Varoma 14
14
Hi nga lamuli vathu vakwathu
1Wule a sa tiyago gukhodwani gwaye, mu hakheni gwadi, mu nga ganedzisani naye khu kotani nya mawonelo yaye. 2Vomo va alakanyago gukhavo va ngu dzi kodza gu hodza silo satshavbo, gasi vambe va sa tiyago gukhodwani gwawe, va gu hodza tongwe basi. 3Oyu a hodzago satshavbo a nga nyenyi wule a digago gu hodza simbe silo. Wule a si hodzigo simbe silo, a nga hembululi oyu a hodzago satshavbo, kholu uye nuye a ngu godwa khu Nungungulu. 4Khuwe mani uwe u tiyelago gu lamula githumi gya mumbe muthu? Mune wa igyo khuye a lamulago, gani gi ngu pala gani gi ngu padwa, isoso si na ni mune waye. Aholu a na pala kholu Pfhumu a na ni tshivba nya gu mu emise.
5Vomo gambe vathu va pimisago gukhavo mambe matshigu makhongolo guvbindra mambe, ni vambe va gukhavo matshigu yatshavbo khidzosaye. Muthu ni muthu gu vbwetega a vbanya khu edzi a khodwago khidzo. 6Oyu a gukhuye matshigu nya gukari makhongolo, a gu girela gu rungudza Pfhumu. Oyu a hodzago satshavbo a ngu rungudza Pfhumu, kholu a ngu bonga Nungungulu. Oyu a si hodzigo nuye a gu girela gu rungudza Pfhumu, a ngu mu bonga nuye. 7Kholu mwalo muthu a dzi vbanyelago uye mune, kha nga gambe mwalo muthu a dzi felago uye mune. 8Ha gu vbanya ha gu vbanyela Pfhumu, ha gufa gambe ha gufela Pfhumu. Kholu gani hi ngu vbanya, gani hi ngufa, ha gu lumba Pfhumu. 9Kholu, Kristo fude, a wuga, a vbanya gasi gu khala Pfhumu nya va nya gufa ni va nya guvbanya. 10#Wona gambe: 2 Dzik 5:10. A gu bani ari kharato, khu ginani uwe u lamulago ndriyago, mwendro khu ginani u mu nyenyago? Ethu hatshavbo hi na ema mbeli gwa Nungungulu gasi hi lamudwa khuye. 11#Wona gambe: Isa 45:23. Pfhumu a ngu ganela omu nya Milowo nya Guage, khuye:
“Nyi ngu tiyisa gwanu kheni vathu vatshavbo va na khidzima mbeli gwangu.
Vatshavbo va na fakaza vathuni khavo kheni Nungungulu.”
12Khu kharato, muthu ni muthu a naya dzi ganelela abune gwa Nungungulu.
Hi nga yisi muthu gighohoni
13Khu kharato, hi nga lamuli vakhwathu. Hi na dzi garadze khu gumba gira ni gimwegyo gilo gi dzi kodzago gu tshunganedzisa vakhwathu va thega gighohoni. 14Nyi ngu dziti ni gukhodwa gwadi khu ga Pfhumu Jesu gukheni, gimwalo gilo gi nyenyezidego khu tumbunugo nya igyo. Aholu muthu a gu pimisa gukhuye gilo nya gukari gi nyenyezide, a na gi wona mapimoni gwaye na gi nyenyezide furi. 15Uwe wa gu khunguvanyisa ndriyago khu kota nya esi u hodzago, khu yeyedzi lihaladzo. Khu kota nya guhodze gwago u nga dzi giri givangelo nya gudzimedze muthu a fedwego khu Kristo. 16Egi gi gu gyadi ga enu, gi nga khali gikhunguvanyiso ga vambe. 17Kholu Mufumo wa Nungungulu, khandri mahungu nya guhodze ni gusela, aholu, mahungu nya gululame, nya gurule ni gunengela gutago khu Liphuvbo nya Guage. 18Muthu a thumelago Kristo khu magirelo nya nga ayoyo, a ngu tsakisa Nungungulu, a wuya a zundzwa khu vathu.
19Khu kharato, hongoleni hi dzi garadze khu gu vbweta silo sile si hi reselago gurula ni gu tiyiselana gukhodwani. 20U nga ghoheteli thumo wa Nungungulu khu kotani nya guhodze. Hi ngu dzi kodza gu hodza silo satshavbo, aholu guvivba khu gu hodza gilo gi dzi kodzago gu tshunganedzisa muthu kwanu a thega gighohoni. 21Gwadi gumba hodza nyama, ni gumba sela wadwa, ni gumba gira gilo wa gu dziti gukhuwe gi na tshunganedzisa ndriyago a thega gighohoni. 22Esi u khodwago monyoni gwago, si na tidwe basi khuwe mune ni Nungungulu. Kategide wule a ngamba dzi mbembisa abune khu kotani nya esi a si hathago. 23Aholu, muthu a hodzago na gu kanakana, a gu hodza, a na ni nandru khu esi a hodzago nyamba dziti gukhuye si loledzisidwe khu Nungungulu, a gu hodza, a na ni nandru; kholu kha landrisi esi a khodwago ga iso. Satshavbo esi a girago muthu na si gu hambana ni gukhodwa gwaye, gighoho.
Currently Selected:
Varoma 14: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
