Genesi 30
30
1Avbo Rakeli a nga wonago gukhuye kha ningi sanana Jakobe, a di khalela wufu ndriyaye, a embela Jakobe, khuye: “Nyi ninge sanana; kholu wa gu bomba nyi nafa.”
2Khavbo avbo, Jakobe a di vbenyela Rakeli a mu embela, khuye: “Wa gu alakanya gukhuwe nyi ngu dzi kodza gu tshikedza wulanga wa Nungungulu a ngamba gu ninga livelego, gani?”
3Rakeli a di hakha, khuye: “Egi githumi gyangu Bhila, indra u ya hengela nagyo malawu, gasi a velega wulangani gwangu. Khavbo gwaye, eni neni nyi na mana sanana.”#30:3 Khu giolovedzo nya tumbunugo nya Gihebheru, nyamayi nya gyumba a di dzi kodza gu ningela wuhandzwa mwendro githumi gyaye ga mwama waye gasi a mu velegela sanana. Khu nayo sanana sesi sa gu lumba uye.
4Khu guralo, a di mu ninga githumi gyaye Bhila gi khala mwangadzi waye. Jakobe a di tshangana naye. 5Bhila a di khura mimba a velega gyanana nya gikhwathana ga Jakobe. 6Khavbo avbo, Rakeli a di ganela, khuye: “Nungungulu a nyi lamude, pwide lito langu a nyi ningide gyanana.” A di gi riya lina nya gupwani khu Dhani.
7Bhila, githumi gya Rakeli, a di khura gambe mimba a velega gyanana nya wuvili nya gikhwathana ga Jakobe. 8Rakeli a di khuye: “Nyi dwanide ni ndriyangu, nyi mu pade!” Khu guralo, a di gi riya lina nya gupwani khigyo Nafitali.
9Liya khu gu wona gukhuye a hegiside guvelega, a di dzega githumi gyaye Zilipa a gi ningela ga Jakobe a gi gira mwangadzi waye. 10Zilipa githumi gya Liya, a di velega gyanana nya gikhwathana ga Jakobe. 11Liya a di ganela, khuye: “Gomo gunengela nya gungi ngudzu!” A di gi riya lina nya gupwani khu Gadhi.
12Zilipa, githumi gya Liya, a di velega gyanana nya wuvili nya gikhwathana ga Jakobe. 13Liya a di ganela khuye “Edzi nyi nengelago khidzo! Sagadzyana si na nyi rana khiso nyi kategide;” a di khuye khigyo Aseri.
14Tshigu mwedo, khu nango nya gupile tirigu, Rubheni a di duga a hongola thembweni, aya mana mihandro nya lihaladzo.#30:14 Mihandro nya lihaladzo, khu eyi Vaputukezi va yi ranago “Romãs”, mambe malimi khyo “mandrágoras”, “pomogranadas”, vanyamayi va gale va di vbweta mihandro yoyo khu tshivba ngudzu kholu va di kodwa gukhavo yi ngu wusa lihaladzo ni livelego. A di hava a dzega aya ningela mayi waye Liya. Rakeli a di embela Liya, khuye: “Nyi girele wuhindzi u nyi bagela mihandro nya lihaladzo ya mwanago.”
15Liya a di hakha, khuye: “Khwa eneledwa khu gu nyi bela mwama wangu, wa gu vbweta gambe gu nyi bela mihandro nya lihaladzo ya gyanana gyangu, gani?” Rakeli a di hakha, khuye: “Ina ka, uwe nyi ninge mihandro nya lihaladzo ya mwanago, wutshigu wa muhuno, mwama a nata lala iyo gwago.”
16Gikhati Jakobe a nga bani na gu wuya khu thembweni ni silambo, Liya a di mu khinga, a mu embela, khuye: “Delu eno gwangu, kholu nyi livbide khu uwe tengo nya mihandro nya lihaladzo ya gyanana gyangu. A di lala naye wutshiguwule.”
17Nungungulu a di yingisa gu lomba ga Liya, uye a di khura mimba a velega gyanana nya gikhwathana nya livbandre ni Jakobe. 18Khavbo avbo, Liya a di ganela, khuye: “Nungungulu a nyi ningide tshatshazelo wangu, kholu nyi nga ningela githumi gyangu ga mwama wangu.” A di gi riya lina khuye khigyo Isakari.
19Liya a di khura gambe mimba a velega gyanana nya gikhwathana nya livbandre na gimwegyo ni Jakobe. 20Liya a di tsaka a ganela, khuye: “Nungungulu a nyi girede makategwa nya makhongolo. Olu mwama wangu a na vbanya ni eni kholu nyi velegide naye livbandre na gimwegyo sanana.” A di gi riya lina nya gupwani khu Zebhuloni.
21Khu gu handzamedza a di velega gyanana nya gyagadzyana, a nga gi ranago gukhuye khu Dhina.
22Nungungulu a di alakanya Rakeli, a mupwa a mu ninga livelego. 23A di khura mimba a gu velega gyanana nya gikhwathana. Rakeli a di ganela, khuye: “Nungungulu a nyi tshude dzitshoni dzangu.” 24A di gi riya lina nya gupwani khu Josefa, na gukhuye: “Pfhumu Nungungulu a na nyi engedzele gambe gimbe gyanana!”
Libhulo nya gugaradze
25Hwane nya gu Rakeli na velegide Josefa, Jakobe a di embela Laboni, khuye: “Nyi dige nyi hongola, nyi bwelela gaya gwathu, tigoni gwangu nya mavelego. 26Nyi ninge vagadzi vangu ni sanana sangu, nyi gu thumedego khu gufela avo, nyi hongola; kholu uwe u ngu pima gwadi idzo nyi gu thumedego khidzo.”
27Laboni a di khuye: “Nyi girele wuhindzi u khala! Kholu nyi ngu dziti gukheni Pfhumu Nungungulu a nyi kategiside khu kotani gwago.” 28A di engedza gambe, khuye: “Vega tengo nya hakhelo wago nyi na gu livba.”
29Jakobe a di hakha, khuye: “Uwe u ngu dziti edzi nyi gu thumedego khidzo, ni edzi nyi sayisidego khidzo tshambi wago. 30Kholu esi u nga bani uri naso gale, nyi si gu vbohi, a diri sidugwanana, olu satshavbo si engedzelane ngudzu; Pfhumu Nungungulu a gu kategiside khavbo gwangu. Ahati eni, lini nyi na gu thumelago neni ngamo yangu?”
31Khavbo avbo, Laboni a di khuye: “Ginani nyi na gu ningago?” Jakobe a di hakha, khuye: “Khu na nyi ninga gilo. Aholu wa gu dzumela mawonelo yangu, nyi na engedza gu khala nyi havisa ni gu ghadha tshambi wago. 32Muhuno nyi na vbindra vbakari nya tshambi wago watshavbo. Nyi kasa phuvbo dzinvuta dzago nya gusivbale nidzo nya mavalavala, avbo nya dziphongo, nyi kasa idzo nya mavalavala; owu wu na bani wuri uwo hakhelo wangu. 33Gululama gwangu gu na nyi emela litshigu la mindru u natago u ta khedza hakhelo yangu. Dziphongo dzatshavbo nyi na bani nyiri nadzo nya mavalavala nya guage ni dzinvuta nyamba sivbala, dzi wone nga khwatshi nyi di gu bela.”
34Laboni a di phindrula, khuye: “Ma tshambide. Gu na girege kharato, kha nga idzo u ganedego khidzo!” 35Aholu, litshigu lolo furi, Laboni a di kasa phuvbo dziphongo dzatshavbo nya mavalavala, siphongwana nya maratarata ni dzinvuta dzatshavbo nya gusivbale, a ninga sanana saye si havisa. 36A di hambanisa pfhuka nya guningane matshigu mararu nya gugimbile; Jakobe a di havisa iso si nga tshalago avbo nya tshambi wa Laboni.
37Jakobe a di fanya matamo nya gunagane nya misimbo nya tshapandre ni ngene ni rumbinyoni, a vandza magwaru yakone, gu wonega guaga nya misimbo, 38a ma vega mbeli nya dzinvuta, mitsongoni ni sighowoloni nya mati gu nga bani gu sela umo sirengo. Dzinvuta nya vanyamayi dzi di wugedwa khu wunyanyu gikhati dzi ya selago mati. 39Avbo dzi litwago khu vamatune na dzi gu wona misimbo nya gugurudwe, dzi di khura dzimimba, dzi velega sinvutana nya mavalavala ni mikwenga. 40Jakobe a di hambanisa a vega phuvbo edzi nya mavalavala ni mikwenga; tshambi wa Laboni wu di tala khu sirengo nya mavalavala ni gusivbala. Khu guralo, Jakobe a di engedzela tshambi waye nyamba pata ni tshambi wa Laboni. 41Gikhati gyatshavbo dzinvuta dzile nya guene gwadi, dzi nga bani dzi gu vbohedwa khu matshigu, Jakobe a di tsitsa matamo mbeli nya sighowolo nya mati, dzi fela gu khura dzimimba na dzi gu wona matamo. 42Aholu a di si giri kharato ga edzi nya guwondre, khu magirelo yoyo, dzinvuta dzile nyambana tshivba a diri dza Laboni, gasi edzi nya tshivba dzi di lumba Jakobe. 43Khu guralo, mwama yoyu a di ghanya a khala gitetema, a manega nari ni mitshambi nya yingi, dzikhumbi nya vama ni vanyamayi, dzingameriya ni dziburu.
Currently Selected:
Genesi 30: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
