Genesi 31
31
Jakobe a ngu thava
1Khavbo avbo, Jakobe a dipwa siregera sa sanana sa Laboni si nga bani si gu, khiso: “Jakobe dzegide silo satshavbo sa babe wathu, a wungedzede talo nya dzithomba dzatshavbo dzedzi khu silo sa babe wathu.” 2Jakobe a di wona gambe khovbeni ga Laboni gukhuye mipimiso yaye ya olu khandriyo saye niyo ya guhegulani.
3 Pfhumu Nungungulu a di embela Jakobe, khuye: “Bwelela tigoni ga vavelegi vago ni valongo vago; Eni nyi na bani nyiri nago.”
4Khavbo avbo, Jakobe a di ranisa Rakeli ni Liya, gu mu yela panini, vbafuvbi ni mitshambi yaye. 5A di va embela, khuye: “Nyi ngu wona khovbeni ga babe wanu gukheni khandridzo saye ni guhegulani, aholu, Nungungulu wa babe wangu a na ni eni.” 6Enu mu ngu pimani gwadi gukhenu nyi thumede babe wanu khu tshivba yangu yatshavbo, 7aholu uye a di nyi kanganyisa a gu vbindrugedzela likhumi dzinyondro hakhelo yangu; aholu Nungungulu kha dzumedzisa gukhuye a nyi kalavele. 8Avbo uye a nga bani na gukhuye: “Uwe u na hakha khu sirengo nya mavalavala,” tshambi watshavbo wu di velega sirengo nya mavalavala. A gukhuye: “Nyi na gu hakhisa khu sirengo nya mikwenga,” tshambi watshavbo wu di velega sirengo nya mikwenga. 9Khu guralo Nungungulu a di wandra tshambi wa babe wanu a ninga eni.
10Gikhati nya gulandrane sirengo, eni nyi di khusa maho nyi khedzisa, nyi wona khu ndroroni gukheni vamatune va landrago tshambi khavo nya mikwenga ni mavalavala. 11Ngilozi ya Pfhumu Nungungulu yi di nyi tivisa khu ndroroni, khiyo: “Jakobe!” Eni nyi di thana, kheni: “Nyi womo avba.” 12Iyo yi di engedza yi nyi embela, khiyo: “Khusa maho u wone; vamatune vatshavbo va velegisago tshambi, khava nya mikwenga ni mavalavala, kholu Eni nyi si wone esi a gu giridego Laboni. 13#Wona gambe: Gen 28:18-22. Eni kheni Nungungulu wa Bheteli, wulanga u nga tsitsago avbo giwindri nya gialakanyiso ni gu gi thela mafura, u wuya u gira gisambanyo khu lina Langu. Olu khuga u duge tigoni momu, u bwelela tigoni u velegedwego umo.”
14Rakeli ni Liya va di hakha, khavo: “Gasi hi ngari ni thomba ethu ndrangani ga babe wathu, gani? 15Khandri ha gu wonwa kha nga vathu va phuvbo, gani? Kholu a hi rengiside a hodza dzitsapawu dzakone dzatshavbo. 16Thomba yatshavbo Nungungulu a wandredego babe wathu ya gu lumba ethu ni sanana sathu. Khu guralo, olu gira satshavbo kha nga edzi Nungungulu a gu embedego khidzo.”
17Khavbo avbo, Jakobe a di dongisela. A di khiledza vagadzi vaye ni sanana saye avbo nya dzingameriya; 18a di dzega tshambi waye watshavbo ni dzithomba dzatshavbo a nga girago, tshambi wu mu lumbago a nga wu manago tigoni ga Padhani-Arani, a phara ndzila a bwelela ga babe waye Isaki, tigoni ga Khanani.
19Kha nga Laboni a nga bani ari mwalo, na hongode aya gaya mawoya nya dzinvuta, Rakeli a diba vanungungulu nya dzinguluve dza babe waye. 20Jakobe a di pemba kharati Laboni, Muarami, a thava nyamba mu embela gilo. 21A di ruredzela satshavbo si nga bani si gu mu lumba a gu thava naso; a tshatuga tsongo wa Ewufrate a thavela gigomoni gya Gileyadhi.
Laboni a ngu lundra Jakobe
22Hwane nya gu bani ma vbindride matshigu mararu, va diya embela Laboni gukhavo Jakobe thavide, 23uye a di dzega valongo vaye va gu mu landra. Avbo va nga vbedzago livbandre na mavili matshigu na va gu gimbila, va diya mu mana gigomoni gya Gileyadhi. 24Aholu ni wutshigu Nungungulu a di endrela Laboni khu ndroroni a mu embela, khuye: “Dzi wonele, u nga wudzisi gilo Jakobe, ne khu gwadi ne khu guvivba.”
25Laboni a diya mana Jakobe na tsitside tshatsha waye gigomoni gya Gileyadhi; Laboni nuye gumogo ni vandriyaye va di tsitsa navo wawe, mugigomoni momo.
Litunga nya magana
26Laboni a di embela Jakobe, khuye: “Ginani u giridego? U nyi pemba u nyi dzegela sanana sangu kha nga sibotshwa nya nyimbi!” 27Khu ginani u nga khugago khu gisihaledza, u nyi pemba, wulangani nya gu nu nyi tiviside? Na nyi gu vbanganide khu gunengela ni gutsaka, na hi guembelela ni gu womba dzingoma ni sitshatsharu! 28Khu ginani u ngamba nyi diga nyi vbanganana ni sanana sangu nya vama niso nya vanyamayi? U thumide thumo nya wupumbu. 29Eni nyi na ni tshivba nya gu mi gireleni guvivba khu mandza yangu; aholu Nungungulu wa babe wago a ganede gwangu wutshigu wowu, khuye: “U nga wudzisi ga Jakobe, gani khu gwadi, gani khu guvivba. 30Olu u khugidego muphelo khu gu suva gaya ga babe wago, khu ginani u nyi bedego vanungungulu vangu?”
31Jakobe a di hakha Laboni, khuye: “Nyi di khala hwanga gu gu tivisa khu gukheni: U nga nyi wandrela sanana sago khu tshivba.” 32“Gasi khu mahungu nya vanungungulu vago, oyu a gu navo kha na vbanya! Khevisela wabune, funungulela satshavbo esi nyi gu naso.” Jakobe a di si dziti gukhuye khu Rakeli a ngabago vanungungulu nya dzinguluve dza ndrangani. 33Laboni a di bela tshatshani wa Jakobe ni Liya, ni ga sithumi saye sa sivili nya vanyamayi, gima kha mana gilo. Na dugide ga Liya a di bela umo ga Rakeli. 34Rakeli a di dzega vanungungulu a va siha vbavbatshi nya sighwabhata nya ngameriya, a hegisa a khala khu vbatshani gakone. Laboni a di khedzisa malangani gwatshavbo nya tshatsha, a si mani gilo.
35Rakeli a di embela babe waye, khuye: “U nga khunguvanyegi mune wangu khu gumba khuga, mbeli gwago, nya gu sindrwa gu khuga khu kotani nya migima yi talago gu wonwa khu vanyamayi.” Laboni a di simama a khedzisa aholu kha nga va mana vanungungulu nya dzinguluve dzaye.
36Jakobe a di goroga khu tshivba, a kawuka Laboni, a ganela gwaye, khuye: “Khu wevbini nandru wangu, khu gevbini gighoho gyangu gi gu girago u nyi landra nu vbisegide ngudzu kharato? 37Hwane nya gu nu galagasede sombo sangu satshavbo, ginani u gi manego gi lumbago ndrangani gwago? Gi rese avba uta hi nonedza mbeli ga vandriyangu ni vandriyago, gasi va khale valamuli vbakari gwathu ethu ha vavili. 38Nyi vbedzide magumavili myaga nago, kha gwa manega phongo mweyo basi mwendro nvuta mweyo yi nga ghohekedwago khu mimba, gambe gima kha nya hodza nvuta nya tshambi wago. 39Gima kha nya gu resela girengo nya gubayiswe khu sirengo sa khabini; eni kheni nyi nga manago sigaradzo satshavbo, kholu uwe u di nyi gurumedza gulivba esi si nga bidwa vbakari nya mihani ni esi si nga bidwa vbakari nya wutshigu. 40Mihaniyile eni nyi di vbiswa khu lihani, vbawutshigutunu nyi banga khu girame, ligovbe li di thava mahoni gwangu. 41Nyi vbedzide kharati magumavili myaga ndrangani gwago! Nyi gu thumede likhumi na mina myaga khu gufela sanana sago sa sivili, nyi wuya nyi engedzela gu thuma livbandre na moyo myaga nyi thumela tshambi wago; aholu uwe u vbindrugedzide likhumi dzinyondro hakhelo yangu. 42Naripwani Nungungulu wa babe wangu Nungungulu Abrahama ni oyu a rungudzwago khu Isaki, kha nga nyi phasa, khu lisine nu nyi vbanganide nyambana gilo, nyi bwelela liphanga nyambana gilo mandzani. Aholu Nungungulu a wonide gusaniseka gwangu a wona mithumo ya mandza yangu, vbanova ni wutshigu a gu kawuka.”
Pwanano wa Laboni ni Jakobe
43Laboni a di hakha Jakobe, khuye: “Vanyamahegyane vava sanana sangu, sikhwathana sesi, sanana sangu, tshambi wowu tshambi wangu; esi satshavbo u si wonago, sa gu lumba eni. Nyi na rini eni olu khu sanana nya sagadzyana ni esi nya sikhwathana va velegidego? 44Hongole hi gire pwanano nya gidzumeledzwano vbakari gwathu, gasi gi khale wufakazi ga eni nago.”
45Jakobe a di dzega giwindri a gi emisa kha nga lidingo nya gialakanyiso. 46A embela vandriyaye, khuye: “Wungedzelani siwindri.” Avo va di dzega siwindri, va wungedzela va gira gigomo, va hodza vbafuvbi nya gigomo gile nya siwindri. 47Laboni a di gu rana khuye Jegari-Sahaduta, gasi Jakobe a di gurana khuye Galedi.
48Laboni a di khuye: “Gigomo gegi nya siwindri, gukhugela muhuno, i fakazi ga ethu ha vavili.” Khu kotani nya isoso, a di gi rana khuye Galedi. 49A di gi rana gambe khuye Misipa, kholu a di khuye: “Pfhumu Nungungulu a na khedzisele ga ethu ha vavili gikhati hi na gu hambanago. 50Wa gu tshanisa sanana sangu, mwendro gu dzega vambe vanyamayi gu diga nya avo, ambari a gu mwalo muthu ni ethu avba, alakanya gukhuwe Nungungulu i fakazi ga eni ni uwe.”
51Laboni a di engedza a ganela gambe ga Jakobe, khuye: “U ngu wona gigomo gegi nya siwindri ni lidingo leli nya gialakanyiso nyi li emisidego ga ethu ha vavili, gani? 52Gigomo gegi ni gialakanyiso gegi, gi na khale fakazi nya vbingano; eni kha nyi na gi vbindra nyita iyo gwago, uwe nuwe khu na gi vbindra u ta eno gwangu khu gikungo nya gute gira guvivba. 53Nungungulu wa Abrahama, Nungungulu wa Nahori, Nungungulu wa babe wawe a na khale mulamuli vbakari gwathu.”
Jakobe a di sambanya khu Nungungulu a rungudzwago khu babe waye Isaki. 54Jakobe a di songa sirengo gigomoni a ramba vandriyaye guta hodza buzo. Va di khala gumogo va hodza, va lala wutshigu vbagigomotunu vbale.
55Avbo Laboni a nga wuga na gu ngari dzimindru ngudzu, a di vbangana situgulwana saye nya sikhwathana ni sanana saye nya sagadzyana, a si kategisa: A Khuga a bwelela gaya gwaye.
Currently Selected:
Genesi 31: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
