Eksodusi 16
16
Nungungulu a va nyika manna.
1Yontlhe hlengeletano ya vanana va ka Israeli yi lo suka Elima, va ya chikela xiwuleni xa Sini, lexi xi nga xikari ka Elima na Sinai, hi siku ga 15 ga hweti ya wumbiri ya kuhuma kabye hi le tikweni ga Gipite. Mitse. 33:10
2A hlengeletano yontlhe ya vanana va ka Israeli yi lo zangarela Mosi na Aroni le xiwuleni.
3A vanana va ka Israeli va te ngalo kabye: Ku wa hi chukwana ku ngha hi delwe hi canja ga Jehova le tikweni ga Gipite, na hi tshamile xikari ka timbita ta nyama, laho hi nga waga zibaba, hi xura. Makunu nwina mu hi humesile mu hi tisa ka lexi xiwula kasi mu fela ku daya vontlhe lava vanhu hi ndlala.
4Jehova aku ka Mosi: Languta, nzi ta mu nisela zibaba za le tilweni, a vanhu va ta huma va rolela lezi zi ringanako ka siku ni siku, na nzi va ringa lezaku xana va ta famba hi nayo wa mina, kutani zi nga tava lezo.
5Ku taku hi siku ga wuntlhanu ni ginwe, va longisela lezi va zi roleleko zi ringana masiku mambiri.
6Zonake Mosi na Aroni va te ngalo ka vontlhe vanana va ka Israeli: Laha gambyeni mu ta zi tiva lezaku hi Jehova a nga mu humesa tikweni ga Gipite.
7Ni laha mixweni mu ta wona a wukulu ga Jehova, hakuva Jehova i zwile ku mu bhongela ka nwina. Kasi hina hova vamani vo kala mu hi zangarela ke?
8Mosi i lo engeta kambe aku: Hakunene Jehova i ta mu nyika a nyama laha gambyeni muga, ni mixo i ta mu nyika a zibaba, mu taga mu xura; hakuva i zwile kubhonga ka nwina, kota lezi mu mu zangareleko. Hakuva hina hova cini? A mu zangarelangi hina, mu zangarele Jehova.
9Zonake Mosi aku ka Aroni: Byela yontlhe hlengeletano ya vanana va ka Israeli, uku: Tshinelani mahlweni ka Jehova, hakuva i zwile a kubhonga ka nwina.
10Laha Aroni a nga kari a wulawula ni hlengeletano ya vanana va ka Israeli, va lo cuwuka tlhelweni ga xiwula, languta, a kuhatima ka Jehova ku lo woneka le refini;
11zinghaho Jehova i lo wulawula na Mosi aku:
12Nzi zwile kubhonga ka vanana va ka Israeli; va byele uku: Ni gambo mu taga nyama; ni mixo mu ta xura hi zibaba, kasi ma fela ku tiva lezaku hi mina Jehova, Nungungulu wa nwina.
13Laha gambyeni a tihwari ti lo huma ti ta fenengeta wugovelo; ni mixo a nzhokati yi lowa yi pomela matlhelo wontihe ya wugovelo. Mitse. 11:31
14Laha a nzhokati yi nga wa tlhatlhekile, ku lo woneka a zilo zitsongwani za zirenzelekwani lomu misaveni, na zi fanana ni hunguva hehla ka misava. Joh. 6:31
15A vanana va ka Israeli laha va nga zi wona, va lo wutisana, vaku: Zini lezi? Hakuva va wa nga zi tivi lezaku zini. Zonake Mosi aku: Lezi hi zona zibaba lezi Jehova a mu nyikako zona a kuva muga.
16Lezi hi zalezi Jehova a mu leleteleko aku: Rolelani, munwe ni munwani a ringanisa kuga kakwe, a lipimo la homeri ka munhu ni munhu, mu pima kota wunyingi ga vanhu va nwina; loyi ni loyi a rolela za va le tendeni gakwe.
17A vanana va ka Israeli va lo maha kota lezo; a Vanwani va lo rolela zo tala, ni vanwani za zitsongwani.
18Zonake va lo pima hi homeri; loyi a nga wa rolele zo tala a nga hunzangi vanwani, ni loyi a nga wa rolele zitsongwani a nga kiyelelwangi. Va lo rolela munwe ni munwani kota kuga kakwe. 2 Kor. 8:15
19Zonake Mosi aku ka vona: Ngha a ngave kona munhu loyi a zi siyako kala manziko.
20Kanilezi a va mu ingisangi Mosi; vanwani va lo zi siya kala manziko. Kanilezi zi lo makanya ziwungwani, zi nuha; zonake Mosi i lo va zangarela.
21Masiku wontihe laha mixweni, munwe hi munwani i wa rolela kota kuga kakwe; loku a gambo gi hisa, zi wo nyeka.
22Ku ku hi siku ga wuntlhanu ni ginwe, va rolela zo ringana kuga masiku mambiri, tipimo timbiri ka munhu munwe ni munwani. Zonake a madota wontihe ya hlengeletano ma lo ta bikela Mosi.
23Yena aku ka vona: Lezi hi lezi zi leletelweko hi Jehova; manziko i siku go humula, hi sabado go basa ga Jehova; bhikani lezi mu lavako ku bhika nyamutlha, mu katinga lezi mu lavako ku katinga nyamutlha; zonake zontlhe lezi zi salako, zi hlayiseni kala manziko.
24Va lo zi hlayisa kala manziko, khwatsi hilezi Mosi a leleteleko; kanilezi a zi furangi, a zi humangi ziwungwani.
25Mosi aku ngalo: Ganani lezi nyamutlha, hakuva nyamutlha i uku ga kuhumula ga Jehova; a mu na ku ya kuma nchumu lehandle.
26Mu ta zi rolela lomu ka ntlhanu wa masiku ni ginwe, kanilezi hi siku ga wuntlhanu ni mambiri i sabado, zi nga tava kona ka lego siku.
27Hi siku ga wuntlhanu ni mambiri, vanwani vanhu va lo huma ku ya zi rolela kanilezi a va kumangi nchumu.
28Zonake Jehova aku ngalo ka Mosi: Mu ta ala kala rini a ku hlayisa zileletelo za mina ni milayo ya mina?
29Tivani lezaku Jehova i mu nyikile sabado, hi zalezo a mu nyikako a zibaba za masiku mambiri ka siku ga wuntlhanu ni ginwe. Munwe ni munwani a tshame kaya, ngha a nga hi kona munhu a humako laha mutini hi siku ga wuntlhanu ni mambiri. Gen. 2:3; Ekso. 20:8
30Zonake a vanhu va lo humula hi siku ga wuntlhanu ni mambiri.
31A vanhu va yindlu ya ka Israeli va lo chula a zibaba lezo a vito ga Manna: na zona zi wa fanana ni tinyungi ta korianderi, na zi basile, zi nanziha kota zihabana zi patsilweko ni wulombe.
32Mosi i te ngalo: Lezi zi leletelweko hi Jehova hi lezi: A ku hlayiswe a homeri leyi yi teleko hi manna xikari ka mingango ya nwina, kasi a zizukulwana za nwina zi ta ta wona a zibaba lezi nzi nga mu wundla ha zona lomu xiwuleni, xikhati lexo nzi nga mu humesa tikweni ga Gipite.
33Mosi aku ka Aroni: Teka mbita, u chela homeri yi teleko hi manna, u yi veka mahlweni ka Jehova, kasi ku hlayisela zizukulwana za nwina.
34Khwatsi hilezi Jehova a wulileko ka Mosi, Aroni i lo yi veka mahlweni ka Wumboni lezaku yi hlayiswa kona.
35A vanana va ka Israeli va loga manna 40 wa malembe, va kala va chikela tikweni legi gi akilweko: va loga manna va kala va chikela mimbhinganweni ya tiko ga Kanani.
36A homeri yinwe yi hi xipanze xa wukhume xa efa.
Currently Selected:
Eksodusi 16: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
