Genesi 25
25
Sanana sa Abrahama ni Ketura
(1 Dzikoronika 1:32-33)
1Abrahama a di dzega gambe mumbe nyamayi nya gupwani khu Ketura, 2a nga velega naye Zinerani, Jokisani, Medhani, Madhiyani, Isibhaki ni Suwa. 3Jokisani a di velega Sabha ni Dhedhani. Sanana sa Dhedhani, khu Hasurini, Letusini, ni Lewumini. 4Sanana sa Madhiyani khu Efa, Eferi, Enoki, Abhidha ni Elidha; esi satshavbo khu sanana sa Ketura.
5Khu guralo, Abrahama a di ninga Isaki dzithomba dzaye dzatshavbo. 6Aholu sanana sa vanyamayi nya vadugwane, a di si kavedzela basi siningwa, a si rumela na nga gu vbanya guya khala hwindzo ga Isaki, gyanana gyaye, mayigoni ya Khugadambo.
Gufa ga Abrahama
7Aya khu matshigu nya guvbanye gwa Abrahama: Vbanyide lizana ni livbandre na mavili magumi ni livbandre (175) myaga. 8Abrahama a di hefemudzega; afa na gumbide ngudzu, na tade khu matshigu nya guvbanye, a diya patana ni vababe vaye. 9Sanana saye Isaki ni Ismayeli, si diya mu dzinga phalani nya giwindri gya Makipela, gi guromo tigoni ga Efroni, gyanana gyaye Sowari, Muhiti a nga bani nari mbeli ga Mambre, 10#Wona gambe: Gen 23:3-16. petoni a nga rengago Abrahama ga Vahiti. Abrahama a di dzingwa vbale ni mwangadzi waye Sara. 11Hwane nya gu bani na fude Abrahama, Nungungulu a di kategisa mwanaye Isaki, a nga bani na gu vbanya vbafuvbi ni nambo wa Lahayi-Royi.
Situgulwana sa Ismayeli
(1 Dzikoronika 1:28-31)
12Eli khu livelego la Ismayeli, gyanana gya Agari, khumbi nya Mugipiti, eyi Sara a nga ningago Abrahama.
13Malina nya sanana sa Ismayeli, gukhedza khu longoloko nya guvelegwe gwawe, khaya: Nabhayoti, matiwula ya Ismayeli; gu handzamedza Kedhari, Adhibiyeli, Mibhisamu, 14Mesimahe, Dhumahe, Masahe, 15Hadhadhe, Tema, Jeturi Nafisi ni Kedima. 16Esi khu sanana sa Ismayeli, khayo malina yawe gukhedza khu mayigwana yawe ni dzindranga dzawe, khavo likhumi na vavili vathangeli nya mahundzu yaye. 17Myaga nya guvbanye ya Ismayeli, lizana ni magumararu na livbandre na mivili (137) myaga. Hwane nya ugo, a difa aya patana ni vababe vaye. 18Sanana saye si di vbaha gukhugela Havila kala Suri, gu khalago vbinganoni ni Egipito phuvbo nya guye Asuri. Vbahide wulanga wule na gu wonwa khu vandriyaye.
Livelego la Isaki
(Genesi 25:19—36:43)
19Eli khu livelego la Isaki, mwamana wa Abrahama: Abrahama a di velega Isaki; 20Isaki a diri ni tanga nya magumana myaga gikhati a nga dzegago Rebheka, nyamahegyane wa Bhetuweli, Muharami wa Padhani-Arami, ndruye wa Laboni, Muharami.
21Isaki a di lomba gikategiso ga Pfhumu Nungungulu, a lombelela mwangadzi waye a nga bani nari gyumba. Pfhumu Nungungulu a dipwa nombelo waye, mwangadzi waye Rebheka a di khura mimba. 22Sanana si di khala khu gu dwana ndrani gwaye, uye a di ganela, khuye: “Khu ginani nyi nga khurago mimba gasi nyi manega ni esi kharati?” A di khuga aya wudzisa Pfhumu Nungungulu. 23#Wona gambe: Rom 9:12. Uye a di mu hakha, khuye: “Ndrani gwago momo mayigo mavili:
Mahundzu mavili nya vathu ma na dugago khu ndrani gwago.
Lihundzu limwedo li na pala limbe,
koma a na thumela nandra.”
24Avbo gi nga vbohago gikhati nya guvelege gu di duga mavbaha khu ndrani gwaye. 25Uye a nga phela khuye gu duga a diri ni libonvu, na fenengedzidwe khu mafefeleti mili waye watshavbo kha nga volo, khidzo kharato va nga mu ningago lina nya gupwani khu Esawu. 26Khu gu landrela gu di duga nuye ndriyaye na mode gitshinandro gya Esawu. Khigyo gi nga gira va mu ninga lina nya gupwani khu Jakobe #25:26 Jakobe khu Gihebheru guranwa gupwani: Gitshinandro. Gikhati va velegidwego, Isaki a diri ni tanga nya livbandre na limwedo magumi myaga nya guvelegwe gwaye. 27Sikhwathana si di dandra, Esawu a di khala musoti nya wadi, mwama nya likhabi. Gasi Jakobe a diri muthu nya gurule, a di vbanya mitshatshani. 28Isaki a di gola ngudzu Esawu, kholu a di gu gola gusota, aholu Rebheka a di gola ngudzu Jakobe.
Mbiya nya dzinyemba
29Tshigu mwedo Jakobe a di gu phula guhodza. Esawu a di wuya khu khabini na garade ngudzu. 30A di embela Jakobe, khuye: “Nya ngu gu lomba, nyi dige nyi hodza guhodza gwago nya gufuvile gwadi, kholu nyi garade ngudzu.” Khigyo gi nga gira va ninga Esawu lina nya gupwani khu Edhomi.#25:30 Edhomi khu Gihebheru gupwani: Gufuvila.
31Khavbo avbo, Jakobe a di phindrula, khuye: “Guphela nyi rengisele wukoma wago.”
32Esawu a di hakha, khuye: “Wu na nyi phasa ginani wukoma olu nyifago khu ndzala?”
33 # Wona gambe: Hebh 12:16. Jakobe a di mu embela, khuye: “Sambanya kamwe olu.” Uye a di sambanya, a gu rengisa kharati wukoma waye ga Jakobe.
34Khavbo avbo, Jakobe a di mu ninga gibaba ni mbiya nya dzinyemba. Esawu a di hodza a sela; na vbedzide a di khuga a hongola.
Khidzo kharato Esawu a nga luzago khidzo wukoma waye.
Currently Selected:
Genesi 25: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
