YOHANES 11
11
Apapaten Lazarus
1Sangkatou aranne i Lazarus uatana'a su Betania su sampunna ringannu tuṛṛangnge i Maria wuṛṛu i Marta. 2I Maria eteudde wawine apan nallal᷊innu lana mawangngi su ledda Mawu Yesus, wuṛṛu see niapun uta'i tou. Su sambau allo i Lazarus nirumada'a. 3Ruang katou tuṛṛangnge namasingkatta Mawu Yesus, “Mawu, tuṛṛangngi yami apan arangnguannu Mawu udde marada'a.”
4Napawe Mawu Yesus naaringikka watti'a udde, i Tou nabbisara, “Rada'a indi tawe maapate. Indi mariaddi tadea'u Ruata wantuhanna, wuṛṛu tadea'u ana waugu udde Ana'u Ruata lai iapaawantuga.”
5Mawu Yesus marangngu si Marta, si Maria wuṛṛu si Lazarus. 6Arawe napawe Mawu Yesus naaringikka watti'a manungku Lazarus marada'a, i Tou natana'a rua allo lai su tampane. 7Wua'udde i Tou nabbisara su mallal᷊aṛṛenggen-Ne, “Wette i ite mabelengnga su Yudea.”
8I mangitou sinumimbakka, “Iamangnga Huru, wakkute tanginna manga taumatan Yahudi ma'apulu manuntungngu watu su Iamangnga see orassa indi Iamangnga maapulu mabelengnga apia poiaroddi?”
9“Wal᷊inewe allo al᷊annune mapul᷊o dua su oranne?” Wisara Mawu Yesus. “Taumata apan u'amatta su tempo allo, tawe matara ana waugu i tou ma'asilo semakku runia indi. 10Arawe taumata apan u'amatta su tempo ṛabbi, mattara ana waugu tawe asasemakka si tou.” 11Ete aroddi unnu Mawu Yesus. Wua'udde i Tou nabbisara apia, “Haweng kite i Lazarus mattiille, arawe I Ya'u sarun inai mamu'o si tou.”
12Manga mallal᷊aṛṛenggennu Mawu Yesus nabbisara, “Mawu, amungkangngu Lazarus mattiilla, ṛaddoite i tou sarun mapia.”
13Pandumannu Mawu Yesus eteudde manungku i Lazarus natete. Arawe i mangitou massunna manungku pandumannu Mawu Yesus udde Lazarus mattiilla wiasa. 14Ana waugu udde Mawu Yesus nabbisara si mangitou ringannu masema-semakka, “I Lazarus natete. 15Arawe i Ya'u lulluassa lai ana waugu i Ya'u tawe poiaroddi, ana waugu mappianne si yamiu, tadea'u i yamiu wotongnge mangngimanna. Wette i ite inaite orassa indi ringanni Lazarus.”
16I Tomas isassago “I Ṛindua” nabbisara su manga ringanne mallal᷊aṛṛenggennu Mawu Yesus, “Wette i ite tumantalongnga, salaiwe i ite mate su sambau ringanni Tou!”
Apan mapaawiakka apia wuṛṛu mangngonggolu wiakka
17Napawe Mawu Yesus na'omate su tampa udde, i Lazarus appate allo al᷊annune nilabingnga. 18Betania maranin Yerusalem, itatakasere tallu kilo meteṛṛe araune. 19Manambo taumatan Yahudi nirumanta nattembo si Marta wuṛṛu si Maria malluassa naungngi mangitou ana waugu apapaten tuṛṛangnge.
20Napawe i Marta naaringikka Mawu Yesus nirumanta, i tou sinumabangnga nanal᷊oho Mawu Yesus, arawe i Maria natana'a su wal᷊e. 21Wisara Marta su Mawu Yesus, “Mawu, wuṛṛu Mawu isindi su orassa udde, asinungka tuṛṛangku tawe nate. 22Arawe aroddi i ya'u masingkatta manungku orassa indi lai Ruata sarun mangagillu apa apan radorongannu Mawu si Tou.”
23“Tuṛṛangngu sarun mabbiakka apia,” wisara Mawu Yesus si Marta.
24I Marta sinumimbakka, “I ya'u masingkatta i Lazarus sarun mabbiakka apia napawe taumata nate iapawangunna su Allong Kiamatta.”
25“Ete i Ya'u apan mangngonggolu wiakka wuṛṛu mapaawangunnu taumata nate,” wisara Mawu Yesus si Marta. “Taumata apan mangngimanna si Ya'u sarun mabbiakka, salaiwe i tou natete. 26Wuṛṛu taumata wiakka apan mangngimanna si Ya'u sarangkal᷊o'engnge, i tou tawe mate. Mangngimannawe i'o su olangnge udde?”
27“Mawu,” sasimbakki Marta, “i ya'u mangngimanna Mawu Ana'u Ruata, Ratum Punnu Sal᷊amatta apan sarun rumanta su runia indi.”
Mawu Yesus nilumuai
28Napawe i Marta nabbisara aroddi, i tou inaite namago si Maria, tuṛṛangnge wuṛṛu sinumal᷊imburungnga si tou, “Iamangnga Huru isindite; i Tou ma'iwal᷊onu.” 29Naaringikka udde, i Maria mal᷊iha-l᷊ihakka nabuatta see inaite naisasomba Mawu Yesus. 30Tempo udde, Mawu Yesus taambe sinumutta su ampungnga. I Tou ta'e su tampa Marta naisasomban Tou. 31Manga taumatan Yahudi apan tantal᷊anna mallimbatta naungngi Maria su wal᷊e, naasilo si Maria nabbuatta wuṛṛu mal᷊iha-l᷊ihakka sinumabangnga; nariaddi i mangitou inai lai tinumantalongnga si tou, ana waugu i mangitou massunna manungku i tou inai su lal᷊abinganna lumuai.
32Napawe i Maria na'omate su tampa Mawu Yesus wuṛṛu naasilo si Tou, i Maria inumal᷊intuda su saruannu Mawu Yesus wuṛṛu nabbisara, “Mawu, amungkangngu Mawu isindi su orassa udde, asinungka tuṛṛangku tawe nate.”
33Napawe Mawu Yesus naasilo si Maria lulluai, wuṛṛu manga taumatan Yahudi nirumanta sangkaṛṛindo'i Maria udde lai lulluai, naung-Nge nasusa, wuṛṛu i Tou niasiloanna mangke natuno atonna. 34Ne i Tou naiwal᷊ote si mangitou, “Suapa i yamiu nallabingngi tou?”
“Wette pa'ellega, Mawu,” sasimbakki mangitou.
35See Mawu Yesus nilumuai. 36Ne manga taumatan Yahudi udde nabbisara, “Pa'ellega tawe hampa darangngu-Ne si Lazarus!”
37Arawe pia su wallatti mangitou apan nabbisara, “I Tou na'ola'a taumata wuta naasilo, anio i Tou tawe naawa'ungnga tadea'u i Lazarus tawe mate?”
I Lazarus niapaawiakka apia
38Mawu Yesus lembo natuno naung-Nge, see inaite su lal᷊abinganna. Lal᷊abinganna udde sambau loṛṛangnga apan nitaapannu watu wahewa.
39“Irua'a watu udde,” unnu Mawu Yesus.
I Marta, tuṛṛangngu taumata nate udde sinumimbakka, “Arawe Mawu, i tou appate allo nilabingnga. Hal᷊urune mawukku'e!”
40Mawu Yesus nabbisara si Marta, “Wal᷊inewe suete niwal᷊o-U si'o: amungkangngu i'o mangngimanna, i'o sarun maasilo aroddi ahewalle taṛṛinon Ruata!” 41Ne i mangitou nangiruten batu udde. See Mawu Yesus naningngara watukku langitta wuṛṛu nabbisara, “Aadiangkamanna, Iamangnga, ana waugu I'o suete naddaringikka si Ya'u. 42I Ya'u masingkatta I'o sidutu uararingikka si Ya'u, arawe I Ya'u mabbisara indi, hunane su manga taumata isindi; tadea'u i mangitou mangngimanna manungku ete I'o apan nandolo-U.” 43Napawe suete nabbisara aroddi, Mawu Yesus inumui ringannu tingikka ma'ikkatta, “Lazarus, sabbangke!” 44Ne sinumabbangke taumata apan natete udde. Lima wuṛṛu leddane ta'e papi'unannu kaengnga kafan, wuṛṛu hatine tataapannu kaengnga tataappa hati. “Wu'ate kaengnga udde; tadea'u i tou wotongnge umamatta,” unnu Mawu Yesus su manga taumata isudde.
Ammul᷊annu taumata lumawangnga Mawu Yesus
(Mat. 26:1-5; Mrk. 14:1-2; Luk. 22:1-2)
45Manambo manga taumatan Yahudi nirumanta mattembo si Maria, nangimanna Mawu Yesus su tempo i mangitou naasilo arariaddianna udde. 46Arawe manga pira su wallatti mangitou inaite ringannu taumatan Farisi wuṛṛu nangalae apa apan suete niola'u Mawu Yesus. 47Ana waugu udde manga taumatan Farisi wuṛṛu manga imam tembonanne naammulla ringannu Mallaṛṛuungngu Agama. I mangitou nabbisara, “I ite ṛinone ma'ola'a apa? Taumata indi ma'ola'a anambon al᷊aṛṛindu'a! 48Amungkangngu i ite sidutu mamalan Tou arendi, manambo taumata sarun mangngimanna si Tou. Wuṛṛu panginsueanne tembonannu Roma sarun rumanta wuṛṛu manggohakku Wal᷊e Mawu wuṛṛu anambon walahanni ite!”
49Sangkatou su wallatti mangitou apan aranne Kayafas, imam wahewa su tonna udde, nabbisara, “I yamiu waggan apa-apa. 50Apa i yamiu tawe maatutukka manungku ana waugu tumanangnge, mappianne sangkatou mate wuassu al᷊awo'u walahanna indi maṛṛimunsa'a?” 51Su ṛinone i Kayafas nabbisara aroddi, wal᷊ine wuassu ṛingiranne sassane. Arawe ana waugu i tou sangkatou imam bahewalla tonna udde, i tou namasingkatta manungku Mawu Yesus sarun mate hunane tumba'u su walahannu Yahudi. 52Wuṛṛu wal᷊ine tumba'u su walahannu Yahudi sassane, arawe hunane lai mangammula wuṛṛu manggemonnu manga al᷊aṛṛana'u Ruata apan uasal᷊iawukka.
53Nanattakka allo udde manga tembonannu Yahudi na'irete mamate Mawu Yesus. 54Ana waugu udde Mawu Yesus tate nattingkapasilo su saruannu awada'alla su pattangngannu taumatan Yahudi. I Tou nanantangken Yudea, see inaite watukku soa aranne Efraim marani wadda'a. Isudde i Tou natana'a su sampunna ringannu mallal᷊aṛṛenggen-Ne.
55Tempo udde maranite Allo Wahewam Paskahn Yahudi. Manambo taumata wuassu manga ampungnga inai watukku Yerusalem mallaghum pamamaresi wadangnga tantal᷊anna taambe ramea udde. 56I mangitou maddea'a Mawu Yesus, wuṛṛu su tempo uaammulla su Wal᷊e Mawu, i mangitou naiwal᷊o sangkatou ringannu waine. “Ereapa addapannu? Asinungka i Tou tawe rumanta su ramea indi.” 57I mangitou nabbisara aroddi ana waugu manga imam tembonanne wuṛṛu manga taumatan Farisi suete namarenta manungku taumata apan masingkattu tampa Mawu Yesus, ṛinone mabal᷊o tadea'u i Tou wotongnge sametanna.
Currently Selected:
YOHANES 11: LAITLD
Highlight
Share
Copy
Want to have your highlights saved across all your devices? Sign up or sign in
