Genesisi 25
25
A vazukulu va Abrahama ni kufa kakwe.
1Abrahama i lo engeta a teka sati, a vito gakwe hi Ketura.
2Yena i lo mu belekela Zimrani, na Jokixani, na Medani, na Midiani, na Ixibake, na Xua.
3Jokixani i lo beleka Xeba, na Dedani. Ni vana va Dedani ku wa hi Axurime, na Letuxime, na Leumime.
4A vana va Midiani hi Efa, na Efera, na Hanoke, na Abida, na Elda. Lava vontlhe i vana va Ketura.
5Abrahama i lo nyika Isaka zontlhe lezi a nga wa hi nazo.
6Kanilezi ka vanana va vasati vakwe va tsongwani lava a nga wa hi navo, Abrahama i lo va nyika zinyikiwo, i lo va hambukisa ka Isaka, a nʼwana wakwe na a ha hanya, va loya tlhelo ga Mutsuwuka-gambo, tikweni ga Mutsuwuka-gambo.
7A masiku ya malembe ya kuhanya ka Abrahama i 175.
8Abrahama i lo nyikela a moya wakwe, i lofa na a hi wa kale, na a khosahele, na a hi ni malembe ya kutala, i lo amukelwa ka va ka kabye.
9Zonake a vana vakwe, Isaka na Ixmaeli, va lo mu lahla a mhakweni ya le Makapela, a tikweni ga ka Efroni, a nʼwana wa Zohara a muHeti, yi nga mahlweni ka Mamre;
10gi nga gona a simu legi a nga xava Abrahama ka vana va Heti, hi kwalomo ku nga lahliwa Abrahama na Sara a sati wakwe.
11Zonake anzhako ka kufa ka Abrahama, Nungungulu i lo katekisa Isaka a nʼwana wakwe; Isaka i lo tshama hi le hlobyeni ya Beer-lahairoi.
12Makunu a zizukulwana za Ixmaeli, a nʼwana wa Abrahama, loyi a nga heleketwa hi Hagari muGipite, a nanza ga Sara, hi lezi:
13laya hi mavito ya vana va Ixmaeli, hi mavito yabye, hi zizukulwana zabye: A matewula ya Ixmaeli hi Nebaiote; na Kedare, na Adbeeli, na Mibsame,
14na Mixma, na Duma, na Masa,
15na Hadade, na Tema, na Jeture, na Nafixi, na Kedema.
16Lava hi vana va Ixmaeli, ni laya hi mavito yabye, hi miti yabye na hi wugovelo gabye; khume ni timbiri tihosana kota matiko yabye.
17A malembe ya wutomi ga Ixmaeli, ma wa hi 137, i lo nyikela a moya wakwe afa, i lo amukelwa ka va ka kabye.
18Vona va lo aka kusukela le Havila va kala va chikela le Xure, ngomama ni Gipite, loku uya le Assiria: i lofa nghoheni ka tixaka takwe tontlhe.
A kubelekiwa ka Jakobe na Esau.
19Lezi hi zizukulwana za Isaka nʼwana wa Abrahama: Abrahama i lo beleka Isaka;
20Isaka i wa hi ni 40 wa malembe a xikhati lexo a nga teka Rebeka a nʼwana Betueli a muAramea wa le Padan-Aramu, makabye wa Labani a muAramea, a kuva sati wakwe.
21Isaka i lo kombelela sati wakwe ka Jehova, hakuva i wa hi ngonwa. Jehova i lo muzwa; na Rebeka sati wakwe i lo xura nyimba.
22Ni vanana va lo gudlhana lomu nzeni kakwe; yena aku ngalo: Loku zi mahisa lezi, nzi xurele yini nyimba ke? I lo ya wutisa ka Jehova.
23Jehova i te ngalo kakwe: Ku kona matiko mambiri lomu nzeni ka wena; ku ta hambana lomu nyimbeni ya wena ku maha tixaka timbiri; linwani lixaka li ta hlula linwani; a nhonzwa i ta khozela nzisana. 2 Sam. 8:14; Mal. 1:2; Rom. 9:10
24Ma lo tatiseka a masiku ya kuhefemula, languta, ma wa hi mahahla lomu nyimbeni yakwe.
25Ku lo huma wo sangula na a pswhukile, na a ku khwatsi i nguwo ya woya a miri wontihe; va lo mu chula vito gakwe ku ngalo hi Esau.
26Hi lenzhako kakwe ku lo huma makabye wakwe, na canja gakwe a khomile xirenze xa Esau; a vito gakwe gi lo chulwa ku ngalo hi Jakobe. Na Isaka i wa hi ni 60 wa malembe kubelekweni kabye. Esau a xavisa a wutewula gakwe.
27Ni vafana va lo kula: Esau i wa hi munhu a nga wa tiva ku hlota, a hi munhu wa khwati; Jakobe i wa hi munhu wa kurula, a tshama matendeni.
28Makunu Isaka i lo ranza Esau, hakuva i wa mu hlotela nyama; kanilezi Rebeka i wa ranza Jakobe.
29Makunu Jakobe i lo bhika zakuga. Na Esau i lo wuya hi le khwatini na a karele.
30Esau i te ngalo ka Jakobe: Wa nga nziha nziga a kuga loko ko pswhuka, hakuva nzi karele. Hikwalaho va nga mu chula ku ngalo hi Edomi.
31Jakobe aku ngalo: Nzi xavisele kuranga a wutewula ga wena.
32Esau i te ngalo: Languta, nzi lava kufa hi ndlala; gi ta nzi vuna yini a wutewula xana?
33Jakobe i te ngalo: Ranga u hlambanya. I lo hlambanya ka yena, a xavisa a Wutewula gakwe ka Jakobe. Gen. 27:36; Maheb. 12:16
34Zonake Jakobe i lo nyika Esau a kuga, a kuga ka tinyawa; i loga, anwa, a suka a ti fambela; lezo Esau i lo kanyisa a tshomba ya wutewula.
Currently Selected:
Genesisi 25: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
