Genesisi 45
45
Josefa a ti tivekisa ka vanakulobye.
1Zonake Josefa i wa nga zi koti ku ti khoma mahlweni ka vona vontlhe lava va nga wa mu ranzele, i lo kanyuluka, aku: Vontlhe vanhu lava va nga laha a va hume! Ku wa nga hi kona munhu a nga sele naye laha a nga ti tivekisa ka vanakulobye.
2Zonake i lo tlakusa a gezu gakwe i lo rila; ni vaGipite va lo zizwa zinwe ni yindlu ya Faro.
3Josefa aku ka vanakulobye: Hi mina Josefa! Dadani wa hanya ke? A vanakulobye va lo tsanzeka ni ku mu hlamula, hakuva va lo dzuka mahlweni kakwe.
4Josefa aku ka vanakulobye: Tshinelani ka mina! Va lo tshinela. Aku: Hi mina Josefa, a nakuloni loyi mu nga mu xavisa, nzita seno Gipite.
5Makunu mu nga bayiseki timbilu, mu xaniseka hi kota ya lezi mu nga nzi xavisa nzita seno, hi lezaku Nungungulu i nzi rumile nzi mu rangela, a ku ta hanyisa wutomi ga vanhu.
6Hakuva malembe mambiri laya a ndlala na yi hi kona lomu tikweni; ka ha sele a ntlhanu wa malembe laya ku to kala ku nga Timiwi hambu ku tshovela nchumu ka wona.
7Nungungulu i lo nzi rumela mahlweni ka nwina ku ta mu ponisa laha misaveni, ni ku ta mu hlanguta hi kupona loku ka hombe.
8Hikwalaho a hi nwina mu nzi rumeleko seno, hi Nungungulu a nzi mahileko nziva raru wa Faro, tlhelo hosi ya yindlu yakwe yontlhe, ni mufumeli wa tiko gontlhe ga Gipite.
9Hatlisani mu ya ka dadani, mu yaku ngalo kakwe: A nʼwana wa wena Josefa i te ngalo: Nungungulu i nzi mahile hosi ya Gipite gontlhe; relela uta seno ka mina, u nga hlweli.
10U ta ta aka tikweni ga le Goxeni, u tava kusuhani na mina, ni vana va wena, ni vazukulu va wena, ni tiyivu ta wena, ni tihomu ta wena, ni zontlhe lezo u nga nazo.
11Nzi ta ku wundla kona, hakuva ka ha sele ntlhanu wa malembe ya ndlala; ku nga taku u kiyelelwa wena ni ngango wa wena, ni vontlhe lavo u nga navo.
12Ma zi wona hi mahlo ya nwina, na Benjamini a nzisana ya mina, i zi wonile hi mahlo yakwe, lezaku hi nomu wa mina lowu nzi wulawulako na nwina.
13Mu ta ya byela dadani hi wuhosi ga mina gontlhe ga lomu Gipite, ni zontlhe lezi mu zi wonileko; hatlisani mu neha dadani seno ka mina.
14Zonake i lo wela nhanwini ya nzisana yakwe, a rila; yenawu Benjamini i lo rila nhanwini yakwe.
15I lo pswopswa ni vanakulobye vontlhe, a rila navo; anzhako ka lezo a vanakulobye va lo wulawula naye.
16Laha a mubiko wa timhaka leto wu nga chikela ka Faro, lezaku a vanakulobye va Josefa va tile, Faro ni malanza yakwe va lo xalala.
17Zonake Faro aku ka Josefa: Byela vanakuloni uku: Mahani lezi; rwexani timbongola ta nwina, mu famba tikweni ga le Kanani;
18mu ta ya wuya ni raru wa nwina, ni mingango ya nwina, seno ka mina; nzi ta ta mu nyika tiko ga gi nene ga Gipite, muga kunona ka tiko.
19Makunu nzi ku layile, u taku: Mahani lezo; tekani tikareta ta lomu tikweni ga Gipite, leti ti nga ya rwala a vana va nwina ni vasati va nwina, mu wuya ni raru wa nwina seno.
20Mu nga kanakani hi tinhunzu ta nwina, hakuva zontlhe lezi zi sasekileko za lomu tikweni ga Gipite, za nwina.
21A vana va Israeli va lo maha lezo; Josefa i lo va nyika tikareta hi kulaya ka Faro, i lo va longisela timbuva ta ndlela.
22I lo nyika ka munwe ni munwani a nguwo ya mubuzo, kanilezi ka Benjamini i lo mu nyika 300 wa maxekeli ya siliva, ni ntlhanu wa tinguwo ta mubuzo.
23A ka raru wakwe i lo rumela a khume ga timbongola, na ti rwele a zilo zo saseka za tiko ga Gipite, ni khume ga mapswele ya timbongola, na ti rwele mavele ni zibaba ni timbuva ta raru wakwe laha ndleleni.
24Zonake i lo tlhelisa vanakulobye va famba; yena aku kabye: Mu nga holovi laha ndleleni.
25Vona va suka le Gipite, va lo ya chikela tikweni ga Kanani, ka Jakobe a raru wabye.
26Zonake va lo ya mu byela ku ngalo: Josefa wa hanya; hi yena a nga hosi lomu tikweni gontlhe ga Gipite. Kanilezi a mbilu ya Jakobe yi lo mbhela ntamu, hakuva i wa nga kholwi ha vona.
27Va lo mu hlawutela timhaka tontlhe leti Josefa a nga va byelile. Makunu laha a nga wona tikareta leti Josefa a nga wa mu rumele ku ta mu teka ha tona, a moya wa Jakobe a raru wabye wu lo vuxiwa.
28Zonake Israeli aku: Ku enele! A nʼwana wa mina wa hanya; nzi taya nzi ya mu wona na nzi nga se kufa.
Currently Selected:
Genesisi 45: TSC72
Highlight
Share
Compare
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
