YOHANES 6
6
Mawu Yesus napaannu lima ṛiwu su atoune
(Mat. 14:13-21; Mrk. 6:30-44; Luk. 9:10-17)
1Manga pira allo wua'udde, Mawu Yesus inaite su samba'a Ranon Galilea, apan isassago lai Ranon Tiberias. 2Napawe na'omate poiaroddi, manambote taumata uatantalongnga si Tou ana waugu i mangitou suete naasilo manga al᷊aṛṛindu'a apan niolang-Nge ringannu napaapian taumata marada'a. 3Mawu Yesus sinuma'a su wowom buidda, wua'udde inuma'ianna isudde ringannu mallal᷊aṛṛenggen-Ne. 4Tempo udde maranite Allo Wahewam Paskah Yahudi. 5Napawe Mawu Yesus na'ellega su uapal᷊iwutta, i Tou naasilo taumata mangngelekka rudanta ringanni Tou. Ne i Tou nabbisara si Filipus, “Suapa i ite wotongnge mamalli anna, tadea'u taumata nambo indi wotongnge umanna?” ( 6Mawu Yesus masingkatte apa apan sarun olaan-Ne, arawe i Tou nabbisara aroddi ana waugu i Tou ma'apulu maannamma si Filipus.)
7I Filipus sinumimbakka, “Roti aregane rua ṛasutta roitta sal᷊a'a, tawe maattiudda su manga taumata indi, salaiwe sangkatou tumba'u maabba'a adio'a.”
8Sangkatou mallal᷊aṛṛenggennu Mawu Yesus apan baine eteudde i Andreas, tuṛṛangngi Simon Petrus nabbisara, 9“Isindi pia sangkatou ana'a esakka uaapiddu roti limam bau wuṛṛu inassa ruam bua. Arawe apa hunane su taumata anambone indi?”
10“Doloṛṛa'e manga taumata udde uma'ianna,” wisara Mawu Yesus. Su tampa udde manambonannal᷊o, nariaddi manga taumata udde inuma'iante su nannal᷊o – sarangkanambone itatakasere esakka lima ṛiwu su atoune. 11Wua'udde Mawu Yesus nanganu roti udde, see ma'adiangkamanna su Ruata. Nasue udde i Tou natahiate roti udde su taumata nambo. Wua'udde i Tou nattahia inassa, wuṛṛu i mangitou inumanna mangke nawusa-wusa. 12Napawe sarangkanambone suete inumanna na'oman sara nal᷊aidda, Mawu Yesus nabbisara su manga mallal᷊aṛṛenggen-Ne, “Ammul᷊a'e lambeng kanna udde; arie ma'oman sara piaddu maramme.” 13See i mangitou nangammullu mapul᷊o dua su ul᷊angnge napene lambeng kanna wuassu limam bau roti apan niannan taumata nambo udde.
14Napawe taumata nambo udde naasilo al᷊aṛṛindu'a apan niola'u Mawu Yesus, i mangitou nabbisara, “Atonna, ete indi Nabi apan a'antimanna rumanta su runia!” 15Mawu Yesus masingkatte i mangitou nirumanta tuddane mamata'i Tou maola'a ratu mangitou. Ana waugu udde i Tou inaite nassal᷊iu watukku wageangnge pia wuidda.
Mawu Yesus niumamatta su wowon ua'e
(Mat. 14:22-33; Mrk. 6:45-52)
16Napawe allo maṛṛabite, manga mallal᷊aṛṛenggennu Mawu Yesus sinumossokke watukku rano. 17See i mangitou sinuma'ete saalanna malliu rano udde mabatukku Kapernaum. Allo marandumpe arawe Mawu Yesus taambe lai nirumanta ringanni mangitou. 18Tantal᷊anna udde rano mannattakke mattandi'a ana waugu anginna ma'ikkatte. 19Napawe nassenggotte itatakasere lima ara'e anummu kilo meteṛṛe araune, i mangitou naasilo Mawu Yesus mattudan saalanna u'amatta su wowon ua'e. I mangitou mangke nata'utta. 20Arawe Mawu Yesus nabbisara si mangitou, “Arie paata'utta, i Ya'u indi!” 21See ringannu naungnga lulluassa i mangitou nanal᷊oho si Tou watukku saalanna, wuṛṛu orassa udde lai saalanni mangitou na'omate su tampa tattudanna.
Manga taumata maddea'a Mawu Yesus
22Su allo tiṛṛabbine taumata nambo apan ta'e uatana'a su samba'an rano, natutukka manungku tanginna tumba'u pia sangngassa saalanna poiaroddi. I mangitou masingkatta manungku manga mallal᷊aṛṛenggennu Mawu Yesus nassenggotte ringannu saalanna udde, arawe Mawu Yesus tawe naṛṛundinganna. 23Wua'udde manga pira ngassa saalanna wuassu Tiberias nirumanta wuṛṛu nabbal᷊ango maranin tampan taumata nambo udde u'anna roti napawe Mawu Yesus suete na'adiangkamanna. 24Napawe taumata nambo udde naasilo manungku mawae Mawu Yesus ara'e mallal᷊aṛṛenggen-Ne tawe isudde, i mangitou sinuma'ete manga salaanna udde wuṛṛu inaite watukku Kapernaum maddea'a Mawu Yesus.
Mawu Yesus, roti apan mangngonggolu wiakka
25Napawe manga taumata udde nassombate Mawu Yesus su samba'an rano, i mangitou naiwal᷊o si Tou, “Iamangnga Huru, ro'en angngera Iamangnga na'oma isindi?”
26Mawu Yesus sinumimbakka, “Atonna i yamiu madde'a si Ya'u wal᷊inewe ana waugu i yamiu naasunnate pandumannu manga al᷊arindu'a apan Ta'u niola'a, arawe ana waugu i yamiu suete inumanna na'oman sara nal᷊aidda. 27Arie pammanara ipaddea'a anna apan wotongnge masue wuṛṛu mawukku'a. Pammanarate tadea'u maasomba anna apan tawe mawukku'a wuṛṛu apan mangngonggolu wiakka tutune wuṛṛu saran mal᷊annu-l᷊annu. Anna udde sarun ionggolu Ana'u Taumata si yamiu, ana waugu i Tou suete nitenegu Ruata Iamangnga.”
28See i mangitou naiwal᷊o si Tou, “I yami ṛinone ma'ola'a apa tadea'u maatuṛṛutta apulun Ruata?”
29Mawu Yesus sinumimbakka, “Ete indi apan ipa'apulun Ruata wuassi yamiu: pangimante si Tou apan nirolokku Ruata.”
30“Amungkangngu aroddi,” unni mangitou, “tatiala apa apan ionggolli Iamangnga tadea'u i yami maasilo wuṛṛu mangngimanna Iamangnga? Apa apan sarun olaannu Iamangnga? 31Iupungngu al᷊amonang kami u'anna manna su wadda'a, ere lai uawoṛṛetta sulal᷊ummu Wuke Susi, ‘i Tou napaanni mangitou roti wuassu surga.’ ”
32See Mawu Yesus nabbisara si mangitou, “Pangimante: Wal᷊ine i Musa ewe'e ete Iamang-Ku apan nangonggolu roti suṛṛinone wuassu surga. 33Ana waugu roti apan nionggolu Ruata eteudde i Tou apan nirumanta wuassu surga wuṛṛu nangonggolu wiakku taumata su runia.”
34“Iamangnga,” unni mangitou, “onggol᷊a'awe lai si yami roti udde uatialu.”
35“Ete i Ya'u roti apan mangonggolu wiakka,” unni Mawu Yesus si mangitou. “Taumata apan rumanta ringang-Ku tawe amal᷊unusanna sarangkal᷊o'engnge. Wuṛṛu taumata apan mangngimanna si ya'u tawe marou lai sarangkal᷊o'engnge.”
36“Arawe ere sueten Ta'u niapaasingkatta si yamiu, salaiwe i yamiu suete naasilo si Ya'u, i yamiu tawe mangngimanna. 37Anambon taumata apan nionggolu Iamangnga si Ya'u sarun rumanta ringang-Ku. I Ya'u tawe mapawelengngi sai-sai apan rumanta ringang-Ku. 38Ana waugu i Ya'u nirumanta wuassu surga, wal᷊ine ma'ola'a apulu-U sassane, ewe'e apulun Tou apan nandolo-U. 39Wuṛṛu ete indi apulu-Ne apan nandolo-U: tadea'u wuassu anambon taumata apan tinantilla si Ya'u, tawe saran sangkatou apan mawul᷊i; tadea'u i Ya'u mapaawangunni mangitou su Allong Kiamatta. 40Atonna, eteudde apulun Iamang-Ku: Tadea'u anambon taumata maasilo Ana'a wuṛṛu mangngimanna si Tou maasomba wiakka tutune wuṛṛu saran mal᷊annu-l᷊annu, wuṛṛu iapaawiakka apia su Allong Kiamatta.”
41Manga taumatan Yahudi manattakke sussawutulla su saruannu Mawu Yesus, ana waugu i Tou nabbisara: “I Ya'u roti apan niumonto'a wuassu surga.” 42I mangitou nabbisara, “Wal᷊inewe indi Yesus ana'i Yusuf? I yami masingkattu inangnga iamangnge! Ereapa i Tou wotongnge mabbisara i Tou niumonto'a wuassu surga?”
43See Mawu Yesus nabbisara si mangitou, “Arie passawutulla. 44Tawe saran sangkatou maaranta ringang-Ku, amungkangngu Iamangnga apan nandolo-U tawe mangapiddi tou ringang-Ku; wuṛṛu isai apan rumanta, sarun Ta'u iapaasengkengnga su Allong Kiamatta. 45Sulal᷊ummu Wuke Manga Nabi uawoṛṛetta arendi, ‘Anambon taumata sarun tantiroannu Ruata.’ Nariaddi anambon taumata apan madaringikka Iamangnga wuṛṛu mangngurumma wuassi Tou, rumanta ringang-Ku. 46Udde tawe atapasanne manungku piate taumata apan suete naasilo Iamangnga. Tumba'u i Tou apan nirumanta wuassu Ruata, suete naasilo Iamangnga.
47Paanaunge: Taumata apan mangngimanna, maatahuanna wiakka tutune wuṛṛu saran mal᷊annu-l᷊annu. 48Ete i Ya'u roti apan mangonggolu wiakka. 49Iupungngu al᷊amonanu u'anna manna su wadda'a wuṛṛu i mangitou nate lai. 50Arawe tawe aroddi roti apan niumonto'a wuassu surga; taumata apan inumanna roti udde tawe mate. 51Ete i Ya'u roti apan niumonto'a wuassu surga – roti apan mangonggolu wiakka. Taumata apan umanna roti indi sarun mabbiakka sarangkal᷊o'engnge. Roti apan Ta'u ionggolla ipabiakku taumata su runia eteudde ṛeme-U.”
52Naaringikka udde, manga taumatan Yahudi uatatiakke sangkatou ringannu waine. “Ereapa taumata indi wotongnge mangonggolu ṛemessi Tou si ite iapaanna?” unni mangitou.
53See Mawu Yesus nabbisara si mangitou, “Pangimante: Amungkangngu i yamiu tawe umanna ṛemessu Ana'u Taumata wuṛṛu ma'inumma raṛṛa-Ne, i yamiu atonna-tonna tawe mabbiakka. 54Taumata apan umanna ṛeme-U wuṛṛu ma'inumma raṛṛa-U maatahuanna wiakka tutune wuṛṛu saran mal᷊annu-l᷊annu wuṛṛu i Ya'u sarun mapaawiakki tou apia su Allong Kiamatta. 55Ana waugu ṛeme-U atonna-tonna udde anna, wuṛṛu raṛṛa-U atonna-tonna udde inumanna. 56Taumata apan umanna ṛeme-U wuṛṛu ma'inumma raṛṛa-U sidutu su sambau ringang-Ku wuṛṛu i Ya'u ringanni tou. 57Iamangnga apan wiakka udde, nandolo-U wuṛṛu i Ya'u lai mabbiakka sulal᷊ummu Iamangnga. Aroddi lai taumata apan umanna ṛeme-U sarun mabbiakka wuassia-U. 58Ete indi roti apan niumonto'a wuassu surga: wal᷊ine ere roti apan niannu iupungngu al᷊amonanu. Ana waugu napawe niumanna roti udde, i mangitou nate lai. Arawe taumata apan umanna roti indi sarun mabbiakka sarangkal᷊o'engnge.”
59Sarangkanambone udde niwisara Mawu Yesus su tempo i Tou mangngaṛṛa'a su wal᷊em pattataṛṛamawuanna su Kapernaum.
Manga wisara apan mangngonggolu wiakka tutune wuṛṛu saran mal᷊annu-l᷊annu
60Napawe suete naddaringikka manga wisara Mawu Yesus udde, manambo su wallattu mallal᷊aṛṛenggen-Ne nabbisara, “Tatantiro indi tumanite masahadda. Isai wotongnge maasunna!”
61Mawu Yesus sassane masingkatta manungku manga mallal᷊aṛṛenggen-Ne sussawutulla su ola'u hatto udde. Ne i Tou nabbisara, “Apa i yamiu nal᷊udda ana waugu manga wisara-U indi? 62Ereapa olangnge amungkangngu i yamiu maasilo Ana'u Taumata masengkengnga apia su tampane apan paarorone? 63Apan maawiakka taumata eteudde Ghaṛṛahon Ruata. Atatohassu taumata tawe gunane. Manga wisara apan niwisara-U si yamiu indi eteudde wisara Ghaṛṛahon Ruata wuṛṛu manga wisara apan mangngonggolu wiakka. 64Arawe pia lai su wallatti yamiu apan tawe mangngimanna.” (Mawu Yesus massingkatte ro'en paarorone isai-sai apan tawe mangngimanna wuṛṛu isai-sai sarun mamate si Tou.) 65See Mawu Yesus nabbisara apia, “Ana waugu udde i Ya'u mamasingkatta si yamiu manungku tawe saran sangkatou apan maaranta ringang-Ku, amungkangngu Iamangnga tawe mamala.”
66Nanattakka orassa udde manambo mallal᷊aṛṛenggen-Ne manantangngi Tou, wuṛṛu maddirite mallal᷊aṛṛenggenna si Tou. 67See Mawu Yesus naiwal᷊o su sire mapul᷊o dua mallal᷊aṛṛenggen-Ne, “Apa i yamiu ma'apulu lai manantang-Ku?”
68“Mawu,” wisaran Simon Petrus si Tou, “ringanni sai yami sarun inai? Wisara Mawu mangngonggolu wiakka tutune wuṛṛu saran mal᷊annu-l᷊annu. 69I yami mangngimante wuṛṛu naatutukke manungku ete Mawu darol᷊oṛṛanna apan naukkassa wuassu Ruata.”
70Mawu Yesus sinumimbakka, “Wal᷊inewe i Ya'u apan namile si yamiu mapul᷊o dua indi? Arawe sangkatou wuassu wallatti yamiu eteudde ghaṛṛaho lal᷊eo!” 71Apan su pandumannu Mawu Yesus eteudde i Yudas ana'i Simon Iskariot. Ana waugu salaiwe i Yudas sangkatou wuassu sire mapul᷊o dua mallal᷊aṛṛenggennu Mawu Yesus, ete i tou apan namate Mawu Yesus.
Currently Selected:
YOHANES 6: LAITLD
Highlight
Share
Copy
Want to have your highlights saved across all your devices? Sign up or sign in
