Genesisi 24
24
Va tekela Isaka a sati.
1Abrahama i wa hi wakale, na hi ni malembe yo tala: Jehova i lo katekisa Abrahama ka zilo zontlhelele.
2Abrahama i te ngalo ka nanza gakwe ga hombe ga yindlu yakwe, loyi a nga wa fumela zontlhe lezi a nga wa hi nazo: Enghenisa a canja ga wena lahasi ka hangaswa ga mina.
3Nzi ta ku hlambanyisa hi Jehova, Nungungulu wa tilo ni Nungungulu wa misava, lezaku u nga tekeli a nʼwana wa mina a sati xikari ka vanhwana va maKanani, laya nzi tshamileko xikari kabye;
4kanilezi u taya tikweni ga hina, ni le maxakeni ya mina, u ya tekela a nʼwana wa mina Isaka a sati.
5A nanza gi te ngalo ka yena: Kutani a nhwana a nga ta vumela ku nzi lanzela nzi wuya naye ka legi tiko; xana nzi ta tlhelisa a nʼwana wa wena ka tiko legi u sukileko hi ka gona ke?
6Abrahama aku ngalo: Chela kota, u nga mu yisi seyo a nʼwana wa mina.
7Jehova, Nungungulu wa tilo, loyi a nga nzi teka le ndlwini ka dadani, ni le tikweni ga maheleko, loyi a nga wulawula a hlambanya ka mina, aku: A pswalo wa wena nzi ta wu nyika legi tiko; i ta ruma ngelosi yakwe mahlweni ka wena, u ta ya mu tekela nʼwana wa mina a sati leyo.
8Loku a nhwana a nga vumeli a ku ku lanza, zonake wena u nga ta kuva na nanzu hi lexi xifungo xa wena; kanilezi u nga yisi a nʼwana wa mina seyo.
9Zonake a nanza gi lo enghenisa a canja gakwe lahasi ka hangaswa ga Abrahama a hosi yakwe, gi lo hlambanya ka yena hi laya mahungu.
10Ni nanza gi lo teka khume ga makameli, xikari ka makameli ya nwinyi wakwe, gi lo famba ni zilo za tsengo za nwinyi wakwe; gi lo suka gi famba le Mesopotamia, le mutini wa Nahori.
11I lo khizamisa a makameli yakwe hi lahandle ka muti, hi le hlobyeni ya mati, hi xikhati xa gambo, xikhati lexo vavasati va yako ku yakha mati.
12Yena i te ngalo: Jehova, Nungungulu wa nwinyi wa mina Abrahama, nzi vune nyamutlha, u mu mahela wuxinji a nwinyi wa mina Abrahama.
13Languta, nzi laha hlobyeni ya mati; a vanhwana va vanhu va muti vata ku takha mati.
14Ngha ku mahisa lezi, a nhwana loye nzi ta nga ku ngalo ka yena: Rula fuko ya wena nza nganwa mati; ngha aku ngalo: Nwana, nzi ta nwisa ni makameli ya wena kambe; ngha yaloye ave a hlawulelweko a nanza ga wena Isaka; hi ka lezo nzi ta zi tiva lezaku u mu mahele wuxinji a nwinyi wa mina.
15Zonake na a nga se nga mbheta ku wulawula, languta, ku lo chikela Rebeka loyi a belekwako hi Betueli, a nʼwana Milka, a sati wa Nahori, a nakulobye wa Abrahama, na a rwele a fuko yakwe.
16A nhwana i wa sasekile kucuwukekeni, a mubulwa a nga tiviko wanuna; i lo relela kuta hlobyeni, i lo khelela a fuko yakwe, a tlhela a kanziha.
17A nanza gi lo tsutsuma gi mu khinga, giku: Hi nga nziha nzinwa kutsongwani a mati lawo ma nga lomo ka fuko ya wena.
18Yena aku ngalo: Nwana hosi yanga; i lo hatlisa a rula a fuko yakwe canjeni gakwe, i lo mu nyika anwa.
19Laha na a mbhetile ku mu nyika anwa, i te ngalo: Nzi ta khela ni makameli ya wena kambe, ma kala ma kolwa.
20I lo hatlisa a chulula a fuko yakwe lomu xigowolweni, i lo tsutsuma aya hlobyeni ku yakha manwani kambe, i lo khela a makameli yakwe wontihe.
21A wanuna i lo mu cuwukisisa na a miyele, kasi ku wona loku Jehova a katekisile a pfhumba gakwe.
22Zonake loku a makameli ma mbhetile kunwa, a wanuna i lo teka a phera ya nzalama, a kutika ka yona ku wa hi khihlanya ga xekeli, ni zingwavila zimbiri za khume ga maxekeli kutika, i lo ma enghenisa canjeni gakwe.
23Yena aku ngalo: U nʼwana mani ke? Hi nga nzi byela. Gi kona wutshamu lomu ndlwini ka raru wa wena ga kuva hi etlela ke?
24A nhwana aku ngalo: Mina nzi nwaBetueli, a nʼwana Milka, kata Nahori.
25Yena i lo engeta kambe aku ngalo: Hi na ni byanyi ni foliji go tala, ni wutshamu go etlela.
26A wanuna i 16 khizama, a khozela mahlweni ka Jehova,
27aku ngalo: A ku khesiwe Jehova, Nungungulu wa nwinyi wa mina Abrahama, loyi a nga tsikangiko a ku mahela nwinyi wa mina a wuxinji ni kutsumbeka. Jehova i nzi rangele lomu ndleleni a nzi yisa ndlwini ya maxaka ya nwinyi wa mina.
28A nhwana i lo tsutsuma a ya bika leti timhaka lomu ndlwini ka nyine wakwe.
29Rebeka i wa hi ni makabye wakwe, a vito gakwe hi Labani. Labani i lo tsutsuma aya ka wanuna le hlobyeni.
30Zonake, laha na a wonile a phera ni zingwavila mandleni ya makabye wakwe ni kuzwa timhaka ta Rebeka makabye wakwe, taku: A wanuna i wulile lezo ka mina, Labani i loya ka wanuna; languta, i wa yimile laha ma-kamelini hi le hlobyeni.
31I te ngalo: Enghena, u katekisilweko hi Jehova; wa ha yimela yini lahandle ke? Nzi longisile a yindlu ni wutshamu ga makameli.
32A wanuna i lo enghena lomu ndlwini: va lo tlhatlha makameli yakwe, va nyika makameli a byanyi ni foliji, ni mati ya ku hlamba milenge yakwe, ni milenge ya vanhu lavo a nga wa hi navo.
33Laho ku lo vekiwa zakuga mahlweni kakwe kasi aga, kanilezi yena aku ngalo: Nzi nga taga na nzi nga se wula timhaka ta mina. Labani aku ngalo: Wula.
34Yena aku ngalo: Mina nzi nanza ga Abrahama:
35Jehova i katekisile nguvu a nwinyi wa mina, yena ngwa hombe; i mu nyikile tiyivu ni tihomu, ni siliva, ni nzalama, ni malanza, ni malanza ya xisati, ni makameli, ni timbongola.
36Na Sara, a sati wa nwinyi wa mina, na hi wakale i mu pswalele nʼwana a nwinyi wa mina; i nyikile ka yena zontlhe lezi a nga nazo.
37A nwinyi wa mina i lo nzi hlambanyisa, aku: U nga tekeli a nʼwana wa mina a sati xikari ka vanhwana va maKanani, laya nzi tshamileko lomu tikweni gabye.
38Kanilezi u taya le ndlwini ka dadani, ni le maxakeni ya! mina u ya tekela a nʼwana wa mina a sati.
39Mina nzi te ngalo ka hosi ya mina: Kutani wasati a nga ta vumela ku nzi lanzela.
40Yena i te ngalo ka mina: Jehova loyi nzi fambako mahlweni kakwe i ta rumela ngelosi yakwe zinwe na wena, yona yi ta katekisa a pfhumba ga wena; u ta ya tekela a nʼwana wa mina a sati le tixakeni ta mina, lomu ndlwini ya dadani.
41Zonake u nga ta kuva ni nanzu hi kuhlambanya ka mina, loku u yile maxakeni ya mina; hambu loku ya nga ku nyiki, u nga ta kuva ni nanzu hi kuhlambanya ka mina.
42Nzi lo chikela le hlobyeni inyamutlha, nzi te ngalo: Jehova Nungungulu wa hosi ya mina Abrahama, loku u nzi katekisa ka pfhumba legi nzi fambako ka gona,
43languta, nzi yimile laha hlobyeni ya mati; ngha kuku loku kuta a nhwana ku takha mati, nzi taku ka yena: Hi nga nziha nzinwa kutsongwani a mati lawo ma nga lomo ka fuko ya wena;
44loku aku ka mina: Nwana wena, nzi ta khela ni makameli ya wena kambe; ngha loye nhwana a hi yena a hlawulelweko a nʼwana wa nwinyi wa mina hi Jehova.
45Zonake laha na nzi nga se mbheta ku wulawula mbilwini ya mina, languta, Rebeka i lo chikela na a rwele a fuko yakwe makatleni yakwe; i lo relela hlobyeni ku takha mati. Nzi te ngalo kakwe: Hi nga nziha nzinwa.
46I lo hatlisa a rula fuko yakwe makatleni yakwe, aku: Nwana; nzi ta nwisa ni makameli ya wena kambe; nzi lonwa, i lo nwisa ni makameli kambe.
47Nzi lo mu wutisa ku ngalo: U nʼwana mani ke? Aku: Nzi nʼwaBetueli, a nʼwana Nahori, loyi a nga pswalelwa hi Milka; nzi lo vekela a phera nhovini yakwe, ni zingwavila mandleni yakwe.
48Nzi lo khizama, nzi korama mahlweni ka Jehova, nzi lo mu bonga Jehova Nungungulu wa nwinyi wa mina Abrahama, loyi a nzi kombileko a ndlela yo lulama kasi nzi ta teka a nhwana wa makabye wa hosi ya mina, kasi a yava sati wa nʼwana wakwe.
49Makunu nzi byeleni loku mu ranza a ku mu mahela wuxinji ni zinene a hosi ya mina; ni loku zi nga hi lezo nzi byeleni kambe; kasi nza fela ku hunzuluka nziya tlhelweni ga xinene kutani ka ga xibhabha.
50Zonake Labani na Betueli va hlamula vaku ngalo! A mhaka leyi yi tako hi ka Jehova; hi nga ta wula ka wena kubiha hambu kusasa.
51Languta, i le mahlweni ka wena, mu teke u famba naye, a ya maha sati wa nʼwana wa hosi ya wena, kota lezo Jehova a wulileko.
52Makunu laha a nanza ga Abrahama gi ngazwa leti timhaka, i lo korama lahasi mahlweni ka Jehova.
53Ni nanza gi lo humesa a zibya za siliva ni nzalama, ni tinguwo, i lo zi nyika ka Rebeka; i lo nyika kambe ka Labani makabye wakwe ni nyine wakwe a zinyikiwo za tsengo wa hombe.
54Va loga vanwa, yena ni vanhu lava a nga wa hi navo, va lo tshama laho lego wusiku. Vontlhe va lo vuka ni mixo, aku ngalo: Nzi fambiseni nziya ka nwinyi wa mina.
55A makabye wakwe ni nyine wakwe vaku ngalo: Ngha a nhwana a tshama na hina kutani khume ga masiku; anzhako ka lezo i ta famba.
56Yena aku ngalo kabye: Mu nga nzi rivatisi, hilezi Jehova i katekisile a pfhumba ga mina; nzi fambiseni kasi nziya ka hosi ya mina.
57Vona vaku ngalo kakwe: Hi ta vitana nhwana, hizwa hi nonwini wakwe.
58Va lo mu vitana Rebeka, vaku kakwe: U ta famba ni loyi munhu ke? Aku ngalo: Nzi ta famba.
59Zonake va lo mu fambisa Rebeka makabye, ni muanwisi wakwe, ni nanza ga Abrahama, ni vavanuna vakwe.
60Va lo mu katekisa Rebeka, vaku ka yena: Wena makweru, ngha ma hi mazana ya mazana ya tsanza-vahlayi a pswalo wa wena, ni pswalo wa wena a wu wutle tinyangwa ta valala vabye.
61I lo suka Rebeka ni vanhanyana vakwe, va lo khilela makameli va lanza loyi wanuna; ni nanza gi lo teka Rebeka gi famba.
62Isaka i wa kari ata hi ndlela ya le Beer-lahairoi: hakuva i wa tshama tikweni ga le Dzongeni.
63Isaka i lo huma laha gambyeni na aya le handle, kasi ku ya alakanyela; i lo tlakusa a mahlo yakwe, a wona makameli na ma kari mata.
64Rebeka i lo tlakusa a mahlo yakwe, laha a nga wona Isaka, i lo chika hi le kamelini,
65aku ngalo ka nanza: Himani loyi munhu a fambako lomu masinwini a hi khinga ke? A nanza giku ngalo: I hosi ya mina. Yena i lo teka a nguwo a ti fenengeta.
66Ni nanza gi lo hlawutela ka Isaka zontlhe lezi a zi mahileko.
67Isaka i lo enghenisa Rebeka lomu tendeni ga Sara a nyine wakwe, i lo mu teka a maha sati wakwe, a mu ranza. Na Isaka i lo chavelelwa zalezo a nga felwe hi nyine wakwe.
Currently Selected:
Genesisi 24: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
