngohi deʼ karana o Abari ma Oa ma Jou Madutuino, 30o nyawa gënanga aha watarima iholoi iwöe öraha nënanga. Unanga aha wamäke ihigali maratuhu moi matau iholoi iwöe, airiadodoto o nauru, aibiranga, ngoi ayo, aingoha-ngohaka, aidumule – deʼ o huha de hangiharaö. Deʼ aha o öraha aha iböa-böa gënanga, o nyawa gënanga aha watarima o ngango madutu deʼ ikakali. 31#Mat. 20:16; Luk. 13:30 Mä o nyawa mangangöe o örahanënanga yohohihira aha yodadi yotototuru deʼ manga ngöe örahanënanga yotototuru aha yodadi yohohihira.”
O Yesus wohi ade-ade mahi gali mahangeoka mangale Ai honenge
(Mat. 20:17-19; Luk. 18:31-34)
32O Yesus deʼ iwinöninïki naga manga dodagi magoronaka o Yerusalemika. O Yesus womä dagi mahimangoka, deʼ iwinöninïki mata-mata manga hininga iëteke. Deʼ o nyawa yäninïki manga poretino mayamäo yohawana. Ipaha o Yesus wäahokoli iwinöninïki wätingakika deʼ wahingahu onangika okia aha idadi Ai dirika. 33”Ni ihene,” Unanga wotemo, ”ngone öraha nënanga hodumutu o Yerusalemika. Dokengoka o Nyawa manga Ngohaka aha iwihilapahi o imam-imam manga häekika, deʼ o agama maguru-guru. Unanga aha iwihukumu iwihohonenge, ipaha iwihilapahi o Yahudi manyawaikaua. 34Onanga aha iwihohedu Unanga, iwiobiri, iwihangihara, deʼ Unanga iwisalib. Mä de o wange hange Unanga aha womomiki.”
O Yakobus deĘĽ o Yohanis manga gogahoko
(Mat. 20:20-28)
35Daha o Yakobus deʼ o Yohanis, enagënanga o Zebedeus ai ngoha-ngohaka, yoiki o Yesusika, ”Bapa Guru,” önanga yotemo, ”naga o hali moiani ngomi miomau Bapa nodiai mangale ngomi.”
36”Okia ngini niomau Ngohi todiai mangale ngini?” o Yesus wä leha.
37Onanga yohaluhu, ”Ngomi miomau migogere Ani niraka de Ani higili Bapa, maöraha okia Bapa nodadi o koano de Ani mulia.”
38 #
Luk. 12:50
”Ngini nihiorikua okia ngini nigahoko,” o Yesus wätemo onangika. ”Kani akunu ngini nio ngokere o huha de o hangihara magalahioko, kiaka aha Ngohi töngokere, deʼ niongohama o huha de o hangihara mangï ika kiaka aha Ngohi töngohama?”
39”Kayakunu,” önanga yohaluhu.
De o Yesus wätemoli onangika, ”Igoungu ngini aha niongokere o huha de o hangihara magalahioko kiaka aha Ngohi töngokere, deʼ niongohama o huha de o hangihara mangïika kiaka Ngohi aha töngohama. 40Mä imakorona o nagona aha yögogere Ahi niraka ekola Ahi higiloka, gënanga Ngohiua Ahi haku tohigogere. Ma Jou Madutu wohi gogere o nagona de o nagona aha yögogere o ngï-o ngï gënanga.”
41Maöraha yangimoi iwinöninïki o Yesus mahomoa gënanga yoihene o hali gënanga, önanga yängamo o Yakobus deʼ o Yohanis. 42#Luk. 22:25-26 Hoʼ o Yesus wä ahoko önanga mata-mata, daha wotemo, ”Ngini nihiöriki o hoana de o berera matutuda iwi näko-näkoua ma Jou Madutu manga kawaha yätuku. Deʼ manga gikiri yoago-agomo yätuku önanga. 43#Mat. 23:11; Mark. 9:35; Luk. 22:26 Mä ngini yakunua hokogënanga! Ngini hara moioli, o nyawa yomau yodadi yolamoko niahidogoronaka, önanga kokiani yodadi inïlöleleani. 44Deʼ o nagona yomau yodadi madodihiraka niahidogoronaka, kokiani yodadi niagilaongo. 45Hababu o Nyawa manga Ngohaka mawainoua mangale iwï leleani. Unanga woböa woma hilapahi Ai nyawa mangale wahibebasi manga ngöe o nyawa.”
O Yesus wihitogumu o Bartimeus wopilo-piloko
(Mat. 20:29-34; Luk. 18:35-43)
46Onanga imahiädono o Yerikho makotaika. Deʼ maöraha o Yesus de iwinöninïki inoli o nyawa yowöe-wöe yamal̄a o kota gënanga, womatëngo wopilo-piloko kawo gogeruku wogaho-gahoko o ngëkomo madatekoka. Ai romanga o Bartimeus, o Timeus ai ngohaka. 47Maöraha ünanga woihene yakokaino gënanga ganga o Yesus o Nazaret manyawa, ünanga wopöaka, ”Yesus, o Daud ai Ngohaka! Nohï dora ngohi!”
48Unanga iwingamo manga ngöe o nyawa, deʼ iwi huloko woma rïdi. Mä unanga iholoi ikuatil̄eoli woma pöaka, ”Daud ai Ngohaka, nohï dora ngohi!”
49De o Yesus womatogumu daha wätemo, ”Niwi ahoko ünanga.”
Hoʼ onanga iwi ahoko o nyawa wopilo-piloko gënanga. Onanga iwitemo unangika, ”Noma rirïdi! Ngona o Yesus woni ahoko, nomomiki!”
50O nyawa wopilo-piloko gënanga wohikaweli aijuba, daha woma tai-taiti womaoko deʼ woiki o Yesusika.
51”Okia ngona nömau Ngohi todiai ngonaika?” o Yesus wïleha unangika.
O nyawa wopilo-piloko gënanga wohaluhu, ”Bapa Guru, ngohi tönahihu tomahi öriki.”
52”Noiki,” o Yesus wïtemo, ”karana ngona nongaku Ngohino, ngona notogumu.”
Ka öraha gënanga dika o nyawa wopilo-piloko gënanga yakunu womahi öriki. Daha ünanga winïki o Yesus o ngekomika.
Currently Selected:
O MARKUS 10: TLB
Highlight
Share
Copy
Want to have your highlights saved across all your devices? Sign up or sign in
