Varoma 10
10
1Vandriyangu, esi nyi si vbwetago khu monyo wangu watshavbo, nyi si lombago ga Nungungulu milombeloni gwangu, khu gukheni Israyeli a vbanyiswe. 2Kholu nyi ngu dzi kodza gu va emela nyi fakaza gukheni avo va ngu dzi garadza ngudzu khu silo sa Nungungulu. Nombo basi khu gu va gu dzi garadzela wukhumuni, 3Kholu kha va pimi ndzila ya Nungungulu a ningago khiyo vathu gululama mahoni gwaye. Avo va gu dzi garadza khu magirelo yawe, aholu va diga gulandra ndzila yi vegisidwego khu Nungungulu. 4Kristo tshipiside Nayo wa Mosi gasi gu tshanganisa wulongoni gwa Nungungulu vathu vatshavbo va khodwago gwaye.
Gukhodwa khugo basi gu vbanyisago
5 # Wona gambe: Levh 18:5. Esi Mosi a lovidego khu mahungu nya gululame gutago khu Nayo khesi: “Muthu watshavbo a landrisago gululama nya Nayo, a na vbanyiswa khu Nayo.”
6Gasi khu mahungu nya gutshanganiswe khu ndzila nya gukhodwe, Mosi lovide, kharati: “U nga ganeli khu monyoni gwago, khuwe: Khu mani a na litago a hongola Ndzadzini?” (Khu gupwani: Gasi guya rana Kristo a tshige mafuni). 7“U nga wudzisi gambe gukhuwe: Khu mani a na relelago vbavbatshi nya mafu?” (Khu gupwani: Gasi guya dusa Kristo khu gufani ata guvbanyani.) 8#Wona gambe: Dhet 30:12-14. Gasi Milowo yari, khiyo: “Magana momo vbafuvbi gwago, kanani gwago ni monyoni gwago.” Khayo magana yaya nya gukhodwe hi ma tivisago. 9Wa gu fakaza khu likana lago khuwe Jesu khuye Pfhumu, gumogo ni gu khodwa monyoni gwago khuwe Nungungulu a mu wuside khu ga vafudego, u na vbanyiswa. 10Kholu, muthu a gu khodwa monyoni gwaye gasi gu ma na gululama; a gu fakaza khu likana laye, gasi gu ma na vbanyisa. 11#Wona gambe: Isa 28:16. Kholu Milowo nya Guage yi ngu hi embela gukhiyo: “Wule a khodwago gwaye gima kha na nga thedwa dzitshoni.” 12Khu kharato, gumwalo gu hambana nya Vajudha ni va nya mayigo, kholu vatshavbo va na ni Pfhumu mweyo basi yi kavedzelago siningwa saye ga vatshavbo vale va mu lombago. 13#Wona gambe: Jol 2:32. Kha nga yi ganelago Milowo, khiyo: “Muthu watshavbo a khodwago ga Pfhumu a na vbanyiswa.”
Vajudha va na ni nandru khu gumba khodwa
14Aholu va na dzi kodza kharini gurana wule va si khodwigo gwaye? Mwendro, va na khodwa kharini ga wule va si mapwigo mahungu yaye? Gambe, va na ma pwisa guwani, a gumba manega muthu nya guya va tivisa? 15#Wona gambe: Isa 52:7. A na hongodzisa guwani muthu nya guya va tivisa, a gumba rumedwa? Kha nga gu ganedwago umo nya Milowo nya Guage, gupwani: “Gu ngu tshamba ngudzu gu wona gu vboha ga vale va hi reselago Mahungu nya Yadi.” 16#Wona gambe: Isa 53:1. Kholu khandri vatshavbo va dzumelago Mahungu nya Yadi. Isaya ganede kharati, khuye: “Khu mani a khodwego khu mahungu hi tivisidego?” 17Kharati, gukhodwa gwa guta khu gupwa mahungu hi tiviswago, gutivisa gwa guta khu mahungu ya Kristo. 18#Wona gambe: Dzind 19:4. Olu nyi ngu wudzisa: Ina avo kha va mapwa mahungu yaya, gani? Khu lisine va ma pwide. Gambe iyo Milowo nya Guage yabune yi ngu ganela, khiyo:
“Lito la vativisi li pwade tigoni gwatshavbo,
ni magana yawe ma vbohide kala mahegiso nya mafu.”
19 # Wona gambe: Dhet 32:21. Nyi ngu wudzisa gambe, kheni: Ina, vathu va na Israyeli kha va ma pima mahungu yaya, gani? Ga giwudziso gegi Mosi a gu hakha, kharati:
“Nyi na mi gira mu khalela lidiwo litigo li si gu litigo la gilo;
nyi mi gira mu khalela wufu litigo nya sipumbu.”
20Isaya a ngu tiya gu ganela, khuye:
“Nyi manidwe khu vale va nga bani va si nyi vbweti;
nyi dzi wonegiside ga vale va nga bani va si nyi wudziseli.”
21 # Wona gambe: Isa 65:1-2. Aholu na gu thula Israyeli, Isaya, a di khuye:
“Matshigu yatshavbo Eni nyi thawuludzide libogo langu,
ga vathu nyamba khodwa ni gumba yingela.”
Currently Selected:
Varoma 10: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
