Genesisi 21
21
A kubelekiwa ka Isaka.
1Jehova i lo alakanya Sara kota lezi a nga wa wulile ka yena, na Jehova i lo maha ka Sara kota lezi a nga wa mu tsumbisile. Mat. 1:2; Maheb. 11:11
2Sara i lo xura nyimba, i lo mu pswalela Abrahama a nuna wakwe a nisanyana na hi wa kale, kotisa a xikhati lexo Nungungulu a nga wa xi wulile ka yena.
3Abrahama i lo chula a vito ga nisanyana wakwe loyi a belekelweko, loyi Sara a nga wa mu belekela, aku ngalo hi Isaka.
4Abrahama i lo enghenisa a wukwera a nʼwana wakwe na ha hi ni ntlhanu wa masiku ni manharu, kota lezi Nungungulu a nga wa mu layile.
5Abrahama i wa hi ni 100 ga malembe a xikhati lexo a nga belekwa Isaka a nwanana wakwe.
6Sara i te ngalo: Nungungulu i nzi hlekisile, ni vontlhe lava va ta nga zizwa va ta tsaka na mina.
7Yena aku ngalo: Himani a nga nga wula ka Abrahama lezaku Sara i ta anwisa a vanana ke? Makunu nzi mu belekele a nwanana na a hi wa kale.
Hagari na Ixmaeli va hlongolwa.
8A nwanana i lo kula, i lo lumulwa; Abrahama i lo maha mubuzo wa hombe a siku lego a nga lumulwa Isaka.
9Sara i lo wona a nisanyana wa Hagari a muGipite loyi a nga wa pswalele Abrahama, na a kari a hleka.
10I te ngalo ka Abrahama: Hlongola a nanza legi ga xisati ni nʼwana wa gona; hakuva a nʼwana wa khumbi a nga na kuga tshomba zinwe ni nʼwana wa mina Isaka. Gal. 4:30
11A gezu lego gi lo mu tsanwisa nguvu Abrahama hi kota ya nʼwana wakwe.
12Nungungulu i te ngalo ka Abrahama: Ngha lexi xi nga ku tsanwisi hi kota ya mufana, na hi kota ya khumbi ya wena; ingisa zontlhe lezi Sara a ku byelileko; hakuva hi ka yena Isaka ku ta nga huma a pswalo wa wena. Rom. 9:7; Maheb. 11:18
13Na yena a nʼwana wa khumbi nzi ta mu maha a tiko; hakuva i pswalo wa wena.
14Abrahama i lo vuka ni mixo a teka a kuga ni nghotso ya mati, a nyika Hagari, a yi pakatsa makatleni yakwe, i lo mu nyika ni nʼwana a mu fambisa; i lo famba a nzulanzula xiwuleni xa Berexeba.
15Laha a mati ma nga mbhela lomu ka nghotso, i lo siya nʼwana lahasi ka sinya.
16I lo tsawukana naye a pfhukana wa ku kota ku hoxa ka tlhari; hakuva i te ngalo: A nzi na ku wona a nʼwana wa mina ni kufa. I loya tshama hi le mahlweni, i lo tlakusa a gezu a rila.
17Nungungulu i lozwa a gezu ga mufana; ni ngelosi ya Nungungulu yi vitana Hagari, yi hi le tilweni, yiku kakwe: Hagari, u yini ke? U nga chavi; hakuva Nungungulu i zwile a gezu ga mufana laho a nga kona.
18Suka, u vuxa mufana, u mu khoma hi woko, hakuva nzi ta mu maha a tiko ga hombe.
19Nungungulu i lo vulula mahlo yakwe, a wona a hlowo ya mati, i lo ya tata a nghotso hi mati, i lo nwisa a mufana.
20Nungungulu i wa hi zinwe ni mufana, i lo kula, a tshama xiwuleni na a hi mukhomi wa wura.
21I lo aka xiwuleni xa le Parani, ni nyine wakwe i lo mu tekela sati tikweni ga le Gipite.
Abrahama na Abimeleki va maha xivumelwano.
22Zonake hi lexo xikhati Abimeleki na Fikole a nduna ya yimpi yakwe, va lo wulawula ka Abrahama, vaku: Nungungulu i na wena ka zontlhe lezo u zi mahako.
23Hikwalaho hlambanya ka mina kwalaha hi Nungungulu lezaku, u nga ta nzi kanganyisa, mina ni pswalo wa mina; kanilezi kota wuxinji legi nzi nga ku mahela, u ta nzi mahela gona wenawu, ni tiko legi u akileko ka gona.
24Abrahama aku ngalo: Nzi ta hlambanya.
25Abrahama i lo sola Abimeleki hi kota ya hlowo leyi a malanza yakwe ma nga wa yi tekile hi xikanya.
26Abimeleki aku ngalo: A nzi mu tivi loyi a nga maha lezo; wena a ku nzi byelangi, hambu ni kuzwa a nzi zwangi kala nyamutlha lezi.
27Abrahama i lo teka a tiyivu ni tihomu a nyika Abimeleki; vona vambiri va lo maha xivumelwano.
28Abrahama i lo veka tlhelweni a ntlhanu ni timbiri tiyivana.
29Abimeleki aku ngalo ka Abrahama: Leti tiyivana ta ntlhanu ni timbiri u vekileko tlhelweni ta yini ke?
30Yena i te ngalo: Leti tiyivana ta ntlhanu ni timbiri u ta teka canjeni ga mina, kasi ta maha wukustumunyu gaku hi mina nzi nga kela leyi hlowo.
31Hikwalaho i lo chula lego wutshamu ku ngalo hi Berexeba; hakuva va lo hlambanya laho vona vambiri.
32Zinghaho va lo maha xivumelwano le Berexeba; zonake i lo suka Abimeleki, na Fikole a nduna ya yimpi yakwe, va tlhelela tikweni ga maFilistia.
33Abrahama i lo byala a tisinya le Berexeba, i lo khongela laho a vito ga Jehova. Nungungulu wa pinzukelwa.
34Abrahama i lo tshama lomo tikweni ga maFilistia masiku yo tala.
Currently Selected:
Genesisi 21: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
