O MARKUS 12
12
O hitotero mangale yomo manarama o angguru madumuleoka
(Mat. 21:33-46; Luk. 20:9-19)
1 #
Yes. 5:1-2
I paha o Yesus womuläenge woade-ade de o hitotero o imam-imam manga häeke, o agama maguru-guru deʼ o Yahudi manga tutudaika. O Yesus wotemo, ”Naga womatëngo, wödatomo aiangguru madumule, daha wödatomo o pagara yakilolitino. Iböto gënanga ünanga wohaiti o guhu, mangale o angguru madedeo mapakakaha, daha ünanga wohigoko yomomanarama manga ngï. Ipaha de gënanga ünanga wohihewa o angguru madumule gënanga yamuruono naga yomomanaramika, daha womä joboka o berera mahomoaika. 2De maorahoka o angguru mahohoko i pagele, madumule madutu gënanga, wihi dingoto womatëngo wïlö leleani, o dumule yomomanaramika gënanga, mangale watarima aihidoku. 3Mä yomomanarama gënanga iwitagoko wolöleleani gënanga. Ipaha önanga iwigohara, daha iwihuloko wolio de ai giama ihomoa. 4Daha o dumule madutu gënanga wihidingotoli womatëngo wolöleleani mahomoa, daha yomomanarama gënanga yagohara wolöleleani gënanga aihäeke, daha iwi duhu de iwi doa-doana. 5O dumule madutu gënanga wihidingotoli womatëngo wolöleleani mahomoa. Mä onanga iwitoma wolöleleani gënanga. Deʼ hokogënanga kai taurika önanga yahidiai manga ngöe yolöleleani mahomoali: naga yä gohara deʼ nagaö yätoma. 6Ka o nagonali madumule madutu gënanga, öraha nënanga yakunu wahidingoto? Duga-duga mahou woma tëngokahi, enagënanga aingohaka mahirete wïhohininga. Hoʼ mabaha ünanga wihi dingoto aingohaka gënanga o dumule yomomanaramika gënanga. ’Marai ahingohaka aha iwihoromati,’ aihiningaka. 7Mä yomomanarama gënanga iwimäke waino, de imaketemo, ’Ne ünanga mapuhaka madutu. Niaino ngone hitoma ünanga, hupaya ngone hamäke aipuhaka.’ 8De mangohaka gënanga iwitagoko daha iwi toma. Ai mayeti önanga yaumo o dumule gënanga maporetika.”
9Daha o Yesus wäleha, ”Okia aha wodiai o dumule madutu gënanga? Marai ünanga aha woböa deʼ wätoma yomomanarama gënanga, daha wohilapahi o dumule gënanga yomomanarama mahomoaika. 10#Mzm. 118:22-23 Ngini marai niabasaoka o ayat nënanga Ma Jou Ai Demo ma Buku magoronaka,
’O helewo yapäke-päkeua o tau yododiai
i dadioka o helewo o liate mahohol̄e.
11NĂ«nanga ma Jou aimanarama;
duru kahä hailoa!ʼ ”
12De o Yahudioka manga balu-baluhu yoihene o hitotero gënanga, ihidailako iwitagoko o Yesus, hababu önanga yanäko o hitotero gënanga o Yesus wohidungutu onangika. Mä önanga yämodongo o nyawa yowöe-wöe. Hoʼ, önanga yoiki iwimal̄a o Yesus.
O soungu mabobangu maloleha
(Mat. 22:15-22; Luk. 20:20-26)
13Yamuruono naga o Farisi manyawa deʼ yamuruono naga o Herodes aidoomuino yähuloko yalingiri o Yesus aihowono, de o loleha-o loleha. 14Onanga yaino o Yesusino deʼ yotemo, ”Bapa Guru, ngomi mia näko Bapa nomaoko nototiail̄e, deʼ nö legaikaua o nagona dika manga damäke. Bapa nodotoko nohitotiaika ima däene de ma Jou Madutu aimau itike o nyawaika, hababu Bapa Ngona napulonua o rupa. Aa, beika Bapa nahëtongo ngomino, ’I moteke nanga agama madatoro, kayakunu hofangu o soungu ma Kaisarika ekola yakunua? Kokiani ngone hofangu o soungu gënanga ekola ngaro uha?ʼ ”
15O Yesus wohiöriki manga toba lawani. Unanga wohaluhu, ”Okia mahababu ngini nimau nihï budi Ngohi? Beika nihihi matoko Ngohino o tiwi haäka o gahumu moi.”
16De önanga ihidöaka Unangika o tiwihaäka o gahumu moi. Daha o Yesus wäleha, ”O naguna ai dulada deʼ ai romanga nënanga?”
”Ma Kaisar,” önanga yohaluhu.
17”Aa, nako hoko gënanga,” o Yesus wato, ”nihi döaka ma Kaisarika okia naga toma Kaisar, deʼ ma Jou Madutuika okia naga to ma Jou Madutu.” Onanga yohëranga yoihene Ai bobaluhu.
Yohonengoka de yomomiki maloleha
(Mat. 22:23-33; Luk. 20:27-40)
18 #
Kis. 23:8
Yamuruono naga o Sadukioka manga doomuino yoböa o Yesusika. (Onanga manga doomu ganga manga damäke, o nyawa yohonengoka aha koyo momikokaua.) 19#Ul. 25:5 ”Bapa Guru,” önanga yotemo o Yesusika, ”O Musa wotulihi o tita nënanga itike ngone: ’Nako o nauru womatëngo wohonenge deʼ unanga aingohaka koiwa, done aidodoto kokiani wokawingi de ngoi fäo, hupaya wohidöaka o ngohaka o nyawa wohone-honengokaika gënanga.’ 20Idadioka naga yatumidi o riadodoto. Mariaka wokawingi, ipaha wohonenge aingohaka koiwa. 21Ipaha aidodotuku wokawingi de ngoi fäo, mä unangö wohonenge aingohaka koiwa. Ima tero idadioli de aidodoto aidodotuku 22de gila-gila hiädono yatumidö. Mabaha mangoheka gënanga mahirete kamo honenge. 23O nyawa yohone-honenge yomomikoli toëna mawangeoka, o naguna ngoi hekata o ngoheka gënanga? Hababu yatumidö yokawingoka de muna!”
24O Yesus wohaluhu, ”Ngini niapikiri ihowono. Hababu ngini nimangaratiua Ma Jou Ai Demo ma Buku, de ma Jou Madutu ai kuaha ma nimangaratiua. 25Hababu maöraha okia o nyawa yohone-honengoka yomomikoli, önanga aha yokawingokaua, duga-duga önanga aha yowango hokä o malaekat o horogaka. 26#Kel. 3:6 Deʼ mangale o nyawa yohone-honenge yomomikoli, komaiwahi ngini nia basa o Musa ai buku magoronaka, yadäene o momo de o gota ma alu-aluhu i toka-tokara gënanga? O ayat-ayat magoronaka gënanga itulihi ma Jou Madutu wïtemo o Musaika, ’Ngohi o Abraham ai Jou Madutu, o Ishak ai Jou Madutu deʼ o Yakub ai Jou Madutu.’ 27Ma Jou Madutu gënanga o nyawa yohone-honengua manga Jou Madutu. Unanga o nyawa yowango-wango manga Jou Madutu. Ngini duru nia pikiri ihowono!”
O tita ilamo-amoko
(Mat. 22:34-40; Luk. 10:25-28)
28 #
Luk. 10:25-28
Daha o agama maguru womatëngo waino wo hi gihene o Yesus de o nyawa Saduki manga doomuino gënanga manga ade-ade. O agama maguru gënanga wamäke o Yesus wäbaluhoka o nyawa ge önanga kayaoa. Ika de ünanga woleha o Yesusika, ”O tita okia duru i lamoko de hagala o tita?”
29 #
Ul. 6:4-5
O Yesus wohaluhu, ”O tita madodihiraka, genangala: ’Ni ihene, hei o Israel manyawa! Nanga Jou Madutu, ma Jou gënanga woma tëngo-tëngoka. 30Nïdora ani Jou Madutu de ani hininga magahumu, de ani jiwa magahumu, de ani akali magahumu deʼ de hagala ani kuata.’ 31#Im. 19:18 O tita mahinotoka ena ganga: ’Nädora ani dodiawo, hokä ngona nödora ani diri mahirete.’ Koiwaka o tita mahomoa iholoi i lamoko de o tita hinoto gënanga.”
32 #
Ul. 4:35
Daha o agama maguru gënanga wïtemo o Yesusika, ”Duru yakoronaka, Bapa Guru! Igoungu itiai okia Bapa nahëtongo: Ma Jou Madutu woma tëngo-tëngoka, deʼ koiwa naga ma Jou Madutu mahomoahi. 33#Hos. 6:6 Deʼ o nyawa kokiani iwï dora ma Jou Madutu de manga hininga magahumu de manga akali ma gahumu deʼ de hagala manga kuata. Deʼ unangö kokiani wä dora ai dodiawo hokä ai diri mahirete. Gënanga i holoi yaoa ngaro ihi huba o huhuba yatuhu-tuhuku deʼ o huhuba-huhuba mahomoahi ma Jou Madutuika.”
34O Yesus wamäke o agama maguru gënanga duru yaoa wohaluhu. Deʼ o Yesus wïtemo unangika, ”Ngona ngade-ngade nodadi o gegetongo ma Jou Madutu ai umati.”
I böto de gënanga moi okaua o nyawa yobaranioli iwi leha o Yesusika.
O Koano Wohi hohalamati maloleha
(Mat. 22:41-46; Luk. 20:41-44)
35Magogiriaka wodotoko ma Jou ai Tauoka, o Yesus woleha, ”Sarakia ho o agama maguru-guru yakunu yahetongo ma Koano Wohihohalamati gënanga o Daud ai difauku? 36#Mzm. 110:1 Ena hioko o Daud mahirete – karana ma Jou Madutu ai Womaha iwihi ngahu – wotemo,
’Ma Jou wotemo ahi Jouika:
nogogeruku ahi nirakoka
hiädono Ngohi tadiai Ani haturü-haturü
Ngonaika ima ponu.’
37Hoʼ nako o Daud wïhëtongo ma Koano Wohihohalamati gënanga ’Ma Jou’, sarakia yakunu ünanga o Daud ai difauku?”
O hohininga hupaya imahi dodiai o agama maguru-guruika
(Mat. 23:1-36; Luk. 20:45-47)
O nyawa yowöe-wöe gënanga naga ma Jou ai Tauoka gënanga yosanangi yoihene o Yesus wodotoko. 38Unanga wätemo onangika, ”Nimahi dodiai o agama maguru-guruika. Onanga yöigo yotagi-tagi de manga juba ikurutuku, deʼ yöigo yähoromati o paha-paharoka. 39Onanga yöigo o ngï iho horomati o pupuji matauoka deʼ o rame-rameoka. 40Onanga yätipu o bobobao deʼ yäora manga tau. Deʼ mangale hitamunu manga dorou gënanga, önanga yohubayanga yakuru-kurutu. To önanga manga hukumanga ahaö i tubuho!”
O ngoheka o bobao ami huhuba
(Luk. 21:1-4)
41Maöraha wogogeruku womahi totäna de o huba mangï ma Jou ai Tauoka, o Yesus wälega-lega o nyawa yönöa manga tiwi o huba mangïuku gënanga. Manga ngöe o nyawa yokaya-kaya yönöa mangöe o tiwi; 42daha momatëngo o bobao momö mihikini munangö moböa. Münanga mönöa o tiwi tabaga gahumu hinoto, enagënanga o tiwi magilianga maija mahuhutulu. 43Daha o Yesus wä ahoko iwinö ninïki, daha wätemo onangika, ”Nio lega nihi dodiai nënanga: O bobao momö mihikini gënanga mönöa o huba mangïuku gënanga iholoi iwöe de yönöa-nöa mata-mata o nyawa mahomoa gënanga. 44Hababu önanga mata-mata i hi döaka de manga arata maboloi. Mä o bobao gënanga ngarokö duru mohuha mohi döaka mata-mata okia naga munangoka – ima korona de okia münanga moparalu mngale ami wowango.”
Currently Selected:
O MARKUS 12: TLB
Highlight
Share
Copy
Want to have your highlights saved across all your devices? Sign up or sign in
