LUKAS 16
16
Mangangadon roitta apan pande
1Mawu Yesus nabbisara mallal᷊aṛṛenggen-Ne, “Pia sangkatou taumata ala. I tou pia sangkatou mangangadon roitta apan mangngatokku pa'a'alane. Taumata ala udde naasomba alae manungku mangangadon roitta mangnginsue roinne. 2Nariaddi i tou namagote mangangadon roitta udde wuṛṛu nabbisara, ‘Apa indi niaringiṛṛangku atonna su ola'u pamamanaranu? Orassa indi, tantil᷊a'e si ya'u hessin manaranu su pinangatokku pa'a'ala'u. I'o tate wotongnge maola'a mananahipunna roi'u.’ 3Ne mangangadon roitta udde naṛṛingida, ‘I ya'u sarun ma'ola'e apa orassa indi? Tuangku tate mapaamanara'u. Mamasolla ya'u alangkatta; madorongnga i ya'u massili. 4I ya'u pia apande; amungkangngu i ya'u iaddo, i ya'u sarun maddea'a hawe'u manambo apan ma'apulu mapaatana'u su wal᷊e mangitou!’ 5Nariaddi mangangadon roitta udde namagote manga taumata apan naballassa roitta su mawune. Su taumata paarorone i tou nabbisara, ‘Sangkura awallannu su mawu'u?’ 6Taumata udde sinumimbakka, ‘Maṛṛasutta su wensadde lanan zaitun.’ Mangangadon roitta udde nabbisara apia si tou, ‘Indi reengannu awallannu. A'iante wuṛṛu paal᷊ihakka mamoṛṛetta limam pul᷊o.’ 7Wua'udde i tou nabbisara su taumata aruane, ‘Wuṛṛu su tuṛṛangnga, pira awallassi tuṛṛangnga?’ Taumata udde sinumimbakka, ‘Saṛṛiwu su karongnge gandumma.’ Mangangadon roitta udde nabbisara si tou, ‘Indi reengannu awallannu. Woṛṛetta'e ual᷊u ṛasutta.’
8Ne mawu mangangadon roitta apan taṛṛa l᷊inga udde nadalo si tou ana waugu inolaanne apan mangngapande udde; ana waugu manga taumatan runia indi mappandeanna mangatokku manara mangitou wuassu mangatokku taumata apan mabbiakka sulal᷊ummu asasemakka.”
9See Mawu Yesus nabbisara apia, wisara-Ne, “Padaringikka! Paata'e pa'a'alan runia indi ipadea'a hawe, tadea'u napawe darotongngu runia indi tate aregane, i yamiu sarun iapaatana'a su tampan atatanaanna apan tawe pangudusanne. 10Taumata apan wotongnge apangimananna su manara maradio'a, wotongnge lai pangimananna su manara wahewa. Arawe taumata apan tawe apangimananna su manara maradio'a tawe apangimananna lai su manara wahewa. 11Nariaddi, amungkangngu su ola'u darotongngu runia indi yamiu tate apangimananna, isai maapulu mangngimanna si yamiu su darotongngu ṛimuudda? 12Wuṛṛu amungkangngu su ola'u sarannapa apan tatahuanannu taumata waine, i yamiu niatialanna tawe apangimananna, isai ma'apulu mangonggolla si yamiu sarannapa apan tatahuananni yamiu?
13Tawe saran sangkatou wotongnge maapammanara su ruang katou tuanga; ana waugu i tou sarun lembo marangngu su sangkatou wuassu sangkatou waine, ara'e i tou sarun lembo marangngu su mawune apan sangkatou wuassu mawune waine. Aroddi lai matataṛṛino si yamiu. I yamiu tawe maapammanara su Ruata wuṛṛu su darotongngu runia lai.”
Manga wisara Mawu Yesus
(Mat. 11:12-13, 5:31-32; Mrk. 10:11-12)
14Manga taumatan Farisi naaringikka al᷊awo'u wisara apan niwisara Mawu Yesus. See i mangitou nilumagen Tou, ana waugu i mangitou wal᷊iun roitta. 15Arawe Mawu Yesus nabbisara si mangitou, “Ete i yamiu taumata apan su saruannu taumata waine ellehanna mapia, arawe Ruata masingkattu lal᷊oṛṛo naungngu. Ana waugu apa apan sassunnannu taumata matanggakka, su aellegu Ruata udde mawawo.
16Tita apan nionggolli Musa wuṛṛu al᷊aṛṛa'u manga nabi, sidutu ta'e ipappaatta na'oman sara tempon Yohanes Mananaṛṛani. Wuassu tempo udde Watti'u Al᷊al᷊uassa su ola'u ereapa Ruata mamarenta ere sangkatou Ratu sidutu iwabbatti'a. Wuṛṛu taumata mammata'en dirine tadea'u maola'a lal᷊oṛṛon araratuannu Ruata. 17Arawe malluaasanna langitta wuṛṛu runia mawul᷊i, wuassu woṛṛetta sambau sulal᷊ummu Titan Ruata tawe matipussa.
18Isai manindo awingnge see ma'awingngu wawine waine, taumata udde sinumandaga. Wuṛṛu taumata apan ma'awingngu wawine apan suete sinindoanna udde, sinumandaga lai.”
Taumata ala wuṛṛu i Lazarus
19“Pia sangkatou ala. Peddenne mangkasagada aregane wuṛṛu wiakke mannampal᷊iu apiane su miallo-miallo. 20Su saruannu ngaran bal᷊ene niapaa'ianna sangkatou asiangnga aranne i Lazarus. Awangnge napenen ibbongnga. 21I tou ma'apulu umanna manga taṛṛotong kanna apan mannawo wuassu meddan taumata ala udde. Arawe asu ewe'e nirumanta nallewa lessane.
22Taumata asiangnga udde see natete wuṛṛu niapiddu mala'ekatta watukku tampa awantuhanne su sandiṛṛanni Abraham su surga. Taumata ala udde nate lai wuṛṛu see nilabingnga. 23Su runian taumata nate i tou uatataṛṛangnga. Wuṛṛu napawe i tou naningngara wua poiaroddi, i tou naasilo si Abraham su tampa apan marau wuṛṛu i Lazarus su sandiṛṛanni Abraham. 24‘Iamangnga Abraham!’ sasal᷊anden taumata ala udde. ‘Akkanaawe i ya'u. Doloṛṛa'a i Lazarus mangammon tal᷊imadone su ua'e, see rumanta maṛṛolo lila'u. I ya'u mangke nasansarate sulal᷊ummu putungnga indi!’
25Arawe i Abraham sinumimbakka, ‘Naungewe ana'u: su alo'engngu pabbiaṛṛannu i'o suete naasomba manambo apianne; arawe i Lazarus naasomba alal᷊eoanne. Orassa indi i tou mal᷊uassa isindi, wuṛṛu i'o uatataṛṛangnga. 26Wuṛṛu lai, su wallatti ite suete niola'a sambau rampissa mal᷊oangnga, tadea'u taumata wua isindi tawe maaranta poiaroddi, wuṛṛu taumata poiaroddi tawe maaranta isindi!’ 27‘Amungkangngu aroddi, Iamangnga,’ wisaran taumata ala udde, ‘i ya'u sumal᷊ande su Iamangnga tadea'u mandolokki Lazarus watukku wal᷊en iamangku. 28Pia sire lima tuṛṛangku isudde. Doloṛṛa'e Lazarus mapaanaungnga si mangitou, tadea'u arie i mangitou lai manawo su tampan sansara indi.’
29I Abraham sinumimbakka, ‘I mangitou lai piate manga wuke Musa wuṛṛu wuke manga nabi! Wala'e i mangitou tumuṛṛutta apa apan uawoṛṛetta sulal᷊ummu manga wuke udde!’ 30Arawe taumata ala udde sinumimbakka, ‘Udde taambe natimu, Iamangnga Abraham. Arawe amungkangngu pia taumata nate mabbiakka apia wuṛṛu rumanta ringanni mangitou, i mangitou sarun mawal᷊u wuassu manga rosane!’ 31Arawe i Abraham sinumimbakka, ‘Amungkangngu i mangitou maddiri madaringikka tita Musa wuṛṛu manga nabi, atonna-tonna i mangitou tawe mangngimanna lai, salaiwe pia taumata nate mabbiakka apia.’ ”
Currently Selected:
LUKAS 16: LAITLD
Highlight
Share
Copy
Want to have your highlights saved across all your devices? Sign up or sign in
