Genesisi 22
22
Abrahama a layiwa ku nyikela Isaka.
1Zonake anzhako ka lezo zilo, Nungungulu i lo ringa Abrahama aku ngalo: Abrahama! Aku: Nzi laha. Maheb. 11:17-19
2Aku ngalo: Teka a nwanana wa wena Isaka, loyi u mu ranzako, uya tikweni ga le Moria, u ya mu nyikela laho, a kuva munyikelo wa kuhiswa le xitsungeni lexi nzi ta nga ku kombisa xona.
3Abrahama i lo vuka ni mixo, i lo gabhatsela a mbongola yakwe, a teka a malanza yakwe ya mambiri, na Isaka a nʼwana wakwe, i lo tshova ni tihunyi ta munyikelo wa kuhiswa, i lo suka aya ka wutshamu lego Nungungulu a nga mu byelile gona.
4Hi siku ga wunharu Abrahama i lo tlakusa a mahlo yakwe, i lo wona wutshamu lego na a ha hi kule.
5Abrahama aku ngalo ka malanza yakwe: Tshamani laha ni mbongola, hi taya lahaya mina ni mufana hi ya khozela, hi ta tlhela hi wuya ka nwina.
6Abrahama i lo teka tihunyi ta munyikelo wa kuhiswa, a rwexa Isaka a nʼwana wakwe; yena i lo teka a nzilo ni mukwana, va famba vona vambiri.
7Isaka i lo wulawula ka raru wakwe Abrahama, aku: Dada! Aku ngalo: Nwananga. Aku ngalo: A nzilo ni tihunyi hi lezi; makunu yi kwihi a yivana ya munyikelo wa kuhiswa ke?
8Abrahama aku ngalo: Nwananga, Nungungulu i ta ti lavela a yivana ya munyikelo wa kuhiswa; va wa, famba hi wumbiri gabye.
9Loku va chikele ka wutshamu lego Nungungulu a nga wa mu byelile, Abrahama i lo aka a alati laho, a longisa a tihunyi, a boha nʼwana wakwe Isaka, a mu veka alatini hehla ka tihunyi.
10Abrahama i lo tshambuluta a canja gakwe, a teka mukwana kasi ku tlhava a nʼwana wakwe.
11A ngelosi ya Jehova yi lo mu vitana hi le tilweni, yiku: Abrahama. Abrahama! Yena aku ngalo, Nzi laha.
12Yiku ngalo: U nga tlhateki a canja ga wena ka mufana, u nga mahi nchumu ka yena; hakuva makunu nza zi tiva lezaku wa mu chava Nungungulu, lezi u nga kala ku ala ni nʼwana wa wena wa munwe. Jak. 2:21
13Abrahama i lo tlakusa a mahlo yakwe, i lo wona a hamba hi lenzhako kakwe na yi khwekele lomu likwareni hi timhonzo ta yona; Abrahama i lo ya teka a hamba, a yi maha munyikelo wa kuhiswa wutshanwini ga nʼwana wakwe.
14Abrahama i lo chula a vito ga wutshamu lego ku Jehova-Jire: kota lezi ka ha wulwako ni nyamutlha, xitsungeni lexi Jehova a wonekako kona.
15A ngelosi ya Jehova yi lo engeta yi vitana Abrahama hi le tilweni,
16yiku ngalo: Nzi hlambanyile ha mina, ku wula Jehova, hakuva u mahileko lezi, a ku nzi alelangi ni nʼwana wa wena wa munwe, Lu. 1:73; Maheb. 6:13
17nzi ta ku katekisa nguvu, ni ku anzisa a pswalo wa wena, wu kota tinyeleti ta tilo, ni ku kotisa a seke ga le fungwini wa bimbi; ni pswalo wa wena wu ta fumela a nyangwa ya valala vabye.
18Ni lezaku hi pswalo wa wena a matiko wontihe ya misava ma ta katekiswa, hakuva wena u lo ingisa a gezu ga mina. Miti. 3:25; Gal. 3:8
19Zonake Abrahama i lo wuya ka malanza yakwe, va lo ta suka va famba Berexeba. Abrahama i lo luvela kona Berexeba.
20Makunu a nzhako ka lezo ku lo ta byelwa Abrahama lezaku: Languta, yenawu Milka i belekele Nahori nakuloni, a zihlangana;
21Uza a matewula yakwe, na Buzi nakulobye, na Kemule raru wa Arame,
22na Kesede, na Hazo, na Pildaxe, na Jidlafe, na Betueli.
23Betueli i lo beleka Rebeka. Lava va ntlhanu ni vanharu Milka i lo pswalela Nahori nakulobye wa Abrahama.
24Ni kata-kulobye wakwe a vito a nga wa hi Reurna, yenawu i lo beleka Teba, na Gahamu, na Tahaxi, na Maka.
Currently Selected:
Genesisi 22: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
