Genesi 32
32
A Jakobe a ngu wuyelana ni Esawu
1Jakobe nuye a di simama ni ndzila yaye, a di tshangana ni dzingilozi dza Nungungulu. 2Avbo a nga dzi wonago, a di khuye: “Libutho la Nungungulu!” A di riya lina wulanga wule, khuye: Mahanayimi.
3Jakobe a di rumela myango mbeli gwaye ga ndriyaye Esawu, tigoni ga Seyiri, gipandrengulu nya litigo la Edhomi, 4a di ruma guya ganela, khuye: “Mu naya ganela kharati ga pfhumu yangu Esawu, khenu: Githumi gyago Jakobe wari, khuye: “Nyi vbanyide ndrangani ga Laboni, nyi khade iyo kala olu. 5Nyi fumide dzithomba ni dziburu, ni mitshambi, dzikhumbi nya vama ni vanyamayi; olu nya gu rumela mwango ga pfhumu yangu Esawu, nyita mu lomba gu a nyi hakhe khu wuwadi.”
6Myango yi di wuya ga Jakobe, yi ta, khiyo: “Hi hongode hi ya manana ni ndriyago Esawu, uye a ngu gu khinga ni mazana mana vama.”
7Jakobe a di tala khu hwanga a hambanega mapimo. A di kabanisa vathu a nga bani nari navo khu sikwata sivili. A gira gambe kharato ni sirengo nya sikhongolo ni esi nya sidugwana ni dzingameriya, 8khuye: “Esawu a gu dhumela tsawa moyo wumbe wu na kodza guvbuluga.”
9Khavbo avbo, Jakobe a di ganela, khuye: “Oh, Nungungulu wa babe wangu Abrahama, Nungungulu wa babe wangu Isaki, Uwe Pfhumu Nungungulu u nyi embedego gukhuwe: Bwelela tigoni gwago nya mavelego, eni nyi na gu vhikela;” 10eni nyi mwalo fanelo nya wuhigo wago watshavbo ni gutumbega gwatshavbo u gu wonegisidego ga eni githumi gyago, kholu guta gwangu nyi tsemakanyide tsongo yoyu wa Joridhani na nyiri ni ndronga basi mandzani, olu nyi mune nya mitsawa mivili. 11Khu wuhindzi wago, nyi vbulugise mandzani ga ndriyangu Esawu, kholu nyi ngu thava gu dhumedwa khuye a nyi songa eni gumogo ni vanyamayi ni sanana. 12#Wona gambe: Gen 22:17. Khuwe u nga ganelago, khuwe: “Nyi na gu tadza khu makategwa, nyi na gira livelego lago li tala kha nga mafu nya fungu wa phwani, wu tandrwago gu saywa tengo wakone.”
13Jakobe a di lala vbale wutshigu wowo, a gu hatha vbakari nya silo saye, sagwati nya guninge ndriyaye Esawu, khuye: 14Mazana mavili dziphongo nya migadzi ni magumavili vamabhongwe; mazana mavili dzinvuta, ni magumavili dzihamba. 15Magumararu dzingameriya, dzi mamisago gumogo ni sanana sakone, magumana dzimombe nya migadzi ni likhumi nya vamatune, magumavili dziburu nya migadzi ni likhumi nya vamatune. 16A di ningela satshavbo sesi ga sithumi saye, a ninga gimwegyo ni gimwegyo, tshambi waye khu phuvbo, a si embela, khuye: “Thangani mbeli, mu tshiya wulanga vbakari nya tshambi ni tshambi.”
17A di laya oyu nya guphele, khuye: “Avbo ndriyangu Esawu a na gu manago, a gu wudzisa khuye khuwe mani uwe? Wa gu hongola hayi? Khu ginani u ghulago tshambi wowu mbeli gwago?” 18Uwe u na mu hakha, khuwe: “Eyi sagwati yi rumedwago khu githumi gyago Jakobe ga pfhumu yangu Esawu. Uye a nguta khu hwane gwathu.”
19A di ruma gu gira kharato oyu nya wuvili, uye nya wuraru ni vatshavbo va nga bani na va gu ghula mitshambi, khuye: “Khidzo kharato mu na gu ganelago khidzo ga Esawu avbo mu na gu mu manago. 20Mu na mu embelani, khenu: Githumi gyago Jakobe a nguta nuye a hi landra khu hwane gwathu.” Kholu Jakobe a di gu alakanya khu monyoni gwaye, khuye: “Nya guvbweta gu tsakisa khovbe yaye khu ningelo wowu nyi wu thangisago mbeli, khu hwane nyi naya wonega mahoni gwaye; a gu dzina saye a na nyi hakha gwadi.” 21Khavbo avbo, miningelo yi di thanga mbeli gwaye; Jakobe a di pila wutshigu wowo wughoveloni gwaye.
22A di wuga ni wutshigu wowo a dzega vagadzi vaye va vavili, sithumi saye sa sivili nya vanyamayi ni sanana saye nya likhumi na gimwegyo a gu khisa kova wa Jabhoki. 23A di va phasa gu tshatuga nondrwa; a gu tshatugisa silo saye satshavbo.
Jakobe a ngu dwana ni Nungungulu
24Avbo a nga tshalago enga basi, a di vboha muthu a ngata dwana ni Jakobe, va pilegisana wutshigu watshavbo kala gu khuga Wuronga. 25Khu gu wona gukhuye a ngu tandrega gu mu pala, muthu wule a di bayisa Jakobe vbanyongatunu; yi di khuyuga kharalo nyonga ya Jakobe na gu dwana naye. 26Muthu wule a di embela Jakobe, khuye: “Nyi dige nyi hongole kholu wu ngu khuga Wuronga.” Jakobe a di mu hakha, khuye: “Gima kha nya na nga gu diga u hongola nyamba phela khu gu nyi kategisa.”
27Muthu wule a di wudzisa Jakobe, khuye: “Khuwe mani lina lago?” Uye a di mu hakha, khuye: “Kheni Jakobe.” 28#Wona gambe: Gen 35:10. Khavbo avbo, a di mu embela, khuye: “Khu na ranwa gambe Jakobe; aholu u na ranwa gupwani khuwe Israyeli; kholu u dwanide ni Nungungulu ni vathu, u pade.”
29Jakobe a engedza, khuye: “Nyi ngu gu lomba u nyi embela lina lago.” Uye a di mu hakha, khuye: “Khu ginani u wudzisago lina langu?” Khavbo avbo, a di mu kategisa.
30Jakobe a di rana wulanga wule khuye Penuweli, kholu a di khuye: “Nyi wonide Nungungulu khovbe ni khovbe, aholu nyi ngu simama nyi vbanya.”
31Li di gu khuga lidambo gikhati Jakobe a dugidego khu Penuweli, na gu ndzodola khu kotani nya nyonga yaye yi nga khuyuswago. 32Khigyo gighelo gi girago gu sanana sa na Israyeli si si hodzi sivba wa vbanyongatunu kala na muhuno, kholu Jakobe bayisidwe vbasivbatunu nya nyonga.
Currently Selected:
Genesi 32: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
