Mithumo 3
3
Gu hawulugiswa ga mwama nya gigoha
1Pedro ni Johane va di gu gwela Nyumbani ga Nungungulu vaya gira nombelo nya silambo. 2Va dita vathu na va rwade mwama a nga bani ari gigoha gukhugela guvelegwani gwaye. Matshigu yatshavbo va dita mu vega vbamwanyatunu nya Nyumba ya Nungungulu gu ranwago pwani “Wumburi,” afela gu lomba zomola ga vathu va belago. 3Na wonide Pedro ni Johane na va gu bela Nyumbani ga Nungungulu a di va lomba zomola. 4Pedro ni Johane va di thendregedza va mu khedzisa. Pedro a di mu embela, khuye: “Nga hi khedzisa.” 5Uye a di khusedza maho a va khedza, na gu virela gu hakha gilogyo khu mandzani gwawe. 6Pedro a di khuye: “Nyi mwalo parata ambari ndralama; aholu, iso nyi gu naso, khiso nyi gu ningago: Khu lina la Jesu Kristo wa Nazareta, khuga u gimbila.” 7A di mu phara khu mandza ya nyamudye a gu mu khusa. Khu gikhati gyogyo, migondro ni sitshinandro saye, si di tiyela; 8mwama a di ndraga a ema khu mawundru yaye, a phela gu gimbila. A di bela navo Nyumbani ga Nungungulu, na gu gimbila, na gu ndragandraga ni gu rungudza Nungungulu. 9Vathu vatshavbo va di mu wona na gu gimbila ni gu rungudza Nungungulu, 10va di gu muti pwani khuye kamwe a nga bani a gu khala vbamwanyatunu nya wumburi nya Nyumba ya Nungungulu a lomba zomola. Va di tala khu guliwuga ni gusamala khu kotani nya iso si nga girega gwaye.
Tshumayelo ya Pedro vbakari nya vathu
11Mwama wule a di namarela Pedro ni Johane, vatshavbo va di liwuga va ta va randrela avba va nga bani va romo, nyangwatunu yi ranwago pwani khya Solomoni. 12Na wonide esi, Pedro a di ganela ga vathu, khuye: “Vathu va Israyeli, khu ginani mu liwuga khu gu wona silo sesi; khu ginani mu hi khedzisago nga khwatshi mwendro khu tshivba yathu, mwendro gukhodwa gwathu gu nga hawulugisa mwama yoyu a kodza gu gimbila? 13Nungungulu wa Abrahama, wa Isaki ni wa Jakobe, Nungungulu wa vababe vathu, rungudzide githumi gyaye Jesu, mu nga Mu ningelani enu, ni gu mu dangani mbeli ga Pilato; narigu uye a di guvbweta gu mi tshula, enu mu bomba. 14#Wona gambe: Mat 27:15-23; Mark 15:6-14; Luk 23:13-23; Joh 19:12-15. Mu dangide muthu nya guage ni muthu nya gululame, mu gu lomba gu tshuledwa gighevenga. 15Mu songiside guralo Pfhumu yi ningago guvbanya. Aholu, Nungungulu a mu wuside khu ga vafudego; ethu avba hi dzifakazi nya sigiro soso. 16Khu gukhodwa linani ga Jesu, ilo lina lolo khilo kamwe li nga ningago tshivba mwama yoyu mu mu wonago, gambe mu mu tigo: Khidzo kamwe, gukhodwa linani ga Jesu gu ningide womi mwama yoyo mu mu wonago mwatshavbo. 17Ambari ulo vandruye, nyi ngu dziti nya gukheni mu giride esi khu wuhangi, enu ni vafumeli vanu. 18Aholu, Nungungulu tadziside khu magirelo yaya satshavbo iso a nga si tivisago khu magana ya vaprofeti vatshavbo, nya gukhuye: Kristo Waye a di gu fanela gusaniseka. 19Khu kharato, dzi layeni mu vbindrugedza mavbanyelo, gasi mufela gu tsetseledwa sighoho sanu; 20mwendro khu magirelo yoyo gi na rumedwa gikhati nya gu rudziswe khu Pfhumu. Uye a na rumela Wule a nga tumbisedwa enu, a gu uye Jesu. 21Uye a fanelago gu hakhwa Ndzadzini kala gu vboha matshigu nya guwusedzwe silo satshavbo a nga tivisago Nungungulu gukhugela gale khu magana ya vaprofeti nya gukatege. 22#Wona gambe: Dhet 18:15-16. Khu lisine, ganede Mosi, khuye: ‘Pfhumu Nungungulu a na tumbulugisa vbakari nya vandriyanu muprofeti nya gufanane ni eni. Mu na mu yingisani ga satshavbo a na gu mi embelago. 23#Wona gambe: Dhet 18:19. Uye a na gumba yingisa muprofeti yoyu a na fuviswa vbakari nya vathu va Nungungulu.’ 24Vatshavbo vaprofeti va nga ganela, gukhugela Samuweli ni vale vatshavbo va nga mu landrela khu hwane, va tiviside matshigu yaya. 25#Wona gambe: Gen 22:18. Enu khenu sanana sa vaprofeti, mu velegidwe ndrani nya pwanano wu nga girwago khu Nungungulu ni vababe vanu, gikhati a nga ganela ga Abrahama, khuye: Khu melego wago ma na kategiswa mahundzu yatshavbo ya mafuni. 26Nungungulu na wuside githumi gyaye khu ga vafudego, a gi rumede gwanu guhegula, gasi guta mi kategisa, gufela gu muthu ni muthu a mane gu vbindrugedza a diga mithumo yaye nya guvivbe.”
Currently Selected:
Mithumo 3: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
