Genesi 28
28
Isaki a ngu rumela Jakobe Padhani-Arani
1Isaki a di rana Jakobe, a mu kategisa, a mu laya, khuye: “Gima u nga dzegi nyamayi vbakari ga vanyamahegyane nya Vakhanani. 2Khuga u hongole tigoni ga Padhani-Arani, ndrangani ga Bhetuweli, babe wa mayi wago, u naya dzega mwangadzi ga sanana sa Laboni, ndruye wa mayi wago. 3Nungungulu nya Tshivba Yatshavbo a na gu kategise, a gu dandrisa ni gu gu andrisa gasi u khale talo nya mahundzu! 4#Wona gambe: Gen 17:4-8. A na gu kategise uwe gumogo ni livelego lago, kha nga gikategiso gya Abrahama, gasi u fela gu hodza thomba nya litigo u luvelago umo, eli Nungungulu a li ningidego Abrahama.” 5Isaki a di vbangana Jakobe, uye a phara ndzila aya tigoni Padhani-Arani, ndrangani ga Laboni, mwamana wa Bhetuweli, Muarami, ndruye wa Rebheka, mayi wa Esawu ni Jakobe.
6Esawu a di wona gukhuye Isaki a kategiside Jakobe, a mu rumela tigoni ga Padhani-Arani, afela guya dzega iyo nyamayi, a di wona gambe gukhuye, gu mu kategisa gwaye a mu himbedzede guvbweta nyamayi vbakari nya vanyamahegyane va Vakhanani; 7khu guyingela milayo ya babe ni mayi waye, Jakobe a di khuga a hongola tigoni ga Padhani-Arani. 8A di wona gambe gukhuye babe waye Isaki, kha tsakiswi khu vanyamahegyane nya Vakhanani, 9Esawu a di khuga aya ga Ismayeli, mwamana wa Abrahama, aya dzega mumbe nyamayi gu diga ava a nga bani ari navo. A diya dzegana ni Mahalati, nyamahegyane wa Ismayeli, ndruye wa Nebhayoti.
Ndroro ya Jakobe tigoni ga Bheteli
10Jakobe a di khuga khu Bherisebha a phara ndzila nya guye Harani. 11Na vbohide wulangani nya gukari, a di lala avbo kholu lidambo li di pfode, a di dzega giwindri gimwegyo a nga gi mana wulanga wule a gira gikhuledzo, a lala. 12Khavbo avbo, Jakobe a di lora. A di wona gilito#28:12 Gilito, vambe vatonga khavo lilata, gu thudwa gilo gi gu na ni sigandro nya gulite khigyo. Wona gambe: Job 1:51. na gi tsitsidwe mafuni, tshokhatunu gakone na gu ghuma ndzadzini, avbo nya gilito gyogyo, gu di lita ni gu tshiga dzingilozi dza Nungungulu. 13#Wona gambe: Gen 13:14-15. Khu vbatshani gakone, a di khade Pfhumu Nungungulu a mu embela, khuye: “Eni kheni Pfhumu Nungungulu wa koko wago Abrahama ni Nungungulu wa babe wago Isaki. Nyi na gu ninga uwe gumogo ni livelego lago, litigo leli u ladego avbo. 14#Wona gambe: Gen 12:3; 22:18. Sanana sago si na tala ngudzu kha nga mafu ya tigoni; u na nava uya Muhwadambo ni Khugadambo, Wuronga ni Marandzi. Mahundzu nya vathu vatshavbo va tigoni, ma na kategiswa khavbo gwago ni ga livelego lago. 15Eni nyi na ni uwe, nyi na gu vhikela ni evbini u na hongolago, nyi na gu wuyisa tigoni momu, kholu gima kha nyi na gu diga, nyi si gu tadzisi esi nyi gu tumbisidego.”
16Na khendzugide, Jakobe a di ganela, khuye: “Khu lisine Pfhumu Nungungulu womo wulanga wowu, aholu eni nyi di si dziti.” 17A di engedza a ganela na tade khu hwanga, khuye: “Wu thiside ngudzu wulanga wowu! Avba Nyumba ya Nungungulu, owu mwanya wa ndzadzini.”
18Khu mindru gakone, na gu ngari dzimindru ngudzu, Jakobe a di dzega giwindri gile a nga lalago a khighela avbo, a gi emisa kha nga lidingo gasi gi khala gialakanyiso, a guhula mafura vbatshani gakone. 19Jakobe a di rana wulanga wule, khuye Bheteli, lidhoropa khu gale li nga bani li gu ranwa gupwani Wenengedzo.
20Khavbo avbo, Jakobe a di gira gisambanyo, khuye: Nungungulu a gu gimbila ni eni a nyi endredza ga lipfhumba leli nyi gu nalo, a nyi ninga guhodza ni guambala, 21a nyi kategisa nyi bwelela khu gurula ndrangani ga babe wangu, khu guralo, Pfhumu Nungungulu a na khala uye Nungungulu wangu. 22Giwindri gegi nyi gi tsitsidego kha nga lidingo nya gialakanyiso, gi na bani na giri Nyumba ya Nungungulu; ga satshavbo iso a na gu nyi ningago nyi na dusa nyi livba gipandre nya likhumi.
Currently Selected:
Genesi 28: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
