O MARKUS 9
9
1”La nihiöriki!” o Yesus wato. ”Ngini niahidogoronaka nenangokanaga aha koyo honengua, nako yamäkeowahi ma Jou Madutu wopareta de makuaha!”
O Yesus wihimulia
(Mat. 17:1-13; Luk. 9:28-36)
2 #
2Pet. 1:17-18
O wange butanga ipahaika o Yesus wä ao o Petrus de o Yakobus deʼ aidodoto o Yohanis, imatingaka, o l̄okuil̄e moi magögurutil̄e. Manga lako mahimangoka o Yesus airupa ingali. 3Ai pakeanga idadi iarehe ileto-letongo. Koiwa naga moi yofoka-foka o duniaka nënanga yakunu yofoka hokogënanga mamagarehe. 4I paha yaruange iwinöninïki gënanga iwimäke o Yesus imä teke ade-ade de o Elia deʼ o Musa. 5De o Petrus wotemo o Yesusika, ”Bapa Guru, ngone nenangokadau duru hosanangi. Kayaoa de ngomi mihigoko o tau-tau hange: moi mangale Ngona Bapa, moi mangale o Musa, deʼ moi ohi mangale o Elia.” 6Imoteke madiai o Petrus wohi orikua okia kokiani wotemo, hababu ünanga deʼ ai dodiawo yahinoto duru magogiria yohawana.
7 #
Mat. 3:17; Mark. 1:11; Luk. 3:22 Ipaha o lobi yähawo önanga deʼ o lobino gënanga yoihene yato, ”Nënanga Ahi Ngohaka tïdora-dora. Niwihi gihene Unanga!” 8Tai-taiti önanga yatailako manga gilolitino, deʼ o nagona ma yä mäkeokaua genangoka dede önanga, sawaliua o Yesus dika. 9Maöraha önanga youti o l̄oku oka deya uku gënanga, o Yesus wäpoma önanga, ”Kamoi ikaö de uha niahingahu okia ngini niamäke-mäke kangano, nako o Nyawa manga Ngohaka wihi momikowahi o honengino.”
10Onanga ihingounu o behehongo gënanga, mä manga hidogoronaka mahirete önanga yomuläenge ima teke ade-ade okia madungutu o Yesus ”wowangokali o honengino”. 11#Mal. 4:5; Mat. 11:14 Ho önanga iwileha Unangika, ”Yadodoa ho o agama maguru-guru yotemo o Elia kokiani i hira woböa?”
12O Yesus wohaluhu, ”O Elia igoungu ihira woböa laʼ mangale wohidiai hagala moi-moi. Mä sarakia de o Nyawa manga Ngohaka ai hali? Hababu okia Ma Jou Ai Demo ma Buku magoronaka i tulihi Unanga aha watagongo ihühuha mangöe deʼ o nyawa iwihikauku? 13Mä Ngohi tinï temo nginika: O Elia woböaka, ma o nyawa iwidiai Unanga imoteke manga mau. Gënanga itiai imatero de i tuli-tulihoka Ma Jou Ai Demo ma Buku magoronaka mangale ai diri.”
O Yesus wihitogumu o ngohaka womatëngo iwï ngohamika o womaha madorou
(Mat. 17:14-21; Luk. 9:37-43a)
14Maöraha o Yesus deʼ yaruange iwinöninïki ima idulokali kamamoi de iwinöninïki mahomoa, önanga yämäke manga ngöe o nyawa genangoka. Yamuruono naga o agama maguru-guru ima teke ributu magogiriaka deʼ iwinöninïki o Yesus gënanga. 15Hoko gënanga o nyawa ge önanga iwimäke o Yesus, önanga yohëranga, ho ima popopäta iwïbuhuku Unanga. 16”Okia ngini nima koke leha de o agama maguru-guru gënanga?” o Yesus wäleha iwinö ninïkika.
17Womatëngo o nyawa manga ngöe manga hidogoronaka gënanga wohaluhu, ”Bapa Guru, ngohi ti ao ahingohaka Ngonaika Bapa. Unanga womou karana o womaha madorou iwingohamika. 18Nako o womaha gënanga iwïdubukika, airöehe ihiboha-boha o tonakuku, aiuru iabo, aiingiri iboriti, deʼ airöehe magahumu itirihi. Ngohi togahoko ininöninïki yaduhu o womaha madorou gënanga, mä onanga yakunua yadiai.”
19De o Yesus wätemo onangika, ”Goguleua ngini nënanga! Ngini igou-goungu o nyawa ningaku-ngakuua. Hiädono hokokia Ngohi kokiani togogere dede ngini deʼ tosabari nginika? Niao o ngohaka gënanga nengino!” 20Onangö iwi ao o ngohaka gënanga o Yesusika.
Hoko gënanga o womaha madorou gënanga iwimäke o Yesus, ënanga yadiai o ngohaka gënanga airöehe itopa-topa, hiädono o ngohaka gënanga woruba wolülulu o tonakika. Ai uru iabo. 21De ika o Yesus woleha aiamaika, ”Hokokia madëkana ünanga hokonënanga?”
”Unanga kai ete-etekohi!” ai ama wohaluhu. 22”Hara mangöeoka o womaha madorou gënanga ihidailako iwitöma ünanga deʼ o uku magoronauku iwitifa ekola o akeruku. Mä nako Bapa yakunu nomï riwo, nomodeke Bapa nomï dora ngomi deʼ nomï riwo ngomi!”
23”Okia nato? Nako Bapa yakunu?” o Yesus wohaluhu. ”Hagala mata-mata yakunu, mangale o nyawa yongaku!”
24Gila-gila o ama gënanga wopöaka, ”Jou, ngohi tongaku, mä ahi ngongaku ikuranga. Nohi riwo ngohi hupaya i holoi tongakuoli!”
25Maöraha o Yesus wämäke o nyawa manga ngöe muläenge yoböa imatoomu, Unanga wapareta o womaha madorou gënanga deʼ wotemo, ”O dopongono deʼ o mou mawomaha, Ngohi toni pareta ngona nohupu de o ngohaka nënanga deʼ uha hakali-kali nowohamoli aigoronaika!”
26O womaha madorou gënanga ipöaka, dahaö yadiai o ngohaka gënanga airöehe itopa-topa, ipaha ihupu de o ngohaka gënanga. O ngohaka gënanga iwi lega-lega hokä o mayeti hiädono mata-mata o nyawa yotemo, ”Unanga wohonengoka!” 27Mä o Yesus wasö aigiama deʼ wïriwo ünanga wïmomiki. O ngohaka gënanga womomiki.
28O Yesus o tauoka waikaka, iwinöninïki yaino imatëngo-tëngo Unangika deʼ yoleha, ”Okia mahababu ngomi miakunua mia duhu o womaha madorou gënanga?”
29O Yesus wohaluhu, ”O womaha madorou marupa hoko gënanga, mahomoa de o hubayanga, de madodagi okiali ma yakunua nia duhu.”
O Yesus wohi ade-adeoli mangale Ai honenge
(Mat. 17:22-23; Luk. 9:43b-45)
30O Yesus deʼ iwinöninïki yamal̄a o ngï gënanga deʼ ihi gila-gila manga dodagi yanonu o Galilea. O Yesus woluku o nyawa ihi öriki kiaka Unanga naga, 31hababu Unanga magogiriaka wädotoko iwinöninïki. ”O Nyawa manga Ngohaka aha iwi hilapahi o nyawa manga kuahaika,” hokogënanga o Yesus wato, ”deʼ Unanga aha iwi töma, mä o wange hangeoka Unanga aha womomiki!”
32Iwinöninïki imangaratiua okia wädotoko o Yesus, mä onanga yohawana iwi leha Unangika.
O nagona iholoi yolamoko?
(Mat. 18:1-5; Luk. 9:46-48)
33Onanga ima hiädono o Kapernaum makotaika. O tauoka yaikaka, o Yesus wäleha iwinöninïkika, ”Ngini okia nima koke leha o ngëkomo mahoanino kangano?”
34 #
Luk. 22:24
Onanga yohaluhua, hababu o ngëkomo mahoanino önanga imateke ributu mangale o nagona iholoi yolamoko. 35#Mat. 20:26-27, 23:11; Mark. 10:43-44; Luk. 22:26 O Yesus wogogeruku, daha wä ahoko yangimoi de yahinoto iwinöninïki gënanga. Unanga wätemo onangika, ”O nyawa womau wodadi madodihiraka, ünanga kokiani wodadi maböbobahaka deʼ kokiani wodadi mata-mata o nyawa walöleleani.” 36Ipaha o Yesus wal̄ë o ngohaka moi mai teteke, deʼ wadiai o ngohaka gënanga woma okoino önanga mata-mata manga himangoka. O Yesus wakololo o ngohaka gënanga deʼ wätemo iwinöninïkika, 37#Mat. 10:40; Luk. 10:16; Yoh. 13:20 ”O nyawa yätarima o ngohaka moi hokä o ngohaka nënanga karana Ngohi, mamangarati ihi tarima Ngohi. Deʼ o nyawa ihi tarima Ngohi, ünanga ka Ngohiua dika wohi tarima, mä witarimali Unanga wohi hulo-huloko Ngohi.”
O nagona inä lawanua ngone inahi böa ngoneino
(Luk. 9:49-50)
38De ika o Yohanis witemo o Yesusika, ”Bapa Guru, ngomi miwi mäke womatëngo waduhu o hetanga de tongona Bapa ani romanga. Deʼ ngomi miwïduhunu ünanga hababu ünanga ngone inoua.”
39Mä o Yesus wotemo, ”Uha niwï duhunu ünanga, hababu moiua o nyawa yadodiai ihëra-hëranga de Tongohi ahi romanga, yakunu gila-gila Ahi romanga yadadi dorou. 40#Mat. 12:30; Luk. 11:23 Hababu o nyawa ina lawanua ngone, mamangarati inahi böa ngone. 41#Mat. 10:42 Nio hohininga! O nyawa inihi oke-okere ngini karana ngini ma Koano Wohi hohalamati niwi ninïki, ünanga maraioka aha watarima ai hewa.”
O hali-o hali kiaka idadi o hababu o nyawa o baradoha yodiai
(Mat. 18:6-9; Luk. 17:1-2)
42”O nagona yodadi hababu moi o ngoha-ngohaka manga alu-aluhu nënanga yongaku okaua Ngohino, iholoi yaöa nako o helewo ibihi-bihi ihi gogulinga ihi dilikoino manga tomarino deʼ yä umo o ngötuku. 43#Mat. 5:30 Nako ani giama idiai ngona nobaradoha, natobiki ani giama gënanga! Iholoi yaöa ngona nowango de ma Jou Madutu de ani giama kamahononga, nakoino de ngona de ani giama hinotö nowohama o narakaika, ënanga gënanga o uku ikokakali. [44Dokengoka o uku yakunua ihonenge, deʼ o gaili yakunua ihonenge.] 45Deʼ nako ani l̄ou idiai ngona nobaradoha, natobiki ani l̄ou gënanga. Iholoi yaöa ngona nowango de ma Jou Madutu ani l̄ou mahononga koiwa, nakoino de ngona de ani l̄ou hinotö ini umo o narakaika. [46Dokengoka o uku yakunua i honenge, deʼ o gaili yakunua i honenge.] 47#Mat. 5:29 Nako ani lako idadi hababu ngona nobaradoha, natubalenge ani lako gënanga! I holoi yaöa ngona nowohama ma Jou Madutu ai Dunia ma Hungi, de anilako mahononga koiwa, nakoino de ngona de anilako hinotö iniumo o narakaika. 48#Yes. 66:24 Dokengoka o uku yakunua i honenge deʼ o gaili yakunua i honenge.
49O nyawa momoi aha yätebini de o uku, hokä o huhubaihi tebini de o gahi.
50 #
Mat. 5:13; Luk. 14:34-35 O gahi gënanga yaöa, mä nako idadi i akere, kayakunu i gahioli? Hoʼ, kokiani ngini hokä o gahi – ni wango nima komoteke deʼ nimahi teke dodiai.”
Currently Selected:
O MARKUS 9: TLB
Highlight
Share
Copy
Want to have your highlights saved across all your devices? Sign up or sign in
