Genesisi 23
23
Abrahama a xava misava yo lahlela kona.
1Sara i wa hi ni 127 wa malembe; laya hi malembe ya wutomi ga Sara.
2Sara i lofa le Kiriat-Arba (ku nga Hebroni) a tikweni ga le Kanani; na Abrahama i lota ku ta hlaluka Sara ni ku mu rilela.
3Abrahama i lo suka mahlweni ka mufi wakwe, i lo ya wulawula ni vanana va Heti, aku ngalo:
4Mina nzi muluveli ni muenzi xikari ka nwina; nzi heni wutshamu ga xilahla xikari ka nwina, kasi nza lahla a mufi wa mina, kasi a nga havi kona mahlweni ka mina.
5A vanana va Heti va lo hlamula, vaku kakwe:
6Hizwe, hosi ya hina, wena u nduna ya Nungungulu xikari ka hina; lahla mufi wa wena ka xilahla lexo u ta nga xi hlawula xikari ka zilahla za hina; a nga kona wa hina a ta nga ku tsimbetela ka xilahla xakwe, lezaku u nga keleli a mufi wa wena.
7Abrahama i lo suka a khizama mahlweni ka vanhu va tiko, vona vanana va Heti.
8I lo wulawula navo aku ngalo: Loku ku hi kuxuva ka mina lezaku nzi lahla mufi wa mina kasi a nga ha hi kona mahlweni ka mina; nzi ingiseni, mu nzi kombelela ka Efroni a nʼwana wa Zohari,
9kasi a nziha a mhako ya le Maka-pela, leyi yi nga le magumo ka simu gakwe, a nzi nyika hi tsengo wa mali yi ringanako yona kasi yi maha xilahla xa mina.
10Makunu Efroni i wa tshamile xikari ka vanana va Heti; na Efroni a muHeti i lo hlamula Abrahama tindleveni ta vanana va Heti, xikari ka vona vontlhe lava va enghenako nyangweni ya muti wakwe, aku ngalo:
11Ahihi, hosi yanga, nzizwe; nza ku nyika simu lego, ni mhako yi nga ka gona, nza yi nyika ka wena; nza ku nyika mahlweni ka vanhu va ka hina: kelela mufi wa wena.
12Abrahama i lo ti koramisa mahlweni ka vanhu va tiko;
13a wulawula ka Efroni kuzweni ka vanhu va tiko, aku: Kanilezi ngha u nzizwa u amukela a tsengo wa mali canjeni ga mina hi simu ga wena, nzi ta kelela kona a mufi wa mina.
14Efroni i lo hlamula Abrahama, aku kakwe:
15Hosi yanga, nzi ingise; a simu gi ringana 400 ya maxekeli ya siliva: xini lexo xikari ka mina na wena ke? Wena kelela mufi wa wena.
16Abrahama i lo ingisa ka Efroni; na Abrahama i lo ringanisela Efroni a siliva leyi a yi wulileko tindleveni ta vanana va Heti, 400 ya maxekeli ya siliva, a mali yi amukelekako ka vaxavisi.
17Zonake a simu ga Efroni legi gi nga le Makapela, gi nga mahlweni ka Mamre, a simu ni mhako leyi yi nga ka gona, ni tisinya tontlhe leti ti nga lomo sinwini, ni mimbhingano yontlhe hi matlhelo wontihe ku wa tiyisilwe.
18Zi lo maha za Abrahama a mahlweni ka vanana va Heti, ni mahlweni ka vontlhelele lava va enghenako nyangweni ya muti wakwe.
19Anzhako ka lezo Abrahama i lo lahla a sati wakwe a mhakweni ya simu ga Makapela mahlweni ka Mamre, ku nga le Hebroni, a tikweni ga Kanani.
20Zonake a simu ni mhako ya gona, zi lo tiyiswa a kuva za Abrahama hi vanana va Heti, xi lo maha xilahla xakwe.
Currently Selected:
Genesisi 23: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
