Eksodusi 7
7
Mosi uya mahlweni ka Faro.
1Jehova aku ka Mosi: Cuwuka, nzi ku mahile u ku khwatsi u nungungulu mahlweni ka Faro, ni nakuloni Aroni i tava muprofeti wa wena.
2U ta wula zontlhe lezi nzi ta nga ku leletela zona, a nakuloni Aroni i ta byela Faro lezaku a tlhatlha a vanana va ka Israeli Va huma tikweni gakwe.
3Kanilezi mina nzi ta nonohisa a mbilu ya Faro, zonake nzi anzisa a zirewukiso za mina lomu tikweni ga Gipite.
4Kanilezi Faro a nga ta ingisa. Zonake nzi ta veka a canja ga mina hehla ka Gipite, nzi humesa a zidlemo za mina ka lego tiko, vona a vanhu va mina, a vanana va ka Israeli, hi tsayiselelo wa hombe.
5Ni vaGipite va ta zi tiva lezaku hi mina Jehova, loku nzi nawuluta a canja ga mina hehla ka Gipite, nzi humesa a vanana va ka Israeli xikari kabye.
6Mosi na Aroni va lo maha lezo. Va maha kota lezi Jehova a va leleteleko.
7Mosi i wa hi ni 80 wa malembe; Aroni i wa hi ni 83 wa malembe, a xikhati lexo va nga wulawula na Faro.
8Jehova i lo wulawula ka Mosi na Aroni, aku:
9Loku Faro a mu byela ku ngalo: Mahani zihlamaliso, u ta byela Aroni ku ngalo: Teka a nhonga ya wena u yi hoxa mahlweni ka Faro, yi ta hunzuka yi maha nyoka.
10Zinghaho Mosi na Aroni va loya ka Faro, va ya maha kotisa lezi Jehova a va leleteleko. Aroni i lo hoxa a nhonga yakwe mahlweni ka Faro, ni mahlweni ka malanza yakwe; yi lo hunzuka yi maha nyoka.
11Zonake Faro i lo vitana a titlhari ni tinʼanga; vonawu kota ti nga hi titlhari ta le Gipite, va lo maha zalezo hi wutlhari gabye. 2 Tim. 3:8
12Hakuva munwe ni munwani i wo hoxa nhonga yakwe, a tinhonga leto ti hunzuka ti maha tinyoka; kanilezi a nhonga ya Aroni yi lo mita tinhonga tabye.
13Kanilezi a mbilu ya Faro yi lo nonoha, cima a nga va ingisangi, khwatsi hi kuwula ka Jehova.
A kuhunguka ka mati ma maha nkhata.
14Jehova aku ka Mosi: A mbilu ya Faro yi nonohile; wa ala ku tlhatlha a vanhu va famba.
15Famba ka Faro laha mixweni, loku aya le matini, wena u ta mu khinga mbhirini ya congo. Na u khomile a nhonga leyi yi nga hunzuka yi maha nyoka,
16u taku kakwe: Jehova, a Nungungulu wa maHeberu, i nzi rumile ka wena, i ngalo: Tsika a vanhu Va mina va ya nzi khozela le xiwuleni! Kanilezi a ku ingisi kala lezi.
17Jehova i ngalo: U ta zi tiva makunu lezaku hi mina Jehova: Nzi taba a mati ya congo hi nhonga ya mina, ma ta hunzuka ma maha nkhata.
18A zidluwani lezi zi nga lomu congweni zi tafa, a congo wu ta nuha, a vaGipite va ta nyenya kunwa a mati ya congo.
19Jehova aku ka Mosi: Byela Aroni uku: Teka a nhonga ya wena, u tlakusa a canja ga wena hehla ka mati ya vaGipite, ni hehla ka micongo, ni hehla ka micongwana yabye, ni hehla ka mativa yabye, ni hehla ka tihlowo tabye, a mati ma ta hunzuka ma maha nkhata; ni nkhata wu tava kona tikweni gontlhe ga Gipite, ni lomu zibyeni zo vatliwa ni za maribye.
20Zonake Mosi na Aroni va lo maha kota lezi Jehova a va leleteleko. Aroni i lo tlakusa a nhonga yakwe, aba mati ya congo mahlweni ka Faro, ni mahlweni ka malanza yakwe; a mati wontihe ya congo ma lo hunzuka ma maha nkhata.
21A zidluwani za congo zi lofa, ni congo wu lo nuha; a vaGipite va lo tsanzeka kunwa mati ya congo. A tiko gontlhe ga Gipite gi wa hi ni nkhata.
22A tinʼanga ta Gipite ti lo mahawu lezo hi wutlhari ga tona. A mbilu ya Faro yi lo sihalala. Cima a nga ingisangi, khwatsi hi lezi Jehova a wulileko.
23Faro i lo tlhela aya ndlwini yakwe, cima a nga khatalelangi lezi zilo lomu mbilwini yakwe.
24Zonake a vaGipite va lo kela kusuhani ni congo, va lava a mati ya kunwa hakuva va wa nga zi koti kunwa mati ya congo.
25Ku lo hunza ntlhanu wa masiku ni mambiri, na Jehova a bile a congo.
Currently Selected:
Eksodusi 7: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
