YOHANES 7
7
Mawu Yesus wuṛṛu manga tuṛṛang-Nge
1Wua'udde Mawu Yesus inaite su alawo'u tampa su Galilea. I Tou maddiri mabatukku leta'u Yudea ana waugu manga tembonannu Yahudi poiaroddi pia pandumma mamate si Tou.
2Su tempo udde maranite Allo Wahewa Rasannu Rongnga. 3Ne manga tuṛṛangngu Mawu Yesus nabbisara si Tou, “Tantanga'e tampa indi wuṛṛu roote su Yudea, tadea'u manga mallal᷊aṛṛenggen-Nu maasilo lai manara-Nu. 4Tawe taumata apan maapamunin apa apan a'olaanne. Amungkangngu i tou maapulu asingkatannu awadaalla. Amungkangngu i'o maapulu ma'ola'a inolaanna ere udde, ahewallu runia indi ṛinone maasingkatta!” ( 5Ana waugu manga tuṛṛang-Nge sassane tawe mangngimanna si Tou.)
6“Taambe tempone si Ya'u,” unnu Mawu Yesus si mangitou, “arawe si yamiu, suapan tempo udde wotongnge. 7Runia indi tawe marantinni yamiu. Arawe i Ya'u atonna-tonna ia'arantinnu runia, ana waugu i Ya'u sidutu mabbisara runia manungku inolaanne lal᷊eo. 8Roote i yamiu sassane su ramea udde. I Ya'u tawe inai ana waugu tempone taambe nia'omanna si Ya'u.” 9Eteudde wisara Mawu Yesus su manga tuṛṛang-Nge, wuṛṛu i Tou lai natana'a su Galilea.
Mawu Yesus su ramean Rasannu Rongnga
10Napawe manga tuṛṛang-Nge inaite watukku ramea udde, mal᷊anna-l᷊annaba Mawu Yesus nattuda sassane tawe niasingkatannu taumata. 11Su al᷊annun ramea udde, manga tembonannu Yahudi maddea'a si Tou wuṛṛu uaaiwal᷊o, “Suapa i Tou?”
12Manambo taumata mannattake uasasal᷊imburungnga su ola'i Tou. Piaddu mabbisara, “I Tou taumata mapia.” Piaddu lai mabbisara, “Tawe! I Tou mangngal᷊iwun taumata nambo.” 13Arawe tawe saran sangkatou waṛṛani mabbisara uasasaruanna su ola'i Tou ana waugu i mangitou matta'uttu manga tembonannu Yahudi.
14Mattangngan ramea, Mawu Yesus sinumutta sulal᷊ummu Wal᷊e Mawu, see nanattakke mangngaṛṛa'a. 15Manga tembonannu Yahudi naherangnga wuṛṛu nabbisara, “Ereapa taumata indi asingkanne aroddi anambone, sumbal᷊i I Tou tawe nassi'ol᷊a?”
16Mawu Yesus sinumimbakka, “Apan Ta'u ia'aṛṛa'a indi wal᷊inewe al᷊aṛṛa-U arawe al᷊aṛṛa'i Tou apan nandolo-U. 17Taumata apan matuṛṛutta apulun Ruata, sarun maasingkatta tanne al᷊aṛṛa-U indi darantane wuassu Ruata ara'e wuassia-U sassane. 18Taumata apan mangngonggolu al᷊aṛṛangnge sassane maddea'a awawantugu ririne sassane. Arawe taumata apan maddea'a awawantugi Tou apan nandolokki Tou, taumata udde matul᷊ida, i tou tawe awusune. 19Wal᷊inewe i Musa suete nangonggolu Titan Ruata si yamiu? Arawe su wallatti yamiu tawedu tinumuṛṛutta Tita udde. Anio i yamiu maapulu mamate si Ya'u?”
20Awada'alla udde sinumimbakka, “I'o wewa! Isai ma'apulu mamate Si'o?”
21Mawu Yesus sinumimbakka, “Tumba'u sambau manara Ta'u olaanna su allon Sabatta, wuṛṛu naaherangnga si yamiu. 22I Musa nangonggolu atoranna si yamiu iapasunatta – salaiwe sunatta udde tawe wuassi Musa, arawe wuassu manga iamangngu al᷊amona ro'en i Musa taanna. Ana waugu udde, su allon Sabatta lai yamiu ma'apulu mannunatta taumata. 23Amungkangngu i yamiu ma'ola'a udde tadea'u tawe lumawangnga atoranni Musa su ola'u sunatta, anio i yamiu mannaungnga lal᷊eo si Ya'u ana waugu mapaapian ahewallu wadangngu taumata su allon Sabatta? 24Arie mamarikissa taumata ana waugu pinangiananne apan aasiloanna, arawe ana waugu atatul᷊idda.”
Atonnawe Mawu Yesus Ratum Punnu Sal᷊amatta?
25Wua'udde pia manga pira taumatan Yerusalem mabbisara, “Wal᷊inewe indi taumatane apan tantal᷊anna raddeaanna pateanna? 26Pa'ellege i Tou mabbisara tawe singgawangnge su saruannu awada'alla, wuṛṛu tawe saran sangkatou apan mabbisaran apa-apa si Tou! Asinungka manga tembonanni ite naatutukke manungku i Tou indi Ratum Punnu Sal᷊amatta? 27Arawe amungkangngu Ratum Punnu Sal᷊amatta udde rumanta, tawe saran sangkatou maasingkatta wuassuapa atatanaan-Ne! Sumbal᷊i i ite masingkatta wuassuapa darantane taumata indi.”
28Wua'udde, tantal᷊anna Mawu Yesus mangngaṛṛa'a su Wal᷊e Mawu, i Tou nangintul᷊i ringannu tingikka ma'ikkatta, “Nariaddi yamiu masingkatta isai i Ya'u indi, wuṛṛu wuassuapa i Ya'u nirumanta? I Ya'u tawe nirumanta ana waugu apulu-U sassane. I Ya'u nirolokki Tou apan pia taṛṛino wotongnge mandolo-U, wuṛṛu i Tou wotongnge apangimananna. Arawe i yamiu tawe maaillal᷊a si Tou. 29I Ya'u maaillal᷊a si Tou, ana waugu i Ya'u nirumanta wua dinganni Tou, wuṛṛu ete i Tou apan nandolo-U.”
30Su tempo udde i mangitou ma'apulu manametta Mawu Yesus, arawe tawedu waṛṛani mangagassa si Tou, ana waugu taambe nia'omanna tempone. 31Manambo su wallattu manga taumata udde mannattakke mangngimanna si Tou, wuṛṛu mabbisara, “Amungkangngu Ratum Punnu Sal᷊amatta udde rumanta, apa i Tou wotongnge maaola'a mannamboanna al᷊aṛṛindu'a wuassu taumata indi?”
Ma'ire manametta Mawu Yesus
32Manga taumatam Farisi naaringikka ereapa taumata nambo udde uasasal᷊imburungnga su ola'u Mawu Yesus. Ana waugu udde su sampunna ringannu manga imam tembonanne, i mangitou nandolokku manga pira mandariaga Wal᷊e Mawu inai manametta Mawu Yesus. 33Mawu Yesus nabbisara su taumata nambo su Wal᷊e Mawu, “Ete lai tal᷊ang kadio'a i Ya'u su sambau ringanni yamiu. Wua'udde i Ya'u sarun mabelengnga ringanni Tou apan nandolo-U. 34I yamiu sarun maddea'a si Ya'u, arawe tawe maasomba si Ya'u; ana waugu i yamiu tawe maaranta su tampa atatanaang-Ku.”
35See manga tembonannu Yahudi uawawisarate sangkatou ringannu waine, “Taumata indi inai suapa na'oman sara i ite tawe maasomba si Tou? Apa i Tou inai ringannu manga taumatan Yahudi apan uatana'a su wanua marau su wallattu taumatan Yunani, wuṛṛu mangngaṛṛa'a taumatan Yunani? 36Apa pandumanne ringannu mabbisara manungku i ite sarun maddea'a si Tou, arawe tawe maasomba si Tou, wuṛṛu manungku i ite tawe maaranta su tampa i Tou uatana'a?”
Ua'e apan mangngonggolu wiakka
37Su allo panginsueannu ramea udde, eteudde allo apan apianne, Mawu Yesus dirumarisikka sulal᷊ummu Wal᷊e Mawu see nabbisara, “Taumata apan marou ṛinone rumanta ringang-Ku ma'inumma. 38Su ola'u taumata apan mangngimanna si Ya'u, uawoṛṛetta sulal᷊ummu Wuke Susi, ‘Wuassu lal᷊ummu naungnge mangngelekka manga aeleṛṛannu ua'e apan mangngonggolu wiakka.’ ” ( 39Mawu Yesus mabbisara su ola'u Ghaṛṛahon Ruata apan sarun sengkamannu manga taumata apan mangngimanna si Tou. Ana waugu su tempo udde Ghaṛṛahon Ruata taambe nionggolla; ana waugu Mawu Yesus taambe niapaawantuga ringannu papate-Ne.)
40Manambo taumata ma'aringikka apa apan niwisara Mawu Yesus, wuṛṛu su wallatti mangitou piaddu mabbisara, “Taumata indi natantunna ete Nabi udde!”
41Arawe piaddu lai mabbisara, “Ete indi Ratum Punnu Sal᷊amatta!”
Arawe piaddu lai mabbisara, “Eh, ṛatadde Ratum Punnu Sal᷊amatta nirumanta wuassu Galilea? 42Sulal᷊ummu Wuke Susi uawoṛṛetta manungku Ratum Punnu Sal᷊amatta udde sinossoṛṛanne wuassi Daud wuṛṛu sarun dumanta wuassu Betlehem, eteudde soa atatanaanni Daud.” 43Panginsueanne manga taumata mannatakke uatatiakka su ola'u Mawu Yesus. 44Piaddu ma'apulu manametta si Tou, arawe tawe saran sangkatou mamita si Tou.
Manga tembonannu Yahudi tawe mangngimanna
45Su tempo manga mandariaga Wal᷊e Mawu, apan nirolokka manametta Mawu Yesus nabelengke apia, manga imam tembonanne wuṛṛu manga taumatan Farisi udde naiwal᷊o si mangitou, “Anio i yamiu tawe nangapiddi Tou inawarendi?”
46Manga mandariaga udde sinumimbakka, “Ah, taambe saran paassa pia taumata mabbisara naal᷊ihida ere i Tou!”
47“Apa i yamiu lai suete nial᷊iwu-Ne?” unnu manga taumatan Farisi udde. 48“Apa wuassu manga tembonanni ite wuṛṛu manga taumatan Farisi piaddu mangngimanna si Tou? 49Arawe awadaalla indi, i mangitou wagan Tita Musa, wuṛṛu salaiwe ereapa i mangitou niawontohante.”
50Sangkatou su wallattu manga taumatan Farisi udde eteudde i Nikodemus apan suete nirumanta ringannu Mawu Yesus. I Nikodemus nabbisara su manga taumatan Farisi waine, 51“Tumuṛṛuttu Tita, sangkatou tawe wotongnge iṛṛuumanna amungkangngu hattone taambe niaringiṛṛanna wuṛṛu pallal᷊agune niparikisanna.”
52“Apa i'o lai wuassu Galilea?” sasimbakki mangitou, “Pamarikisse Wuke Susi! I'o sarun maasingkatta manungku tawe sangkatou nabi apan asapputanne wuassu Galilea!”
Sangkatou wawine niaratinganna sussandaga
[ 53Wua'udde, taumata nambo udde napul᷊ete watukku wal᷊e.
Currently Selected:
YOHANES 7: LAITLD
Highlight
Share
Copy
Want to have your highlights saved across all your devices? Sign up or sign in
