Genesisi 44
44
1Josefa i lo leletela a nekwa ya yindlu yakwe, aku: Cheletela zakuga lomu tisakweni ta vanhu lava, kotisa wukulu ga tona, u tlhelisa a mali yabye vontlhe, u yi chela lomu milonwini ya tisakwa tabye.
2U enghenisa a gombe ga mina ga siliva nonwini wa sakwa ya loyi wa tsongwani zinwe ni mali yakwe ya ku ta xava mavele. Yena i lo maha kota lezi Josefa a mu leleteleko.
3Laha gi nga wa cile, a vanhu va lo fambiswa ni timbongola tabye.
4Laha na va ha ku huma laha mutini, na va nga se famba kule, Josefa aku ka nekwa ya yindlu yakwe; Suka u lanza a vanhu lava, loku u va kuma u taku ka vona: Hikuyini mu tlhelisela a kusaseka hi kubiha?
5A hi gona a gombe legi mu tekileko a hosi yi nwako ha gona, ni ku hlahluva ha gona ke? Mu onhile hi lezi mu mahileko.
6Laha na a va kumile i lo va byela timhaka leto.
7Vaku kakwe: Hikuyini a hosi ya hina yi wula timhaka ta kunghahi? A zive kule ni malanza ya wena a ku maha a zilo za kunghaho!
8Cuwuka, a mali leyi hi nga yi kuma milonwini ya tisakwa ta hina hi tlhelile hi yi neha ka wena, xikhati lexi hi ngata hi le Kanani; makunu hi nga mahisa kuyini a ku yiva a siliva kutani nzalama lomu ndlwini ya hosi ya wena?
9Kani hi wihi wa malanza ya wena gi ta nga kumiwa ka yena a dawe, hina hontlhe hi tava tikhumbi ta hosi ya wena.
10A nekwa yiku: Hi zona, a zi maheke kota kuwula ka nwina; a munhu loyi gi ta nga kumiwa ka yena, yaloye i tava khumbi ya mina, nwina nwentlhe mu nga tava ni nanzu.
11Zinghaho vontlhelele va lo hatlisa ku rula tisakwa tabye, va ti tlhatlha.
12A nekwa yi lo lavisisa, a sangula hi ka nhonzo kala a chikela ka loyi wa nzisana, zonake a gombe gi lo kumiwa lomu sakweni ya Benjamini.
13Vona va lo hanzula tinguwo tabye, zonake vontlhelele va lo rwexa timbongola tabye va tlhelela mutini.
14Juda ni vanakulobye va lo ya enghena lomu ndlwini ya Josefa, hakuva i wa hi kona, va lo ti wisa lahasi mahlweni kakwe.
15Josefa aku kabye: Hikuyini mu maha lezi? A mu zi tivi lezaku a munhu wo kota mina wa zi kota ku vumba ke?
16Juda aku: Hi ta kuyini ka hosi ya mina? Hi ta wula yini? Hi ta ti hlaza hi yini? Nungungulu i wonile a kubiha ka malanza ya wena. Hina hi tikhumbi ta hosi ya hina, hina ni munhu loyi a gombe gi kumilweko sakweni yakwe.
17Kanilezi Josefa aku ka vona: Cima tua nga ta maha lezo. A munhu loyi a gombe gi kumilweko canjeni gakwe, yaloye i tava khumbi ya mina; kanilezi nwina nwentlhe ti fambeleni hi kurula ka raru wa nwina.
18Zonake Juda i lo tshinela kusuhani ka Josefa, aku: O! hosi yanga, ngha a nanza ga wena gi wula gezu ginwe tindleveni ta hosi ya mina; ngha a zanga ya wena yi ngave hehla ka nanza ga wena, hakuva wena u ecana na Faro.
19A hosi ya mina yi lo wutisa malanza ya yona, yiku: Mu na ni raru kutani nakuloni ke?
20Hina hi te ngalo ka hosi ya mina: Hi naye raru, yena xikhosana, ni nʼwana loyi a nga mu beleka wukhosaneni gakwe, wa nzisana; ni nhonzo yakwe a yi kona, hi yena yece a seleko lomu ndlwini ya nyine wabye, hikwalaho dadani wa mu ranza nguvu.
21Zonake wena u te ngalo ka malanza ya wena: Mu neheni nzi ta mu wona hi mahlo.
22Hina hi te ngalo ka hosi ya hina: A mufana a nga zi koti ku hambana ni raru wakwe, hakuva loku yena a suka ka dadani wakwe, dadani a ngafa.
23U te ngalo ka malanza ya wena: Loku mu nga wuyi ni nzisana ya nwina cima mu nga ta ha wona a nghohe ya mina.
24Laha hi nga tlhela hiya ka nanza ga wena, a raru wa hina, hi lo mu hlawutela a timhaka ta hosi ya mina.
25Dadani i te ngalo ka hina: Tlhelani kambe mu ya hi xujela zakuganyana.
26Hina hi te ngalo kakwe: Hi nga ta zi kota ku tlhela hiya kambe; loku a nakulori wa hina wa tsongwani a nga fambi na hina, hi ta fambisa kuyini, hakuva loku hi nga fambi naye, cima hi nga ta zi kota ku wona a nghohe ya munhu loye.
27Makunu a nanza ga wena, a raru wa hina, i te ngalo ka hina: Ma zi tiva lezaku a sati wa mina i lo beleka varisanyana vambiri.
28Munwani i lo suka ka mina, mina nzi alakanya lezaku i pfhemulwe hi zivanza; kusukela lezo a nza ha mu wonangi kambe.
29Hikwalaho loku mu nzi tekela ni loyi, kutani a kumiwa hi timhango, nwina mu ta relelisa a wuvu ga hloko ya mina hi xiviti le nkeleni.
30Makunu loku nzi tlhela ka nanza ga wena, a raru wa hina, na nzi nga hi na mufana loyi, loyi a wutomi ga raru wa hina gi bohilweko hi wutomi gakwe;
31laha a ta nga wona lezaku a mufana a nga kona, zalezo i tafa, zonake hina malanza ya wena hi ta relelisa a wuvu ga hloko ya raru wa hina nkeleni na a hi ni xiviti.
32Hakuva mina nzi ti bohile ka dadani hi kota ya mufana loyi, nzi te ngalo: Loku nzi nga wuyi naye ka wena, nzi tava ni nanzu a masiku wontihe ya kuhanya ka mina.
33Hikwalaho nza ku khongotela lezaku u vumela a nanza ga wena gi sala gi maha khumbi, wutshanwini ga mufana loyi, nzi maha khumbi ya hosi ya mina, a mufana a famba ni vanakulobye.
34Hakuva nzi ta fambisa kuyini ka dadani, na nzi nga hi na mufana loyi? Ku nga taku nzi wona a khombo legi gi ta nga humelela ka dadani.
Currently Selected:
Genesisi 44: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
