Genesi 24
24
Isaki a ngu lowodzwa nyamayi
(Genesi 28:1-10; 29:1-20)
1Abrahama a di gumbide ngudzu, myaga yaye yi diri yingi ngudzu, Pfhumu Nungungulu a di mu kategiside khu satshavbo. 2Abrahama a di embela githumi gyaye nya gikhongolo gya ndrangani gwaye, egi gi thangelago silo saye satshavbo, khuye: “Vega mandza yago vbanyongatunu gwangu, #24:2 Vbanyongatunu gwangu, maganelelo nya wuthiwa, nya gupwni “vbawamatunu gwangu.” Vagale va di tiyisa gisambanyo nyamba tshulega khu gu vega mandza vbawamatunu ga wule va mu sambanylago. 3Nya gu vbweta gukheni u sambanye khu lina la Pfhumu Nungungulu wa ndzadzini ni Nungungulu wa mafuni, khuwe, gima khu na nga vbwetela gyanana gyangu, nyamayi vbakari ga vanyamahegyane nya lifumbu nya Vakhanani nyi vbanyago vbakari gwawe. 4Aholu, u na hongola tigoni gwathu, ga valongo vangu, u na ya hatha iyo mwangadzi wa gyanana gyangu Isaki.”
5Githumi gi di hakha, khigyo: “Ahati nyamahegyana a gumba dzina gu wuya ni eni tigoni momu, nyi na dzega gyanana gyago nyi gi bweledza tigoni gwago nya mavelego, gani?”
6Abrahama a di hakha, khuye: “Ne khu mevbini magirelo, u nga dzegi gyanana gyangu u gi bweledza iyoyo!”
7 Pfhumu Nungungulu wa ndzadzini a nyi dusidego ndrangani ga babe wangu ni tigoni gwangu nya mavelego, a nyi embede, a sambanya gwangu khuye a na ninga litigo leli ga sanana sangu, Uye a na rumela ngilozi yaye mbeli gwago, a na resa nyamayi a na khalago mwangadzi wa gyanana gyangu. 8Aholu, nyamayi a gu bomba gu wuya nago, u na bani na wu tshulegide ga gisambanyo gyangu, nya gikhongolo khu gumba bweledza iyoyo gyanana gyangu. 9Khavbo avbo, githumi gi di vega mandza yaye vbavbatshi nya nyonga ya mune waye, gi sambanya esi uye a nga gi rumago.
10Githumi gi di dongisela likhumi dzingameriya dza mune waye, gi gu phara ndzila gi hongola, na gi pharisidwe miningelo nya yingi nya lisima khu mune waye. Gi di dzega ndzila nya guhongole Mesopotamiya, gi hongola dhoropani ga Nahori. 11A di khidzimisa dzingameriya gasi gu dzi hefemudza vbavbandze nya lidhoropa, vbafuvbi ni nambo. A diri silambo, guhwani nya lidambo, gikhati vanyamahegyane va dugago va ya rega mati.
12Githumi gi di ganela khu monyoni gwaye, khigyo: “Pfhumu Nungungulu wa Abrahama, mune wangu, Gira khuwe nyi mane muhuno egi nyi gi vbwetago, wonegisa wuwadi wago ga mune wangu Abrahama.” 13Wona gukhuwe nyi emide vbafuvbi nya nambo yoyu dzimbiri dza dhoropani momu dzi tago guta rega mati. 14Nyamahegyane wule nyi na mu lombago, kheni: “Gira wuhindzi u wegedza khali yago nyi kodza gu sela mati, a gu hakha khuye sela, nyi na ninga gambe mati dzingameriya dzago dzi sela, a na khale uye u mu hathidego gu khala mwangadzi wa githumi gyago Isaki. Khu kharati nyi na dziti gukheni u wonegiside wuwadi ga mune wangu.”
Rebheka namboni
15Githumi gi si gu vbedzi gu ganela, Rebheka, gyanana gya Bhetuweli, gyanana gya Milika ngadza Nahori, ndruye wa Abrahama, a di vboha na vbagaride khali yaye. 16Nyamahegyane a di mburide ngudzu, a diri likendzi kholu a di si gu tidwi khu mwama. A di relela namboni aya tadza khali yaye a gwela.
17Khavbo avbo, githumi gi di tutuma gi mu khinga, gi mu embela, khigyo: “Khu wuhindzi wago, nyivbe nyi sela vbadugwana mati ya khalini gwago.” 18Uye a di hakha, khuye: “Sela, mune wangu,” a di wegedza khali mandzani a mu ninga a sela.
19Na sede, nyamahegyana a di khuye: “Nyi nguya rega gambe mambe nyita sedza dzingameriya dzago, kala dzi kodwa.” 20A di dzegela gu guhula khali nya mati umo nya gighowolo a tutuma a bwelela gambe namboni aya rega mati a ta sedza dzingameriya dzaye dzatshavbo. 21Mwama a di mu khedzisela nyamba ganela gilo gasi guti mwendro Pfhumu a gimbidziside gwadi lendro laye.
22Avbo dzi nga vbedzago gu sela dzingameriya dzatshavbo, mwama a di dusa phera nya gipandre nya pimo nya ndralama, ni maniya mavili nya likhumi mipimo nya ndralama.#24:22 pimo nya ndralama gale wu di ranwa pwani “sekele,” vbagikaloni wu di pima 12 gramas. 23A di wudzisa nyamahegyane, khuye: “U gyanana gya mani uwe? Nyi ngu gu lomba u nyi embela, ndrangani ga babe wago womo wulanga nya gu hi ya lala avbo wutshigu wowu, gani?”
24Uye a di hakha, khuye: “Eni nyi nyamahegyane wa Bhetuweli, gyanana gya Milika a nga velega ni Nahori.” 25A di engedza gambe, khuye: “Gaya gwathu womo mwasi ni mahawo nya mangi ngudzu nya guhodzise sifuyo. Womo gambe wulanga nya gulale.”
26Khavbo avbo, mwama wule a di noga a khidzima a lombelela mbeli ga Pfhumu Nungungulu, 27a ganela, khuye: “A na rungudzwe Pfhumu Nungungulu wa mune wangu Abrahama, a ngamba diga gu wonegisa wuwadi ni gutumbega ga mune wangu, a nga nyi gimbidzisa kala ndrangani ga valongo va pfhumu yangu.”
28Nyamahegyane a di tutuma a hongola ndrangani ga mayi waye, aya va embela satshavbo si nga mu dugelelago. 29Rebheka a diri ni ndriyaye nya mwama nya gupwani khu Laboni, a di tutuma a relela namboni aya hakha mwama yoyo. 30Laboni a di wone phera ni maniya mandzani ga ndriyaye, gambe a di pwide Rebheka na gu ganela, khuye: “Mwama yoyo a nyi embede esi, a diya vbweta mwama aya mu mana ni dzingameriya vbafuvbi ni nambo. 31A di mu embela, khuye: Delu nya gukatege wa Pfhumu Nungungulu, khu ginani u khalago vbavbandze yoyo? Eni nyi dongisede nyumba ni wulanga nya dzingameriya.”
Gutadzisega nya thumo
32Khavbo avbo, mwama a di bela ndrangani. Laboni a di ruma gurula dzingameriya a ninga mwasi ni mahawo sirengo, ni mati nya guhambe mawundru mwama ni dziphelegedzi dzaye. 33Khu hwane, va di va ninga guhodza. Aholu uye a di ganela, khuye: “Kha nyi na hodza gilo nyi si gu ganeli esi nyi vbwetago gu ganela.” Laboni a di khuye: “Ganela.”
34Khavbo avbo, Mwama a di ganela, khuye: Eni nyi githumi gya Abrahama. 35Pfhumu Nungungulu tadzide mune wangu khu wuhigo ni makategwa, a mu dandriside khu tshivba ni dzithomba. A mu ningide dzinvuta, dzimombe, parata ni ndralama, ni sithumi nya vama ni vanyamayi, dzingameriya ni dziburu. 36Sara, mwangadzi wa mune wangu, ambari a nga bani na gumbide, a mu ningide gyanana nya gikhwathana, a gi ningidego dzithomba dzaye dzatshavbo. 37Mune wangu a di nyi gira nyi sambanya, khuye: U nga lowodzisi nyamayi mwamana wangu vbakari nya sagadzyana sa tigoni ga Khanani a vbanyago umo. 38Aholu u na hongola, ndrangani ga babe ni valongo vangu u ya dzegela nyamayi gyanana gyangu.
39Eni nyi di mu hakha, kheni: Ahati nyamahegyane a gu bomba nyi landra?
40Uye a di nyi hakha, khuye: Pfhumu Nungungulu a nyi thangelago dzindzilani gwangu gwatshavbo, a na rumela Ngilozi yaye yi gu bangaladza gasi lendro lago li mane mihandro hi yi vbwetago; u na dzegela gyanana gyangu nyamayi nya lihundzu langu, wa ndrangani ga babe wangu. 41Uwe u na tshulega ga gisambanyo gegi nyi giridego nago, wa gu vboha ga valongo vangu avo va ya bomba gu gu ninga nyamahegyane.
42Aholu, muhuno, gikhati nyi vbohidego namboni, nyi di ganela, kheni: Uwe Pfhumu Nungungulu wa mune wangu Abrahama, gira gukhuwe liendro langu li katege. 43Eni nyi guromo avba vbafuvbi ni nambo yoyu nya mati, gyagadzyana gi na dugago gita rega mati, eni nya gu gi embela, kheni: Nga nyivba nyi sela mati madugwana ya khalini gwago, 44uye a gu nyi hakha, khuye: Sela, nyi na ya rega gambe mati nyi ta sedza dzingameriya dzago, khuye Pfhumu Nungungulu a mu hathidego gu khala mwangadzi wa gyanana gya mune wangu.
45Nyi di si gu vbedzi gu ganela esi khu monyoni gwangu, gikhati Rebheka a dugidego ni khali a relela namboni aya rega mati. Eni nyi di mu embela, kheni: Nyivbe mati nyi sela.
46Uye a di dzegela guwegedza khali, a nyi embela, khuye: Sela, nyi na ninga gambe mati dzingameriya dzi sela nidzo. Eni nyi di seda, uye a di sedza nidzo dzingameriya. 47Khavbo avbo, nyi di mu wudzisa gukheni u gyanana gya mani.
Uye a di nyi hakha, khuye: Nyi gyanana gya Bhetuweli, mwamana wa Nahori ni Milika.
Khavbo avbo, nyi di mu ambagisa phera vbathonvutunu ni maniya mawogoni gwaye. 48Nyi di khidzima mbeli ga Pfhumu Nungungulu; nyi bonga Pfhumu Nungungulu wa mune wangu Abrahama, a nga nyi gimbidzisa khu ndzila nya gudzegele gu nyi vbohisa wulanga nya gukodze gu mana gyanana gya ndruye wa mune wangu gasi gu khala mwangadzi wa gyanana gyaye. 49Olu, mwa gu dzina gu yeyedza mune wangu, lihaladzo ni lisine lanu, nyi embeleni; mwa gu bani mu hungide simbe silo nyi embeleni gambe, nyi fela gu dziti ndzila muni nyi na gu yi dzegago.”
Dzegano wa Isaki ni Rabheka
50Khavbo avbo, Laboni ni Bhetuweli va di hakha, khavo: “Satshavbo sesi sa guta khiyo ga Pfhumu Nungungulu, ethu hi mwalo gilo nya gu gu embele nya gyadi mwendro nya guvivbe. 51Rebheka khuye oyu, womo mbeli gwago, mu dzege u hongole naye; a na khale mwangadzi wa gyanana gya mune wago, kha nga idzo a ganedego khidzo Pfhumu Nungungulu.”
52Avbo gi ngapwa magana yaya, githumi gya Abrahama gi di noga mbeli ga Pfhumu. 53Gi di dusa sombo nya parata, sombo nya ndralama ni guambala gi ninga Rebheka; gi ninga gambe sombo nya lisima ga ndriyaye ni ga mayi waye. 54Hwane nya isoso, va di hodza, va sela, mwama ni dziphelegedzi dzaye, va di lala. Khu mindru gakone, gikhati va nga wugago githumi gya Abrahama gi di ganela, khigyo: “Nyi tshuleni nyi bwelela ga mune wangu.”
55Aholu, ndruye ni mayi wa Rabheka va di khavo: “Nyamahegyane a na khale nethu khu matshigwanyana, tanga nya likhumi matshigu, khu hwane, a na hongola.”
56Uye a di phindrula, khuye: “Mu nga nyi hwedzini, kha nga olu Pfhumu Nungungulu a kategisidego lendro langu, nyi digeni nyi bwelela gaya ga mune wangu.”
57Avo va di mu embela, khavo: “Hi na rane nyamahegyane hi mu wudzisa a gu pimisa ginani.” 58Va di rana Rebheka va mu wudzisa, khavo: “U ngu dzina gu hongola ni mwama yoyu, gani?” Uye a di hakha, khuye: “Ina. Nyi ngu dzina.”
59Khavbo avbo, va di diga Rebheka a gu hongola, ni ndriyaye nya gyagadzyana ni muyayi waye ni githumi gya Abrahama gumogo ni vama va nga bani va gi bangaladza. 60Va di kategisa Rebheka, khavo:
“Uwe ndriyathu!
U na khale melegi wa mazana ni mazana!
Sanana sago si na dzege madhoropa ya valala vawe!”
61Rebheka ni sithumi saye va di khuga, va khilela dzingameriya va gu landra mwama wule. Githumi gile gi di dzega Rebheka gi hongola naye.
Rebheka a ngu tshangana ni Isaki
62Gu pfolani nya lidambo, Isaki a di gu wuya khu namboni wa Lahayi-Royi; kholu uye a di gu vbanya tigoni ga Negebhi. 63Ni silambo soso a nga bani a dugide a gimbila gimbila mahangeni, a di khusa maho a gu wona dzingameriya dzi nga bani na dzi gu hidzimela. 64Rebheka nuye a di khusa maho a wona Isaki, a di tshiga khu vbangameriyatunu. 65Uye a di wudzisa githumi, khuye: “Khu mani mwama a hi khingago khu thembweni?”
Githumi gi di hakha, khigyo: “Khu mune wangu.” Khavbo avbo, Rebheka a di dzegela gufenengela khovbeni khu mwendra.
66Githumi gi di embeledzela Isaki satshavbo iso gi thumidego. 67Khu vbale, Isaki a di dzega Rebheka a mu bedza tshatshani ga mayi waye Sara, a mu hakha kha nga mwangadzi waye, a mu haladza. Isaki a di tangadziswa kharati hwane nya gufe ga mayi waye.
Currently Selected:
Genesi 24: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
