YOHANES 13

Mawu Yesus nangukassa ledda manga mallal᷊aṛṛenggen-Ne

1Allo massallo tantal᷊anna taambe nia'omanna Allo Wahewam Paskah, Mawu Yesus naasingkatte manungku temponete i Tou manantangngu runia indi mabelengnga ringannu Iamang-Nge. I Tou mandangngu manga taumata apan tatahuanan-Ne su runia, wuṛṛu i Tou sidutu mandangngu si mangitou ma'oman sara panginsueanne.

2Mawu Yesus wuṛṛu manga mallal᷊aṛṛenggen-Ne tantal᷊anna u'anna annu ṛabbi. Setanna suete napaasuttam pandumanne sulal᷊ummu naungngi Yudas ana'i Simon Iskariot ipamate Mawu Yesus. 3Mawu Yesus masingkatta manungku Iamangnga suete nanantillu al᷊awo'u taṛṛino si Tou. I Tou masingkatta lai manungku i Tou nirumanta wua dingannu Ruata wuṛṛu sarun mabelengnga lai ringannu Ruata. 4Ana waugu udde i Tou nirumarisikka, nalluatta jubah-Ne, wuṛṛu nama'issu handukka su lawan-Ne. 5Wua'udde i Tou nallal᷊innu ua'e sulal᷊ummu sambau pangangukasanna lima, see nanattakke nangukassa ledda manga mallal᷊aṛṛenggen-Ne wuṛṛu niapaamaran handukka apan uawa'issa su lawan-Ne. 6Na'omate i Tou ringanni Simon Petrus, apan nabbisara, “Mawu, ṛatadde Mawu nangukkassa ledda'u?”

7Mawu Yesus sinumimbakka, “Orassa indi i'o tawe maasunna apa apan a'olaang-Ku indi, arawe sal᷊immurine i'o sarun maasunna.”

8“Arie Mawu,” wisaram Petrus su Mawu Yesus, “Arie saran paassa Mawu mangukkassa ledda'u!”

Arawe Mawu Yesus sinumimbakka, “Amungkangngu i Ya'u tawe mangukkassa leddanu, i'o tawe paa'aukka ringang-Ku.”

9I Simon Petrus nabbisara, “Amungkangngu aroddi, Mawu, arie tumba'u ledda'u, ewe'e lima'u wuṛṛu pua'u lai!”

10“Taumata apan suete nandeno, nawaresite sarangkanambone,” wisara Mawu Yesus si Petrus. “I tou salaiwe tate waresianna; tumba'u leddane. I yamiu indi nawaresite, arawe tawe sarangkanambone.” ( 11Mawu Yesus masingkatte isai apan sarun mamate si Tou. Ana waugu udde i tou nabbisara, “I yamiu indi nawaresite arawe tawe sarangkanambone.”)

12Napawe Mawu Yesus suete nangukassa ledda mangitou, i Tou nalluṛṛete apia jubah-Ne see inuma'ianna apia. See i Tou nabbisara si mangitou, “I yamiu maasunna apa apan wakkute niola-U si yamiu? 13I yamiu mammago si Ya'u huru wuṛṛu Mawu. Wuṛṛu atonna aroddi. 14Amungkangngu i Ya'u Mawu wuṛṛu hurunu nangukkassa leddanu, i yamiu ṛinone lai uaa'ukkasa ledda. 15I Ya'u mangngonggolu tul᷊ada indi si yamiu, tadea'u i yamiu lai ma'ola'a apa apan suete Ta'u inola'a si yamiu. 16Mangke atonna wisara-U indi: Sangkatou allangnga tawe magewal᷊anna wuassu mawune, wuṛṛu sangkatou darol᷊oṛṛanna tawe magewal᷊anna wuassu mandarolokke. 17Amungkangngu i yamiu maasingkatten sarangkanambone indi, al᷊al᷊uassa si yamiu apan suete na'ola'a manara udde.

18Apa apan Ta'u niwisara indi wal᷊inewe su ola'i yamiu sarangkanambone. I Ya'u masingkatta isai-sai apan suete nipile. Arawe apa apan uawoṛṛetta sulal᷊ummu Wuke Susi ṛinone matipussa, eteudde ‘Taumata apan u'anna su sambau ringang-Ku sarun lumawangnga si Ya'u.’ 19Olangnge udde Ta'u iapaasingkatta si yamiu orassa indi, tantal᷊anna taambe natipussa, tadea'u amungkangngu olangnge udde mariaddi, yamiu sarun mangngimanna manungku ete i Ya'u apan isassago I YA'U INDI. 20Mangke atonna wisara-U indi: Isai manarimmattu taumata Ta'u nirolokka, mannarimma-U lai. Wuṛṛu isai mannarimma-U, i tou lai manarimmatti Tou apan nandolo-U.”

Mawu Yesus namasingkattu pamamate watangan-Ne

(Mat. 26:20-25; Mrk. 14:17-21; Luk. 22:21-23)

21Napawe Mawu Yesus suete nabbisara aroddi, naungngi Tou mangke natuno. See i Tou nabbisara, “Mangke atonna wisara-U indi; sangkatou wuassu wallatti yamiu sarun mamate si Ya'u.”

22Manga mallal᷊aṛṛenggen-Ne uaa'ellega sangkatou ringannu sangkatou, wuṛṛu lembon tinumiangnga ana waugu wagga isai apan ipappandum-Me udde. 23Mallal᷊aṛṛenggenna apan arangnguannu Mawu Yesus ua'ianna su samba'a Mawu Yesus. 24I Simon Petrus inumeramma si tou, tadea'u i tou maiwal᷊o Mawu Yesus tanne isai apan pappandumanne udde.

25Ne mallal᷊aṛṛenggenna udde nangundani Mawu Yesus wuṛṛu naiwal᷊o, “Isai i tou Mawu?”

26Mawu Yesus sinumimbakka, “Taumata apan Ta'u onggol᷊annu roti apan Ta'u iammo sulal᷊ummu mangko, ete i tou taumatane.” Ne Mawu Yesus nanganu roti sampaddi, niammo sulal᷊ummu mangko see nionggolla si Yudas ana'i Simon Iskariot. 27Napawe i Yudas nanengkamma roti udde, Setanna sinumuttate sulal᷊ummu naungnge. See Mawu Yesus nabbisara si tou, “Ola'e paal᷊ihakka apa apan sarun olaannu.” 28Tawe saran sangkatou wuassi mangitou apan ua'ianna u'anna isudde naasunna anio Mawu Yesus nabbisara aroddi si Yudas. 29Piaddu massunna Mawu Yesus mandolokki Yudas mamalli sarannapa apan ipaatta su andeangnga udde, ara'e mangonggolu roitta adio'a su taumata asiangnga ana waugu i Yudas eteudde sangkatou mananahipunna roitti mangitou.

30Napawe i Yudas nanengkamma roti udde, i tou lapiddu sinumabangnga. Allo ṛabbite.

Parenta apan wakku

31Napawe i Yudas sinumabangke, Mawu Yesus nabbisara, “Orassa indi Ana'u Taumata wantuhanna, wuṛṛu Ruata wantuhanna sulal᷊ummi Tou. 32Amungkangngu Ruata wantuhanna sulal᷊ummi Tou, i Tou lai sarun wantuhannu Ruata sulal᷊ummu wadang-Nge sassane. Ewe'e Ruata lai sarun mamantuga si Tou ringannu mal᷊ihakka. 33Manga al᷊aṛṛana-U, i Ya'u tate matana'a mal᷊annu lai ringanni yamiu. I yamiu sarun maddea'a si Ya'u, arawe ere suete niwal᷊o-U su manga tembonannu Yahudi, aroddi lai iwal᷊o-U si yamiu; su tampa patuddang-Ku, i yamiu tawe maaranta isudde. 34Parenta wakku apan Ta'u ionggolla si yamiu: Padarangngute sangkatou ringannu waine. Ere lai Ya'u mandangngu si yamiu, aroddi lai yamiu ṛinone uararangngu. 35Amungkangngu i yamiu uarararangngu, anambon taumata sarun maasingkatta manungku i yamiu mallal᷊aṛṛenggeng-Ku.”

Papatta manungku Petrus sarun massinaadu Mawu Yesus

(Mat. 26:31-35; Mrk. 14:27-31; Luk. 22:31-34)

36“Mawu, Mawu inai watukkuapa?” aiwal᷊on Simon Petrus su Mawu Yesus. Mawu Yesus sinumimbakka, “Su tampa tuddang-Ku, i'o tawe maatantalongnga orassa indi. I'o sarun tumantalongnga si Ya'u sal᷊immurine.”

37“Mawu, anio i ya'u tawe maatantalongnga Mawu orassa indi?” aiwal᷊on Simon Petrus apia. “I ya'u mal᷊uassa mate ana waugu Mawu!”

38Mawu Yesus sinumimbakka, “Atonna i'o mal᷊uassa mate ana waugu i Ya'u? Paanaunge, tantal᷊anna manu'a taambe inumu'u, paatallute i'o nabbisara manungku i'o wagga-U!”

Currently Selected:

YOHANES 13: LAITLD

Highlight

Copy