YOHANES 12

Mawu Yesus niseboṛṛannu lana mawangngi su Betania

(Mat. 26:6-13; Mrk. 14:3-9)

1Annummu allo tantal᷊anna taambe Allo Wahewam Paskah, Mawu Yesus inaite su Betania. Su soa udde uatana'a i Lazarus apan suete niapawangunna wuassu papate. 2Poiaroddi Mawu Yesus sinaruanni mangitou, wuṛṛu i Marta nangimbe. I Lazarus wuṛṛu manga raho ua'ianna su sampunna u'anna ringannu Mawu Yesus. 3Wua'udde i Maria nirumanta uaapiddu iraṛṛangngo mal᷊oara su liteṛṛe lana mawangngi narwastu apan masagada atonna aregane. I Tou nanebokku lana udde su ledda Mawu Yesus, see niapun uta'i tou. Ahewallu wal᷊e udde nabal᷊i mawangngi ana waugu hal᷊urun lana udde. 4Arawe Yudas Iskariot, sangkatou su wallattu mallal᷊aṛṛenggennu Mawu Yesus – apan wua'udde nandal᷊eo si Tou – nabbisara, 5“Anio lana mawangngi udde tawe niwal᷊u'a ringannu aregane tallu ṛasutta roitta sal᷊a'a, wuṛṛu roinne ionggolla su taumata asiangnga?” 6I Yudas nabbisara aroddi wal᷊ine ana waugu i tou tuttundaallu taumata asiangnga, arawe ana waugu i tou taṛṛa ta'o. I tou masokka manna'o roitti mangitou wuassu pangadoannu roitta apan uaraddo si tou.

7Arawe Mawu Yesus nabbisara, “Wala'e wawine udde! I tou na'ola'a indi hunan allo pallabingang-Ku. 8Taumata asiangnga sidutu su wallatti yamiu, arawe i Ya'u tawe.”

Ammul᷊annu taumata lumawanna si Lazarus

9Manambo taumatan Yahudi naaringikka manungku Mawu Yesus poi su Betania, nariaddi i mangitou inaite lai poiaroddi. I mangitou inai tawe tumba'u ana waugu Mawu Yesus. Arawe ana waugu i mangitou lai maapulu ma'ellega si Lazarus apan suete niapaawiakki Tou wuassu papate. 10Ana waugu udde manga imam tembonanne ma'apulu lai mamate si Lazarus; 11ana waugu ete i tou naanambo taumatan Yahudi nanantangngi mangitou, wuṛṛu nangimanna Mawu Yesus.

Mawu Yesus sinumutta su Yerusalem ringannu awawantuga

(Mat. 21:1-11; Mrk. 11:1-11; Luk. 19:28-40)

12Su allo tiṛṛabbine manga taumata apan suete nallaghum Paskah, naaringikka manungku Mawu Yesus tantal᷊anna u'amatta matuddan Yerusalem. 13Ne i mangitou nanappo manga rongngu palem see inaite nanansomakka si Tou, lapiddu u'ui, “Paddalote Ruata! Inal᷊amatanna i Tou apan nirumanta ringannu arannu Mawu. Nial᷊amatanna Ratun Israel!”

14Mawu Yesus naasomba sambau keledai saṛṛen tumuwo wuṛṛu sina'eanni Tou. Natipusse apa apan uawoṛṛetta sulal᷊ummu Wuke Susi:

15“Arie pa'ata'utta, sinangiannu Sion!

Pa'ellege Ratunu nirumanta,

uasa'e sambau keledai saṛṛen tumuwo!”

16Su tempo udde manga mallal᷊aṛṛenggennu Mawu Yesus taambe naasunna sarangkanambone udde. Arawe napawe Mawu Yesus niapaawantuga ringannu papate-Ne, wakkute udde i mangitou naanaungnga manungku apa apan niola'u manga taumata si Tou uawoṛṛette sulal᷊ummu Wuke Susi su ola'i Tou.

17Manga taumata apan uasemodda su tempo Mawu Yesus namago si Lazarus niapasabangnga wuassu lal᷊abinganna wuṛṛu namangunna si tou wuassu papate, sidutu mattiala su olangnge udde. 18Ana waugu udde taumata nambo inaite ringannu Mawu Yesus ana waugu i mangitou naaringikka manungku ete i Tou apan na'ola'a al᷊aṛṛindu'a udde. 19Ne manga taumatan Farisi uawawisarate sangkatou ringannu sangkatou, “I ite tawe mapa'ola'a apa-apa! Pa'ellege, anambon lal᷊oṛṛon runia uatantalongnga si Tou!”

Manga pira taumatan Yunani maddea'a Mawu Yesus

20Su wallattu manga taumata apan inai su Yerusalem mattaṛṛamawu su tempon ramea udde pia lai manga pira taumatan Yunani. 21I mangitou nirumanta ringanni Filipus wuṛṛu nabbisara, “Tuṛṛangnga, amungkangngu wotongnge, i yami maapulu maisasomba Mawu Yesus.” (I Filipus taumata wuassu Betsaida su Galilea.)

22Ne i Filipus inaite namasingkattu pandumanne udde si Andreas, wuṛṛu sal᷊immurine itarua namasingkatte Mawu Yesus. 23Mawu Yesus nabbisara si mangitou, “Nia'omante tempone Ana'u Taumata wantuhanna. 24Mangke atonna wisara-U indi: Amungkangngu gandumma sambatu tawe iasi'a su leta'a wuṛṛu mate, i tou ta'e matatana'a sambatu. Arawe amungkangngu watun gandumma udde mate, wakkute udde i tou mabua manambo. 25Taumata apan mandangngu wiakke sarun awul᷊iannu wiakke. Arawe taumata apan maddantinnu wiakke su runia indi, sarun maapadul᷊i wiakka tutune wuṛṛu saran mal᷊annu-l᷊annu. 26Taumata apan maapulu mangimbe si Ya'u ṛinone tumantalongnga si Ya'u; tadea'u mangangimbe'u wotongnge su sambau ringang-Ku su tampa i Ya'u uatana'a. Taumata apan mangngimbe si Ya'u sarun addatannu Iamang-Ku.”

Mawu Yesus namasingkattu papate-Ne

27“Naungku sussinggawangnga; apa Ta'u iwisara su orassa indi? Ṛinonewe i Ya'u mabbisara, ‘Iamangnga liua'awe i Ya'u wuassu orassa indi’? Arawe tadea'u i Ya'u maapendamma orassu asasusa indi i Ya'u nirumanta. 28Iamangnga, mawantuga arannu!” Ne niaringiṛṛanna tingikka wuassu langitta nabbisara, “I Ya'u suete namantuga si Tou, wuṛṛu i Ya'u sarun mamantuga lai si Tou.”

29Awada'alla isudde naaringikka tingikka udde. I mangitou nabbisara, “Udde rallu'a!” Arawe piaddu lai nabbisara, “Wal᷊ine! Mala'ekatta uahahatton Tou!”

30See Mawu Yesus nabbisara si mangitou, “Tingikka udde niaringiṛṛanna, wal᷊ine hausang-Ku, arawe maola'a hausannu. 31Tempone nia'omante runia parikisanna; orassa indi tembonannu runia tate ipaatta. 32Arawe i Ya'u indi, amungkangngu i Ya'u suete niruitta su wowon runia, i Ya'u sarun mamago anambon taumata rumanta ringang-Ku.” 33I Tou nabbisara aroddi tadea'u mapaal᷊iatta'u ereapa olangnge i Tou mate.

34Manga taumata nambo udde nabbisara si Tou, “Tumuṛṛuttu Wuken Titang kami, Ratun Punnu Sal᷊amatta sarun mabbiakka sarangkal᷊o'engnge. Ereapa I'o wotongnge mabbisara manungku Ana'u Taumata ṛinone iruitta su wowon runia? Isai Ana'u Taumata udde?”

35Mawu Yesus sinumimbakka, “Tumba'u tantal᷊anna adio'a semakka udde su wallatti yamiu. Nariaddi amatte tantal᷊anna semakka udde ta'e pia, tadea'u i yamiu tawe aratingannu randumma. Taumata apan u'amatta su ararandumma wagga suapa pattudanne. 36Pangimante su semakka udde, tantal᷊anna semakka udde ta'e ringanni yamiu, tadea'u i yamiu maola'a al᷊aṛṛana'u asasemakka.”

Manga taumatan Yahudi tawe mangngimanna

Napawe Mawu Yesus suete nabbisara aroddi, i Tou nangingkatte wua isudde wuṛṛu maddirite mattingkapasilom batangan-Ne si mangitou. 37Salaiwe manambote al᷊aṛṛindu'a apan niola'u Mawu Yesus su saruanni mangitou, i mangitou tawe lai mangngimanna si Tou. 38Ne natipusse apa apan niapasingkatti Nabi Yesaya,

“Mawu, isai mangngimanna watti'i yami?

Ete sisai taṛṛino Mawu niapaal᷊iatta'a?”

39Ana waugu udde i mangitou tawe mangngimanna, ana waugu Yesaya suete nabbisara apia,

“Ruata nabbisara,

40‘I Ya'u mapaawuta mata mangitou,

maola'a naungngi mangitou maatikka;

tadea'u i mangitou tawe maasilo,

ṛingiṛṛanni mangitou tawe maasunna.

Tadea'u i mangitou tawe mabelengnga ringang-Ku,

see I Ya'u mapaapia mangitou.’ ”

41Yesaya nabbisara aroddi ana waugu i tou suete naasilo awawantugu Mawu Yesus wuṛṛu nabbatti'a su ola'i Tou.

42Salaiwe aroddi, manambo taumata, ewe'e lai su wallattu tembonannu Yahudi lai mangngimanna Mawu Yesus. Arawe i mangitou tawe waṛṛani manga'u udde ringannu uahahati, ana waugu i mangitou matta'utta aṛṛengenne taumatan Farisi maningaddi mangitou sumutta su wal᷊em pattataṛṛamawuanna. 43I mangitou lembo maapulu maasomba daralon taumata wuassu daralon Ruata.

Wisara Mawu Yesus ipamarikissa taumata

44See Mawu Yesus inumui, “Taumata apan mangngimanna si Ya'u, wal᷊inewe si Ya'u i tou mangngimanna, arawe si Tou apan nandolo-U. 45Wuṛṛu taumata apan naasilo si Ya'u, naasilo lai si Tou apan nandolo-U. 46I Ya'u nirumanta su runia indi maola'a sambau asasemakka, tadea'u anambon taumata apan mangngimanna si Ya'u tawe matana'a sulal᷊ummu ararandumma. 47Taumata apan maddaringikka al᷊ara-U, arawe tawe tumuṛṛutta – wal᷊ine i Ya'u makkuumanni tou. Ana waugu i Ya'u nirumanta wal᷊inewe mamarikissa runia indi, arawe rumanta manal᷊amatta. 48Taumata apan mannol᷊a-U wuṛṛu maddiri maddaringikka wisara-U, piate mallaṛṛuungnge. Wisara apan Ta'u iapaasingkatta, eteudde sarun ipamarikissa si tou su Allong Kiamatta. 49Ana waugu i Ya'u tawe mabbisara wuassu apulu-U sassane; Iamangnga apan nanadolo-U, ete i Tou apan namarenta si Ya'u apa apan Ta'u iwisara wuṛṛu iapaasingkatta. 50Wuṛṛu i Ya'u masingkatta manungku parenta-Ne udde mangngonggolu wiakka tutune wuṛṛu saran mal᷊annu-l᷊annu. Ne i Ya'u lai namasingkatta ere lai niaṛṛa'u Iamangnga si Ya'u.”

Currently Selected:

YOHANES 12: LAITLD

Highlight

Copy