LUKAS 17
17
Manga inolaanna apan ma'arosa taumata
(Mat. 18:6-7, 21-22; Mrk. 9:42)
1Mawu Yesus nabbisara manga mallal᷊aṛṛenggen-Ne, “Manga inolaanna apan ma'arosa taumata udde ṛinone pia. Arawe nasilakate taumata apan naola'a punnene! 2Mappianne amungkangngu pia watun gahilinganna ii'itta su ullekkane, see i tou iwontolla su tahal᷊oangnga wuassu i tou mapaarosan sangkatou su wallattu manga taumata maradio'a indi. 3Ana waugu udde, paatehamma!
Amungkangngu tuṛṛangngu ma'ola'a rosa, taggue i tou. Amungkangngu i tou sinumassilla, ampungewe i tou. 4Amungkangngu i tou nassal᷊a si'o paapitu sulal᷊ummu massallo wuṛṛu suapan massal᷊a rumanta ringannu wuṛṛu mabbisara, ‘I ya'u madorongnga ampungnga,’ ampungewe i tou.”
Su ola'u pangangimanna
5Manga rasul nabbisara Mawu Yesus, “Mawu, tohassawe pangangimanni yami.” 6Mawu Yesus sinumimbakka, “Amungkangngu i yamiu pia pangangimanna ere ahewallu watun sawi, yamiu wotongnge mabbisara su alu murbei indi, ‘Aabute i'o wuṛṛu tuwote su tahal᷊oangnga,’ alu indi sarun tumuṛṛutta parentanu.”
Manaran sangkatou mangangimbe
7“Unnu wisara sangkatou wuassi yamiu pia mangangimbe apan mammasolla su wailla wuṛṛu mallu'ada domba. Napawe mangangimbe udde nabelengnga, apa mawune mabbisara mangangimbene, ‘Wette paal᷊ihakka umanna’? 8Asinungka tawe! Ewe'e i tou mabbisara mangangimbene, ‘Saddiae anna i ya'u. Palluṛṛeten laubba waresi wuṛṛu riagaite i ya'u umanna wuṛṛu ma'inumma, wua'udde wotongngete i'o umanna!’ 9Mangangimbe udde salaiwe tawe raloanna, ana waugu suete tinumuṛṛutta parenta mawune, wal᷊inewe aroddi? 10Aroddi lai yamiu. Amungkangngu i yamiu suete tinumuṛṛutta anambon manara nirolokka si'o, wal᷊oa'e, ‘I yami tumba'u mangangimbe wiasa; i yami tumba'u ma'ola'a manarang kami.’ ”
Mawu Yesus napaapian taumata sire mapul᷊o
11Sulal᷊ummu amatanna watukku Yerusalem, Mawu Yesus sinumabbi passarannu Samaria wuṛṛu Galilea. 12Su tempo sinumutta su sambau ampungnga, i Tou nirantannu sire mapul᷊o taumata marada'a paro apan ma'arantinna. I mangitou nirumarisikka ro'en marau 13wuṛṛu mangngintul᷊i, “Mawu Yesus! Tuangnga! Akkanaawe i yami!”
14Su tempo Mawu Yesus naasilo si mangitou, i Tou nabbisara, “Roote ringannu manga imam, padorongke i mangitou mamarikissa wadangngi yamiu.”
Tantal᷊anna i mangitou u'amatta, nawul᷊ite rada'i mangitou. 15Napawe sangkatou su wallatti mangitou naapendamma manungku i tou napiate, i tou nabelengnga see ringannu tingikka ma'ikkatta i tou nadalo Ruata. 16See su saruannu Mawu Yesus i tou nassubba wuṛṛu naadiangkamanna si Tou. Taumata udde taumatan Samaria. 17Wua'udde Mawu Yesus nabbisara, “Wal᷊inewe pia sire mapul᷊o apan niapaapia? Suapa sire sio udde? 18Anio tumba'u taumata raho indi nabelengnga ma'adiangkamanna su Ruata?” 19See Mawu Yesus nabbisara su taumata udde, “Darisikke, wuṛṛu roote. Ana waugu i'o mangngimanna si Ya'u, i'o napiate.”
Tempone Ruata rumanta mamarenta
(Mat. 24:23-28, 37-41)
20Sire pira taumatan Farisi naiwal᷊o Mawu Yesus tingngera Ruata rumanta mamarenta. Mawu Yesus sinumimbakka, “Araratuannu Ruata tawe itattakka ringannu manga tanda apan wotongnge asiloannu taumata, 21ma'oman sara taumata botongnge mabbisara, ‘Wette pa'ellega, indi i Tou!’ ara'e, ‘Poiaroddi i Tou!’ Ana waugu Ruata suete nanattakka mamarenta su pattangnganni yamiu.”
22Wua'udde Mawu Yesus nabbisara su manga mallal᷊aṛṛenggen-Ne, “Sarun dumanta tempone i yamiu ma'apulu ma'ellega sambau allo wuassu manga allon Ana'u Taumata, arawe i yamiu tawe maasilo allo udde. 23Wuṛṛu taumata sarun mabbisara si yamiu, ‘Pa'ellega, isudde!’ ara'e, ‘Pa'ellega isindi!’ Arawe imbaṛṛangnga i yamiu sumabangnga maddea'a si Tou. 24Su ereapa sawallo ma'ilatta wuassu langitta, wuṛṛu mannemakka wuassu pentakke saran pondolle, aroddi lai ola'u Ana'u Taumata napawe su allonete. 25Arawe paarorone i Tou ṛinone matataṛṛangnga anambon asasusa wuṛṛu ipa'adirin taumata orassa indi. 26Su allo udde Ana'u Taumata sarun iapaal᷊iatta'a lihidde ere su tempo Nabi Nuh rorone. 27Taumata u'anna wuṛṛu ma'inumma, wuṛṛu ma'awingnga; aroddi lai tawe illol᷊one na'oman sara i Nuh sinumutta sulal᷊ummu apalla wuṛṛu nammanawangnga lapiddu namate anambon taumata udde. 28Wuṛṛu ere lai su tempon Lot. Taumata u'anna ma'inumma, mabbal᷊u'a, mammalli, mabbailla, massuanna wuṛṛu ma'ola'a wal᷊e. 29Arawe napawe i Lot sinumabangnga wuassu Sodom, allo udde putungnga wuṛṛu belerangnga nanawo wuassu langitta wuṛṛu namate si mangitou sarangkanambone. 30Aroddi lai olangnge su allon Ana'u Taumata iapaal᷊iatta'a.
31Su allo udde taumata apan tantal᷊anna roso uaawitta su wal᷊ene arie pallintukka mangal᷊appa darotongnge sulal᷊ummu wal᷊e. Aroddi lai taumata apan tantal᷊anna su wailla arie pabelengnga su wal᷊ene. 32Paananunge apa apan suete nariaddi su awingngi Lot! 33Taumata apan mattinsahadda manal᷊amatta wiakke, sarun awul᷊iannu wiakke. Arawe taumata apan niawul᷊iannu wiakke sarun maasal᷊amatta wiakke udde. 34Pangimante: Su ṛabbi udde ruang katou apan mattiilla su atatiil᷊anna sambau, sangkatou sarun iapidda wuṛṛu sangkatou lai itantangnga. 35Ruang katou wawine tantal᷊anna manggilingngu gandumma, sangkatou sarun iapidda wuṛṛu sangkatou sarun itantangnga. [ 36Ruang katou tantal᷊anna mammanara su wailla, sangkatou sarun iapidda wuṛṛu sangkatou sarun itantangnga.]”
37Mallal᷊aṛṛenggennu Mawu Yesus naiwal᷊o, “Suapa udde sarun mariaddi, Mawu?”
Mawu Yesus sinumimbakka, “Suapa pia winal᷊unanna, isudde pia manu'a u'inassa winal᷊unanna udde.”
Currently Selected:
LUKAS 17: LAITLD
Highlight
Share
Copy
Want to have your highlights saved across all your devices? Sign up or sign in
