O MARKUS 13
13
O Yesus wohi ade-ade mangale ma Jou ai Tau aha i kilianga
(Mat. 24:1-2; Luk. 21:5-6)
1Maöraha o Yesus wamal̄a ma Jou ai Tau, womatëngo iwinö ninïki wato, ”Bapa Guru, beika nolega o tau ima oko-okoino gënanga. Natailako nohi dodiai mahelewo. Goguleua marahai!”
2O Yesus wohaluhu, ”Ngona namäke o tau imahi goko-gokoino mapako-pako gënanga? O tau ima oko-okoino gënanga mahelewo aha kamoiö de i ma teke tapal̄ukua mangïoka. Mata-mata aha yaruba.”
O huha deʼ o aniaya
(Mat. 24:3-14; Luk. 21:7-19)
3Ipaha o Yesus woiki o Zaitun ma Doporonika, deʼ wogogeruku ima teke rihimanga de ma Jou ai Tau. Daha o Petrus, o Yakobus, o Yohanis, deʼ o Andreas yaino Unangino mangale imä teke ade-ade imahi teke dodiai. 4”Beika Bapa nohi ngahu ngomino,” önanga yotemo Unangika, ”Muruonoka mata-mata gënanga aha idadi? Deʼ o nonako-nonako okia hokä i hi dumutu maöraha yadonoka?”
5”Nimahi dodiai,” o Yesus wohaluhu, üha hiädono ngini inï tipu. 6O nyawa manga ngöe aha yoböa de yapäke Ahi romanga deʼ yotemo, ’Ngohi nanga una!ʼ daha wätipu manga ngöe o nyawa. 7Nako ngini ni ihene o pasangi mailingi deʼ o parangi ma abari, uha nihawana. O hali-hali gënanga kokiani idadi, mä genanga koiwa mamangarati o kiamati maöraha yadonoka. 8O hoana de o berera moi aha yäparangi yälawani o hoana de o berera mahomoa. O negara moi aha yaino yälawani o negara mahomoa. Okiaka dika aha idadi o ohu deʼ o habirokata. Mata-mata gënanga daha mamuläenge dika, hokä o hiri o ngoheka momatëngo mamäo, nako momau ami ngohaka ima kil̄au.
9 #
Mat. 10:17-20; Luk. 12:11-12 Ngini kokiani nimahi dodiai, hababu ngini aha inï tagoko deʼ inï tatauru o juru hakimika. Ngini aha inï gohara o pupuji matauoka. Ngini aha inï ao nima teke rihimanga de yokokuaha deʼ o kokoano karana ngini nihinö ninïki. Deʼ genangala nia öraha mangale nihi döaka o hakihi mangale Ngohi onangika. 10O Abari ma Oa ma Jou Madutuino gënanga kokiani ihi barihi ihira hagala o hoana de o bereraika. 11Deʼ nako ngini inï tagoko deʼ inï ao o pengadilanika, uha nihawatere mangale okia kokiani ngini nitemo. Nako yadonoka maöraha mangale ni ade-ade, nia hetongo dika okia inihi ngahu nginika to ëna ma orahoka. Karana o demo-demo kiaka ngini nihi demo gënanga, ganga tinginiua nia demo-demo, duga-duga i böa ma Jou Madutu ai Womahoka de yaino. 12O nyawa aha yädiai o huha manga dodotika mahirete laʼ mangale yätoma. Genangö aha idadi o ama de o ngohaka mahi dogoronaka. O ngoha-ngohaka aha yälawani manga ayo de manga ama, deʼ yahi lapahi önanga laʼ mangale yätoma. 13#Mat. 10:22 Mata-mata o nyawa, aha inï dohata ngini, karana ngini nihinö ninïki. Mä o nyawa yoto tongohono hiädono mabaha, aha yahihalamati.”
O dorou ya hi wö wede-wedere
(Mat. 24:15-28; Luk. 21:20-24)
14 #
Dan. 9:27, 11:31, 12:11 ”Ngini aha nia mäke ’O Dorou yahi Wö wede-wedere’ ima okoino o ngï ilara-laranga mangale ëna. (O dulihi madungutu yobasa-basaika: Nia tailako okia mamangarati!) O öraha gënanga o nagona naga o Yudea madaeraoka kokiani yopiringana i l̄oku-l̄okuil̄e. 15#Luk. 17:31 O nagona naga o katu mal̄okuoka uha youti deʼ yowohama o tau magoronaika mangale yal̄ë manga kia naga moi. 16O nagona o dumuleoka uha ima kilioro mangale yal̄ë manga juba. 17O ngoheka o ngohaka ihi ao-ao deʼ o ayo kaya huhuohi manga ngohaka, duru yäporohono o wange gënanga! 18Nimä niata hupaya o hali-hali gënanga uha idadi o awa-awana maöraha. 19#Dan. 12:1; Him. 7:14 O wange yobö borohonoka gënanga aha naga o huha moi komaiwahi idadi kama dero ma Jou Madutu wohi dadi o dunia hiädono o öraha nënanga, deʼ komaiwaka aha idadioli. 20Ade-ade nako ma Jou Madutu watipokoua maöraha gënanga done kamoiö de koiwa naga o nyawa yohalamati. Mä karana Ai umati, ma Jou Madutu watipoko maöraha.
21Ma orahoka gënanga nako o nyawa womatëngo winï temo nginika, ’Niwï lega, ma Koano Wohihohalamati gënanga naga nenangoka!ʼ ekola ’Niwï lega, Unanga naga dokengoka!ʼ – uha niwi ngaku o nyawa gënanga. 22Hababu wohihohalamati madutua deʼ o nabi-nabi madutua aha yoböa. Onanga aha yodiai o manarama-manarama biaha-biahaua, deʼ i hëra-hëranga mangale yotipu nako yakunu, ma Jou Madutuö ai umati. 23Hoʼ, nimä göa-göana! Mata-mata gënanga Ngohi tinihi ngahuoka nginika ihira de o hali gënanga idadi.”
O Nyawa manga Ngohaka ai böa
(Mat. 24:29-31; Luk. 21:25-28)
24 #
Yes. 13:10; Yeh. 32:7; Yl. 2:10, 31, 3:15; Him. 6:12 ”Ipaha de o huha maöraha gënanga, o wange malako aha idadi i huhutu, deʼ o mede itararonokaua. 25#Yes. 34:4; Yl. 2:10; Him. 6:13 Hagala o murumö aha o dihangoka de i tifa, deʼ yokokuaha o gitawa maamokoka aha idadi yoburakituku. 26#Dan. 7:13; Him. 1:7 O öraha gënanga o Nyawa manga Ngohaka aha iwi mäke woböa o lobi-lobi magoronaka deʼ Ai kuaha i amoko deʼ Ai mulia. 27Unanga aha wahuloko o malaekat-malaekat mangale yätoomu Ai umati wä iri-irikoka o dunia malibuku iatino, o dunia mabahaka hiädono o dihanga mabaha-bahaika.”
O dodötoko o ara magotaino
(Mat. 24:32-35; Luk. 21:29-33)
28”Nima l̄ë o dodötoko o ara mautuino. Nako majaga-jaga i ijo deʼ yabole, deʼ imuläenge itubo, ngini nia näko o hiwara maöraha itigioka. 29Hoko genangoli nako ngini nia mäke o hali-hali gënanga idadi, ngini nia näko duru itigioka maöraha. 30La nia näko! O nyawa yowango-wango o öraha nënanga yohonengowahi mata-mata, okia naga i dädadi mata-mata nënanga aha idadi. 31O dihanga deʼ o dunia aha i hihanga, mä ahi demo i gögogere kahi ado-adonika.”
Moiua ihi öriki ma wange deʼ ma jam
(Mat. 24:36-44)
32 #
Mat. 24:36
”Ngaro hoko gënanga, moiua o nyawa yanäko ma wange hokokia ekola ma jam hokokia. O malaekat-malaekat o horogaka yanäkoua deʼ ma Ngohaka makowali, duga-duga ma Ama dika wanäko. 33Hoʼ ngini kokiani nimä göa-göana deʼ nima hitiari, hababu ngini nia näkoua maöraha hokokia. 34#Luk. 12:36-38 Madodagi hohi tero o nyawa womatëngo wamal̄aika ai tau daha woiki o ngï magögurutika. Unanga wähuloko iwilö leleani yögöana deʼ yatatoro ai tau deʼ wohi döaka o manarama onangika o nyawa moi-nyawa moi. O ngorana magogoanika, ünanga wohi behehongo hupaya wögöana wohi dodiai. 35Hababu gënanga ngini kokiani nimä göa-göana, hababu ngini nia näkoua muruonoka o tau madutu gënanga aha woma kilioro – yakunu o bobimaoa, yakunu o hutu gorona, yakunu tigi-tigi itebini ekola yakunu o wange iböa. 36Nako ünanga i todokanino woböa, uhala hiädono ünanga winï mäkeino ngini nia gogiokoka. 37Okia tahetongo nënanga nginika, nia hetongoli o nyawa mata-mataika: nimä göa-göana!”
Currently Selected:
O MARKUS 13: TLB
Highlight
Share
Copy
Want to have your highlights saved across all your devices? Sign up or sign in
