Mithumo 4
4
Gumodwa ga Pedro ni Johane
1Na va gu ganela vbakari nya vathu, va di vboha vaphasi nya mhamba, ni muthangeli nya Nyumba ya Nungungulu, ni vasadhusi. 2Va di garadzega khu gu wona Pedro ni Johane na va gu hevbudza vathu ni gu huwelela guwuga ga vafudego linani la Jesu. 3Va di va mola va gu va khothela pasoni kala khu mindru gakone, kholu li di hwide lidambo. 4Ambari ulo, vangi nya vale va nga pwago magana yaye, va di khodwa, va engedzela tengo nya vakhodwa, wu nga vboha gipimo nya livbandre magumi mazana (5000) vama. 5Khu mindru gakone, vakhongolo nya Vajudha ni madhota ni vahevbudzi nya Nayo, va di gira tshangano Jerusalema. 6Gumogo ni Muphasi nya Khongolo Anasi, ni Khefasi, ni Jonathane, ni Alexandre, ni vatshavbo valongo nya lihundzu la Muphasi nya Khongolo. 7Va di ranisa vapostoli va ta va vega vbakari gwawe, va gu va wudzisa, khavo: “Khu tshivba ya mani, mwendro khu lina la mani mu giridego silo sesi?”
Magana ya Pedro ga vathangeli nya Vajudha
8Khavbo avbo, Pedro, na tade khu Liphuvbo nya Guage, a di ganela, khuye: “Vakhongolo nya libandla ni madhota, 9kha nga olu muhuno hi wudziswago khu kotani nya thumo nya wadi wu nga giregago ga mudwali moyo ni edzi a nga hawulugiswa khidzo, 10khalani na mu gu dziti enu mwatshavbo, enu ni vathu vatshavbo va Israyeli, nya gukhenu: Khu lina la Jesu Kristo wa Nazareta mu nga mu khokhothelani enu vbagihambanotunu, aholu Nungungulu a mu wusidego khu ga vafudego. Khu tshivba ya Jesu muthu yoyu a dzi kodzide gu khuga a ema vbakari gwanu na hawulugile. 11Jesu khuye giwindri gi nga nyenywago khu enu vavbahi, gi khadego hungo nya gikoli nya nyumba. 12Kha hi dzi kodzi gu mana guvbanyiswa khu mumbe muthu, kholu, mafuni gwatshavbo limwalo limbe lina li riyidwego vathu li gu ni tshivba nya gu hi vbanyise.” 13Va di liwuga khu gu wona gutiya ga Pedro ni Johane, va tidwago gupwani vathu nyambana sihevbulo, gambe va di si dugeli dzindrangani nya guwonegele va di gu vati khu lisine khavo vapizane va Jesu. 14Aholu va di gu wona nuye mwama wule a nga hawulugiswa na emide navo, gima kha va mana magana nya gu va ganedze. 15Va di va embela va duga vbavbandze avo va tshala va wudzisana khu gyawe, khavo: 16“Ginani hi na gu girago khu vathu vava? Kholu, khu mandza yawe gu giregide giliwugiso nya gikhongolo gi wonidwego khu vathu vatshavbo va Jerusalema; ethu kha hi dzi kodzi gu danga. 17Na ma si gu phalalegi vbakari nya vathu mahungu yaya, hongoleni hi va thele hwanga, hi va himbedzela gu ganela gambe khu lina lolo.” 18Khavbo avbo, va di va ranisa gambe, va gu va laya ni gu va himbedzela va si engedzi gambe gu ganela ni gu hevbudza khu lina la Jesu. 19Pedro ni Johane va di va hakha, khavo: “Lamulani enu vamune, mwendro gululamile mahoni ga Nungungulu gu ethu hi yingisa enu vathu guvbindra Nungungulu. 20Gasi ethu, kha hi dzi kodzi gumba pwadza vathuni iso hi nga si wonago ni gu sipwa.” 21Kha nga va nga hamugago nandru nya gu va tsayise khuwo, va di engedzela gu va thusedzela, va gu va tshula khu gu thava vathu, kholu vathu vatshavbo va di gu rungudza Nungungulu khu iso si nga giregago. 22Kholu mwama a nga hawulugiswa a di vbindride magumana myaga nya guvelegwe gwaye.
Nombelo nya vakhodwa vbakari nya sigaradzo
23Pedro ni Johane, na va tshudwe, va di hongola vaya patana ni va na gyawe va gu va embeledzela satshavbo esi va nga embedwago khu vaphasi nya vakhongolo ni madhota. 24Na va pwide satshavbo, va di hengela monyo moyo va khusedza lito ga Nungungulu va ganela, khavo: “Pfhumu, khuwe mugiri nya ndzadzi ni mafu, ni linene ni satshavbo esi si tadzago malanga yoyo. 25Khuwe u nga ganela khu Liphuvbo nya Guage khu likana la babe wathu Dhavhidhe, githumi gyago, khuye: Khu ginani va tadego khu likhulo va nya mayigo?
‘Khu ginani vathu va lugago gikungo nyamba phasa gilo?
26Vafumeli nya mayigo ni manganagana va emide gumogo
Va hengela gu wugela Pfhumu ni Kristo waye.’
27Khidzo khu lisine, Pontiyo Pilato ni Herodhi, gumogo ni va nya mayigo ni mahundzu yatshavbo ya Israyeli va hengede gumogo dhoropani momu, va gu wugela githumi gyago nya gukatege, Jesu u nga mu todzago mafura nya wufumu, 28vafela gu gira esi u nga si dongisela khu gale khu tshivba ni guti gwago. 29Gasi olu, Pfhumu, wona, va ngu hi thela hwanga; ninga tshivba sithumi sago si huwelela mahungu yago khu gu tiya gwatshavbo; 30Handzega mandza yago gu gumanege siwonegiso ni siliwugiso ni gu hawulugisa madwali khu lina la Jesu, githumi Gyago nya gukatege.” 31Na vari vbakari nya nombelo gu di manega girevareva vbale va nga bani va romo; vatshavbo va di tala khu Liphuvbo nya Guage, va gu ganela mahungu ya Nungungulu na va tiyide.
Mavbanyelo nya libandla nya vakhodwa nya guhegule
32Talo nya vathu va nga khodwago va di gu vbanya khu monyo moyo ni hefemulo moyo. Mwalo muthu a nga bani a gu thula gilo gyaye khuye egi khyangu, aholu va di hengela silo satshavbo. 33Vapostoli va di gu fakaza khu tshivba guwuga ga Pfhumu Jesu khu ga vafudego. Gambe wuhigo nya wukhongolo wu diri gwawe. 34Vbakari gwawe gu diri mwalo gisiwana, kholu vale va nga bani vari ni sipeto ni dzinyumba va di rengisela va gu resa dzitsapawu dzakone, 35va ta dzi vega migondroni ya Vapostoli, va gu kabanisela muthu ni muthu maningano ni sigaradzo saye.
Wuhindzi wa Bharinabha
36Josefe a ranwago khu vapostoli pwani Bharinabha, gu tshamusago pwani “Gyanana nya gutangadzise,” a diri Mulevhi nya givelegwa gya Kipre. 37Adiri ni gipeto, na gi rengisile, a di resa tengo wakone a ta vega migondroni ya Vapostoli.
Currently Selected:
Mithumo 4: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
