Genesi 27
27
Isaki a ngu kategisa Jakobe
(Genesi 22:15-18; 26:2-5)
1Isaki a di gumbide ngudzu. Maho yaye ma di garade, ma di si woni. A di rana Esawu, gyanana gyaye nya matiwula, a mu embela, khuye: “Mwanangu!”
Uye a di hakha, khuye: “Nyi womo avba.”
2Isaki a di khuye: “Kha nga u wonago, eni nyi gumbide, kha nyi liti litshigu nya gufe gwangu. 3Nyi ngu gu lomba u dzega matshari yago, gikhweso ni wulaho wago, u bela khabini u sota. Egi u na songago, 4nyi phulele u tshambisela gwadi kha nga idzo nyi golago khidzo, u nyi resela nyi ta hodza, nyi fela gu gu kategisa na nyi si gufi.”
5Aholu Rebheka a di bani a gu yingisela, a pwa esi Isaki a nga embelago gyanana gyaye. Esawu a di duga aya sota, gasi gu resa ga babe waye. 6Rebheka a di embela mwanaye Jakobe, khuye: “Nyi ngari gupwa babe wago a na gu embela ndriyago Esawu, khuye: 7Indra uya sota u ta nyi phulela nyama nya gunone nyi hodza, kholu nya gu vbweta gu gu kategisa mahoni ga Pfhumu Nungungulu na nyi si gufi.” 8Olu, upwa gwadi mwanangu, esi nyi gu embelago. 9Indra phandroni u ya mola siphongwana sivili nya gunone, u nyi resela. Eni nyi nata si dongisela gwadi nyi phulela babe wago nyama nya gutshambe gwadi kha nga idzo a yi golago khidzo uye. 10“U na yisa ga babe wago aya hodza, afela gu gu kategisa na si gufi.”
11Jakobe a di hakha mayi waye, khuye: “Ndriyangu Esawu mwama nya gutale khu mafefeleti milini gwaye, gasi eni nyi mwalo nawo. 12A gu nyi phara babe, nyi na khala muthu nya malipha gwaye, wulangani nya gikategiso nyi na mana givalo.”
13Mayi waye a di phindrula, khuye: “Givalo gyogyo gi na thegela eni, mwanangu. Upwa esi nyi gu embelago; indra u ya dzega esi nyi gu embedego.”
14Jakobe a di hongola aya mola siphongwana a gu wuya naso ga mayi waye. Uye a di ta phula gwadi a tshambisela kha nga idzo a nga bani a gu gola khidzo babe waye. 15Rebheka a di hatha dzingandzu dzile nya gumbure ngudzu dza Esawu, mwanaye nya matiwula, edzi dzakone nya gumbure ngudzu a nga bani ari nadzo ndrangani, a gu ambagisa Jakobe gyanana gyaye nya nandra. 16Na vbedzide a di mu ambagisa lidowo nya phongo mandzani ni ngoloni, gu nga bani guri mwalo mafefeleti, 17a gu ninga gyanana gyaye Jakobe gi phara mandzani nyama nya guphudwe ni gibaba a nga dongiselago.
18Jakobe a diya ga babe waye aya, khuye: “Baba wangu.”
Isaki a di hakha, khuye: “Nyi womo avba, gasi khuwe mani, mwanangu?”
19Jakobe a di hakha babe waye, khuye: “Kheni Esawu, gyanana gyago nya matiwula; nyi giride esi u nga nyi ruma. Nyi ngu gu lomba u wuga, u khala, u hodza nyama nyi nga sotago, gasi u nyi kategisa.”
20Isaki a di khuye: “U dzi kodzide kharini guvbiredzela gu sota girengo, mwanangu?”
Jakobe a di hakha, khuye: “Kholu Pfhumu Nungungulu wago khuye a gi residego mbeli gwangu.”
21Khavbo avbo, Isaki a di embela Jakobe, khuye: “Delu, hidzimela nyi ta gu phara, mwanangu, nyi wone gukheni khu lisine kamwe khuwe gyanana gyangu Esawu mwendro khandruwe.”
22Khavbo avbo, Jakobe a di hidzimela ga babe waye Isaki, a nga mu pharago, a gu ganela, khuye: “Lito kheli la Jakobe, aholu mandza khaya ya Esawu.” 23Isaki kha tugula Jakobe kha nga a nga bani ari ni mafefeleti nya nga ya ndriyaye Esawu, a di rula gasi gu mu kategisa. 24Ambari ulo a di mu wudzisa nyaluphye, khuye: “Ina kamwe khu lisine khuwe gyanana gyangu Esawu, gani?” Jakobe a di hakha, khuye: “Ina kheni.”
25Khavbo avbo, Isaki a di khuye: “Nyi ninge guhodza nya girengo u ngaya sota, gasi nyi hodze nyi gu kategisa.” Jakobe a di mu ninga uye a gu hodza; a mu yisela gambe vbinyu aya sela. 26Khavbo avbo, Isaki, babe waye, a di mu embela, khuye: “Hidzimela mwanangu u nyi ninge besu.”
27Jakobe a di hidzimela aya mu bhejari. Na gupwa gunengela gwadi dzingandzu dzaye, a di mu kategisa, khuye:
“Ina, gunengela ga gyanana gyangu,
gu ngu fanana ni gubhumula nya lithembwe
li kategisidwego khu Pfhumu Nungungulu.
28Nungungulu a na gu ninge
thondrwane ya ndzadzini
ni gunona nya mafu,
gu na manege talo nya tirigu ni vbinyu! 29Mayigo ma na gu khozele,
ma na khidzime mahundzu nya vathu mbeli gwago!
Fumela vandriyago,
mbelii gwago si na noge
sanana sa mayi wago! A na vadwe oyu a na gu valago,
a kategiswe oyu a gu kategisago.”
Guwuya ga Esawu
30Isaki, na ngari guvbedza gu kategisa Jakobe, Jakobe na ngari gu duga khu ga babe waye, a di vboha Esawu na gu wuya khu gusotatunu. 31A di phula nuye nyama nya gunone, a yi yisa ga babe waye, a mu embela, khuye: “Wuga baba wangu u hodze nyama nyi ngaya sota eni gyanana gyago, gasi u nyi kategisa.”
32Babe waye Isaki a di mu wudzisa, khuye: “Khuwe mani uwe?”
Uye a di hakha, khuye: “Kheni Esawu gyanana gyago nya matiwula.”
33Isaki a di liwuga khu tshivba, a ganela, khuye: “Gasi khu mani a nga nyi resela nyama nya gusotwe nyi hodzidego eni nu si gu vbohi uwe? Nyi mu kategiside, khu guralo khuye a kategisidwego.”
34Na pwide magana yoyo ya babe waye, Esawu a di phela gu gira ligwaha ni gulila khu wuvi waye watshavbo, a ganela, khuye: “Nyi kategise neni, baba wangu!”
35Aholu Isaki a di khuye: “Ndriyago dzude khu wugengeli a ta hakha gikategiso gyago.”
36Esawu a di ganela, khuye: “Khu olu gikhati nya wuvili na gu nyi kanganyisa, khu guralo va nga mu thangisa lina nya gupwani khu Jakobe. Guhegula a nyi wandrede wukoma wangu, olu a nyi dzegede gikategiso gi nga bani gi gu nyi lumba.” A di engedza gambe a ganela, khuye: “Baba, ina kamwe khwa nyi vegela neni gikategiso gimwegyo, gani?”
37Isaki a di mu hakha, khuye: “Nyi mu giride pfhumu yago, nyi mu ningide vandriyago vatshavbo gu khala sithumi saye, nyi mu ningide tirigu ni wadwa nya dziuvha. Ginani gambe nya gu gu ninge olu mwanangu?”
38Esawu a di wudzisa babe waye, khuye: “Ina gikategiso gimwegyo basi u gu nagyo gani baba wangu? Nyi kategise neni baba wangu.” A di khusa lito a lila khu tshivba.
39Babe waye Isaki a di mu hakha, khuye:
“Ndranga yago yi na hamuga gunona nya mafu
ni thondrwane yi thegago khu vbatshani ndzadzini.
40U na vbanya khu litshari lago
u na khala githumi gya ndriyago,
aholu mugugimbilani gwago nya gulegalege,
u na tshula kanga waye thamoni gwago.”
41Esawu a dipwa likhulo khu Jakobe, khu kotani nya gikategiso gile a nga ningwago khu babe waye. A di ganela khu monyoni gwaye, khuye: “Ma na vboha matshigu nya gulile babe wangu, hwane nya ugo, nyi na songa ndriyangu Jakobe.”
42Rebheka a di tiviswa magana yaya ya mwanaye nya koma Esawu. A di ranisa Jakobe, gyanana gyaye nya nandra, a mu embela, khuye: “Ndriyago Esawu a gu vbweta gu phodza khu gu gu songa. 43Nyipwe mwanangu, vbiredza u thavela ga ndriyangu Laboni, tigoni ga Harani. 44Indra u ya khala ndrangani gwaye matshigu ma vbwetegago kala li bosa likhulo la ndriyago. 45Avbo uye a na rulago, a divaledwa khiso u mu giredego khavbo nyi na rumelago va ta gu dzega u wuye khiyoyo. Kha nyi vbweti gukheni nyi luze sanana sangu sa sivili khu litshigu limwedo basi.”
Jakobe a ngu rumedwa Mesopotamiya
(Genesi 24; 29:1-20)
46Rebheka a di embela Isaki, khuye: “Nyi ngu garadzega ngudzu guvbanyani gwangu khu kotani ya vanyamahegyane nya Vahiti; Jakobe nuye a gu dzegana ni nyamayi nya Muhiti kha nga avo, i tshukwana nyifa basi.”
Currently Selected:
Genesi 27: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
