Genesi 26
26
Esi si dugeledego guvbanyani ga Isaki
(Genesi 20:1-17; 22:15-18; 27:1-15)
1Gu di manega ndzala nya yikhongolo ngudzu tigoni mule, gu diga ndzala nya guphele ya matshiguni ya Abrahama. Isaki a di hongola Gerari ga Abhimeleki, mufumeli wa Vafilisitiya. 2Pfhumu Nungungulu a di dzi wonegisa gwaye a mu embela, khuye: “U nga releli tigoni ga Egipito, khala tigoni nyi na gu nonedzago. 3Vbanya umo matshigu nya gukari, Eni nyi womo gwago, nyi na gu kategisa, kholu Eni nyi na ninga uwe ni sanana sago mayigo yaya yatshavbo, nyi na tadzisa gisambanyo nyi giridego ga babe wago Abrahama. 4#Wona Gen 22:16-18. Nyi na andrisa livelego lago kha nga dzinyeledzi dza ndzadzini, nyi na gu ninga mayigo yaya yatshavbo. Khavbo nya melego wago, ma na kategiswa mafumbu yatshavbo nya vathu va tigoni, 5kholu Abrahama yingiside lito langu, a wuya a gu landrisa sileletelo sangu ni milayo yangu.” 6Khu guralo, Isaki a di vbanya tigoni ga Gerari.
7 # Wona gambe: Gen 12:13; 20:2. A gu wudziswa khu vathu va tigoni mule khu mahungu ya mwangadzi waye, uye a di va hakha, khuye: “I ndriyangu,” kholu uye a di gu pimisa monyoni gwaye, khuye: “Vathu va wulanga wowu va na nyi songa khu kotani ya Rebheka, kholu a diri nyamayi nya gumbure ngudzu.”
8Na gu vbindride matshigu nya gulaphe, litshigu limwedo, Abhimeleki, mufumeli wa Vafilisitiya, a di khedzisa khu vbagihogwanatunu a wona Isaki na gu hesana ni mwangadzi waye Rebheka. 9Abhimeleki a di rana Isaki a mu embela, khuye: “Khu lisine, oyu i mwangadzi wago. Khu ginani u nga tiyago u ganela, khuwe: I ndriyangu?”
Isaki a di hakha, khuye: “Nyi ganede satshavbo soso khu gu thava gu songwa khu kotani gwaye.”
10Abhimeleki a di engedza, khuye: “Ginani u giridego? Gu di tshala vbadugwanana basi mwama wa tigoni gwathu na lade ni mwangadzi wago, khu kharato, nu hi giriside gighoho.”
11Gukhugela avbovbo, Abhimeleki a di ruma gu wu tshayedwa nayo ga vathu vatshavbo, khuye: “Oyu a kuhago mwama yoyu mwendro mwangadzi waye, a na songwa.”
12Isaki a di yala marembwe yaye tigoni mule. Mwaga yoyo wa wumowo, a di fuma ngudzu guvbindra lizana dzinyondro, kholu Pfhumu Nungungulu a di mu kategisa. 13Mwama yoyu a di fuma ngudzu, a gu engedzela ngudzu dzithomba dzaye, kala a gu khala gikhudhudhu. 14A di fuma mitshambi nya dzinvuta ni dzimombe ni sithumi nya gutale ngudzu. Vafilisitiya va di girela lidiwo Isaki.
Milambo ni vahavisi
15Milambo yatshavbo yi nga podwago khu sithumi sa babe waye Abrahama, matshigu a vbanyidego, yi di futedwa khu Vafilisitiya, va gu yi tadza khu mafu. 16Abhimeleki a di embela Isaki, khuye: “Khuga avba u hongole, kholu u fumide ngudzu guvbindra ethu.”
17Khavbo avbo, Isaki a di khuga, aya vbaha mitshatsha yaye vbafuvbi ni kova wa Gerari, a khala vbale. 18Isaki a di ravba nyaluphye milambo yi nga podwago matshiguni ya babe waye Abrahama, eyi Vafilisitiya va nga yi futelago hwane nya gufe Abrahama. A di rana milambo yoyo khu malina a nga yi ranago khayo babe waye.
19Sithumi sa Isaki si di simama si gu kemba kovani, si di ya tugula gifefe nya mati ma gogago, 20aholu vahavisi va Gerari va di dwanisa avo va Isaki va gu va embela, khavo: “Mati yaya ma gu lumba ethu.” Isaki a di rana nambo wule, khuye: “Nambo nya Maregera,” kholu va nga vbweta gu mu wandrela nambo waye khu malipha. 21Va di pola wumbe nambo, gu wuga gambe guganedzisana; va wu rana, khavo: “Nambo nya guvengane.” 22A di dzegela gukhuga khu vbale, a vbindra aya mbeli va ya tula nambo, avbovbo kha ga manega guganedzisana, a di wu riya lina nya gupwani: “Nambo nya guandre,” kholu a di khuye: “Olu Pfhumu Nungungulu a hi ningide wulanga, hi na fuma tigoni momu.”
23Khu vbale, a di gwela Bherisebha. 24Pfhumu Nungungulu a di dzi wonegisa gwaye ni wutshigu, a mu embela, khuye: “Eni kheni Nungungulu wa babe wago Abrahama. U nga thavi gilo, kholu, Eni nyi nago, nyi na gu kategisa, nyi engedzela melego wago, khu kotani ya githumi gyangu Abrahama.”
25Isaki a di vbaha giluvelo wulanga wule, a rana lina la Pfhumu Nungungulu; khu hwane a di vbaha tshatsha waye wulanga wule, sithumi saye si di pola nambo vbale.
Pwanano ni Abhimeleki
26 # Wona gambe: Gen 21:22. Abhimeleki a di khuga khu Gerari a na gu bangaladzwa khu pari yaye Awuzati ni Fikoli, muthangeli nya libutho laye a hongola ga Isaki. 27Isaki a di mu embela, khuye: “Gighelo muni gi mi resago avbo gwangu, enu mu nyi nyenyago, mu nyi tutumisidego tigoni gwanu?”
28Avo va di hakha, khavo: “Kholu gu ngu dzi wonegisa gupwani khu lisine Pfhumu Nungungulu a na ni uwe, ethu hi di khethu: Gu vbwetega gu manega gisambanyo ga ethu ni uwe. Ha gu vbweta gu gira pwanano nago. 29Sambanya gukhuwe gima khu na nga hi girela guvivba, kha nga anethu gima kha hi na nga gu tshanisa, hi na gu girela silo nya sadi, hi gu diga u duga khu gurula. Uwe, olu khuwe wule a kategisidwego khu Pfhumu Nungungulu.”
30Khavbo avbo, Isaki a di mu girela buzo, va di hodza va sela. 31Khu mindru gakone, vbadzimindrutunu, va vavili va di patana khu gisambanyo; khavbo avbo, Isaki a di va vbangana, avo va di khuga va hongola khu gurula.
32Litshigu lolo furi, sithumi sa Isaki si di ya mu embela makungo nya yadi nya gutshambe nya nambo va nga bani va gu pola, va di mu embela, khavo: “Hi mane mati!” 33A di rana nambo yoyo khu lina nya gupwani Sebha. Khu guralo kala na muhuno olu, lidhoropa lakone la gu ranwa pwani Bherisebha.
Dzegano wa Esawu
34Na tshanganiside magumana myaga nya guvelegwe gwaye, Esawu a di dzega vanyamayi: Judhite, nyamahegyane wa Bheheri Muhiti ni Bhasemati, nyamahegyane wa Eloni, Muhiti. 35Avo va di pwisa wuvi nya wukhongolo ngudzu monyoni gwa Isaki ni gwa Rebheka.
Currently Selected:
Genesi 26: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
