Genesisi 43
43
A vanakulobye va Josefa vaya le Gipite khati ga wumbiri.
1A ndlala yi lo tshinga tikweni ga Kanani.
2Laha va nga wa mbhetile mavele lawa va nga yile va ya xava le Gipite, Jakobe aku ka vana vakwe: Engetani kambe mu ya hi xavela zakuganyana!
3Juda i lo hlamula, aku: Inaloye i tiyisile ka hina, aku: Cima mu nga ta wona a nghohe ya mina loku mu nga wuyi ni nzisana ya nwina.
4Loku u vumela hi famba ni nakulori, hi taya hi ya ku xavela zakuga.
5Kanilezi loku u nga hi vumeli ku famba naye, cima hi nga ta famba, hakuva inaloye i te ngalo ka hina; Mu nga ta wona a nghohe ya mina loku mu nga wuyi ni nzisana ya nwina.
6Israeli aku: Hikuyini mu nzi maheleko kubiha, hi ku byela inaloye lezaku mu na ni munwani nakuloni?
7Vona va lo hlamula, vaku: Inaloye i lo hi wutisisa hi kutikisa, a timhaka ta hina ni ngango wa hina, aku: A raru wa nwina wa hanya ke? Hikwalaho hina hi lo mu byela, hi hlamula magezu yakwe. Ngha hi zi tivisile kuyini lezaku i taku ngalo: Fambani mu ya teka a nakuloni ke?
8Juda aku ka Israeli a raru wakwe: Veka mufana loyi ntanweni wa mina, hi ta suka hi famba; kasi hi fela ku hanya, hi ngafi, hina na wena ni zihlangana za hina.
9Mina nzi ti bohile ku mu hlayisa, wena u ta mu lava canjeni ga mina; loku nzi nga mu nehi ka wena, nzi ta ku nyika nʼwana wa wena, mina nzi tava ni nanzu mahlweni ka wena wontihe masiku ya kuhanya ka mina.
10Hakuva loku hi wa nga hlwelangi, lezi ngha hi tlhelele kambiri.
11Israeli a raru wabye aku ka vona: Loku zi nghaho, mu fanele ku mahisa lezi: Tekani tisakwa ta nwina, mu chela mihanzu yo nanziha ya tiko legi lomu tisakweni ta nwina, mu ya nyika inaloye; mu teka ni hlakati ni wulombe ni makha, ni mure, ni timanga, ni maalmonde.
12Mu teka ni mali yi wuyetilweko canjeni ga nwina, ni mali leyi yi nga ya tlheliswa yi chelwa lomu milonwini ya tisakwa ta nwina, mu yi tlhelisa; kutani mu wa lo hoxisa.
13Zonake mu teka ni nakuloni, mu famba ka naloye.
14Nungungulu wa Ntamu Wontihe a mu mahe mu kuma thomo mahlweni ka naloye, kasi a fela ku mu tlhatlhisela munwani nakuloni zinwe na Benjamini. Loku mina zi nzi fanele a kuva nzi lahlekelwa hi vana va mina, a nzi lahlekelwe hi vona.
15Zonake va lo teka zinyikiwo lezo, va teka ni mali yi wuyetilweko ku hlayiwa canjeni gabye, zinwe na Benjamini; va lo suka va relela kuya Gipite va lo ya chikela ka Josefa.
16Laha Josefa a nga wona Benjamini na va hi naye, i te ngalo ka nekwa ya yindlu yakwe: Heleketa vanhu lava le kaya, u ya va longisela ku va fihluta, hakuva lava vanhu nzi taga navo a mumu lowu.
17A wanuna i lo maha kota lezi Josefa a leleteleko, i lo va heleketa ndlwini ya Josefa.
18Zonake va lo dzuka, hilezi va nga wa heleketwa ndlwini ya Josefa, vaku: Hi yiswa lomu ndlwini yakwe hi kota ya mali yi nga wa enghenisilwe lomu tisakweni ta hina xikhati lexiyani; kasi va kuma xigelo xo hi vukela ha xona, va wela hehla ka hina, va hi khoma ni timbongola ta hina, hi maha tikhumbi takwe.
19Va lo tshinela ka nekwa ya yindlu ya Josefa, va lo wulawula naye laha nyangweni ya yindlu,
20vaku: O! hosi ya hina, leziyani hi nga wa tile legi go ranga hi ta xava zakuga,
21hi te loku hi chikele wutshanwini ga kuetlela, hi sangula ku tlhatlha tisakwa ta hina, hi lo hlamala hi ku wona a mali ya munwe ni munwani wa hina na yi hi kona nonwini wa sakwa yakwe, ni mali yi wa hi yona a mali ya hina hi tsengo wa yona; makunu ha yi tlhelisa hi canja ga hina.
22Hi tekile ni yinwani mali, kasi ku ta xava Zakuga; na hi nga tivi lezaku himani a nga enghenisa a mali ya hina lomu tisakweni ta hiha.
23A nekwa yiku ka vona: A kurula a kuve na nwina, hakuva Nungungulu wa nwina ni Nungungulu wa raru wa nwina hi yena a mu nyikileko mali lomu tisakweni ta nwina; a mali ya nwina nzi yi kumile. Zonake i lo humesa Simoni lomu paxweni.
24A nekwa yi lo va enghenisa lomu ndlwini ya Josefa, i lo va nyika mati va hlamba milenge yabye, a nyika foliji ka timbongola tabye.
25Vona va lo longisa zinyikiwo zabye, kasi ku ta nyika Josefa xikhati xa kuwuya kakwe laha munwini; hakuva va wa zwile ku ngalo va taga laho zakuga.
26Laha Josefa a nga wa enghenile lomu ndlwini, va lo neha zinyikiwo lezi va nga wa hi nazo, va ti koramisa mahlweni kakwe.
27Yena i lo va wutisa kuhanya kabye, aku: A raru wa nwina wa hanya ke? Loyi wa xikhosana mu nga hlawutela ha yena, wa ha hanya ke?
28Vaku ka yena: A nanza ga wena, a raru wa hina, wa ha hi kona, wa ti hanyela. Va lo korama va mu khizamela.
29Josefa i lo tlakusa mahlo yakwe a wona Benjamini a nakulobye wo belekwa naye nyine munwe, aku: Hi yena nakuloni tsongwani loyi mu nga nzi hlawutela ha yena ke? Aku: Nungungulu a ku katekise, nwananga!
30Zonake Josefa i lo hatlisa a ya lava wutshamu go ya rila ka gona, hakuva a mbilu yakwe yi lo henyiwa hi liranzo ka nakulobye; i lo enghena ndlwini yakwe, a ya rila kona.
31Loku a hlambile nghohe i lo huma a ti khoma, aku: Nehani zakuga.
32Va lo mu phamela hi tlhelo, ni vaGipite lava a nga kari aga navo va lo phamelwa hi tlhelo, hakuva a vaGipite va wa nga gelani ni maHeberu, hakuva lexi xi wa hi xinyenyeko kabye.
33Vona va lo tshamiswa mahlweni ka Josefa, va xaxametwa hi tintanga tabye, zonake va lo cuwukana munwe ni munwani hi kuhlamala.
34Zonake i lo va phamela a kuga loku ku nga wa hi mahlweni kakwe; kanilezi Benjamini i lo mu phamela hi ku wuyeta ntlhanu wa zikhati ku hunza vontlhe. Va lonwa va tsaka zinwe naye.
Currently Selected:
Genesisi 43: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
